۱ اور ۲ پطرس

پہلی نظر میں، یہ عجیب معلوم ہوسکتا ہے کہ پطرس نے عام طور پر مصائب سے وابستہ اِلفاظ: بھاری پن ،آزمائشیں، غم، آتش گیر اِمتحانات، اور تکلِیفوں کی بجائے شادمانی، خُوشی، جلال، اور نِہایت خُوش و خُرّم جیسے اِلفاظ کا استعمال کیا ہے (دیکھیں ۱ پطرس ۱: ۶؛ ۲: ۱۹؛ ۴: ۱۲–۱۳)۔ ابتدائی مُقدّسین کے لیے پطرس کا پیغام صدر رسل ایم نیلسن کے سِکھائے گئے پیغام کے مترادف ہے: ”مُقدّسین ہر طرح کے حالات میں خوش رہ سکتے ہیں۔ … جب ہماری زِندگیوں کی توجہ کا مرکز خُدا کا نِجات کا منصوبہ … اور یِسُوع مسِیح اور اُس کی اِنجیل ہوتی ہے، تو ہم اپنی زِندگیوں میں چاہے کچھ ہو—یا نہ ہو—اِس سے قطع نظر خُوشی محسوس کر سکتے ہیں۔ خُوشی اُس سے اور اُس کے وسیلہ سے حاصل ہوتی ہے۔ وہ کُل خُوشی کا منبع ہے“ (”Joy and Spiritual Survival،“ انزائن یا لیحونا، نومبر ۲۰۱۶، ۸۲)۔

جب آپ ۱ پطرس ۱: ۳–۹؛ ۲: ۱۹–۲۴؛ ۳: ۱۴–۱۷؛ ۴: ۱۲–۱۹ پڑھتے ہیں، تو کونسی بات آپ کو اُمید دیتی ہے کہ آپ مشکل حالات کے باوجود بھی خُوشی پاسکیں گے؟

ایک دن، ہر شَخص کو تختِ عدالت کے سامنے کھڑا ہونا اور ”اُسی کو حِساب دینا پڑے گا جو زِندوں اور مُردوں کا اِنصاف کرنے کو تیّار ہے“ (۱ پطرس ۴: ۵)۔ کچھ لوگوں کو حیرت ہوسکتی ہے کہ جب اِنجیل کو سمجھنے اور اِس کے مُوافِق جینے کے مواقع اتنے مختلف ہوتے ہیں تو خُدا تمام لوگوں کی اِنصاف کے ساتھ عدالت کیسے کرسکتا ہے۔ اُس عقیدے پر غور کریں جو پطرس نے ۱ پطرس ۳: ۱۸–۲۰؛ ۴: ۶ میں اپنے دور کے مُقدّسین کو یہ سمجھنے میں مدد کرنے کے لیے سِکھایا کہ خُدا کے فیصلے منصفانہ ہوں گے۔ یہ آیات خُدا کے اِنصاف اور عدالت پر آپ کے بھروسے کو کیسے مضبُوطی بخشتی ہیں؟

اِس عقیدے کے مزید مُطالعہ کے لیے، عقائد اور عہود ۱۳۸ کا تفصیلی جائزہ لیں، وہ مُکاشفہ جو صدر جوزف ایف سمتھ نے پطرس کی اِن تحریروں پر غور کرنے کے باعِث حاصل کیا۔ اُن لوگوں کو کون سی برکات حاصل ہوتی ہیں جو اِنجیل کی رسوم کو اپنے خاندان کے اُن اَرکان کے لیے مہیا کرتے ہیں جو رحلت فرما چکے ہیں اور اب بھی اُن رسوم کے منتظر ہیں؟

کیا آپ کو کبھی یِسُوع مسِیح کی مانند بننا اور اُس کی صفات کو اپنانا ناممکن محسوس ہوا ہے؟ بزرگ رابرٹ ڈی ہیلز نے مسِیح کی مانند صفات کو فروغ دینے کے لیے اِس حوصلہ افزا سوچ کی پیش کش کی: ”نِجات دہندہ کی صفات … ایک دُوسرے کے ساتھ بُنی ہوئی خصوصیات ہیں، جو ایک دُوسرے سے جوڑی ہوتی ہیں، جو ہم میں متعامل طریقوں سے فروغ پاتی ہیں۔ دُوسرے لفظوں میں، ہم دُوسری صفات کو حاصل اور متاثر کیے بغیر مسِیح جیسی ایک بھی خصوصیت حاصل نہیں کرسکتے ہیں۔ ایک صفت کی مضبُوطی، دُوسری صفات کی مضبُوطی کا بھی باعِث بنتی ہے“ (”Becoming a Disciple of Our Lord Jesus Christ،“ انزائن یا لیحونا، مئی ۲۰۱۷، ۴۶)۔

بزرگ ہیلز کے پیغام کے ساتھ ۲ پطرس ۱:۱–۱۱ پڑھنے پر غور کریں۔ مسِیح کی مانند بننے کی آپ کی کوششوں میں مدد کے لیے آپ اِن دو رَسُولوں سے کیا سیکھتے ہیں؟

مزید دیکھیں ۱ پطرس ۴: ۸؛ ڈیوڈ اے بیڈنار، ”Exceeding Great and Precious Promises،“ انزائن یا لیحونا، نومبر ۲۰۱۷، ۹۰–۹۳۔

جب آپ اپنے خاندان کے ساتھ یہ آیات پڑھتے ہیں تو، خاندانی اَرکان کو پطرس کی تعلیمات تصوّر کرنے میں مدد دینے کے لیے پتھّروں کے اِستعمال پر غور کریں کہ نِجات دہندہ ہمارا ”کونے کے سِرے کا پتھّر“ ہے۔ ہم کِس طرح ”سرگرم [زِندہ] پتھّروں“ کی مانند ہیں جو خُدا اپنی بادشاہی کی تعمیر کے لیے استعمال کر رہا ہے؟ ہم پطرس سے نِجات دہندہ اور اُس کی بادشاہی میں اپنے کردار کے بارے میں کیا سیکھتے ہیں؟ پطرس کا آپ کے خاندان کے لیے کیا پیغام ہے؟

جو ہم سے ہمارے اِیمان کے بارے میں پوچھتے ہیں ہم کیسے اُن کو ”جواب دینے کے لِئے ہر وقت مُستعِد“ رہ سکتے ہیں؟ آپ کا خاندان اِنجیل سے متعلق پوچھے جانے والے سوالات جیسے حالات کی کردار نگاری کرنے سے لطف اندوز ہوسکتا ہے۔

بطور خاندان آپ اپنے مرحوم آباؤ اجداد کے بارے میں جاننے کے لیے کیا کرسکتے ہیں؟ شاید کسی مُردہ پُرکھ کی سالگرہ کے موقع پر آپ اپنے پُرکھوں کا پسندیدہ کھانا پکا سکتے ہیں، اُن کی تصاویر کی نمائش کرسکتے تھے، یا اپنے پُرکھوں کی زِندگی کی کہانیاں سُن سکتے تھے۔ اگر ممکن ہو تو، آپ ہَیکل میں اُس پُرکھ کے لیے رسوم ادا کرنے کا بھی منصوبہ بناسکتے ہیں۔

اِن آیات میں، پطرس نے مُقدّسین کو تبدیلیِ صُورت کے پہاڑ پر اپنے تجربے کی یاد دلائی (مزید دیکھیں متّی ۱۷: ۱–۹)۔ نبِیوں کی تعلیمات کے بارے میں ہم اِن آیات سے کیا سیکھتے ہیں؟ (مزید دیکھیں عقائد اور عہود ۱: ۳۸)۔ آج ہم اپنے زندہ نبی کی پیروی کرنے کا اعتماد کِس چیز سے پاتے ہیں؟