۱ کُرنتھِیوں ۸–۱۳

رُوحانی تجربات، حتّیٰ کہ مُعجِزانہ بھی، ہمیں اَیسی آزمائشوں سے مستثنیٰ نہیں کرتے جو ”اِنسان کے لیے عام ہیں“ (۱ کُرنتھِیوں ۱۰: ۱۳)۔ یہی ایک وجہ ہو سکتی ہے جس سے متعلق پَولُس نے لِکھا تھا کہ موسیٰ کے ایّام میں بنی اِسرائیل نے آزمائش کے ساتھ کیسے جدوجہد کی، حالانکہ اُنھوں نے بڑے مُعجِزے دیکھے تھے (دیکھیں خروج ۱۳: ۲۱؛ ۱۴: ۱۳–۳۱)۔ جب آپ ۱ کُرنتھِیوں ۱۰: ۱–۱۳ پڑھتے ہیں، تو بنی اِسرائیل کے تجربات میں سے آپ پر کون سی تنبیہہ لاگو ہوتی ہے؟ آسمانی باپ نے کِس طرح آپ کے لیے آزمائش سے ”نِکلنے“ کی راہ بھی پَیدا کی؟ (مزید دیکھیں ایلما ۱۳: ۲۷–۳۰؛ ۳ نیفی ۱۸:۱۸–۱۹)۔

اگرچہ عشائے ربانی کی رسم ایک فرد اور خُداوند کے درمیان ذاتی عہد ہے، یہ ایک ایسا تجربہ ہے جس کا ہم دُوسروں کے ساتھ اشتراک بھی کرسکتے ہیں—ہم تقریباً ہمیشہ مُقدّسین کے ایک بَدَن کی حیثیت سے ایک دُوسرے کے ساتھ عشائے ربانی لیتے ہیں۔ عشائے ربانی کے بارے میں پَولُس کی تعلیم پڑھیں، اور اِس بارے میں سوچیں کہ یہ پاک شراکت مسِیح میں ”بہُت سے“ مُقدّسین کو ”ایک“ بننے میں کِس طرح مدد کرسکتی ہے (۱ کُرنتھِیوں ۱۰: ۱۷)۔ دُوسرے پیروکاروں کے ساتھ عشائے ربانی میں حصّہ لینے سے آپ کِس طرح مضبُوطی حاصل کرسکتے ہیں؟ یہ عشائے ربانی کے لیے آپ کی تیاری کے طریقہ پر کیسے اثر انداز ہوتا ہے اور آپ اپنے بپتِسمہ کے موقع پر باندھے جانے والے عہود کو برقرار رکھنے کی کِس طرح کوشش کرتے ہیں؟

پَولُس نے مردوں، عَورتوں اور خُداوند کے درمیان تعلقات کے بارے میں تعلیم دینے کے لیے لباس اور تربیت کے ثقافتی رسم و رواج کا حوالہ دیا تھا۔ اگرچہ ہم آج اِن رسم و رواج کی پیروی نہیں کرتے ہیں، ہم پھر بھی ۱ کُرنتھِیوں ۱۱:۱۱ میں پَولُس کے اِس اعلان سے سیکھ سکتے ہیں کہ شادی اور کلیسیا دونوں میں، خُداوند کے منصوبے میں مرد اور عَورت دونوں کی ضرورت ہوتی ہے۔ جیسا کہ بزرگ ڈیوڈ اے بیڈنار نے سِکھایا، ایک ساتھ سرفرازی کی طرف آگے بڑھتے ہوئے ”مرد اور عَورت کا مقصد ایک دُوسرے سے سیکھنا، ایک دُوسرے کو مضبُوطی بخشنا، برکت دینا اور ایک دُوسرے کی تکمیل کرنا ہے“ (”We Believe in Being Chaste،“ انزائن یا لیحونا، مئی، ۲۰۱۳، ۴۲؛ مزید دیکھیں مرقس ۱۰: ۶–۹)۔

۱ کُرنتھِیوں ۱۲–۱۳ میں رُوحانی نَعمتوں کی فہرست تمام نَعمتوں کا احاطہ نہیں کرتی ہے۔ آسمانی باپ کی عطاکردہ رُوحانی نَعمتوں کی شناخت اور اِن سے متعلق غور و فکر کی شروعات کرنے کے لیے یہ ایک اچھّا حوالہ ہے۔ آپ پَولُس کی نَعمتوں کی اِس فہرست میں اُن تمام نَعمتوں کو شامل کرسکتے ہیں جو آپ نے دُوسروں میں، اپنے آپ میں، یا صحائف کے لوگوں میں پائی ہیں۔ اگر آپ نے بطریقی برکت حاصل کی ہے، تو اِس میں آپ کی چند رُوحانی نَعمتوں کا بھی ذکر ہوگا۔ یہ نَعمتیں خُدا کی بادشاہی کی تعمیر میں کیسے ہماری مدد کرتی ہیں؟ غور کریں کہ آپ ”بڑی سے بڑی نَعمتوں“ کی آرزُو کے لیے کیا کریں گے (۱ کُرنتھِیوں ۱۲: ۳۱)۔

مزید دیکھیں مرونی ۱۰: ۸–۲۱، ۳۰؛ عقائد اور عہود ۴۶: ۸–۲۶؛ اِیمان کے اَرکان ۱: ۷۔

چونکہ پَولُس نے اِنجیل کے مُوافِق زِندگی گزارنے کا موازنہ دَوڑ میں حصّہ لینے کے ساتھ کیا، اِس بات کی وضاحت کے لیے آپ ایک خاندانی دَوڑ منعقد کرسکتے ہیں۔ دَوڑ ختم کرنے والے ہر فرد کو ایک تاج سے نوازیں، اور اِس بات پر تبادلہ خیال کریں کہ وہ سب جو اِس زِندگی میں یِسُوع مسِیح کی پیروی کرنے میں مستعد رہتے ہیں وہ ”نہ مُرجھانے والا“ سَہرا حاصل کریں گے (۱ کُرنتھِیوں ۹: ۲۵؛ مزید دیکھیں ۲ تِیمُتھیُس ۴: ۷–۸)۔ دَوڑ کی تیاری کے لیے جِیتنے والا کیا کرسکتا ہے؟ اِسی طرح، ہم آسمانی باپ کے پاس واپس لوٹنے کی تیاری کے لیے کیا کرسکتے ہیں؟

سب کو ایک خاندانی رُکن کے نام کے ساتھ کاغذ کا ایک ٹکڑا دینے پر غور کریں۔ سب سے کہیں کہ وہ اُس شَخص کی رُوحانی نَعمتوں کی فہرست بنائیں جو وہ اُس شَخص میں پاتے ہیں۔ اِس کے بعد آپ کاغذوں کو دائرے میں ایک دُوسرے کو دے سکتے ہیں جب تک کہ ہر شَخص کو اپنے خاندان کے ہر فرد کی نَعمتوں کے بارے میں لکھنے کا موقع نہ مِل جائے۔

یِسُوع مسِیح کی گواہی حاصل کرنے کے لیے رُوحُ الُقدس کیوں ضروری ہے؟ ہم اپنی گواہیوں کو مضبُوط بنانے کے واسطے رُوحُ الُقدس کو دعوت دینے کے لیے کیا کر سکتے ہیں؟

پَولُس کی بَدَن کی تَمثِیل خاندانی اتحاد پر تبادلہ خیال کرنے کا ایک یادگار طریقہ ہوسکتا ہے۔ مثال کے طور پر، خاندان کے افراد صرف آنکھوں یا کانوں والے جسم کی تصویر بنانے کی کوشش کرسکتے ہیں (دیکھیں آیت ۱۷)۔ ایک دُوسرے کے ساتھ خاندانی فرد کی مانند سلوک روا رکھنے سے متعلق یہ آیات ہمیں کیا مشورت دیتی ہیں؟

پَولُس کی محبّت کی تعریف آپ کے خاندان کے لیے ایک اِلہامی مقولہ بن سکتی ہے۔ آپ خاندان کے ہر فرد کو آیات ۴–۸ میں سے کسی اصطلاح کا مُطالعہ کرنے کی تفویض دے سکتے ہیں اور باقی خاندان کو تعریف، مثالوں اور ذاتی تجربات کے اِستعمال سے اِن کا مطلب سِکھائیں۔ نِجات دہندہ کیسے اِن صفات کی ایک مثال ہے؟ آپ اِن میں سے ہر ایک اصطلاح کا اکٹھے پوسٹر بھی بناسکتے ہیں اور اِن کی نمائش اپنے گھر میں کرسکتے تھے۔ تخلیقی بنیں، کچھ نیا کریں!