Malakai

• N̄an kōketak ro uwaan kūlaaj eo n̄an kwaļo̧k ta eo raar ekkatak kōn jortak ko jān Malakai 1:6–14, kwomaron̄ kajjitōk ippāer n̄an bar etale eoon kein ilo ikōņ im ekōnono ippān ro jet uwaan kūlaaj eo juon men me pris in Israel ro raar jab meļeļe kōn joortak ko. Ta eo Irooj ej kajjitōk kōn ta eo em̧m̧an tata jān kōj? Ro uwaan kūlaaj remaron̄ kōm̧m̧ane juon laajrak in joortak ko, ak kaarmejete ko, me jej kōm̧m̧ani n̄an Irooj rainin. N̄an kajjojo aitam ioon laajrak eo, rej maron̄ ekōnono kōn ta eo remaron̄ in kōm̧m̧ane juon jortak “kattoon” ak juon jortak “ erreo” (Malakai 1:7,11).

• Kwomaron̄ jino kōn juon iien ekōnono kōn Malakai 3–4 kōn kwaļo̧k bwe Moronai ekar kwaļo̧k eoon ko jān jebta kein ke ekar waļo̧kļo̧k n̄an Josep Smith (lale Josep Smith—Bwebwenato 1:36–39). Ta m̧ool ko ilo jebta kein ro uwaan kūlaaj eo rej en̄jake emaron̄ in ļap tata an aorōk n̄an Josep—im kōj—n̄an jeļā? Ro uwaan kūlaaj eo remaron̄ pād ilo kumi ko reddik im laajrake lōn̄ in wōt m̧ool ko remaron̄ in. Kōketak kumi ko n̄an kwaļo̧k laajrak ko aer im ekōnono kōn etke m̧ool kein rej aorōk ilo raan ko āliktata.

• N̄an kōketak ro uwaan kūlaaj eo n̄an kwaļo̧k naan in kam̧ool ko aer kōn kien juon m̧ōttan jon̄oul, kwomaron̄ kajjitōk ippāer n̄an pukōt pedped in katak ko ilo Malakai 3:8–12 im n̄an kwaļo̧k ekōjkan aer kar itok n̄an jeļā kōn pedped in katak kein rej m̧ool. Remaron̄ kōnono kōn ekōjkan an Irooj kar kōjeraam̧m̧an er—ilo jetōb im ilo kanniōk—kōn kōļļā juon m̧ōttan jon̄oul. Ak remaron̄ ekōnono kōn katak ko kōn juon m̧ōttan jon̄oul me Elder DavidA. Bednar ekar kwaļo̧ke ilo ennaan eo an “Wintō Ko An Lan̄” (Liaona, Nob. 2013, 17–20) im kwaļo̧k ta eo rekar ekkatak ilo aer kar kajjieon̄ in mour kōn kien in.

• Kajjitōk ippān ro uwaan kūlaaj eo n̄an riiti Malakai 3:8–12 ilo ikōņ ilo aer kejekļo̧kjeņ kōn ekōjkan aer maron̄ katakin juon etke Irooj ej kajjitōk ippād n̄an kōļļā juon m̧ōttan jon̄oul. Remaron̄ barāinwōt riiti ennaan eo jān Būreejtōn Gordon B. Hinckley ilo “Kein Jipan̄ ko Jet.” Ta eo jej kōņaan ro jet n̄an meļeļe kōn juon m̧ōttan jon̄oul? N̄an waanjon̄ak, ta meļeļe in n̄an kōļļā juon m̧ōttan jon̄oul? Etke Irooj ekōņaan bwe jen kōm̧m̧ane? Ekōjkan an “kapeḷḷọk wūntō ko an lañ” (eoon10) kar peļļo̧k n̄e jej kōļļā juon m̧ōttan jon̄oul? Ta inepata ko juon emaron̄ in wōr ippān kōn kōļļā juon m̧ōttan jon̄oul, im ekōjkan ad uwaaki? Kajjitōk ippān ro uwaan kūlaaj eo n̄an kwaļo̧k ekōjkan kōjparok kien in kar kōkajoorļo̧k tōmak eo aer ilo Jemedwōj Ilan̄ im Jisōs Kraist.

• Ro uwaan kūlaaj eo remaron̄ bōk kōļmenļo̧kjeņ ko rejipan̄ kōn Malakai 4:5–6 jān keidi eoon kein n̄an wāween eo Moronai ekar kouti er n̄an Josep Smith ilo Josep Smith—Bwebwenato 1:38–39. (Emaron̄ in jipan̄ n̄an kōm̧m̧an bwe juon en je kajjojo bok ko iturejet in boot eo.) Ta eo naan eo an Moronai ej kobaitok n̄an meļeļe eo ad kōn eoon ko ilo Malakai? Kwomaron̄ barāinwōt ekōnono kōn kajjitōk ko āinwōt kein: Wōn ro rej “jiṃṃaṃ”? (lale Duteronomi 29:13). Ekōjkan an būruōd oktak n̄an ro jim̧m̧aer, im ekōjkan an būruier oktaktok n̄an kōj? N̄an jipan̄ kūlaaj eo am̧ meļeļe ekōjkan an kanaan eo an Malakai kar kūrm̧ool, remaron̄ riit kōn n̄aat eo Ilaija ekar leļo̧k kii ko an liāp n̄an Josep Smith (lale Katak im Bujen Ko 110:13–16). Etke ro uwaan kūlaaj eo rej kam̧m̧oolol kōn kii kein em̧ōj kar kōjepļaaktoki?

• Malakai 4:5–6 ej letok juon iien em̧m̧an n̄an ekōnono kōn tampeļ im jerbal in menmenbwij an baam̧le. Bōlen ro uwaan kūlaaj eo remaron̄ kwaļo̧k en̄jake ko ewōr ippāer ke raar kōm̧m̧ane jerbal in im ekōjkan an en̄jake kein kar jipan̄ er ukōt būruier n̄an ro jim̧m̧aer. Ta eo jemaron̄ kōm̧m̧ane n̄an jipan̄ epepen ko ilju im jekļaj ukōt būruier n̄an kōj?

Būreejtōn Gordon B. Hinckley ekar ba, “Jej maron̄ kōļļā juon m̧ōttan jon̄oul. Menin ejjab lukkuun juon men kōn jāān āinwōt an juon men an tōmak. Ijjan̄in de lo juon eo ej tiljek an kōļļā juon m̧ōttan jon̄oul me ejjab maron̄ kam̧ool bwe ilo juon wāween elukkuun in im aiboojoj kōn an wintō ko an lan̄ em̧ōj aer peļļo̧k im kōjeraam̧m̧an ko em̧ōj lutōktok ioon” (“Let Us Move This Work Forward,” Ensign, Nob. 1985,85).