Unsaon Nako sa Pagdumala sa usa ka Panag-istoryahanay sa Grupo?

Gamiton nimo ang EnglishConnect 1 alang sa mga Tigkat-on o ang EnglishConnect 2 alang sa mga Tigkat-on sa pagdumala sa grupo. Ang matag leksiyon nagsunod niining sama nga pamaagi:

Welcome: Mainitong moabiabi sa mga tigkat-on ug ipailaila ang bag-ong mga partisipante. Iestablisar ang gilaoman nga moistorya ka og Iningles ug dapiton ang tanan nga gamiton ang Iningles kutob sa mahimo. Ipailaila og kadali ang hilisgotan sa leksiyon.

Pag-ampo: Dapita ang usa ka tigkat-on sa pag-ampo og kusog. Sulayi ang pagpili sa usa ka tigkat-on nga mibati nga komportable sa pag-ampo gamit ang Iningles. Mahimo nimong dapiton ang tawo sa pagpangandam daan pinaagi sa pagtuon sa “Pag-ampo gamit ang Iningles” diha sa apendiks sa mga manwal sa tigkat-on.

Baroganan sa Pagkat-on: Basaha ug hisgoti ang baroganan sa pagkat-on nga makita diha sa seksiyon sa “Personal Study” (Personal nga Pagtuon) sa manwal sa tigkat-on. Ang tumong sa baroganan sa pagkat-on mao ang pagdapit sa Espiritu samtang dungan kamo nga magpakigbahin ug magkat-on “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118).

Ipakita kon unsaon sa paghisgot sa baroganan pinaagi sa pagpakigbahin og kadali kon unsaon nimo sa pagtubag ang usa sa mga pangutana sa panaghisgotan. Gamit og yano nga mga pulong ug hugpong sa mga pulong.

Dapita ang mga tigkat-on sa pagpakigbahin sa ilang mga hunahuna ug mga kasinatian sa usag usa. Ang mga tigkat-on mahimong maghisgot gamit ang ilang lumad nga mga pinulongan. Kon mobati sila nga komportable, ang mga tigkat-on makapili og mga pulong o mga hugpong sa mga pulong sa Iningles samtang maghisgot sila.

Kalihokan 1: Modumala sa mga tigkat-on pinaagi sa mga kalihokan diha sa seksiyon sa “Conversation Group” (Panag-istoryahanay sa Grupo) sa manwal sa tigkat-on. Ang matag kalihokan moandam sa mga tigkat-on alang sa sunod nga kalihokan. Ang mga kalihokan makatabang sa mga tigkat-on nga mouswag gikan sa balikbalik nga pagpraktis ngadto sa paghimo og ilang kaugalingong panag-istoryahanay.

Diha sa kalihokan 1, tabangi ang mga tigkat-on sa pagrebyo sa bokabularyo ug sa mga sundanan diha sa seksiyon sa “Personal nga Pagtuon” sa manwal sa tigkat-on. Ang tumong mao ang pag-andam sa mga tigkat-on alang sa mga kalihokan 2 ug 3 pinaagi sa pagtabang nila nga masabtan ang pipila ka mahinungdanong mga pulong ug sa pagsulti sa mga sundanan.

Kalihokan 2: Diha sa kalihokan 2, ang mga tigkat-on mogamit sa bokabularyo ug sa mga sundanan aron magpraktis sa pagpangutana ug sa pagtubag sa mga pangutana sa kapares gamit ang gihatag nga impormasyon. Ang tumong mao nga aron ang mga tigkat-on makahimo og daghang kapahayag nga Iningles kutob sa ilang mahimo.

Awhaga ang mga tigkat-on nga mag-ilis og mga kapares aron madugangan ang mga oportunidad sa pagpraktis. Sa imong pagpakighinabi sa mga tigkat-on, maningkamot sa pagpangita niadtong nagkinahanglan og dugang nga suporta. Magmaawhagon ug magmadasigon.

Kalihokan 3: Diha sa kalihokan 3, ang mga tigkat-on adunay oportunidad sa paggamit sa bokabularyo ug sa mga sundanan aron makabaton og kompleto nga panag-istoryahanay diha sa usa ka sitwasyon sa tinuod nga kinabuhi. Ang tumong mao nga aron ang mga tigkat-on makabaton og makahuloganon nga panag-istoryahanay gamit ang Iningles.

Awhaga ang mga tigkat-on nga mag-ilis og mga kapares kanunay aron mahatagan sila og daghang oportunidad sa pagpraktis. Sa kataposan sa kalihokan 3, kasagaran ang tanang tigkat-on moistorya og Iningles nga dili na motan-aw sa ilang mga manwal. Ang grupo kinahanglang abtik ug naglihok samtang ang mga tigkat-on manag-uban nga nakighinabi ug nagpraktis. Sa imong pag-apil uban sa mga tigkat-on, tingali imong mamatikdan nga ang uban nakasabot gayod ug maayo kaayo niini nga kalihokan. Ikonsiderar ang paghagit niini nga mga tigkat-on nga palawman pa ang ilang pagkat-on pinaagi sa paglakip og dugang pa nga mga detalye o sa paghimo sa mao gihapon nga kalihokan diha sa lahi nga konteksto. Pananglitan, kon ang mga tigkat-on magpraktis sa pakighimamat sa usa ka tawo, hangyoa sila sa pagpraktis sa lahi nga mga sitwasyon sama sa pakighimamat sa bag-ong higala o bag-ong boss.

Pag-ebalwar: Tabangi ang mga tigkat-on sa pag-ebalwar sa ilang pag-uswag ug mga paningkamot. Tabangi sila nga mobati nga malamposon pinaagi sa pagpasabot og maayo kon unsay ilang mahimo aron molambo. Tabangi ang mga tigkat-on sa paggamit sa “Personal Study Tracker” (Tracker sa Personal nga Pagtuon) sa pagtakda og mga tumong alang sa inadlaw nga pagpraktis.

Molihok inubanan sa Hugot nga Pagtuo sa Pagpraktis og Iningles Kada Adlaw: Basaha og kusog ang kinutlo uban sa imong grupo. Ipahayag ang imong hugot nga pagtuo nga ang Ginoo makatabang nila nga makakat-on og Iningles. Dapita sila sa pagpraktis og Iningles kada adlaw ug sa pagpangandam alang sa sunod nga leksiyon pinaagi sa pagkompleto sa mga kalihokan sa “Personal Study” (Personal nga Pagtuon) .

Pag-ampo: Dapita ang usa ka tigkat-on nga mohatag sa panapos nga pag-ampo gamit ang Iningles. Pilia ang tigkat-on nga mibati nga komportable o usa nga imong gidapit nang daan.

Ang mga leksiyon sa EnglishConnect gidesinyo gamit ang napamatud-an na nga mga baroganan sa pagkat-on sa pinulongan. Ikaw magmalamposon kon imong sundon ang mga leksiyon ug mag-ugmad og usa ka kahimtang nga adunay hugot nga pagtuo, pakigdait, ug paglambo.