Doktrina e Besëlidhje 59

Plaku Leri Y. Uilson, i Të Shtatëdhjetëve, tregoi përvojën vijuese:

10:17

“Vajza jonë Meri, ndërsa rritej, ishte një lojtare e famshme futbolli. Një vit ekipi i saj doli në finale dhe, siç pritej, ajo lojë do të zhvillohej në një të diel. Si adoleshente, Meri kishte vite që mësonte se Shabati ishte një ditë pushimi dhe përtëritjeje shpirtërore, jo argëtimi. Por ajo ende ndjeu presionin për të luajtur prej trajnerëve dhe shoqeve të saj të ekipit, si dhe një dëshirë për të mos e lënë në baltë ekipin e saj.” (Leri Y. Uilson, “Vetëm mbi Parimet e Drejtësisë”, Liahona, maj 2012, f. 104)

• Përse disa njerëz mund ta shohin këtë si një vendim të rëndësishëm në jetën e Merit ndërkohë që të tjerët jo?

• Po të ishe Meri, çfarë mendon se do të ishte e rëndësishme për t’u marrë parasysh para se ta marrësh këtë vendim?

Mendo për një çast rreth vendimeve që merr për ditën e Shabatit. Çfarë bën zakonisht për t’i udhërrëfyer zgjedhjet e tua? Ndërsa studion sot, kërko frymëzim nga Fryma e Shenjtë për të të ndihmuar ta dish se përse ta mbash të shenjtë Shabatin dhe se si mund ta bësh atë.

Megjithëse shëndeti i saj po keqësohej në moshën 55 vjeç, Poli Najti u largua nga shtëpia e saj në Kolsvill në Nju-Jork, e vendosur për t’iu bindur Zotit dhe për të ardhur në Sion. Poli ia doli mbanë të mbërrinte në Sion (konteja e Xheksonit në Misuri) dhe vdiq pak ditë më pas. Në ditën e funeralit të saj, një e diel, Profeti Jozef Smith mori zbulesën e shënuar te Doktrina e Besëlidhje 59. Në këtë zbulesë, Zoti dha mësim të vërteta që mund ta ngushëllonin familjen e Polit (shih vargjet 1–2). Ai foli gjithashtu për urdhërimet e Tij, duke e vënë theksin te Shabati. Zoti premtoi bekime të mëdha për ata që e mbajnë të shenjtë ditën e Shabatit.

Lexo te Doktrina e Besëlidhje 59:9–20 dhe bëj dy lista, një të udhëzimeve që jep Zoti për veprimet dhe qëndrimet tona në Shabat dhe një tjetër të bekimeve që na ofron Ai.

• Çfarë të vërtetash mund të përcaktojmë nga këto vargje rreth qëllimit të Shabatit?

  Ftojini nxënësit ta tregojnë çdo të vërtetë që zbuluan. Mund t’u kërkoni nxënësve të diskutojnë përse mendojnë se të vërtetat që përcaktuan janë të rëndësishme. Së bashku me të vërtetat e tjera që tregojnë nxënësit, ndihmojini pjesëtarët e klasës të përcaktojnë dhe diskutojnë se Shabati është një ditë për ne për të treguar përkushtimin tonë ndaj Perëndisë (shihni vargun 10).

• Si mund të të ndihmojë në jetën tënde të pasurit e një dite për t’u përqendruar në dashurinë dhe përkushtimin ndaj Perëndisë?

Gjatë intervistave të rekomandimit të tempullit, do të pyetesh:

“A përpiqeni fort ta mbani të shenjtë ditën e Shabatit, si në shtëpi edhe në Kishë; të merrni pjesë në mbledhjet tuaja; të përgatiteni për sakramentin dhe ta merrni me denjësi atë; dhe ta jetoni jetën tuaj në harmoni me ligjet dhe urdhërimet e ungjillit?”

Për të të ndihmuar të mendosh rreth mënyrës se si mund t’i bindesh urdhërimit për ta mbajtur të shenjtë ditën e Shabatit, shkruaj në ditarin tënd të studimit ide rreth mënyrës se si mund ta nderosh Zotin duke e mbajtur të shenjtë ditën e Shabatit.

Lexoji shkrimet e shenjta në vijim për të zbuluar se çfarë bëri Jezu Krishti në Shabat:

• Mateu 12:9–13

• Lluka 4:16

Studioji disa nga burimet vijuese për ide shtesë mbi mbajtjen të shenjtë të ditës së Shabatit:

• “Duajeni Perëndinë, duajeni të afërmin tuaj” te Për Forcën e Rinisë: Një Udhëzues për Bërjen e Zgjedhjeve ([2022], f. 10–14)

• Topics and Questions, “Sabbath Day” dhe “Sacrament”, topics.ChurchofJesusChrist.org

  Mund të merrni parasysh gjithashtu të shfaqni “Upon My Holy Day – Honoring the Sabbath” [“Në Ditën Time të Shenjtë – Nderimi i Shabatit”] (1:30) për të gjetur këshillë shtesë nga Plaku Xhefri R. Holland.

  Artikujt vijues nga faqja ChurchofJesusChrist.org mund të jenë gjithashtu burime të dobishme për t’u dhënë: “Goal: Honor and Enjoy the Sabbath Day” [“Synimi: Nderoni dhe Shijoni Ditën e Shabatit”] dhe “Prepare for the Sacrament All Week Long” [“Përgatituni për Sakramentin Gjatë Gjithë Javës”].

  Pasi nxënësit të kenë pasur kohë të mjaftueshme për të studiuar, merreni parasysh t’i ftoni ata ta tregojnë atë që mësuan. Mund t’i vini ata t’i shkruajnë në tabelë disa nga gjetjet e tyre. Merreni parasysh të bëni edhe pyetjet vijuese për t’i ndihmuar nxënësit t’i tregojnë përvojat e tyre.

• Çfarë të ka ndihmuar të tregosh përkushtim ndaj Perëndisë në Shabat? Çfarë ndryshimi kanë sjellë për ty këto sjellje?

Nxënësit mund të jenë të interesuar të mësojnë më shumë nga përvoja e Merit e paraqitur në fillim të mësimit. Mund t’u jepni nxënësve pjesën e mbetur të historisë duke shfaqur materialin filmik “Only upon the Principles of Righteousness” [“Vetëm mbi Parimet e Drejtësisë”] nga kodi kohor 5:24 deri në 6:26, në dispozicion në ChurchofJesusChrist.org.

10:17

Bëj një plan në ditarin tënd të studimit rreth mënyrës se si do të përpiqesh fort ta nderosh Shpëtimtarin në ditën e Shabatit. Ti mund të përcaktosh ide të asaj që do të fillosh të bësh, vazhdosh të bësh ose ndalosh së bëri, qoftë në shtëpi ose në kishë.