Hi’ora’a

Tē hina’aro nei te ’āpo’ora’a titi e fa’atupu i te mau pupu EnglishConnect o tā te mau melo nō te titi ’e nō te ’oire e nehenehe e ’āmui atu i te mau taime ato’a. Tē ti’aturi nei rātou e hōro’a te mau pupu EnglishConnect i te rāve’a i te mau melo o te ’Ēkālesia ’ia tāvini. Tē ti’aturi ato’a nei rātou e hōro’a teie mau pupu i te rāve’a i te mau melo o te ’oire ’ia ha’api’i hau atu nō ni’a ia Iesu Mesia ’e ’ia ’ite i te here ’o te mau melo o te ’Ēkālesia.

E mā’iti rātou i te hō’ē fare fātata roa a’e i te rahira’a o te mau ta’ata e haere mai. E fa’aoti rātou e putuputu te mau pupu i te pō mahana piti mai te hora 7 e tae atu i te hora 8 ’e te ’āfa. E pi’i rātou e maha ’orometua ha’api’i, e piti nō te EnglishConnect 1 ’e e piti nō te EnglishConnect 2. E ani rātou i te hō’ē o te mau ’orometua ha’api’i ’ia riro ’ei ti’a’au nō te tā’āto’ara’a o te fa’anahora’a ’e e hōro’a i terā ’orometua ha’api’i i te pi’ira’a o te ta’ata ’aravihi nō te pae o te ha’api’ira’a ’e nō te fa’arava’ira’a iāna iho i roto i te mau rāve’a tauturu a te feiā fa’atere ’e te mau pāpa’i parau. Nā roto i teie pi’ira’a, e nehenehe te ti’a’au e tāpa’o i te mau pupu i roto i te QuickReg.

I muri iho, e fa’atīaniani te ’āpo’ora’a titi i te mau pupu nā roto i te ’ōperera’a i te mau ’api fa’atīani i te fare purera’a, te piara’a i te reira i ni’a i te mau tahua itenati tōtiare, ’e nā roto i te anira’a i te mau misiōnare ’ia tītau-manihini i te mau ta’ata tā rātou e fārerei. ’Ei ta’ahira’a mātāmua, e ani te titi i te mau pīahi ’ia ’āmui i roto i te hō’ē pupu EnglishConnect 3 nō tō rātou fenua ’ia ineine rātou nō te ta’uma i ni’a i te EnglishConnect 2. I roto i te roara’a o te tau, ’ua nava’i te mau melo o te titi nō te pāturu i te hō’ē pupu EnglishConnect 3 i roto i te hō’ē ā fare purera’a e tāna mau pupu EnglishConnect 1 ’e te 2. Tē rave nei rātou i te ’ohipa i piha’i iho i tā rātou pupu BYU-Pathway Worldwide nō te pi’i i te mau misiōnare PathwayConnect nō te hi’opo’a i te pupu EnglishConnect 3.

Tē hina’aro nei te ’āpo’ora’a pāroisa e hōro’a i te rāve’a i te mau melo nō te pāroisa ’e nō te ’oire ’ia ha’api’i i te reo Peretāne. ’Ua tāmata a’ena rātou i te fa’anaho i te hō’ē pupu EnglishConnect, terā rā ’ua fifi te rahira’a o te mau pīahi i te ravera’a i te tā’āto’ara’a o te ’ohipa e 25 hepetoma te maoro. E fa’aoti rātou ’ia fa’atupu i te mau pupu e ’āmui e piti noa tuha’a.

E fa’anaho te feiā fa’atere e putuputu te mau pupu i te mau pō mahana piti ’e mahana pae mai te hora 7 ’e te ’āfa e tae atu i te hora 9 ’e te ’āfa. E pi’i rātou e maha ’orometua ha’api’i, e piti nō te EnglishConnect 1 ’e e piti nō te EnglishConnect 2. E tāpa’o rātou i te mau pupu i roto i te QuickReg ’e e fa’atīani i te mau pupu nā roto i te tu’ura’a i te hō’ē tāpa’o i rāpae’au i te fare purera’a. E nehenehe ato’a rātou e hāmani i te mau ’api fa’atīani tā te mau melo e nehenehe e ’ōpere i tō rātou mau hoa ’e ’aore rā e fa’a’ite i ni’a i te tahua itenati tōtiare.

I te hope’a ’āva’e, e tāpa’o te feiā fa’atere i te mau pupu i roto i te QuickReg ’e e hāmani rātou i te hō’ē fa’anahora’a nō te ’āmui i nā tuha’a ’āpī e piti i roto i te hō’ē tau poto i muri nei.

Tē hina’aro nei te hō’ē ’āpo’ora’a titi e tauturu i te feiā ’āpī ’ia fāna’o i te mau rāve’a nō te ha’api’ira’a ’e nō te ’ohipa i muri a’e i tō rātou fa’aotira’a i te fa’anahora’a a te feiā ’āpī ’e ’ia ho’i mai i te fare nā tā rātou misiōni. Tē ti’aturi ato’a nei te feiā fa’atere e tauturu te ha’api’ira’a i te reo Peretāne nā roto i te EnglishConnect i te feiā ’āpī ’ia ha’api’i nāhea ’ia ’āpiti atu i te Atua nō te fa’atupu i te mau ’ōpuara’a maita’i. ’Ua fa’aoti rātou e ha’amata i te mau pupu EnglishConnect nō te feiā ’āpī i roto i tā rātou titi.

Nō te ātea te fa’aeara’a o te feiā ’āpī te tahi i te tahi, ’ua fa’aoti te feiā fa’atere e ha’aputuputu i te mau pupu i ni’a i te mauha’a uira i te mau mahana piti ato’a mai te hora 8 e tae noa atu i te hora 9 i te pō. E pi’i rātou i te hō’ē misiōnare tei ho’i mai ’e te hō’ē feiā ’āpī tei ’ite ri’i i te reo Peretāne nō te ha’api’i i te pupu. E ha’apāpū te feiā fa’atere ē tē pe’e nei rātou i Te mau ture a te ’Ēkālesia nō ni’a i te pārurura’a i te feiā ’āpī. ’Ei hi’ora’a, e ha’apāpū rātou ē tē vai ra e piti ta’ata pa’ari tei fa’aoti i te ha’api’ipi’ira’a nō te pārurura’a i te feiā ’āpī i roto i te mau purera’a mauha’a uira ato’a ’e tē vai ra tā te feiā ’āpī tāta’itahi parau fa’ati’a a te metua.

’Ua ha’amau ato’a te mau rauti i te hō’ē pupu WhatsApp hi’opo’ahia e te hō’ē ’orometua ha’api’i ’e ’aore rā te hō’ē ta’ata fa’atere ’ia nehenehe i te feiā ’āpī ’ia ha’api’i i te reo Peretāne i te mau mahana ato’a. E tāhō’ē te pupu WhatsApp i te feiā ’āpī o tē ’ore e nehenehe e ’āmui i te mau rurura’a nō te mahana piti.

Tē ’ohipa nei te feiā fa’atere e tō rātou ti’a fa’atere nō te orara’a maita’i ’e nō te fa’arava’ira’a iāna iho nō te ha’amata i te hō’ē pupu EnglishConnect 3 feiā ’āpī i roto i tō rātou fenua nō te feiā e ’aravihi tō rātou nō te reo Peretāne i ’ō atu i te EnglishConnect 2.

’Ua hina’aro te feiā fa’atere o te misiōni e fa’a’ohipa i te EnglishConnect nō te fa’a’ite i te ’evanelia a Iesu Mesia. ’Ua ’ite rātou e tere maita’i te mau pupu EnglishConnect mai te mea e fa’anahohia rātou nā te mau melo ’e e pāturuhia nā te mau misiōnare. I roto i te ’āpo’ora’a e te mau peresideni titi i roto i te misiōni, e fa’aoti rātou e ha’amau te misiōni i te mau pupu EnglishConnect ’e e fa’aitoito rātou nō te hōro’a i te reira i roto i te mau titi.

E fa’aoti te mau misiōnare i te mau hora putuputura’a o te mau pupu e tano maita’i i tā rātou tābula ’ohipa porora’a ’e e fa’arahi atu ā rātou i te tomora’a nō te mau ta’ata o te ’oire. Noa atu e ha’amata te mau misiōnare ’ei mau ’orometua ha’api’i nō te EnglishConnect, e ’ohipa ato’a rātou e te feiā fa’atere o te autahu’ara’a nō te ’imi i te mau melo o te fenua iho nō te mono ia rātou, e nehenehe te tahi pae o rātou e mau pīahi tahito nō te EnglishConnect 1 ’e te 2. I te roara’a o te tau, e riro te mau misiōnare ’ei feiā turu. E tāmau te mau misiōnare i te pāturu i te mau pupu nā roto i te ’āmui-tāmau-ra’a, te tāpa’ora’a i te mau pīahi ’āpī ’e te fa’aitoitora’a i te mau pīahi ’ia ani i te tauturu a te Atua nō te ha’api’i i te reo Peretāne.