عِبرانیوں ۷–۱۳

صدیوں سے، یہُودِیوں نے لاوی کی کہانت کا استعمال کیا تھا، جسے ہارونی کہانت بھی کہا جاتا ہے۔ لیکن یِسُوع مسِیح کی اِنجیل کی معموری کے ساتھ اعلیٰ مَلکِ صدؔق کہانت آئی، جس نے قدرے زیادہ برکات پیش کیں۔ آپ عِبرانیوں ۷ سے مَلکِ صدؔق کہانت کے بارے میں کیا سیکھتے ہیں؟ یہاں آپ کو سَچّائیوں کی کچھ مثالیں مل سکتی ہیں:

ترجمہ برائے جوزف سمتھ، عِبرانیوں ۷: ۳، ۲۱:وہ جو مَلکِ صدؔق کہانت پر مُقرّر ہوئے ہیں وہ خُدا کے بَیٹے کے مُشابِہ ٹھہرے اور ہمیشہ کے لئِے [کاہِن] مُقرّر ہُوئے ہیں۔

عِبرانیوں ۷: ۱۱:لاوی کی کہانت سے ”کامِلیّت “ حاصِل نہیں ہوتی ہے اور اس لیے مَلکِ صدؔق کہانت نے اِس پر سبقت لے لی (دیکھیں عقائد اور عہود ۸۴: ۱۸–۲۲)۔

عِبرانیوں ۷: ۲۰–۲۱:مَلکِ صدؔق کہانت ایک عہد کے ذریعہ حاصل کی جاتی ہے (دیکھیں عقائد اور عہود ۸۴: ۱۹–۴۴)۔

آپ نے مَلکِ صدؔق کہانت اور اِس سے وابستہ رسوم کے وسیلہ سے کون سی نَعمتیں حاصل کیں ہیں؟

مزید دیکھیں ایلما ۱۳: ۱–۱۳؛ عقائد اور عہود ۱۲۱: ۳۶–۴۶؛ ہینری بی آئرنگ ”Faith and the Oath and Covenant of the Priesthood،“ انزائن یا لیحونا، مئی ۲۰۰۸، ۶۱–۶۴؛ ڈیلن ایچ اوکس، ”The Keys and Authority of the Priesthood،“ انزائن یا لیحونا، مئی ۲۰۱۴، ۴۹–۵۲۔

اِس خط کے پڑھنے والے حقیقی عِبرانی لوگ قدیم خَیمہ اجتماع اور اُن رسوم سے واقف ہوں گے جو پَولُس نے بیان کی ہیں۔ لیکن کچھ نے پوری طرح سے اِس حقیقت کو تسلیم نہیں کیا تھا کہ اِن رسوم کا مقصد یِسُوع مسِیح کے کفّارہ کی طرف اشارہ کرنا تھا۔

بائبل کے اوقات میں، سالانہ تعطیل کے دن جسے یومِ کفّارہ کہا جاتا تھا، ایک سَردار کاہِن یروشلِیم کی ہَیکل میں سب سے مُقدّس جگہ (یا پاک ترین) مقام میں داخل ہوتا اور اِسرائیل کے گُناہوں کے کفّارہ کے لیے ایک بکرا یا بّرہ قربان کرتا تھا۔ پَولُس نے وضاحت کی کہ یِسُوع مسِیح اَیسا سَردار کاہِن ہے جس نے ایک ہی قربانی چڑھائی—اپنی زِندگی کی—دُنیا کے گُناہوں کے کفّارہ کے لیے (دیکھیں عِبرانیوں ۹: ۲۴–۱۰: ۱۴)۔

اُن رسوم کے بارے میں سوچیں جن میں آج آپ نے حصّہ لیا۔ یہ رسوم کیسے یِسُوع مسِیح کی طرف اشارہ کرتی ہیں؟

اگر کوئی آپ سے اِیمان کی تعریف پوچھے تو آپ کیا کہیں گے؟ بہن اِین سی پینگری، انجمنِ خواتین کی عمومی صدارت کی سابقہ رکن نے، اِس کی تعریف کو پیش کرنے کے لیے عِبرانیوں ۱۱ کے اِلفاظ پر روشنی ڈالی: ”اِیمان، اُن وعدوں پر قائل رہنے کی رُوحانی قابلیت ہے جو ”دُور ہی سے“ نظر آتے ہیں لیکن شاید اِس زِندگی میں حاصل نہیں کیے جاسکتے، یہ پختہ یقین رکھنے والوں کی ایک ٹھوس تدبیر ہے“ (”Seeing the Promises Afar Off،“ انزائن یا لیحونا، نومبر ۲۰۰۳، ۱۴)۔

عِبرانیوں ۱۱ میں درج خیالات پر غور کرتے ہوئے اپنی خود کی اِیمان کی تعریف کو تیار کرنے پر غور کریں۔ اِس باب میں درج لوگوں کی مثالوں سے آپ کو اِیمان کے بارے میں کیا تعلیم ملتی ہے؟ (مزید دیکھیں عیتر ۱۲: ۶–۲۲۔)

مزید دیکھیں ایلما ۳۲: ۲۱، ۲۶–۴۳؛ جیفری آر ہالینڈ، ”An High Priest of Good Things to Come،“ انزائن، نومبر ۱۹۹۹، ۳۶–۳۸۔

آپ خاندانی اَرکان کو ایسے رُوحانی تجربات کا اشتراک کرنے کی دعوت دے سکتے ہیں جب اُنھوں نے خود کو سَچّائی کی بدولت ”مُنوّر“ محسوس کیا۔ آزمائش یا شک کے اوقات میں یہ تجربات ”اپنی دِلیری کو ہاتھ سے نہ“ جانے دینے میں کِس طرح ہماری مدد کرسکتے ہیں؟

عِبرانیوں ۱۱ میں درج دیندار مثالوں سے سبق حاصل کرنے کے لیے آپ اپنے خاندانی اَرکان کی کس طرح مدد کر سکتے ہیں؟ اِن مثالوں میں سے کچھ کہانیوں کی کردار نگاری کرنے سے لطف اُٹھایا جاسکتا ہے۔ یا شاید آپ کا خاندان دُوسرے دیندار لوگوں کی مثالوں پر تبادلہ خیال کرسکتا ہے جن سے آپ واقف ہیں—بشمول آپ کے آباؤ اجداد، کلیسیائی راہ نماؤں، اور آپ کی برادری کے اَرکان۔

اِس آیت کے مطابق، یِسُوع نے کیوں خُوشی سے صلِیب کا دُکھ اُٹھایا اور اِس کی تکلیف سہی؟ اِس سے ہم اپنے مصائب کو کِس طرح برداشت کرنا سیکھتے ہیں؟ صدر رسل ایم نیلسن نے اپنے پیغام میں اِس آیت کے بارے میں کچھ مددگار بصیرت پیش کی ہے ”Joy and Spiritual Survival“ (انزائن یا لیحونا، نومبر ۲۰۱۶، ۸۱–۸۴)۔

خُداوند کیسے ہمیں نصِیحت اور تنبِیہ کرتا ہے؟ جب آپ اِن آیات کا اکٹھے مُطالعہ کرتے ہیں تو آپ کے خاندانی اَرکان خُداوند کی تنبِیہ کے طریقوں کے بارے میں کیا سیکھتےہیں؟ یہ آیات کسی کو تنبِیہ کرنے یا خود تنبِیہ حاصل کرنے کے آپ کے طریقے کو کیسے متاثر کرتی ہیں؟