Te tahi atu mau arata’ira’a

Fa’aitoito i te fa’aro’o, te auhoara’a, ’e te tupura’a. ’A tauturu nō te ha’amau i te hō’ē vāhi i reira te mau pīahi e nehenehe ai e fa’arahi i tō rātou fa’aro’o, tō rātou ’ite nō te auhoara’a, ’e nō te fa’arahi i tō rātou mau ’aravihi. E nehenehe ’outou e nā reira nā roto i te pi’ira’a i te mau ’orometua ha’api’i, te hōro’ara’a i te mau vāhi, ’e te hi’o-māite-ra’a ē tē vai ra tā te mau pīahi ’e te mau ’orometua ha’api’i mau rāve’a tauturu e hina’arohia. E nehenehe ato’a ’outou e fa’anaho e te tahi atu mau ta’ata o tē nehenehe e tauturu i te mau pīahi, mai te mau misiōnare ’e te tahi atu mau pupu nō te fa’arava’ira’a iāna iho.

’A ruru e te feiā fa’atere o te Autahu’ara’a ’A ara maita’i e tei raro a’e tā ’outou fa’anahora’a i te ha’amanara’a ’e te hi’opo’ara’a a te feiā fa’atere o te autahu’ara’a. Te feiā fa’atere o te autahu’ara’a, o rātou ïa nō te fa’arava’ira’a iāna iho, te seminaire ’e te institut, ’e te mau tauto’ora’a misiōnare. ’A ruru e te feiā fa’atere o te Autahu’ara’a nō ni’a i te mau tumu parau i muri nei :

• Ha’amaura’a ’e te hi’opo’ara’a i te mau ’ōpuara’a ’e te mau manuïara’a (hi’o « EnglishConnect Supports God’s Work of Salvation and Exaltation »).

• Ha’amaita’ira’a i te mau nūmera o te fa’anahora’a.

• Pi’ira’a i te mau ’orometua ha’api’i ’āpī (hi’o « mau ’Orometua ha’api’i »).

• Ani-manihini-ra’a i te tahi atu mau pīahi ’ia ’āmui mai (hi’o « Te tītau-manihini-raa ’e te fa’a’ite-ra’a »).

• Fa’arahira’a i te tomora’a (hi’o « Vāhi ’e Pinepinera’a »).

• Anira’a i te mau pīahi ’ia ’imi i te tahi atu ā mau rāve’a tauturu a te ’Ēkālesia (hi’o « Tū’atira’a i te tahi atu mau Rāve’a tauturu a te ’Ēkālesia »).

’Āfa’i i te parau fa’a’ite i te feiā fa’atere o te autahu’ara’a. ’A fa’a’ite i te feiā fa’atere o te autahu’ara’a i te mau manuïara’a ’e te mau tītaura’a a te mau pupu o te EnglishConnect.

’A ha’apāpū i te ha’apa’ora’a i mua i te ture. ’A ha’apūpū ē ’ua ’āfaro te fa’anahora’a EnglishConnect i te mau arata’ira’a a te ture o te fenua iho e ’itehia i ni’a i te englishconnect.org/leader/approved-locations.

Fa’ata’ara’a : ’Ua pāruruhia te mau rāve’a tauturu EnglishConnect e te ture fatura’a ’e ’aita e tauihia ma te parau fa’ati’a ’ore.

’A fa’anaho ’ia fa’a’ohipa i te English Connect nō te fa’a’ite i te ’evanelia. E nehenehe te EnglishConnect e riro mai ’ei tuha’a faufa’a roa nō te ’ōpuara’a misiōni a te pāroisa. E nehenehe te mau pupu EnglishConnect e :

• Fa’arahi i te mau rāve’a ’imira’a ’e te ha’api’ira’a nō te mau misiōnare rave tāmau.

• Ha’apūai i te mau aura’a i rotopū i te mau melo, te mau hoa o te ’Ēkālesia, ’e te mau misiōnare.

• Tauturu i te mau melo i ho’i-fa’ahou mai ’e ’aore rā te mau ta’ata i ha’api’ihia e te mau misiōnare ’ia tomo mai i roto i te hō’ē pāroisa.

• Tauturu i te mau melo ’ia fa’a’ohipa i te mau parau tumu nō te here, te fa’a’itera’a, ’e te tītau-manihini-ra’a (hi’o Buka arata’i rahi, 23.1).

E tauturu maita’i a’e te mau tauto’ora’a a te mau melo turuhia ’e te mau misiōnare i te fa’atupura’a i teie mau hope’ara’a. ’Ia arata’i ana’e te mau melo i te mau pupu EnglishConnect, e mea ’ōhie a’e ïa nā te mau pīahi ’ia fa’ahoa i te mau melo ’e ’ia fa’a’ite i te mau ’itera’a nō te patu i te fa’aro’o. Tītauhia i te mau misiōnare, te feiā fa’atere misiōni, ’e te mau tōmite fa’arava’ira’a iāna iho ’ia ’ohipa ’āmui nō te fa’ariro i te mau pupu EnglishConnect ’ei vāhi i reira te fa’a’itera’a ’e te orara’a i te ’evanelia e riro ai ’ei vāhi ’ōhie ’e te marū.

’A ani i te mau misiōnare ’ia tauturu ia ’outou. I te mau vāhi e tē vai ra te mau pupu EnglishConnect i roto i te mau titi ’e ’aore rā te mau pāroisa, ’a ani i te mau misiōnare ’ia tauturu mai nā roto i te :

• ’Āmuira’a i roto i te mau pupu ’e te ha’api’ipi’ira’a i roto i te mau ’ohipara’a.

• Ha’api’ipi’ira’a e te mau pīahi i rotopū i te mau pupu ’āparaura’a.

• E ha’api’i i te mau ha’api’ira’a mai te mea e hina’arohia.

’A pi’i i te mau ’orometua ha’api’i. Nō te mea ē tē vai ra te mau tamari’i i roto i te ha’api’ira’a i te reo Peretāne, e tītauhia i te feiā fa’atere o te autahu’ara’a o te fenua iho ’ia uiui i te ’orometua ha’api’i tāta’itahi ’e ’ia hi’opo’a i te mau tāpa’opa’ora’a e vai ra i roto i tō rātou parau melora’a hou a rave ai i te hō’ē pi’ira’a. E tītauhia i te mau pupu tē vai ra te mau tamari’i ’ia vai e piti ta’ata pa’ari i reira ’e ’ia pe’e i te mau ture a te ’Ēkālesia nō ni’a i te pārurura’a i te feiā ’āpī. Tē fa’aitoitohia nei ’ia vai e piti ’orometua ha’api’i i roto i te mau pupu e ’ere i te feiā ’āpī, ’ia ti’a ia rāua ’ia ha’api’i ’ei pūpu ’e ’aore rā ’ia mono te tahi e te tahi ’ia ma’iri te hō’ē o rāua ’e ’aore rā ’ia ma’i-hia.

’A ha’api’i i te mau ’orometua ha’api’i. E nehenehe ’outou e ha’api’i i te mau ’orometua ha’api’i ma te fa’a’ohipa i te EnglishConnect nō te mau ’orometua ha’api’i ’e te mau rāve’a tauturu i roto i te englishconnect.org/teacher. E ti’a ato’a ia ’outou ’ia hōro’a te hō’ē buka ha’api’ira’a ’e te buka ’ohipara’a a te pīahi nā te mau ’orometua ha’api’i (hi’o « mau Mātēria »). E fa’aitoito-ato’a-hia i te mau ’orometua ha’api’i ’ia fārerei tāmau nō te ’āpo’o ’āmui, nō te fa’a’ite i te mau rāve’a maita’i a’e, nō te pāhono i te mau uira’a tāta’itahi, ’e nō te hi’o fa’ahou i te mau mātēria nō te ha’api’ipi’ira’a.

Tauturu i te mau pīahi ’ia riro mai ’ei mau ’orometua ha’api’i. E nehenehe te mau ’orometua ha’api’i e ’ite pāpū i te mau pīahi i roto i te pupu o tē nehenehe e fa’aineine ia rātou nō te ha’api’i i te hō’ē pupu a muri a’e. E tauturu te ha’api’ira’a i te mau pīahi ’ia tāmau i te tupu i te rahi ’e ’ia fa’arahi atu ā i te ’ite i roto i te fa’anahora’a.

Hōro’a i te mau mātēria nā te mau ’orometua ha’api’i. E ti’a i te mau pīahi ’ia fāna’o i te EnglishConnect 1 nō te mau Pīahi ’e ’aore rā EnglishConnect 2 nō te mau Pīahi i roto ānei i te Vaira’a Buka ’Evanelia uira ’e ’aore rā tei nene’ihia i roto i te fare ho’ora’a buka itenati a te ’Ēkālesia store.ChurchofJesusChrist.org. E roa’a ato’a te tahi atu mau rāve’a tauturu nō te ha’amaita’i i tā rātou ha’api’ira’a, mai te mau buka ’ohipara’a ’e te mau ’ohipara’a i ni’a i te itenati. Nō te hō’ē fa’ata’ara’a nō te mau rāve’a ato’a e vai ra nō te mau pīahi, ’a hi’o i te tuha’a « E aha tā te mau pīahi ’e tā te mau ’orometua mau mātēria nō te EnglishConnect ? » i roto i te tuha’a « Te mau uira’a ui pinepine-hia .»

Hōro’a i te mau mātēria nā te mau ’orometua ha’api’i. E ti’a i te mau ’orometua ha’api’i ’ia tuatāpapa i te EnglishConnect nō te mau ’orometua ha’api’i i roto i te Vaira’a Buka ’Evanelia e tae noa atu i te tahi atu mau rāve’a tauturu nō te ha’api’ipi’ira’a i ni’a englishconnect.org/teacher.

’A fa’aoti e pūpū ānei ’outou i te mau pupu ta’ata iho ’e ’aore rā nō te mauha’a uira. Tē fa’aitoitohia nei ’ia fa’atupu i te mau pupu ta’ata i roto i te mau fare a te ’Ēkālesia nō te hōro’a i te mau rāve’a nō te fa’ahoara’a. Mai te mea e fifi te feiā i ’āmui mai nō te tomo i roto i te mau fare a te ’Ēkālesia, ’a fa’anaho i te mau pupu i ni’a i te itenati. E nehenehe te « Guide to Leading Virtual Groups » ’e « Virtual Group Participant Guide » e tauturu i te feiā fa’atere, te mau ’orometua ha’api’i, ’e te mau pīahi ’ia ha’amau i te hō’ē vāhi ha’api’ira’a fa’auruhia i ni’a i te itenati. E ’itehia te mau fa’anahora’a o te mau ha’api’ira’a i ni’a i te englishconnect.org/resources/teaching-materials.

’A fa’aoti e hia taime te mau pupu e fārerei ai. E putuputu te rahira’a o te mau pupu hō’ē ’e ’aore rā e piti taime i te hepetoma, terā rā, ’ua pāpa’ihia te mau ha’api’ira’a ’ia nehenehe i te mau pupu ’ia fārerei pinepine a’e ’ia hina’aro rātou. ’A ha’amana’o e hina’aro te mau pīahi i te taime nō te fa’a’ī i te mau ’ohipara’a nō te tuatāpapara’a tāta’itahi nā mua a’e i te ha’api’ira’a tāta’itahi.

’A fa’aoti e ’ā fea ’e e hia taime te mau pupu e fārerei ai. ’A mā’iti i te mahana ’e te hora tano roa a’e nō te mau pīahi ’e te mau ’orometua ha’api’i. E putuputu te rahira’a o te mau pupu i te hō’ē roara’a e iva ’ahuru minūti, e nehenehe rā te mau pupu e putuputu nō te hō’ē taime ’ē atu ’ia hina’aro rātou.

’A fa’aoti te maorora’a o te mau pupu ’e ’o vai te mau pupu tā rātou e ha’api’i atu. E rave rahi pupu e tāmau noa nei, te aura’a ra, e ha’amata rātou nā ni’a i te ha’api’ira’a 1 ’ia hope tā rātou buka ha’api’ira’a. E haere te tahi mau pupu i roto i te buka ha’api’ira’a hō’ē noa taime ’e ’aore rā e fa’a’ohipa noa rātou i te hō’ē o te mau tuha’a i roto i te buka ha’api’ira’a.

’A ha’amau ’e ’a fa’anaho i te mau pupu i roto i te QuickReg. E mauha’a fa’ati’ahia te QuickReg e te ’Ēkālesia nō te fa’atere i te mau pupu fa’arava’ira’a iāna iho. ’A ha’amau i te mau pupu i roto i te QuickReg nā roto i te haerera’a i ni’a i te quickreg.englishconnect.org. Muri iho ’a tāmau i te fa’a’ohipa i te QuickReg nō te :

• Fa’atīani i te mau pupu.

• Taui i te tai’o mahana, te hora, ’e te vāhi o te mau pupu.

• Nene’i i te mau parau ha’apāpū a te mau ti’a rautī.

• Taui i te ti’ara’a o te pīahi.

• ’A ha’amau i te mau pupu.

’A hi’o i te fa’anahora’a QuickReg i ni’a ia englishconnect.org/leader nō te ha’api’ipi’ira’a.

Fa’ata’ara’a : Nō te fa’a’ohipa i te QuickReg, tītauhia i te hō’ē melo (1) ’ia mau i te hō’ē pi’ira’a i roto i te ’Ēkālesia ’e (2) ’ia tāpa’ohia tō rātou pi’ira’a i roto i te mau rāve’a a te feiā fa’atere ’e a te mau pāpa’i parau.

’A nene’i ’e ’a hōro’a i te mau parau ha’apāpūra’a i roto i te QuickReg. E nehenehe te mau ’orometua ha’api’i ’e te mau tahu’a nō te fa’arava’ira’a iāna iho e nene’i ’e e hōro’a i te mau parau ha’apāpūra’a nō te ’āmuira’a i te mau pīahi i tāpa’ohia i roto i te QuickReg.

’A fa’a’ohipa i te mau mātēria fa’atīani. E roa’a te mau mātēria fa’atīaniani i ni’a i te fare ho’ora’a buka itenati a te ’Ēkālesia i te store.ChurchofJesusChrist.org ’e i te englishconnect.org/resources/leader#publicity.

Tītau-manihini i te mau pīahi. E nehenehe ’outou e fa’a’ohipa i te mau rāve’a ha’apararera’a mātarohia nō te fa’atīani i te mau pupu o te EnglishConnect, mai te mau tuahine ’e te mau taea’e utuutu, te mau misiōnare, te mau rata a te pāroisa, te mau ’api parau fa’atīani, ’e tē vai atu ra. Mai te mea e fa’ati’ahia ’e e ’aufauhia e te mau pupu o te fenua iho, e nehenehe ato’a te mau pupu e fa’atae i te mau parau fa’atīani i ni’a i te rāve’a ha’apararera’a sōtiare ’e ’aore rā i ni’a i te tahua itenati a te pāroisa ’aore rā a te titi o te fenua iho. Hou a fa’a’ohipa ai i te hō’ē o teie mau rāve’a fa’atīanianira’a, ’a hi’o i te mau arata’ira’a a te ture o te fenua iho i te englishconnect.org/leader/approved-locations.

’A fa’ari’i poupou i te mau pīahi. ’A ha’amau i te hō’ē fa’anahora’a e nāhea ’outou ’ia fa’ari’i poupou i te mau pīahi o tē tāpa’o i roto i te pupu.

Te mau hoa nō te tahi atu mau ha’apa’ora’a fa’aro’o Tē fa’aitoito atu nei mātou ia ’outou ’ia fa’aō ato’a mai i te mau ta’ata nō te tahi atu mau ha’apa’ora’a fa’aro’o. ’A fa’a’ite noa i te fa’atura nō te mau ti’aturira’a o vetahi ’ē ma te fa’a’ite hua i tō ’outou fa’aro’o ’e e nehenehe te Atua e tauturu i te mau melo o te piha ha’api’ira’a ’ia ha’api’i i te reo Peretāne.

’A feruri ’ia tītau-manihini i te feiā ’āpī. E nehenehe ’outou e fa’anaho i te mau pupu nō te feiā ’āpī noa, ’e ’aore rā e nehenehe ’outou e ani i te feiā ’āpī ’ia ’āmui mai e te feiā pa’ari. I roto i te EnglishConnect, tē ha’api’i nei te u’i ’āpī nāhea ’ia fa’ari’i i te tauturu a te Atua nō te ha’api’i mai i te reo Peretāne. E nehenehe teie mau ha’api’ira’a e tauturu ia rātou ’ia ti’aturi e tauturu te Atua ia rātou i roto i te mau tuha’a ato’a o tō rātou orara’a.

’A pe’e i te mau ture a te ’Ēkālesia nō ni’a i te pārurura’a i te feiā ’āpī. Tītauhia i te mau tamari’i (18 a’e matahiti ’e e ora ra i te fare) ’ia fa’ari’i i te parau fa’ati’a tā-rima-hia a te mau metua hou a fa’aō ai i roto i te pupu. E roa’a te mau ’api parau i roto e rave rahi reo i ni’a ia englishconnect.org/resources/leader. Ta’a ’ē noa atu te reira, e ti’a i te mau pupu English Connect ’ia ha’apa’o tāmau i te ture a te ’Ēkālesia ē, e ti’a i nā ta’ata pa’ari e piti a’e ’ia tae mai i te mau taime ato’a i roto i te mau ’āpo’ora’a pupu. E ti’a i teie mau ture ’ia pe’ehia noa atu ē tē ruru ra te pupu i ni’a i te mauha’a uira.

Ha’api’i i te mau pīahi i ni’a i te fa’anahora’a ha’api’ira’a ’e tōro’a ’ohipa o te EnglishConnect ’e BYU–Pathway Worldwide. Tē hōro’a nei te EnglishConnect ’e BYU–Pathway Worldwide i te rāve’a i te mau pīahi ’ia ha’api’i mai i te mau ’ite ’āpī i roto i te hō’ē orara’a auhoara’a ’e te fa’aro’o. E nehenehe ’outou e ’ite i te mau rāve’a tauturu i ni’a i te byupathway.org/englishconnect.

’A tauturu i te mau pīahi ’ia tāpa’o ia rātou i roto i te EnglishConnect 3. Hi’o i te tuha’a « Connecting Learners to EnglishConnect 3 Groups. »

’A fārerei i te mau misiōnare tāvini nō BYU–Pathway Worldwide o te fenua iho. ’A ’āparau i te mau rāve’a nō te tauturu i te mau pīahi a taui ai rātou i tā rātou fa’anahora’a EnglishConnect 3 ia BYU–Pathway Worldwide.

Tū’ati e te tahi atu mau rāve’a tauturu a te ’Ēkālesia. ’A fa’anaho nō te fa’atū’ati i te mau pīahi i te tahi atu mau rāve’a a te ’Ēkālesia, mai te tahi atu mau pupu fa’arava’ira’a iāna iho, te mau ’ātivite a te feiā ’āpī, ’e te mau rāve’a nō te ha’api’i rahi atu ā nō ni’a i te ’evanelia a Iesu Mesia. ’A hi’o i te ’api « Emotional, Educational, and Employment Resources » i ni’a ia ChurchofJesusChrist.org nō te tahi atu ha’amāramaramara’a.