اعمال ۶–۹

ایک بڑھتی ہوئی کلیسیا کے لیے بادشاہی میں خدمت کرنے والے شاگِردوں کی بڑھی تعداد کی ضرورت ہوتی ہے۔ اعمال ۶: ۱–۱۵ کے مطابق، بارہ رَسُول اپنے ساتھ خدمت کرنے والوں میں کونسی خوبیوں کی تلاش میں تھے؟ جب آپ اعمال ۶–۸ پڑھیں، نوٹ کریں کہ سِتفنُس اور فلِپَس جیسے لوگوں نے اِن اور دیگر خصوصیات کا مظاہرہ کیسے کیا۔ شمعُون میں کِس چِیز کی کمی تھی، اور ہم اُس سے رُجُوع لانے کی تیاری کے بارے میں کیا سیکھ سکتے ہیں؟

اِس بات کو یقینی بنانے کے لیے کہ آپ کا دِل ”خُدا کے نزدِیک خالِص“ ہے آپ کیا بدلنے کی ترغیب پاتے ہیں؟ (اعمال ۸: ۲۱–۲۲)۔ خُدا کی خدمت کرتے ہوئے یہ تبدیلی آپ کو کیسے برکت بخشے گی؟

اگرچہ، یہودی راہنماؤں پر لوگوں کو ممسوح کی آمد کے لیے تیار کرنے کی ذمہ داری عائد تھی، لیکن اُنھوں نے یِسُوع مسِیح کو مسترد کردیا تھا اور اپنے غرور اور خواہشِ اقتدار کی بدولت اُس کے مصلُوب ہونے کا مطالبہ کیا۔ اَیسا کیسے ہوا؟ سِتفنُس نے اعلانیہ کہا، ”تُم ہر وقت رُوح اُلقدّس کی مُخالفت کرتے ہو“ (اعمال ۷: ۵۱)۔ آپ کے خیال میں رُوح اُلقدّس کی مُخالفت کرنے سے کیا مراد ہے؟ رُوحُ الُقدس کی مُخالفت کیسے نِجات دہندہ اور اُس کے نبیوں کو رد کرنے کا سبب بن سکتی ہے؟

جب آپ اعمال ۶–۷ پڑھیں، تو دیگر اَیسے پیغامات کو تلاش کریں جو سِتفنُس نے یہُودِیوں کو سِکھائے تھے۔ وہ کِن رویوں کے خلاف خبردار کر رہا تھا؟ کیا آپ اپنے اندر بھی اِسی طرح کے رویوں کو بھانپ پاتے ہیں؟ رُوحُ الُقدس کی مُخالفت کے نتائج کے بارے میں سِتفنُس کے اِلفاظ آپ کو کیا سِکھاتے ہیں؟ آپ اپنی زِندگی میں رُوحُ الُقدس کی سرگوشیوں کو کِس طرح زیادہ حساس طریقے سے سُن سکتے اور اِن پر عمل پیرا ہو سکتے ہیں؟

سِتفنُس یِسُوع کے جی اُٹھنے کے بعد پہلا مسیحی شہید تھا (کوئی شَخص جسے اُس کے عقائد کی وجہ سے قتل کیا جائے)۔ تاریخ میں بہت سے دُوسرے مُقدّسین کو بھی قتل کر دیا گیا کیونکہ اُنھوں نے یِسُوع مسِیح پر اپنے اِیمان سے انکار نہ کیا۔ اِن میں سے کچھ کا ذکر ۲ توارِیخ ۲۴: ۲۰–۲۱؛ مرقس ۶: ۱۷–۲۹؛ اعمال ۱۲: ۱–۲؛ مُکاشفہ ۶: ۹–۱۱؛ مضایاہ ۱۷: ۲۰؛ ایلما ۱۴: ۸–۱۱؛ ہیلیمن ۱۳: ۲۴–۲۶؛ عقائد اور عہود ۱۰۹: ۴۷–۴۹؛ ۱۳۵: ۱–۷؛ اور ابرؔہام ۱: ۱۱ میں ملتا ہے۔ نِجات دہندہ کی قِیامت کے بعد، یُوحنّا کے سِوا غالباً باقی تمام رَسُول شہید ہوئے تھے۔

آپ اعمال ۸: ۲۶–۳۹ میں درج کہانی سے اِنجیل پھیلانے کی بابت کیا سیکھتے ہیں؟ رُوحُ الُقدس نے فلِپَس کی کِس طرح مدد کی؟ دُوسروں کے ساتھ اِنجیل کا اشتراک کرنا کیسے ایک راہ دکھانے والے کی مانند ہے؟ (دیکھیں اعمال ۸: ۳۱)۔

ساؤل کا رُجُوع لانا بہت اچانک محسوس ہوتا ہے؛ وہ مسِیحیوں کو قید خانے میں ڈالنے کی بجائے ”فوراً“ عِبادت خانوں میں مسِیح کی منادی کرنے لگا (اعمال ۹: ۲۰)۔ جب آپ اُس کی کہانی پڑھتے ہیں تو غور کریں کہ وہ کیوں رُجُوع لانے پر آمادہ ہوا تھا۔ (ساؤل کے رُجُوع لانے کے بارے میں اُس کا اپنا بیان پڑھنے کے لیے، دیکھیں اعمال ۲۲: ۱–۱۶ اور ۲۶: ۹–۱۸۔ نوٹ کریں کہ اِن بیانات تک، ساؤل کا نام پَولُس میں تبدیل ہوگیا تھا۔)

اگرچہ یہ سچ ہے کہ ساؤل کا تجربہ غیر معمولی ہے—زیادہ تر لوگوں کے لیے، رُجُوع لانے کا عمل بہت طویل عمل ہوتا ہے—کیا کوئی ایسی بات ہے جو آپ ساؤل سے رُجُوع لانے کے بارے میں سیکھ سکتے ہیں؟ حننِیاہ اور دُوسرے شاگردوں نے جس طرح ساؤل کے رُجُوع لانے پر ردِعمل کا اظہار کیا اُس سے آپ کیا سیکھ سکتے ہیں؟ آپ اپنی زِندگی میں اِن اسباق کے اطلاق کے لیے کیا کریں گے؟ آپ دُعا کے ذریعے پوچھنے سے آغاز کرسکتے ہیں، جیسے ساؤل نے کیا، ”تُو مُجھ سے کیا چاہتا ہے؟“ یا آپ یہ سوال اپنے روزنامچے میں بطور عنوان لکھ سکتے ہیں اور وقت گزرنے کے ساتھ ساتھ حاصل ہونے والے تاثرات کو قلمبند کریں۔

مزید دیکھیں ڈیٹئر ایف اوکڈورف، ”Waiting on the Road to Damascus،“ انزائن یا لیحونا، مئی ۲۰۱۱، ۷۰–۷۷؛ ”The Road to Damascus“ (ویڈیو، ChurchofJesusChrist.org)۔

اعمال ۶: ۸ اور اعمال ۷: ۵۱–۶۰ میں سِتفنُس کے ساتھ پیش ہونے والے واقعات کا موازنہ لُوقا ۲۳: ۱–۴۶ میں مُنّجی کے ساتھ پیش ہونے والے واقع کے ساتھ کریں۔ سِتفنُس نے نِجات دہندہ کی مثال کی پیروی کیسے کی؟

جب اُس پر ظلم کیا جا رہا تھا تو رُوحُ اُلقدس نے سِتفنُس کو کِس طرح برکت دی؟ ہم نے کب مشکل اوقات میں رُوحُ الُقدس سے قوت پائی ہے؟

کیا آپ کے خاندان کو معلوم ہے کہ ”پَینے کی آر پر لات مارنے“ کا کیا مطلب ہے؟ پَینا جانوروں کو چلانے کے لیے استعمال ہونے والا ایک نوکیلا نیزہ تھا۔ اکثر جانور مار کھانے پر واپس ٹکر مارتے تھے، جس کی وجہ سے یہ نوکیلا نیزہ جانوروں کے گوشت میں مزید اندر چلا جاتا تھا۔ یہ مشابہت ہم پر کِس طرح لاگو ہوسکتی ہے؟

اعمال ۹: ۳۲–۴۳ میں پائی جانے والی کہانیوں کی تصویریں بنانے کے لیے اپنے خاندانی اَرکان کو دعوت دینے پر غور کریں۔ وہ اَینیاس، تبِیتا، اور یافا کی بیواؤں سے حقیقی شاگِردی کے بارے میں کیا سیکھتے ہیں؟ ”نیک کام اور خَیرات“ کرنے والا خُداوند پر بھروسا رکھنے سے دُوسروں کی کِس طرح مدد کرسکتا ہے؟ (دیکھیں اعمال ۹: ۳۶، ۴۲)۔