අපගේ ඉගෙනීම සඳහා අපි වගකිව යුතුය

අප ගෝලයන්වීමේ මාවතේ අලුත් අයද නැතහොත් අපගේ ජීවිත කාලය පුරාම එහි ගමන්කර තිබේද යන්න නොසලකමින්—ගැලවුම්කරුවාණන්ගේ ආරාධනය වන, “එන්න, මා අනුගමනය කරන්න” යන්න සියල්ලන්ටම අදාළ වේ. ආඥා පිළිපැදීමට වෑයම් කළ ධනවත් තරුණයෙකුට උන්වහන්සේ කළ ආරාධනය මෙයයි (මතෙව් 19:16–22 බලන්න). ඔහු ඉගෙනගත් දෙය—හා අප සියල්ලන්ම ඉගෙනගත යුතු දෙයනම්—ශ්‍රාවකයෙකු වීම යනු අපගේ මුළු ආත්මයම ස්වර්ගික පියාණන්වහන්සේට හා යේසුස් ක්‍රිස්තුස්වහන්සේට ලබාදීමයි. අපට නැති දේ හඳුනාගැනීමෙන්, වෙනස් කිරීමෙන් සහ ඒවා වඩාත් හොඳින් අනුගමනය කිරීමට උත්සාහ කිරීමෙන් අපි අපගේ අනුගාමිකත්වය තුළ ප්‍රගතියක් ලබන්නෙමු.

ගැලවුම්කරුවාණන්ගෙන් ඉගෙනීම ආරම්භවන්නේ උන්වහන්සේ ඉගැන්වූ දේ තේරුම්ගැනීමට අප උත්සාහ කරන විටය. නිදසුනක් වශයෙන්, ඔබ පහත සඳහන් කරුණු ගවේෂණය කරන විට සමාවදීම පිළිබඳ ඔබේ අවබෝධය ගැඹුරුවන්නේ කෙසේද?

ගැලවුම්කරුවාණන්ගේ ඉගැන්වීම් (මතෙව් 6:14–15; 18:21–35 බලන්න)

උන්වහන්සේගේ ජීවිතයෙන් උදාහරණයක් (ලූක් 23:33–34 බලන්න)

කෙසේවෙතත්, ගැලවුම්කරුවාණන් උගන්වන දේ අනුව ජීවත්වීමෙන් මිස ඉගෙනීම සම්පූර්ණ නොවේ. ඔබට වඩාත් සමාවදිය හැක්කේ කෙසේද?

ඔබට තවත් ඉගෙනගැනීමට අවශ්‍ය නම්, ආදරය හෝ නිහතමානීකම වැනි, තවත් ශුභාරංචි මූලධර්මයක් සමග මෙම ක්‍රියාකාරකම උත්සාහ කරන්න.

වැඩිහිටි ඩෙවිඩ් ඒ. බෙඩ්නර් මෙලෙස ඉගැන්වීය: “හුදෙක් ක්‍රියාත්මක කරවන අසන්නන් පමණක් නොවී, ඉගෙනගන්නන් වශයෙන්, ඔබත් මමත් ක්‍රියා කළ යුතු අතර වචනය පිළිපදින්නන් විය යුතුය. ඔබත් මමත් ඇදහිල්ලෙන් ඉගෙනීමට උත්සාහ කරන නියෝජිතයන්ද, නැත්නම් උගන්වන හා ක්‍රියාකරවන තෙක් අප බලා සිටිනවාද? … නිවැරදි මූලධර්මයන්ට අනුකූලව ක්‍රියාකිරීමෙන් ඉගෙනගන්නා අයෙක් ඔහුගේ හෝ ඇයගේ හදවත ශුද්ධාත්මයාණන් වෙත විවෘතකර උන්වහන්සේගේ ඉගැන්වීමට, සාක්ෂි දරන බලයට, සහ සනාථ කරන සාක්ෂියට ආරාධනා කරයි. ඇදහිල්ලෙන් ඉගෙනීමට අවශ්‍ය වන්නේ අධ්‍යාත්මික, මානසික සහ ශාරීරික වෙහෙසක් මිස නිෂ්ක්‍රීය පිළිගැනීමක් නොවේ” (“Seek Learning by Faith,” Ensign, Sept. 2007, 64).

ඔබේම ඉගෙනීමේ වගකීම භාරගැනීම යන්නෙන් අදහස් කරන්නේ කුමක්ද? වැඩිහිටි බෙඩ්නර්ගේ ප්‍රකාශයේ සහ පහත සඳහන් ශුද්ධලියවිලි පද තුලින් පිළිතුරු සොයා බලන්න: යොහාන් 7:17; 1 තෙසලෝනික 5:21; යාකොබ් 1:5–6, 22; 2:17; 1 නෙපි 10:17–19; 2 නෙපි 4:15; ඇල්මා 32:27; සහ දහම සහ ගිවිසුම 18:18; 58:26–28; 88:118. ශුභාරංචිය ඉගෙනගැනීමට වඩාත් ක්‍රියාශීලී වීමට ඔබව පොළඹවන්නේ මොනවාද?

ඔවුන්ගේ ජීවිතයේ කුමක් සිදුවුවද, කිසිවිටෙකත් ඔවුන්ගේ ඇදහිල්ල නැති නොවන බවක් ඔබ දන්නා අය සිටිය හැකිය. ගැලවුම්කරුවාණන්ගේ උපමාවේ බුද්ධිමත් කන්‍යාවන් පස්දෙනා ගැන ඔවුන් ඔබට මතක්කරදෙනු ඇත (මතෙව් 25:1–13 බලන්න). ඔබ නොදකින දෙය නම් සත්‍යය පිළිබඳ ඔවුන්ගේ සාක්ෂි ශක්තිමත් කිරීමට ඔවුන් දරන උත්සාහයයි. මෝඩ කන්‍යාවන් ඉගෙනගත් පරිදි, අපට වෙනත් කෙනෙකුගෙන් හැරීම ණයට ගත නොහැකි නිසා, අප සියලුදෙනා අපගේ සාක්ෂි ශක්තිමත් කිරීමට උනන්දුවෙන් උත්සාහ කළ යුතුය.

අපි අපේම සාක්ෂි ලබාගෙන පෝෂණය කරන්නේ කෙසේද? පහත සඳහන් ශුද්ධලියවිලි පද ගැන මෙනෙහි කරන විට ඔබේ අදහස් ලියන්න: ලූක් 11:9–13; යොහාන් 5:39; යොහාන් 7:14–17; ක්‍රියා 17:10–12; 1 කොරින්ති 2:9–11; සහ ඇල්මා 5:45–46. (තවත් බලන්න “Testimony,” Gospel Topics, topics.ChurchofJesusChrist.org.)

ඔබ අධ්‍යාත්මික දැනුම ලබාගන්නා විට, ප්‍රශ්න ඔබේ මතකයට එනු ඇත. පහත සඳහන් මූලධර්ම මගින් ඇදහිල්ල සහ සාක්ෂි ගොඩනංවන ආකාරයෙන් ප්‍රශ්න වලට පිළිතුරු සැපයිය හැකිය:

1. දිව්‍යමය වශයෙන් පත්කරන ලද ප්‍රභවයන් තුළින් අවබෝධය ලබාගන්න. දෙවියන්වහන්සේ සියලු සත්‍යයේ උල්පත වන අතර උන්වහන්සේ ශුද්ධාත්මයාණන්වහන්සේ තුලින්, ශුද්ධලියවිලි තුලින් සහ උන්වහන්සේගේගේ අනාගතවක්තෘවරුන් හා ප්‍රේරිතයන් තුලින් සත්‍යය හෙළිකරයි.

2. ඇදහිල්ලෙන් ක්‍රියා කරන්න. පිළිතුරු එකවරම නොපැමිණෙන්නේ නම්, නියමිත වේලාවට ස්වාමින්වහන්සේ පිළිතුරු හෙළිකරනු ඇතැයි විශ්වාස කරන්න. මේ අතර, ඔබ දැනටමත් දන්නා සත්‍යය අනුව ජීවත්වන්න.

3. සදාකාලික ඉදිරි දර්ශනයක් තබාගන්න. ලෝකය දකින ආකාරයට නොව, ස්වාමින්වහන්සේ දකින ආකාරයට දේවල් දැකීමට උත්සාහ කරන්න. ඔබගේ ප්‍රශ්න අපගේ ස්වර්ගික පියාණන්වහන්සේගේ ගැලවීමේ සැලැස්මේ සම්බන්ධය තුලින් බලන්න.

මේ වසරේ අලුත් ගිවිසුමෙන් ඉගෙනගැනීමට සූදානම්වීමට ඔබේ පවුලට උපකාර කළහැකි එක් හොඳ ක්‍රමයක් නම් වපුරන්නාගේ උපමාව සමාලෝචනය කිරීමයි. උපමාවේ විස්තර කර ඇති බිම් වර්ග දෘශ්‍යමාන කිරීම සඳහා ඔබේ පවුලේ අයට ඔබේ නිවස අසල විවිධ වර්ගයේ බිම් දෙස බලා විනෝද විය හැකිය. අපේ නිවසේ “හොඳ භූමියක්” අස්වැද්දීමට අපට කුමක් කළ හැකිද? (මතෙව් 13:8).

“පවුලේ යාච්ඤාව, පවුල් නිවාස සන්ධ්‍යාව, ශුභාරංචි අධ්‍යයනය සහ උපදෙස් සහ යහපත් පවුල් ක්‍රියාකාරකම් සඳහා ඉහළම ප්‍රමුඛතාවය ලබාදෙන ලෙස අපි දෙමාපියන්ට හා දරුවන්ට උපදෙස් දෙන්නෙමු. කෙසේවෙතත්, සුදුසු සහ සරිලන වෙනත් ඉල්ලීම් හෝ ක්‍රියාකාරකම් කුමක් වුවත්, දෙමාපියන්ට සහ පවුල් වලට පමණක් ප්‍රමාණවත් ලෙස ඉටුකළ හැකි දිව්‍යමය වශයෙන් පත්කරන ලද රාජකාරි විස්ථාපනය කිරීමට ඒවාට ඉඩනොදිය යුතුය” (“Letter from the First Presidency,” Liahona, Dec. 1999, 1).

නව වසරක ආරම්භය ඔබගේ නිවස වඩාත් ශුභාරංචි කේන්ද්‍රගත කිරීම පිළිබඳව සාකච්ඡා කිරීමට පවුල් එකතුවක් පැවැත්වීමට හොඳ කාලයකි. ගලාති 5:22–23 සහ පිලිප්පි 4:8 හි ආශිර්වාද හා උපදෙස් කියවන විට මතකයට එන අදහස් මොනවාද? සමහරවිට ඔබට ඔබේ අරමුණු සිහිපත් කරගැනීම සඳහා නිවස වටා පෝස්ටර් සෑදිය හැකිය.