۱ اور ۲ تیمِتھُیس؛ طِطُس؛ فِلیمون

تیمِتھُیس اور طِطُس نے پَولُس کے ساتھ اُس کی تبلیغی مسافتوں میں خدمات سر انجام دی تھیں۔ اُن کی خدمت کے دوران، اُنھوں نے پَولُس کا اعتماد اور عزت کمائی۔ تیمِتھُیس کو بعد میں اِفِسُس میں کلیسیائی راہ نما کے طور پر بُلاہٹ ملی، اور طِطُس کو کریتے میں راہ نما کے طور پر بُلایا گیا تھا۔ اِن خطوط میں، پَولُس نے راہنماؤں کو اُن کی ذمہ داریوں سے متعلق ہدایت اور حوصلہ افزائی بخشی، جس میں اِنجیل کی منادی کرنا اور مرد حضرات کو اُسقف کی حیثیت سے خدمات انجام دینے کے لیے بُلاہٹ دینا بھی شامل ہے۔

تیمِتھُیس نسبتاً جوان تھا، لیکن پَولُس جانتا تھا کہ لڑکپن کے باوجود وہ کلیسیا کا ایک عظیم راہنما بن سکتا ہے۔ پَولُس نے ۱ تیمِتھُیس ۴: ۱۰–۱۶ میں تیمِتھُیس کو کیا صلاح دی؟ یہ مشورت دُوسروں کو مُنّجی اور اُس کی اِنجیل کی طرف مائل کرنے میں آپ کی کِس طرح مدد کرسکتی ہے؟

مزید دیکھیں ایلما ۱۷: ۱۱۔

یہ خیال کیا جاتا ہے کہ ۲ تیمِتھُیس وہ آخری خط ہے جو پَولُس نے لکھا تھا، اور ایسا لگتا ہے کہ وہ جانتا تھا کہ زمِین پر اُس کا وقت بہت کم رہ گیا تھا (دیکھیں ۲ تیمِتھُیس ۴: ۶–۸)۔ جب آپ یہ خط پڑھتے ہیں، تو اِس کے بارے میں سوچیں کہ تیمِتھُیس کو یہ جان کر کیسا لگا ہوگا کہ اُس کا قابلِ بھروسا صلاح کار اور راہنما اُسے جلد ہی چھوڑ کر جانے والا تھا۔ پَولُس نے اُس کی حوصلہ افزائی کے لیے کیا کہا؟ پَولُس کے اِلفاظ آپ کو خود اپنی آزمائشوں اور خطرات کا سامنا کرنے کے بارے میں کیا سِکھاتے ہیں؟

ہم ”اخِیر زمانہ“ میں جی رہے ہیں جس کی بابت پَولُس نے بات کی تھی، اور ”بُرے دِن“ آ گئے ہیں (۲ تیمِتھُیس ۳: ۱)۔ جب آپ ۲ تیمِتھُیس ۳، پڑھیں تو، اُن آخری ایّام کے خطرات کو تحریر کریں جن کا تذکرہ کیا گیا ہے (مزید دیکھیں ۱ تیمِتھُیس ۴: ۱–۳):

کیا آپ اپنی اِرد گِرد کی دُنیا میں—یا اپنی ہی زِندگی میں اِن خطرات سے متعلق مثالوں کے بارے میں سوچ سکتے ہیں؟ یہ خطرات، کیسے آیت ۶میں بیان کردہ لوگوں کی طرح، ”[آپ کے گھروں] میں دبے پاؤں گُھس آتے ہیں اور [آپ] کو قابُو میں کر لیتے ہیں“؟ اپنے آپ کو اور اپنے خاندان کو اِن رُوحانی خطرات سے محفوظ رکھنے کے لیے ۲ تیمِتھُیس ۳ میں اور اِن خطوط میں کہیں بھی آپ کو کیا مشورت ملتی ہے؟ (دیکھیں، مثال کے طور پر، ۱ تیمِتھُیس ۱: ۳–۱۱؛ ۲ تیمِتھُیس ۲: ۱۵–۱۶؛ طِطُس ۲: ۱–۸)۔

فِلیمون ایک مسِیحی تھا جو پَولُس کے باعِث اِنجیل کی طرف رُجُوع لایا تھا۔ وہ اُنیسمُس نامی ایک غُلام کا مالِک تھا، جو قَید سے فرار ہوگیا، پَولُس سے مِلا، اور اِنجیل کی طرف رُجُوع لایا تھا۔ فِلیمون کے نام لکھے گئے خط میں، پَولُس نے اپنے دوست کو اُنیسمُس کو معاف کرنے اور اُسے ”غُلام کی طرح نہِیں، بلکہ غُلام سے بہُتر ہوکر، یعنی عزیز بھائِی کی طرح“ قبول کرنے کی ترغیب دی (آیت ۱۶)۔

کیا آپ نے کبھی ایسی صورتحال کا سامنا کیا کہ جب کوئی آپ سے مُعافی کا طالب ہوا تھا؟ فِلیمون کے خط کو پڑھتے ہوئے اِس صورتِ حال کے بارے میں سوچیں۔ پَولُس نے فِلیمون کو کیا سِکھایا کہ وہ اُنیسمُس کو کیوں مُعاف کرے؟ کیا اِس خط میں آپ کو اپنے لیے کوئی پیغام مِلتا ہے؟

مزید دیکھیں، ۱ نیفی ۷: ۱۶–۲۱؛ مضایاہ ۲۶: ۳۰–۳۱۔

اگرچہ پَولُس کی خواتین کے لیے باحیا لباس پہننے کی مشورت کے پہلو ہمارے وقت پر لاگو نہیں ہوتے ہیں، لیکن ہم سب اُس کی مشورت ”نیک کاموں سے … اپنے آپ کو سنوارنے“ سے متعلق سیکھ سکتے ہیں۔ آپ کا خاندان ایک فیشن شو منعقد کرنے سے لطف اندوز ہوسکتا ہے، جس میں خاندانی اَرکان مختلف قسم کے اچھّے کاموں کے لیبل زدہ لباس یا زیور میں ملبوس ہوں۔ اِس ہفتے آپ کا خاندان کون سے کچھ اچھّے کام کرسکتا ہے؟

اپنے خاندان کے اَرکان کی ”اِیمانداروں کے لِئے نمُونہ“ بننے کی خواہش میں مدد کے لیے، اُنھیں اِس بات کی تصویر بنانے کی دعوت دینے پر غور کریں کہ لوگ اُن کے لیے کِس طرح عمدہ مثال بنے ہیں۔ کِس طرح اِن لوگوں نے ہمیں یِسُوع مسِیح کی پیروی کرنے کی ترغیب بخشی؟ صدر تھامس ایس مانسن کا پیغام ”Be an Example and a Light“ (انزائن یا لیحونا، نومبر ۲۰۱۵، ۸۶–۸۸) چند تجاویز پیش کرسکتا ہے۔

آپ کے خیال میں ”زر کی دوستی“ کو ”ہر قِسم کی بُرائی کی ایک جڑ“ کیوں سمجھا جاتا ہے؟ اپنی زِندگی کو پیسے پر مرکوز کرنے کے کیا خطرات ہیں؟ اپنی حاصل کردہ نَعمتوں پر ہم کِس طرح قناعت کرسکتے ہیں؟

اِن آیات کے مطابق، صحائف کو جاننے اور اِن کا مُطالعہ کرنے والوں کو کون سی برکات حاصل ہوتی ہیں؟ شاید خاندانی اَرکان اُن صحائف کا اِشتراک کرسکتے ہیں جو اُنھیں خاص طور پر ”فائِدہ مند“ لگیں۔

پَولُس اُنیسمُس کے لیے کیا کرنے کو تیار تھا؟ یہ اُس کام سے کیسے مطابقت رکھتا ہے جو مُنّجی نے ہمارے واسطے خُوشی سے کیا؟ (مزید دیکھیں ۱ تیمِتھُیس ۲: ۵–۶؛ عقائد اور عہود ۴۵: ۳–۵)۔ ہم کیسے پَولُس اور مُنّجی کے نمُونہ کی پیروی کرسکتے ہیں؟