Unsa ang Tahas sa Magtutudlo?

Ang imong tahas isip usa ka magtutudlo sa EnglishConnect mao ang pagtabang sa mga tigkat-on nga mapalambo ang ilang mga kahanas sa panag-istoryahanay og Iningles diha sa usa ka kahimtang nga adunay hugot nga pagtuo, pakigdait, ug paglambo. Ang Espiritu mao ang tinuod nga magtutudlo. Makatabang ka sa mga tigkat-on nga mobati sa Espiritu, mobati nga sila nahisakop, ug mobati og pagsalig nga pinaagi sa tabang sa Langitnong Amahan makakat-on sila og Iningles. Makatabang ka sa mga tigkat-on kon ikaw motutok sa mosunod:

Mopasiugda og Hugot nga Pagtuo

Awhaga ang mga tigkat-on ug ilha ang tabang sa Ginoo sa pagkat-on og Iningles. Awhaga sila nga mogamit sa mga baroganan sa pagkat-on “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi. Dapita sila sa pagpakigbahin og makapalig-on sa pagtuo nga mga kasinatian. Ipakigbahin ang imong mga kasinatian mahitungod sa pagdawat og tabang sa Ginoo. (Tan-awa ang seksiyon sa “Tabangi ang mga Estudyante sa Pagduol ngadto ni Jesukristo” gikan sa Pagtudlo Sumala sa Pamaagi sa Manluluwas [2022].)

Mopasiugda og Pakigdait

Dapita ang Espiritu pinaagi sa pagtabang sa mga tigkat-on sa paghigugma ug pagsuporta sa usag usa. Tabangi sila nga mobati sa gugma sa Dios. Pagmugna og maabiabihon nga kahimtang diin ang tanang tigkat-on mobati nga sila nahisakop. Ilailaha ang mga tigkat-on ug tabangi sila nga mailaila ang usag usa. Tabangi sila nga makaugmad og pagsalig samtang sila magpraktis, masayop, ug molambo og dungan. (Tan-awa ang seksiyon sa “Higugmaa Kadtong Inyong Gitudloan” gikan sa Pagtudlo Sumala sa Pamaagi sa Manluluwas [2022].)

Mopasiugda og Paglambo

Tabangi ang mga tigkat-on nga molihok pinaagi sa hugot nga pagtuo sa pagpraktis og Iningles ug molambo. Ang ubang mga tigkat-on tingali kulang og pagsalig sa ilang mga abilidad sa pagkat-on og Iningles. Makatabang ka. Kon moistorya ka og Iningles ngadto nila, imong ipakita ang imong hugot nga pagtuo nga ang Dios makatabang nila sa pagkat-on. Awhaga ang mga tigkat-on nga moistorya og Iningles. Dayga ang ilang mga paningkamot. Tabangi ang mga tigkat-on nga hinumdoman kon nganong nagkat-on sila og Iningles. Awhaga sila sa pagtakda og mga tumong ug sa pagpraktis og Iningles kada adlaw. (Tan-awa ang seksiyon sa “Pagdapit og Makugihon nga Pagkat-on” gikan sa Pagtudlo Sumala sa Pamaagi sa Manluluwas [2022].)

Akong Tahas

Ako mopasiugda og hugot nga pagtuo pinaagi sa pagtabang sa mga tigkat-on sa pagtinguha ug sa pag-ila sa tabang sa Ginoo sa pagkat-on og Iningles.
Ako mopasiugda og pakigdait ug modapit sa Espiritu pinaagi sa pagtabang sa mga tigkat-on sa paghigugma ug sa pagsuporta sa usag usa.
Ako mopasiugda og paglambo pinaagi sa pagtabang sa mga tigkat-on nga molihok diha sa hugot nga pagtuo sa pagpraktis og Iningles ug sa pagpalambo.