Haggeai; Zekaraia 1–3; 7–14

• Ko̧o̧njeļ eo ilo Haggeai1 emaron̄ jipan̄ ro uwaan kūlaaj eo ļōmņak kōn kōttōpar ko aer raorōk tata. Kwomaron̄ kajjitōk ippāer n̄an riiti Haggeai 1:1–7 im kwaļo̧k ekōjkan an armej ro ilo Jerusalem kar likjab in kōllaajrake ta eo Irooj ekar kōņaan bwe ren kōm̧m̧ane. Ta jet iaan men ko Irooj ekar kajjitōk ippād n̄an kōm̧m̧ane men ko aorōk tata ilo mour ko ad? Ta eo emaron̄ kapo kōj jān pedped ioon Jemedwōj Ilan̄ im Rilo̧mo̧o̧r eo im kōttōpar ko Aer? Bōlen ro uwaan kūlaaj eo maron̄ kwaļo̧k en̄jake ko me raar jipan̄ er “ļōmņak kōn wāween ko [aer]” im kōttōpar ko aer.

• N̄an jipan̄ ro uwaan kūlaaj eo ļōmņak kōn ekōjkan aer maron̄ ļapļo̧k wōt aer pedped ioon kōttōpar ko an Irooj, kwomaron̄ kajjitōk ippāer n̄an etale Haggeai 2:1–9. Ta ko̧o̧njeļ eo Irooj ekar letok me emaron̄ jipan̄ kōj kōm̧m̧ane jerbal eo An? Ro uwaan kūlaaj eo remaron̄ kwaļo̧k ekōjkan aer maron̄ in likūt kōttōpar ko an Irooj m̧oktata ilo mour ko aer ilo aer kōm̧m̧ane eddo ko jet aer rellōn̄ raorōk. Ta eo Haggeai 2:1–9 ej katakin kōj ekōjkan an Irooj kōjeraam̧m̧an kōj n̄e jej likūt E m̧oktata ilo mour ko ad? (lale barāinwōt “Kein Jipan̄ ko Jet”). Leļo̧k n̄an ro uwaan kūlaaj eo iien n̄an je ta eo rej en̄jake im̧we n̄an kōm̧m̧ane kōnke kōn ekōnono in.

• N̄an jino juon iien ekōnono kōn kwojarjar, kwomaron̄ riiti ippān doon Zekaraia 14:20–21. Ro uwaan kūlaaj eo remaron̄ kwaļo̧k ta eo eoon eo “Kwōjarjar n̄an Jeova” meļeļe in n̄an er. Ta kareel eo emaron̄ in wōr ioon armej ro eļan̄n̄e raar lo eoon eo “Kwōjarjar n̄an Jeova” kar je ilo men ko aolep raan? Ekōjkan an eoon in jelet kōj n̄e jej loe ioon tampeļ ko rainin? Innām ro uwaan kūlaaj eo remaron̄ riiti Zekaraia 1:1–6; 3:1–7; 7:8–10; 8:16–17 im ekōnono kōn ta eo rej ekkatak kōn ta meļeļe in n̄an erom kwojarjar. Etke kwojarjar eo ad make ej aorōk n̄an Irooj? Ekōjkan An jipan̄ kōj erom kwojarjar?

• Ro uwaan kūlaaj eo remaron̄ etale Zekaraia 2:10–11; 8:1–8; 14:9–11, 20–21 im kwaļo̧k im̧weo ko aer kōn ta eo enaaj kar āinwōt n̄an mour ippān Rilo̧mo̧o̧r eo ilo juon jekjek ekwojarjar. Ekōjkan an Irooj kar kōpooj kōj n̄an mour ilo jekjek ko Zekaraia ekar kōmeļeļeik? Ekōjkan ad maron̄ bōk kajoor eo An n̄an jipan̄ kōj erom ļapļo̧k kwojarjar?

Zekaraia 9:9–11; 11:12–13; 12:10; 13:6–7

Jisōs Kraist ej Messia eo kar kallim̧ur kake.

• N̄an jipan̄ ro uwaan kūlaaj eo lo ekkejel ko ikōtaan naan ko an Zekaraia im mour eo an Rilo̧mo̧o̧r eo, āinwōt armej ro ilo tōre eo an Jisōs kar kōm̧m̧ane, kwomaron̄ ajije kūlaaj eo n̄an ruo kumi ko. Leļo̧k n̄an ro uwaan kūlaaj eo ilo kumi eo kein kajuon juon iaan eoon kein: Zekaraia 9:9–11; 11:12–13; 12:10; 13:6–7. Leļo̧k n̄an ro uwaan kūlaaj eo ilo kumi eo juon juon iaan eoon kein: Matu 21:1–11; 26:14–16; 26:31; Jon 19:37. Kajjojo uwaan kūlaaj eo remaron̄ kajjieon̄ in pukōt juon jān kumi eo juon me ewōr juon eoon an jeje ko rekwojarjar me ejetjet n̄an eo aer. Ta eo jej ekkatak kōn Rilo̧mo̧o̧r jān eoon kein?

• N̄an jipan̄ ro uwaan kūlaaj eo kejekļo̧kjeņ kōn Zekaraia 9:9–11, kwomaron̄ kwaļo̧k juon pija in deļo̧n̄ in anjo̧ eo an Rilo̧mo̧o̧r n̄an Jerusalem (lale Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko). Ak kwaļo̧k pija in alooj eo “The Lord’s Triumphal Entry into Jerusalem” (ChurchofJesusChrist.org). Ro uwaan kūlaaj eo remaron̄ ekōnono kōn ta eo emaron̄ in kar āinwōt n̄an pād ibwilijin armej ro rej karuwaineneik Jisōs n̄an jikin kweilo̧k eo. Ekōjkan ad karuwaineneik E tok n̄an mour ko ad, im̧ōko im̧ōd, im jukjukin pād ko ad?

  

  1:22

Ālkin kōnono kōn Haggeai 1:4–7, Elder Terence M. Vinson ekar katakin:

“Jemaron̄ en̄jake lan̄lōn̄ eo ejjeļo̧k jem̧ļo̧kin n̄e ad Rilo̧mo̧o̧r im gospel eo An rej erom̧ ļōmļōm peļaakin ijo jej kalōk mour ko ad ie. Mekarta, epidodo an ļōmļōm in erom̧, ijjeļo̧kin, men ko an laļ in, ijo gospel eo ej pād āinwōt ad pepe in kāālōt ak āinwōt pād ilo jikin jar ium̧win ruo awa aolep Jabōt. N̄e en̄in ej jekjek eo, ejjeļo̧k oktak n̄e jenkar likūt oņād ilo ‘pāāk ko rettal.’

“Haggeai ej ba n̄an kōj bwe jen wūjlepļo̧k.…

“Ejjeļo̧k men ettino, ak jabdewōt itok limo, ak jabdewōt taitōļ, ak jabdewōt social media, ak jabdewōt video game ko, ak jabdewōt ikkure, ak jabdewōt iaiao ippān ribun̄bun̄ ro, ak jabdewōt men ioon laļ in me eļapļo̧k an aorōk jān mour indeeo. Kōn menin kapilōk eo an Irooj n̄an aolep armej ej ‘kōļmānļo̧kjeņ kōn iaļ ko am̧’” (“Rikaļoor ro Rem̧ool an Rilo̧mo̧o̧r,” Liaona, Nob. 2019, 9,11).