عِبرانیوں ۱–۶

کچھ علما نے یہ سوال اُٹھایا ہے کہ کیا واقعی ہی پَولُس نے عِبرانیوں کے نام خط لکھا تھا؟ عِبرانیوں کے خط کا ادبی انداز پَولُس کے دُوسرے خطوط سے کچھ مختلف ہے، اور متن کی ابتدائی تحریروں میں مصنف کا نام نہیں لیا گیا۔ تاہم، چونکہ عِبرانیوں میں جن خیالات کا اِظہار کیا گیا ہے وہ پَولُس کی دُوسری تعلیمات کے ساتھ مطابقت رکھتے ہیں، مسِیحی روایت کو برقرار رکھتے ہوئے، مقدسینِ آخِری ایّام نے، تسلیم کیا ہے کہ اِس خط کو لکھنے میں کم از کم پَولُس ملوث تھا۔

بہت سے یہُودِیوں کے لیے یِسُوع مسِیح کو خُدا کا بَیٹا قبول کرنا مشکل تھا۔ عبرانیوں کے نام خط یہ تعلیم دیتا ہے کہ یِسُوع کے بارے میں سب کچھ اُس کے باپ کی گواہی اور مثال پیش کرتا ہے۔ جب آپ عِبرانیوں کے پہلے پانچ ابواب پڑھتے ہیں تو، آپ یِسُوع مسِیح کے القابات، کردار، اوصاف، اور درج کاموں کی ایک فہرست بنا سکتے ہیں۔ یہ چِیزیں آپ کو نِجات دہندہ کے بارے میں کیا تعلیم دیتی ہیں؟ یہ آسمانی باپ کے بارے میں آپ کو کیا سِکھاتی ہیں؟

بزرگ جیفری آر ہالینڈ کا درج ذیل بیان اِن ابواب میں دی گئی تعلیمات کے بارے میں آپ کے فہم میں کیا اضافہ کرتا ہے؟ ”یِسُوع … خُدا کے بارے میں انسان کے نظریہ کو بہتر بنانے اور اُن سے یہ التجا کرنے آیا تھا کہ وہ اپنے آسمانی باپ سے محبّت رکھیں جیسا کہ وہ ہمیشہ سے اُن سے محبّت رکھتا آیا ہے اور ہمیشہ رکھے گا۔ … چنانچہ بھوکے کو کھانا کھلانے، بیماروں کو شِفا دینے، رعیاکاروں کو ڈانٹنے، اِیمان کی التجا کرنے کے باعِث—مسِیح نے ہمیں باپ کی جانب جانے کا راستہ دِکھایا“ (”The Grandeur of God،“ انزائن یا لیحونا، نومبر ۲۰۰۳، ۷۲)۔

کیا آپ کو لگتا ہے کہ آپ ”فضل کے تخت کے پاس دِلیری سے“ جاسکتے ہیں تاکہ آپ پر رحم ہو؟ (عِبرانیوں ۴: ۱۶)۔ عِبرانیوں کے نام خط کا ایک پیغام یہ ہے کہ ہمارے گُناہوں اور کمزوریوں کے باوجود، ہم خدا تک رسائی پاسکتے ہیں اور اُس کا فضل قابلِ حصول ہے۔ عِبرانیوں ۲: ۹–۱۸؛ ۴: ۱۲–۱۶؛ ۵: ۷–۸ میں کون سی باتیں آپ کے اعتماد کو تقویت بخشتی ہیں کہ یِسُوع مسِیح آپ کی فانی چنوتیوں میں آپ کی مدد کرے گا؟ روزنامچے میں اپنے خیالات اور احساسات کو قلمبند کرنے پر غور کریں کہ نِجات دہندہ نے آپ کے لیے کیا کِیا ہے۔

مزید دیکھیں مضایاہ ۳: ۷–۱۱؛ ایلما ۷: ۱۱–۱۳؛ ۳۴۔

اگرچہ وہ مسِیحیت کی طرف رُجُوع لا چکے تھے، پھر بھی کچھ یہُودی مُقدّسین کے لیے یِسُوع مسِیح کی اِنجیل اور اِس کی برکات کو پوری طرح قبول کرنا مشکل تھا۔ قدیم بنی اِسرائیل کی کہانی کو دہراتے ہوئے، پَولُس نے اِس اُمِید سے یہُودیوں کو یہ باور کروایا کہ وہ اپنے آباؤ اجداد کی غلطی سے بچیں—بے اعتقادی کی وجہ سے خُدا کی نَعمتوں کو رد کرتے ہوئے۔ (آپ پَولُس کی اُس کہانی کو پڑھ سکتے ہیں جو گنتی ۱۴: ۱–۱۲، ۲۶–۳۵ میں درج حقائق کی طرف اشارہ کرتی ہے۔)

غور کریں کہ عِبرانیوں ۳: ۷–۴: ۱۱ آپ پر کِس طرح لاگو ہوسکتا ہے۔ اَیسا کرنے کے لیے، آپ شاید اِس طرح کے سوالات پر غور کرسکتے ہیں:

• اسرائیلیوں نے خُداوند کو کِس طرح اُکسایا؟ (دیکھیں عِبرانیوں ۳: ۸–۱۱)۔ سخت دِل ہونے کے کیا نتائج ہوتے ہیں؟

• میں نے کب اپنے دِل کو سخت ہونے کی اجازت دی؟ کیا اَیسی کوئی نَعمت ہے جو خُدا مجھے عطا کرنا چاہتا ہے مگر میرے اِیمان کی کمی کی وجہ سے اَیسا نہیں ہو پا رہا؟

• شائستہ اور پشیمان دِل پانے کے لیے مَیں کیا کرسکتا ہوں؟ (دیکھیں عیتر ۴: ۱۵؛ امثال ۳: ۵–۶؛ ایلما ۵: ۱۴–۱۵)۔

مزید دیکھیں ۱ نیفی ۲: ۱۶؛ ۱۵: ۶–۱۱؛ یعقوب ۱: ۷–۸؛ ایلما ۱۲: ۳۳–۳۶۔

یِسُوع نے کیسے یہ ظاہر کیا ہے کہ وہ راستبازی سے محبّت اور بدکاری سے عَداوَت رکھّتا ہے؟ ہم اپنی بدکار خواہشات کو بدلنے کے لیے کیا کرسکتے ہیں؟

کیا آپ کسی اَیسے عملی سبق کے بارے میں سوچ سکتے ہیں جو آپ کے خاندان کو یہ سمجھنے میں مدد فراہم کرے کہ اِنجیلی سَچّائیاں جو ”ہم نے سُنِیں“ اُن کو پختگی سے تھامے رکھنے کا مطلب کیا ہے؟ آپ اِس کی وضاحت کسی اَیسی چِیز کے ساتھ کر سکتے ہیں جس کو تھامے رکھنا مشکل ہو۔ اِس چِیز کو پکڑنا اور تھامے رکھنا کیسے ہماری گواہی کو برقرار رکھنے کی ہماری کوششوں کے مترادف ہے؟ ہم اِس بات کو کیسے یقینی بنا سکتے ہیں کہ وہ ”باتیں جو ہم نے سُنِیں“ وہ ہم سے ”دُور“ نہ ہوجائیں؟ (آیت ۱)۔

”نِجات کے بانی“ کی اصطلاح کو دریافت کرنے کے لیے، آپ اِس بارے میں گفتگو کر سکتے ہیں کہ بانی کِس کو کہتے ہیں۔ بانی کیا کرتا ہے؟ یِسُوع مسِیح کِس طرح ہمارا اور ہماری نِجات کا بانی ہے؟

یہ آیات آپ کو اِس بارے میں گفتگو کرنے میں مدد دے سکتی ہیں کہ خُدا کی طرف سے بُلاہٹ پانے، کہانت کے حامل ہونے یا کسی اِختیّار کے حامل شَخص کے ذریعہ دیگر کلیسیائی بُلاہٹوں کو پورا کرنے کا مطلب کیا ہے۔ ہم یِسُوع مسِیح کی مثال سے بُلاہٹوں کو پانے اور اُن کو پورا کرنے کے بارے میں کیا سیکھ سکتے ہیں؟