Doktrina e Besëlidhje 46:7–33, Pjesa 1

Bekimet dhe aftësitë që na jep Perëndia nëpërmjet Frymës së Shenjtë quhen dhunti shpirtërore.

• Çfarë di rreth dhuntive shpirtërore dhe qëllimit të tyre?

Të kthyerit e hershëm në besim në Kishën në Kirtland qenë të emocionuar nga premtimi që mund të merrnin dhunti shpirtërore. Sidoqoftë, disa e keqkuptuan mënyrën se si dhuntitë manifestoheshin.

“Disa nga shenjtorët në Kirtland i çuan bindjet e tyre në ekstreme të papërmbajtshme, duke e tepruar me ato që kujtonin se ishin dhuntitë e Shpirtit. Disa njerëz pretendonin se kishin parë vegime që nuk mund t’i shpjegonin. Të tjerë besonin se Fryma e Shenjtë i bënte ata të rrëshqitnin ose të zhvendoseshin ndenjur nëpër tokë. Një burrë hidhej nga dhoma në dhomë ose lëkundej nga trarët e tavanit sa herë që mendonte se ndiente Shpirtin. Një tjetër sillej si një babuin.

Duke e parë këtë sjellje, disa të kthyer në besim u shkurajuan dhe hoqën dorë nga kisha e re.” (Saints [Shenjtorët], 1:112)

• Cilat janë disa pyetje ose keqkuptime që njerëzit mund të kenë rreth dhuntive të Shpirtit në kohën tonë?

Profeti Jozef Smith kërkoi udhërrëfim qiellor rreth mënyrës se si t’i ndihmonte shenjtorët në Kirtland. Si pjesë e zbulesës që mori Profeti, Zoti dha mësim parime që do t’i ndihmonin shenjtorët të shmangnin rënien pre të mashtrimit dhe që do t’i ndihmonin ata për t’i kuptuar dhuntitë e vërteta të Shpirtit.

Lexo te Doktrina e Besëlidhje 46:7–8, duke kërkuar paralajmërimin që Zoti ua dha shenjtorëve.

• Çfarë dha mësim Zoti në këto vargje rreth mënyrës se si mund ta shmangim rënien pre të mashtrimit?

Lexo te Doktrina e Besëlidhje 46:9–12, 26. Kërko përgjigje për pyetjet vijuese:

• Kujt i jepen dhunti shpirtërore?

• Pse Ati Qiellor u jep dhunti shpirtërore fëmijëve të Tij?

  Paraqitini dy pyetjet e mëparshme që nxënësit t’iu referohen ndërsa studiojnë. Ata mund të studiojnë në mënyrë të pavarur ose në grupe të vogla. Pasi nxënësit të kenë pasur kohë të mjaftueshme për të studiuar, ftojini ata t’i diskutojnë përgjigjet e tyre për pyetjet.

  Si pjesë e diskutimit tuaj, ndihmojini nxënësit të përcaktojnë të vërtetën vijuese: Ati Qiellor i bekon fëmijët e Tij me dhunti shpirtërore në mënyrë që gjithkush të mund të ketë dobi.

• Si mund të na ndihmojë njohuria për qëllimin e dhuntive shpirtërore që t’i dallojmë ato në jetën tonë?

• Të dinë mënyrat e ndryshme të administrimit (vargu 15): Kjo dhunti mund t’i ndihmojë udhëheqësit t’i dallojnë dhuntitë shpirtërore të të tjerëve dhe mënyrën si mund të jenë të dobishme në pozicionet e ndryshme të shërbimit.

• Të dinë larmitë e veprimeve (vargu 16): Kjo dhunti i ndihmon individët të përcaktojnë a vjen një mësim ose ndikim nga Perëndia ose nga ndonjë burim tjetër.

• Dhuntia e profecisë (vargu 22): “Dëshmia e Jezusit është frymë e profecisë” (Zbulesa 19:10). Zbulesa vetjake është burimi i dëshmisë dhe dëshmia i mundëson një personi të profetizojë ose dëshmojë për punën e Perëndisë.

• Dallimi i shpirtrave (vargu 23): Kjo dhunti e lejon një njeri të dallojë ose të kuptojë qëllimet e vërteta dhe synimet e fshehura të të tjerëve. Kjo dhunti e ndihmon një njeri që të diktojë ligësi të fshehura dhe të shohë mirësinë tek të tjerët.

• Çfarë mësove rreth mënyrës se si Ati Qiellor i bekon fëmijët e Tij nëpërmjet dhuntive të Shpirtit?

  Shpjegoni që nxënësit mund ta dallojnë që Ati Qiellor i bekon ata me dhunti shpirtërore përtej atyre që renditen në shkrimet e shenjta. Për shembull, nëpërmjet Frymës së Shenjtë, Ai mund t’i bekojë ata me durim në një situatë stresuese, me aftësinë për ta falur dikë që i ka fyer, me guxim në një kohë nevoje, ose me një dëshirë më të madhe për t’i shërbyer dikujt. Merreni parasysh t’i ftoni nxënësit të mendojnë për dhunti të tjera shpirtërore që i kemi në dispozicion, dhe mënyrën se si ato janë një manifestim i dashurisë së Perëndisë. Mund t’i renditni disa nga këto në tabelë.

• Cilat janë disa dhunti shpirtërore me të cilat Ati Qiellor të ka bekuar?

• Si të ka bekuar Ai nëpërmjet dhuntive shpirtërore të të tjerëve?

• Si ka ndikuar përvoja jote me dhuntitë shpirtërore te marrëdhënia jote me Atin Qiellor?