Unsay Buhaton sa Tigkat-on?

Isip usa ka magtutudlo sa EnglishConnect, kinahanglan nga imong masabtan kon unsay buhaton sa mga tigkat-on aron makatabang ka nila nga magmalamposon. Ang mga tigkat-on labing magmalamposon kon sila mokompleto sa mga kalihokan sa personal nga pagtuon, moapil diha sa panag-istoryahanay sa grupo, ug mopalambo og kinaiya sa pagpraktis og Iningles kada adlaw. Matag leksiyon sa EnglishConnect 1 alang sa mga Tigkat-on ug EnglishConnect 2 alang sa mga Tigkat-on gibahin ngadto sa duha ka seksiyon: “Personal Study” (Personal nga Pagtuon) ug “Conversation Group” (Panag-istoryahanay sa Grupo). Rebyoha ang “Pasiuna” diha sa mga manwal sa tigkat-on sa EnglishConnect aron matabangan ka nga makasabot sa kasinatian sa tigkat-on.

grapika nga nagpakita nga ang personal nga pagtuon ug panag-istoryahanay sa grupo usa ka balik-balik nga proseso

Pangitaa ang Pagtulon-an pinaagi sa Pagtuon ug pinaagi sa Hugot nga Pagtuo

Ang pundasyon sa kasinatian sa EnglishConnect mao ang pagtabang sa mga tigkat-on sa “[pagpangita] sa pagtulon-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Ang matag leksiyon sa EnglishConnect nakasentro sa usa ka baroganan sa pagkat-on. Mao kini ang espirituhanong mga baroganan nga makatabang nato nga mosalig sa Ginoo nga dugangan ang atong kapasidad sa pagkat-on ug sa pagtudlo. Ang mga baroganan sa pagkat-on makatabang nato nga makasabot sa atong tinuod nga potensiyal ug sa abilidad sa Manluluwas sa pagtabang nato. Ang mga baroganan sa pagkat-on nga atong tun-an ug gipakita diha sa kasinatian sa EnglishConnect naglakip sa:

Ikaw Anak sa Dios

Ako anak sa Dios nga may mahangtorong potensiyal ug katuyoan.

(Tan-awa sa Mga Taga-Roma 8:16–17; “Ang Pamilya: Usa ka Pamayahag ngadto sa Kalibotan.”)

Mopakita og Hugot nga Pagtuo diha ni Jesukristo

Si Jesukristo makatabang nako sa pagbuhat sa tanang butang kon ako mopakita og hugot nga pagtuo diha Kaniya.

(Tan-awa sa Mga Taga-Filipos 4:13; Ether 12:27; Moroni 7:33.)

Moangkon og Responsibilidad

Ako adunay gahom sa pagpili, ug ako ang responsable sa akong kaugalingong pagkat-on.

(Tan-awa sa 2 Nephi 2:14, 16; Doktrina ug mga Pakigsaad 58:27–28.)

Mohigugma ug Motudlo sa Usag Usa

Ako makakat-on gikan sa Balaang Espiritu samtang ako mohigugma, motudlo, ug magkat-on kauban ang ubang tawo.

(Tan-awa sa Juan 13:34–35; Juan 14:26–27; Doktrina ug mga Pakigsaad 84:106; 88:77, 122–23.)

Mopadayon sa Unahan

Pinaagi sa tabang sa Dios, ako makapadayon sa unahan bisan kon ako nag-atubang og mga babag.

(Tan-awa sa 2 Nephi 31:20; 32:9; Doktrina ug mga Pakigsaad 50:41–42.)

Makigtambag uban sa Ginoo

Mapalambo nako ang akong pagkat-on pinaagi sa pagpakigtambag uban sa Dios kada adlaw mahitungod sa akong mga paningkamot.

(Tan-awa sa Mga Panultihon 3:5–6; Mateo 7:7–8; Alma 37:37.)

Personal nga Pagtuon

Sa dili pa motambong sa panag-istoryahanay sa grupo, ang mga tigkat-on mokompleto sa seksiyon sa “Personal Study” (Personal nga Pagtuon) diha sa manwal sa tigkat-on. Dinhi niini nga seksiyon, ang mga tigkat-on magtuon og usa ka baroganan sa pagkat-on, magmemorya sa bokabularyo, ug magpraktis gamit ang sundanan nga kapahayag.

Ang pagmemorya sa bokabularyo ug pagpraktis sa sundanan mao ang mga kalihokan nga labing maayo nga buhaton diha sa personal nga pagtuon. Magtugot kini sa mga tigkat-on nga mahimong batid sa mga konsepto sa ilang kaugalingong gipaspason.

Panag-istoryahanay sa Grupo

Diha sa panag-istoryahanay sa grupo, ang mga tigkat-on mokompleto sa mga kalihokan sa “Conversation Group” (Panag-istoryahanay sa Grupo) diha sa manwal sa tigkat-on. Sa pagtrabaho diha sa ginagmay nga mga grupo o mga pares, ang mga tigkat-on maghisgot og usa ka baroganan sa pagkat-on, morebyo sa bokabularyo ug mga sundanan nga kapahayag, ug magpraktis sa pagpanag-istoryahanay. Ang matag kalihokan moandam sa mga tigkat-on alang sa sunod nga kalihokan. Inighuman sa matag panag-istoryahanay sa grupo, ang mga tigkat-on moebalwar sa ilang pag-uswag ug magtakda og mga tumong alang sa inadlaw nga pagpraktis.

Inadlaw nga Pagpraktis

Aron labing makakat-on sa Iningles, ang mga tigkat-on kinahanglan nga mopalambo og kinaiya sa pagpraktis kada adlaw. Aron makaestablisar niini nga kinaiya, ang mga tigkat-on kinahanglan nga mangita og mga paagi sa paglakip sa Iningles ngadto sa ilang inadlaw nga mga kalihokan. Pananglitan, kon maminaw sila og musika, maminaw sila sa Iningles. Ang mga tigkat-on mahimo usab nga adunay yano nga panag-istoryahanay gamit ang Iningles diha sa panimalay, sa trabahoan, o sa simbahan. (Tan-awa ang dugang nga mga ideya diha sa seksiyon sa “Mga Sugyot sa Pagtuon” diha sa mga manwal sa EnglishConnect sa tigkat-on.) Ang importante nga bahin sa inadlaw nga pagpraktis mao ang pagtabang sa mga tigkat-on nga makakita og mga paagi sa paggamit sa Iningles sa ilang normal nga buluhaton.

Isip kabahin sa ilang inadlaw nga pagpraktis, ang mga tigkat-on mahimong mokompleto sa katukma nga seksiyon diha sa “Personal Study” (Personal nga Pagtuon) diha sa manwal sa tigkat-on. Mahimo usab nilang kompletohon ang mga kalihokan sa leksiyon ug ang mga pagsusi sa online diha sa englishconnect.org/learner/resources ug diha sa EnglishConnect 1 Workbook ug EnglishConnect 2 Workbook.