Nahum; Habakkuk; Zepanaia

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko ej elmakote etale Nahum1 kōn eoon ko me ej kōmeļeļeik bōnjen ko an Irooj. Kwomaron̄ kajjitōk ippān ro uwaan kūlaaj eo a eo rekar ekkatak kōn Irooj jān ekkatak eo aer make. N̄an waanjon̄ak, ta eo jej ekkatak kōn E jān eoon 1–9? Kwomaron̄ kalikkare bwe Nahum ekar kanaan kōn ekajet ko an Irooj ņae Nineveh, kapitieļ eo an Assyria, im bwe Assyria ekar kaen̄ataan armej in Israel ro ium̧win elōn̄ iiō ko. Etke ekar aorōk n̄an armej in Israel ro n̄an ron̄jake ennaan eo an Nahum kōn Anij? Etke ej aorōk n̄an kōj rainin?

  

• Emaron̄ in jipan̄ n̄an ro uwaan kūlaaj eo n̄an jeļā bwe, āinwōt elōn̄ iaad, Habakkuk ekar inepata kōn ta eo ekar loe ilo laļ eo ipeļaakin. Bōlen ro uwaan kūlaaj eo remaron̄ riiti Habakkuk 1:1–4 im ba ilo tukadu in n̄ūrbōktak eo an Habakkuk. Remaron̄ barāinwōt keidi kajjitōk ko an ippān ro jet ilo jeje ko rekwojarjar, ko āinwōt ko kar loi ilo Mark 4:37–38 im Katak im Bujen Ko 121:1–6. Ta kajjitōk ko reier wōt juon armej rej kajjitōk kaki kōn Anij rainin? Ta kapilōk eo Irooj ekar letok ilo Habakkuk 2:1–4 me ejipan̄ eok lōke ankilan Irooj im iien eo An? (lale barāinwōt Mark 4:39–40; Katak im Bujen Ko 121:7–8). Ro uwaan kūlaaj eo remaron̄ lo kōļmenļo̧kjeņ ko jet rejipan̄ ilo “Kein Jipan̄ ko Jet.” Remaron̄ barāinwōt kwaļo̧k ekōjkan an Rilo̧mo̧o̧r eo kar jipan̄ er “mour kōn tōmak eo [aer]” jekdo̧o̧n n̄e ekar wōr aer kajjitōk ko rekar jab uwaak.

• N̄an jino ekōnono kōn Habakkuk 3, kwomaron̄ kajjitōk ippān ro uwaan kūlaaj eo n̄an etale jebta eo im kwaļo̧k en̄jake ko kōn nōbar im tōmak eo rej loe. N̄an jiapn̄ er kōjerbal naan kein n̄an er make, kwomaron̄ kajjitōk ippān kajjojo ro uwaan kūlaaj eo n̄an je juon laajrak in kōjeraam̧m̧an ko Anij ekar lelo̧k n̄an e. Kajjitōk ippāer n̄an kejōkļo̧kjeņ kōn ta eo enaaj waļo̧k eļan̄n̄e rej jerwane jet iaan kōjeraam̧m̧an ko ilo kanniōk. Riiti ippān doon Habakkuk 3:17–19, im ekōnono kōn etke emaron̄ in pen n̄an “lan̄lōn̄ ilo Jeova” (eoon18) ilo apan̄ ko āinwōt ko kar kōmeļeļeik ilo eoon17. Ekōjkan ad maron̄ kōļapļo̧k tōmak āinwōt eo an Habakkuk?

• N̄an jipan̄ ro uwaan kūlaaj eo lo kōjatdikdik eo n̄an ilju im jekļaj ilo Zepanaia 3:14–20, kwomaron̄ je ioon boot eo “Kwōn ṃōṇōṇō im laņlōņ kōn aolepen būruoṃ” kōnke… Innām ro uwaan kūlaaj eo remaron̄ etale eoon kein kōn kōjeraam̧m̧an ko kar kallim̧ur kaki n̄an ilju im jekļaj eo me emaron̄ in jipan̄ er lan̄lōn̄ rainin. Ekōjkan an kallim̧ur kein jipan̄ kōj ilo iien reppen?

Elder JeffreyR. Holland ekar ba:

“Ewi aitokin ad kōttar n̄an jipan̄ jān men ko reppen me rej itok iood tok? Ak kōn en̄taan kōn māllijon̄ ko an juon make ejjeļo̧k jem̧ļo̧kier ilo ad kōttar im kōttar, im jipan̄ āinwōt erūm̧wij ilo an itok? Etke jej karūm̧ūjļo̧k n̄e eddo ko relukkuun eddo jān ad maron̄i?…

“…enaaj wōr iien ko ilo mour ko ad n̄e kijejeto im ikdeelel eo ad em̧m̧antata, akweļap ilo jar ko ejjab dāpij ad anjo̧ ioon men ko jekōņaan, men̄e ej ilo jorrāān im ijorrāān ko reļļap an aolepān laļ in ak ko reddik an juon make. Aaet ilo ad jerbal im kōttar ippān doon n̄an uwaak ko n̄an jet iaan jar ko ad, ij lewaj n̄an kom̧ juon kallim̧ur āinwōt juon rijilōk bwe em̧ōj ron̄ jar ko im em̧ōj uwaaki, bōtaab bōlen ejjab ilo iien eo ak ilo wāween eo jekōņaan. Bōtaab rej aolep iien uwaak ilo iien eo im ilo wāween eutiejtata im eļap obrak kōn iakwe ejjeļo̧k jem̧ļo̧kin juon jinen im jemān ej aikuj uwaaki.…

“…tōmak ej meļeļein lōke Anij ilo iien ko rem̧m̧an im ko renana, men̄e menin ekitbuuj jet en̄taan m̧ae jenaaj lo an kwaļo̧k Pein” (“Kōttar wōt Irooj,” Liaona, Nob. 2020, 115–16).