Sam Ko 102–103; 110; 116–119; 127–128; 135–139; 146–150

• Em̧ōj ke an ro uwaan kūlaaj eo en̄jake jōkjōk eo rijeje eo Sam Ko 102 ekar en̄jake? Ewi wāween ad maron̄ oktak n̄an Irooj n̄e jej en̄jake inepata ak mōk. Ilo aer ekkatak Sam Ko 102, 103, im 116 ilo m̧ōko ilo wiik in, ro uwaan kūlaaj eo remaron̄ kar loe ennaan ko im rekar im̧we er n̄an oktakļo̧k Irooj ilo iien ko reppen n̄an er. Kōketak er n̄an kwaļo̧k ta eo rekar loe, ak pukot jet naan in im̧we ko ippān doon āinwōt kūlaaj. Ro uwaan kūlaaj eo remaron̄ barāinwōt kōnono kōn ewi an Irooj kar jipan̄ er ilo iien ko reppen.

• Ro uwaan kūlaaj eo remaron̄ barāinwōt m̧ōņōņō in jei sam ko aer make kōn ewi an Irooj jipan̄ er ilo iien ko reppen. Rejjab aikuj aetok ak bwe en ļap in wōt sam ko—jidik wōt kwaļo̧k kōn tōmak, m̧ōņōņō im lan̄lōn̄. Ro uwaan kūlaaj eo remaron̄ jerbal make iaer ak ippān doon, im remaron̄ etale Sam Ko 102, 103, im 116 jet ļōmņak. Karuwaineneik jejjo iaer n̄an kwaļo̧k sam ko aer make, eļan̄n̄e rej m̧ōņōņō. Komaron̄ bar al ippen doon kōn ewi an Irooj kaenōm̧an kōj, āinwōt “Where Can I Turn for Peace?” (Hymns, nō. 129).

  

  Kōmour, jān J. Kirk Richards

• N̄an jinoe juon kōnono kōn Sam Ko 119, komaron̄ karuwaineneik ro uwaan kūlaaj eo n̄an kōnono kōn iien eo rekar ļoorļo̧k iiaļ eo n̄an tōpar ijo rej jipadōdeļo̧k (enaaj ļap an jipan̄ n̄an tōpar juon m̧okta im kajjitōk ippān n̄an pojak n̄an kōnono kōn menin). Ta en̄jake eo ekōm̧m̧an bwe en pen n̄an dāpdep ilo iiaļ e Ta eo ekar jipan̄ er n̄an ped wōt ie? Kwomaron̄ jin̄aik juon iaļ ioon boot eo im kajjitōk ippān ro uwaan kūlaaj eo n̄an jei ennaan eo ilo Sam ko 119 im ej ba ta eo Irooj ekar kōm̧m̧ane n̄an jipan̄ kōj dāpdep wōt ilo iiaļ in bujen in. Ļōmņak n̄an kwaļo̧k ennaan eo jān Būreejtōn Russell M. Nelson in “Kein Jipan̄ ko Jet” āinwōt m̧ōttan kōnono eo.

• Ro uwaan kūlaaj eo remaron̄ jeraam̧m̧an n̄an keidi ta eo Sam Ko 119 katakin kōn dāpdep wōt ilo iiaļ eo an Irooj ippān jeje ko rekwojarjar im rej katakin ejja m̧ook kein wōt. Lale n̄an kōjpelļok kūlaaj eo ilo kumi ko im kajjitōk ippān kajjojo kumi n̄an etale eoon ko āinwōt kein: Sam Ko 119:33–40, 105; Jabōn Kōnnaan Ko 4:11–19; 1 Nipai 8:20–28; 11:25; 2 Nipai 31:17–21; Alma 7:9, 19–20. Kajjitōk ippān kajjojo kumi n̄an kwaļo̧k ta eo raar ekkatak. Leļo̧k iien n̄an ro uwaan kūlaaj eo n̄an ļōmņak kōn ta eo rej im̧we n̄an kōm̧m̧ane ekkar n̄an ta eo raar ekkatak.

• Meļeļe bwe Irooj ej ļōmņak kōn kōj—ļōmņak im m̧akūtkūt ko ad, kajoor im m̧ōjņo ko—im E ej iakwe kōj emaron̄ wōr kajoor n̄an an kōketak kōj ilo kāālet ko je kōm̧m̧ani. Komaron̄ karuwaineneik ro uwaan kūlaaj eo n̄an lale eoon ko ilo Sam Ko 139 im ej katakin kōn aorōk in m̧ool. Ewi wāween an mour ko ad jelōt jān ad jeļā m̧ool eo? Ro uwaan kūlaaj eo remaron̄ kōmeļeļeik jōkjōk ko jemaron̄ karuwaineneik Irooj n̄an “pukot Eō, O Anij, im jeļā kōn buruwō” (eoon 23).

Būreejtōn Russell M. Nelson ekar ba:

“Eļan̄n̄e m̧akūtkūt eo ad ilo mour in ej n̄an em̧m̧anļo̧k eo, jej aikuj ļoor iaļ eo an. Irooj ekar ba, ‘Reitok n̄an n̄a ilo aolepān ļōmņak ko, jab ebber, jab mijak’ [Katak im Bujen Ko 6:36]. Im Sam ko rekar jei, ‘ Aṃ in naan e lamp n̄an neiō, im meram n̄an aō iaḷ’ [Sam Ko 119:105]. …

“Ilo m̧akūtkūt eo am ilo mour in, komaron̄ ioon elōn̄ menin kaban̄ban̄ ko im kōm̧m̧an bōd ko. Unin tōl eo rekwojarjar ej jipan̄ kwe n̄an kūle bōd im kōm̧m̧an oktak emenin aikuj n̄an jim̧we. Kwon bōjrak n̄an etal ilo iaļ eo ebōd. Kwon lukkuun ekkatak māp in iaļ ilo jeje ko rekwojarjar. Innem kwoj wōnm̧anļo̧k ilo ukweļo̧k im kajim̧we n̄an pād ilo ‘iaļ eo erānin̄ im eaidik eo ej tōlļo̧k n̄an mour indeeo’ [2 Nipai 31:18]” (“Living by Scriptural Guidance,” Ensign, Nov. 2000, 17).