اعمال ۱–۵

اعمال کی کتاب نِجات دہندہ کے اُوپر اُٹھا لِیے جانے کے بعد یِسُوع مسِیح کی کلیسیا کو قائم کرنے کی رَسُولوں کی کوششوں کو بیان کرتی ہے۔ اگرچہ یِسُوع مسِیح اب زمِین پر نہیں رہا تھا، اُس نے رُوحُ الُقدس کے ذریعہ مُکاشفہ کے وسیلہ سے کلیسیا کی قیادت کی۔ درج ذیل حوالہ جات کا جائزہ لیتے ہوئے آپ غور کریں کہ رُوحُ الُقدس نے مسِیح کی کلیسیا کے نئے راہ نماؤں کو کِس طرح ہدایت کی: اعمال ۱:۱–۸، ۱۵–۲۶؛ ۲: ۱–۴۲؛ ۴: ۱–۱۳، ۳۱–۳۳۔

خُداوند نے آپ کو کون سی تفویضات، بُلاہٹیں، یا ذمہ داریاں سونپی ہیں؟ آپ اِن ابتدائی رَسُولوں کے تجربات سے اپنی راہ نمائی کے لیے رُوحُ الُقدس پر بھروسا کرنا کیسے سیکھتے ہیں؟

زبان کی نَعمت بعض اوقات ایسی زبان بولنے کے مترادف سمجھی جاتی ہے جس کا فہم کوئی دوسرا نہیں رکھتا۔ تاہم، نبی جوزف سمتھ نے اعمال ۲ میں رُونما ہونے والے واقعات کا ذکر کرتے ہوئے یہ واضح کیا کہ رُوح کی نَعمتیں ”اُن لوگوں کے درمیان [اِنجیل] کی منادی کے مقصد کے لیے بخشی گئی تھیں جن کی زبان سمجھی نہیں جاتی تھی؛ جیسا کہ عِید پنتِکسُت کے دِن۔ … [زبان کی نَعمت] کا حتمی مقصد غَیر زبان والوں سے بات کرنا ہے“ (Teachings of Presidents of the Church: Joseph Smith [۲۰۰۸], ۳۸۳–۸۴)۔ عِید پنتِکسُت، یہُودِیوں کا ایک بڑا تہوار، کئی ممالک کے یہُودِیوں کو یروشلِیم میں لانے کا باعث بنتا تھا۔ زبان کی نَعمت نے اُن زائرین کو اپنی مادری زبانوں میں رَسُولوں کے اِلفاظ کو سمجھنے کی اجازت دی تھی۔

کیا آپ نے کبھی پنتِکسُت کے دِن والے یہُودِیوں کی طرح ”[اپنے] دِلوں پر چوٹ لگی“ محسوس کی ہے؟ (اعمال ۲: ۳۷)۔ ہوسکتا ہے کہ آپ نے ایسا کچھ کیا ہو جس پر آپ کو افسوس ہوا ہو، یا شاید صرف آپ اپنی زِندگی کو مکمل طور پر بدلنا چاہتے ہیں۔ ایسے احساسات کی صورت میں آپ کو کیا کرنا چاہیے؟ یہُودِیوں کے لیے پطرس کی مشورت اعمال ۲ :۳۸ میں پائی جاتی ہے۔ نوٹ کریں کہ اِنجیل کے پہلے اُصول اور رسوم (بشمول اِیمان، تَوبہ، بپتِسمہ، اور رُوحُ القُدس کی نَعمت—یا جس کا حوالہ بعض اوقات عقیدہِ مسِیح کے طور پر بھی دیا جاتا ہے) نے کِس طرح اُن تبدیل ہونے والوں کو متاثر کیا، جیسا کہ اعمال ۲: ۳۷–۴۷ میں درج ہے۔

ہوسکتا ہے کہ آپ نے پہلے ہی سے بپتِسمہ پا لیا ہو اور رُوحُ القُدس کی نَعمت حاصل کرلی ہو، تاہم آپ مسِیح کے عقیدے کو کِس طرح لاگو کرنا جاری رکھیں گے؟ بزرگ ڈیل جی رینلنڈ کے اِن اِلفاظ پر غور کریں: ”ہم بار بار … [مسِیح] پر بھروسہ کرنے، تَوبہ کرنے، بپتِسمہ لیتے وقت باندھے گئے عہود اور برکات کی تجدید کے لیے عشائے ربانی میں حصّہ لینے، اور رُوحُ الُقدس کو ایک اعلیٰ درجہ تک مستقل ساتھی کی حیثیت سے حاصل کرنے کی بدولت کامِل ہوسکتے ہیں۔ اَیسا کرنے کے باعِث، ہم مزید مسِیح کی مانند بن جاتے ہیں اور تمام لازم چِیزوں کے ساتھ، آخِر تک برداشت کرنے کے قابل ہوجاتے ہیں“ (”Latter-day Saints Keep on Trying،“ انزائن یا لیحونا، مئی ۲۰۱۵، ۵۶)۔

مزید دیکھیں ۲ نیفی ۳۱؛ ۳ نیفی ۱۱: ۳۱–۴۱؛ ۲۷؛ برائن کے ایشٹن، ”The Doctrine of Christ،“ انزائن یا لیحونا، نومبر ۲۰۱۶، ۱۰۶–۹۔

”تازگی کے دِن“ سے مراد فضل کے ہزار سال ہیں، جب یِسُوع مسِیح زمِین پر لوٹے گا۔ ”جب تک کہ وہ سب چِیزیں بحال نہ کی جائیں“ سے مراد اِنجیل کی بحالی ہے۔

لنگڑا آدمِی ہَیکل میں جانے والوں سے بِھیک مانگنے کی اُمید کر رہا تھا۔ لیکن خُداوند کے خادِموں نے اُسے کہیں زیادہ بخشش کی پیش کش کی۔ جب آپ اعمال ۳؛ ۴: ۱–۳۱؛ اور ۵: ۱۲–۴۲ کو پڑھتے ہیں، تو اِس بات پر غور کریں کہ بعد ازاں رُونما ہونے والے مُعجِزے نے درج ذیل پر کیا اثر ڈالا:

لنگڑا آدمِی

پطرس اور یُوحنّا

ہَیکل میں موجود گواہ

سَردار کاہن اور حکمران

دیگر مُقدّسین

کسی شَخص کی جانب سے اِنجیل کی تعلیم حاصل کرتے ہوئے کیا آپ نے کبھی ”[اپنے] دِلوں پر چوٹ لگی“ محسوس کی ہے؟ اِس احساس کا کیا مطلب ہے؟ اِن احساسات کے حامل ہوتے ہوئے یہ کہنا کیوں ضروری ہے کہ، ”ہم کیا کریں؟“

ہَیکل میں آدمِی نے غَیر متوقع برکت کیسے پائی؟ ہم نے کیسے آسمانی باپ کی برکات غَیر متوقع طریقوں سے حاصل کی ہیں؟

پطرس اور یُوحنّا کی وفاداری سے متعلق کونسی بات آپ کو متاثر کرتی ہے؟ ہم کیسے یِسُوع مسِیح کی اپنی گواہی میں نڈر ہوسکتے ہیں؟

آپ کا خاندان سادہ ملبوسات اور کچھ سکوں کے ساتھ حننِیاہ اور سفیرہ کی کہانی کی کردار نگاری کرنے سے لطف اندوز ہوسکتا ہے۔ ہم اِس کہانی سے کون سے اسباق سیکھتے ہیں؟ اپنے خاندان کی ضروریات پر مبنی، آپ دیانتداری، کلیسیائی راہ نماؤں کی تائید کرنے، یا تقدیس کے بارے میں گفتگو کرسکتے ہیں۔