Fan ko Galabthir—Falaag Rogon Pifakam ko fare Wo’en e M’ag rok Got nib Manechubog

Nephi e machib nag ni “fare garog niʼir e [gimed] ra yaen riy” ni fare kanawo’en e m’ag e ir fare “kalngaenʼ nge tawfe ko raen” (2 Nephi 31:17). Gay rogon ni ngam ayuweg pifakam ko tawfe nge thapeg e Kan ni Thothup erayog ninge tay ay raed nga dakean ere pi’ i kanawo’ ney. Tiney ni ngan gay rogon e ma buch udakean e pin’en ni ngad machib niged ni mornga’agen e mich ngak Yesus Kristus nge kalngan’. Ma kab mu’un ni ngan machib nag ni rayog ni ngad be’ech niged biyay fare m’ag ko tawfe rodad u dakean e sakrament ni gadadma fek ni gubin e wiik.

Ba’aray boche ayuw ni rayog ninge ayuwegem: 2 Nephi 31; babyor ko fare Pi Tafagar magazine bay mornga’agen e tawfe riy; Fapi Topics nge Questions, “Tawfe,” Gospel Library.

• Tin nibe buch rom nibe gel nag e mich rom ngak e Chitamangiy nu Tharmiy nge Yesus Kristus, mu ser nag ngak pifakam. Ayuwegrad ni ngayog ni ngar nangfaned ni mich e ban’en nrayog ninge gel buch’uw nge buch’uw ulane yafos. Mang boch ban’en nrayog ni nge rin’ pifakam ninge gelnag e mich rorad ngak Kristus um’on ningar tawfe gad?

• Fa’anra qoloboch pifakam, mu non ngorad ufithik e falfalaen’ ko fare tawa’ath nima yib u dakean e kalngan’uy. Ma fa’an gara mel’eg ban’en ni dani fel’, mu ser nag fare falfalaen’ nima yib udakean e kalngan’ ko denen rom ni gubin e ran. Micheg nag mornga’agen Yesus Kristus ni yim’ nibochane pi denen rodad, ma rayog ni ngan kalngan’ ni gubin e ran, min n’agfan e pi denen rodad, ma gadad thapeg gelingdad ni ngad thilgad. Fa’anra ke yib fakam nibe ning e min’agfan, mu n’agfan rok u fithik e falfalaen’.

• Moeg ngak fakam mornga’agen e tawfe rom. Dag ya’an e sassing nikan fek ni ya’an mag ser nag rogon e tafney rom riy. Weliy rogon en’en nikam thamiy riy, nge rogon nikam ayuweg fare m’ag ko tawfe rom nike ayuwegnem kam nang Yesus Kristus nib gel, nge rogon nibe ul’ul’ fare m’ag rom ma be tawa’ath nigem. Pi’ e athamgil ngak fakam ni nge fith e duwer.

• Napan e yira tay rebe tawfe nifan ko tabinaew rom fa ward rom, mu fek fakam ninge guy rogon. Mu weliy fakam e n’en nikam guyew nge n’en nikam thamiyew riy. Fa’anra rayog, mu non ngak facha’ nikam tawfe nag mag fith e duwer ni woed e bin ba’aray: “Uw rogon nikam duugliy e biney ni ngam rin’? Uw rogon nikam fal’ag rogom ngay?”

• Fa’anra kam guy fakam nibe rin’ ban’en nike michmicheg nira rin’, moeg e thin ngak nirib mangil. Moeg ni fa’an yira ayuweg etin nikan michmicheg ni yira rin’ erayog ninge ayuwegney ko fapi m’ag ni bayda ngongliyed ko tawfe. Mang e gadadma michmicheged ngak Got ko napan nikan tawfe nagdad? Mnag e ke michmicheg nag ngodad? (Muguy ko Mosiah 18:8–10, 13.)

• Weliy mornga’agen ni bochane kan michegnem ko Fare Galasia ku Yesus Kristus ni Fan ko Gidii’en Got ko Tin Tomur e Rran e ke tawa’ath nigem. Woed ni, ba uw rogon nikan chugur nigem ngak e Chitamangiy nu Tharmiy nge Yesus Kristus ni bochane pigpig rom ngak e gidii’ nge gidii’ nibe pigpig ngom? Ayuweg fakam ni nge lemnag e rogon nrayog ni nge pigpig me ayuweg boche gidii’ ko Galasia bachane ir e chon ko Galasia. Mag ayuwegrad ni ngar guyed fare falfalaen’ nima yib udakean e pigpig.

• Napan nra buch ban’en romew fakam nib thothup (ni woed u galasia, fa ngiyal’ ni gamew be be’eg e babyor nib thothup, fa pigpig ngak be’), mu weliy ngorad epin’en nikam thamiy nib thothup. Pining fakam nge weliy etin nike thamiy. Ba thilthil rarogon nima non fare Kan Thothup ngak e gidii’, nib mu’un nib thil rogon nima non ngom. Mu ayuweg fakam nge poey rogon me ser nag ngam mornga’agen etin nibe buch rok napan e bayi thamiy rogon fare Kan ni Thothup nibe gagiyegnag e yafos rok.

• Yaliyed ya’an boche video nibay ko Gospel Library ni kanog fithing ni “Motoyil Ngak!” Weliyed rogon nib thilthil rogon nima rung’ag e tapigpig ku Somoel laman. Pining fakam nge yoloey fa achay nag fa fek ya’an rebe video ko rogon nima rung’ag laman Somoel.

• Mu tay ni fare sakrament e bang nib thothup ma bang nib falfalaen’ ulane yafos rom. Moeg ngak fakam rogon ni gama tafney nag Yesus Kristus ko napan e sakrament. Ayuweg fakam nge duugliy rogon ni nge dag ni fare sakrament e ban’en nib thothup ngorad. Woed, ni motoyil ko thin ko meybil ko sakrament e rayog ninge pugoran ngodad e m’ag rodad ko tawfe.

• Bo’or e babyor ko Pi Tafagar ko magazine ni bay e article riy, yat, nge gosgos nrayog ninge ayuweg e bitir nge fal’ag rograd ko tawfe nge michegnag. Pag fakam nge mel’eg boch ninge be’eg me falfalaen’mew ngay. (Ngkum guy ko fapi collection ko “Fal’ag Rogoy nifan e Tawfe” ulane section ko bitir ko fare Gospel Library.)

Fare priesthood e ir gelngin nge matawon ku Got nifan e yibilynag e bitir Rok. Priesthood rok Got e bay e doba’ ulan Fare Galasia ku Yesus Kristus ni Fan ko Gidiiʼen Got ko Tin Tomur e Rran. “Gubin chongin e memba ko Galasia nibe ayuweg e m’ag rok—bpin, pumoon, nge bitir—e yibe tawa’ath nagrad ko gelngin Got ulane tabinaew rorad nge gelingrad nge pi tabinaew rorad” (General Handbook: Pigpig u lan Fare Galasia ku Yesus Kristus ni fan ko Gidii’en Got ko Tin Tomur e Rran, 3.6, Gospel Library). Biney e gelngin era pi’ e ayuw ko muruwel rok Got ko wo’en e thap nge n’uf ngalang ko faflalaen’ ulane yafos rorad nge lane tabinaew rorad (muguy ko General Handbook, 2.2).

Napan era pigpig boche pumo’on fa bpin ulane Galasia, ma yaedma pigpig udakean fare gelngin e priesthood, utan pa’ e pi’in nibay fapi kiy ko priesthood rorad. Gubin pifak e Chitamangiy nu Tharmiy—pifak ni pumo’on nge bpin—e yira tawa’ath nagrad napan e yadra yib ni ngar nanged fan fare priesthood Rok.

Gadad ma thapeg fapi gam’ing udakaen matawon e priesthood. “Chonggin e Galasia nib pumo’on nib fel’ thawingraed e yadma thapeg mot’won e priesthood roraed u dakean e priesthood ni yima pi’ nge gam’ing riy ko fapi office ko priesthood” (General Handbook, 3.4). Pi’in nibay mat’wonrad ko priesthood e rayog ninge pi’ be’ mat’won rad nibay fapi kiy ko priesthood rorad ni ngar rin’ed fapi gam’ing nibay e priesthood riy.

Ra ngan fil boch mornga’agen e priesthood, muguy ko Russell M. Nelson, “Bogi Tawa’ath nib Thothup,” Liahona, Nov. 2019, 76–79; Russell M. Nelson, “Fare Pilwon Gelngin e Priesthood,” Liahona, May 2016, 66–69; “Yalen e Priesthood,” guruy 3 ulane General Handbook.

• Mu tay ni fapi gam’ing ko priesthood e kabang ko yafos rom ni gubin ngiyal’. Woed ni, ngam ayuweg fakam nge fal’ag rogon nib thothup ko gubin e wiik nifan fare sakrament. Pi’ e athamgil ngak fakam ninge ning e ayuw ko fapi tawa’ath nima yib ko priesthood ni fa’anra kar m’ar gad fa bat’uf ningan powi’iyrad kotin ni yadbe rin’. Mu gay rogon nga um weliy rogon nibe tawa’ath nigem Somoel nge tabinaew rom udakean gelngin.

• Napan e bay mu be’eged e babyor nib thothup utabaang, mag sap nag rogon ni ngan weliy rogon nibe tawa’ath nag Got e gidii’ rok udakean gelngin. Mu ser nag rogon nike tawa’ath nigem Got udakean gelngin e priesthood Rok. Woed ni, fapi tawa’ath ni gadadma thapeg udakean fare priesthood, muguy ko General Handbook, 3.2, 3.5.

• Machib nag ngak fakam ni tomuren nikan tawfe, e rayog ni ngar thapaged gelngin Got ni fa’an yadra fok ko fare m’ag ko tawfe rorad. Be’eged utabaang e mulwol rok President Russell M. Nelson “Bogi Fla’ab nib Thothup” (Liahona, Nov. 2019, 76–79). Moeg ngak fakam ni fapi m’ag ko priesthood e ke fek gelngin Got ngalane yafos rom. Boch e list ko rogon nikan tawa’ath nagdad udakean gelngin Got, muguy ko General Handbook, 3.5.

• Weliyed mornga’agen e biney e duwer “Mang e ma rin’ e pi tapigpig rok Somoel?” Be’eged utabaang e Doctrine and Covenants 121:36–42, magmed sap nag e fulweg riy. Napan ni gara guy nibe rin’ fakam (fa be’) e pi yalen ney fa tin nibay ko pi vers ney, mag weliy rogon ni yaed be rin’.

• Napan e gara yus nag fa yus nag fakam reb e kiy ninge bing e mab fa karo, mu non ngak ko mornga’agen e pi key ney ni wod fapi kiy ko priesthood nibay ko tiyugang’. (Ko n’en nibe yipfan fapi kiy ko priesthood, muguy ko General Handbook, 3.4.1). Mang e ma “bing” fapi kiy ko priesthood fa “tabab” nag nifan ngodad? Ngkum guy ko Gary E. Stevenson, “Bu’uw Fapi Kiy nge Mot’won e Priesthood?,” Liahona, May 2016, 29–32; “Bo’or Fapi Kiy?” (video), Gospel Library.

  

  2:51

Fapi temple e kabang ko tonom ko Chitamangiy nu Tharmiy nifan ngak pifak Ulane nu’un rok Somoel, e gadadma ngongliy e m’ag nib thothup ngak e Chitamangiy nu Tharmiy napan e bayda uned ko fapi gam’ing nib thothup, ni gubin e be sapegdad ngak Yesus Kristus. Chitamangiy nu Tharmiy e ke pi’ kanawo’en nifan ngak gubin pifak ni ngar ngongliyed e m’ag miyad un ko fapi gam’ing, nib mu’un e gidii’ ngay ni dani thapeg ko biney e yafos. Ko fare duw nira gaman 12 e duw ku fakam, ma rayog ni ngar uned ko tawfe nge michegnag u temple nifan ko gidii’ ni kakarom nike yim’ (muguy ko 1 Korinths 15:29).

• Maen ko na’un rok Somoel ko urngin yay ni rayog rom. Mu weliy ngak pifakam fan ni gama yean nga temple nge rogon nima ayuwegnem e temple nge chuchugur nigem ngak e Chitamangiy nge Yesus Kristus.

• Sul udakean min weliy fapi duweg ko temple recommend utabaang. Rayog ni ngam pateg pages 36–37 ko Fan ko Gelngin e Pi’in ni Fal’yangren: Babyoren e Powi’iy ko Rogon ni Ngan Mel’eg. Weliy ngak fakam ko n’en nima buch ko ngiyal’ e interview ko temple recommend. Weliy fan nib ga’fan e temple recommend ngom.

• Be’eged utabaang e Malaki 4:6. Weliy rogon ni rayog ninge sul e t’ufeg rom ngak e gidii’ rom ni kakrom. Fil boch mornga’agen e gidii’ rom ni kakrom ko FamilySearch.org. Musap nag e gidii’ rom ni kakrom nib t’uf ningan tawfe nag min michegnag. Consultant ko ward temple nge cheppin e tabinaew erayog ninge ayuwegem.

• Mu filed utabaang boche talne ayuw ko collection nibay fithingan e “Temple” riy ko fare section ko bitir ko fare Gospel Library. (Ngkum guy ko “Fal’ag Rogon Fakam nifan ko fare Tawfe nge Michegnag ko Temple” ko ChurchofJesusChrist.org.)

Yibliy ko patriarchal e rayog ninge powi’iyey, me pi’ e gapas, me thogthog nagdad. Bay e mulwol riy nike yib rok e Chitamangiy nu Tharmiy ma rayog ninge ayuwegdad ngayog ningad nangedfan fandad nge muruwel rodad nib manechubog. Mu ayuweg fakam nge fal’ag rogon nge thapeg fare yibliy ko patriarchal mag fil ngorad fan nib ga’fan mab thothup e yibliy ko patriarchal.

Ra ngan fil boch mornga’agen, muguy ko fapi Topics nge Questions, “Fapi Yibliy ko Patriarchal,” Gospel Library.

• Weliy ngak fakam rogon nimu thapeg e yibliy ko patriarchal rom. Rayog ningam weliy rogon ni nimu fal’ag rogom ningam thapeg, rogon nike ayuwegem ke chugur nigem ngak Got, nge rogon nibe ul’ul’ nibe powi’iem u dakean e biney e tawa’ath. Ma krayog ningam pining fakam nge fith me non ngak boch e tabinaew ko rogon nikar thapeged e yibliy ko patriarchal.

• Be’eged utabaang e mulwol rok Elder Randall K. Bennett “Yibliy ko Patriarchal Rom—Bogi Thogthog nike Yib Rok e Chitamangiy nu Tharmiy” nge mulwol rok Elder Kazuhiko Yamashita “Ngiyal’ ningam Thapeg e Yibliy ko Patriarchal Rom” (Liahona, May 2023, 42–43, 88–90). Weliy ngomed e tin nikam filed ko fan ni ba’adag e Chitamangiy nu Tharmiy ni ngad thapeged e yibliy ko patriarchal. Ra ngan fil rogon ni ngan thapeg e yibliy ko patriarchal, rayog ni ngam guy ko General Handbook, 18.17.

• Ra bay reb e gidii’ rom ni kakrom nike thapeg e yibliy ko patriarchal, ma sana rayog ni ngam be’eg boch ngak fakam. Ra ngam fith fapi yibliy ko gidii’ rom ni kakrom, ma ngam log nin ko ChurchofJesusChrist.org, klik ko fapi Tools ko tobthung ko mat’aw ulang, mag mel’eg e Yibliy ko Tawa’ath.

• Tomuren nike thapeg fakam e yibliy ko patriarchal, mag pining be’ ko tabinaew rom nibay e chiney ninge yoloey ngabut’ etin nike thamiy ngak e bitir rom.

God e ba’adag ninge endow nag, fa yibliy, gubin pifak ko fare “gelngin nima yib u tharmiy” (Doctrine and Covenants 95:8). Kemus ni tabiyay e gadadma thapeg e birodad e endowment, machane fapi m’ag nikad ngongliyed ngak Got nge fare gelngin nib thothup nima pi’ ngodad ni bang fare endowment erayog ninge tawa’ath nagdad ni gubin e ran ulane yafos rodad.

• Tay rebe sassing ni ya’an e temple ulane tabinaew rom. Weliy ngak fakam rogon en’en nikam thamiy bangiyal’ ulane na’un rok Somoel. Gubin ngiyal’ ma nga um weliy mornga’agen e t’ufeg rom ngak Somoel nge na’un Rok nge fapi m’ag nikam ngongliy u roem. Mugay rogon ngam fek fakam nga temple nge un ko fapi tawfe nge michegnag ni yima rin’ nifan e gidii’ ni kakrom.

• Muguyew etin ba’aray utabaang temples.ChurchofJesusChrist.org . Be’eged e babyor ni woed e “Mornga’agen e Endowment ko Temple” nge “Fal’ag Rogoy nifan fare Na’un rok Somoel.” Pag fakam nge fith e duwer ko mornga’agen e temple. Ko rogon etin ni rayog ningan weliy u wuru’ e temple, muguy ko mulwol rok Elder David A. Bednar “Fal’ag Rogom Ngam Thapeg Gubin etin nib T’uf Ban’en” (Liahona, May 2019, 101–4; ngkum guy ko section ko fare “Tabinaew-Baga’fan u Tabinaew ma Be Pi’ e Galasia e Ayuw ningan fil Rogon nge Fal’ag Rogoy nifan e Temple”).

• Napan e bay mu unew fakam ko rebe pi gam’ing ney (ni woed e sakrament fa yibliy ko golnag), ma ngiyal’nem e ngamu weliy fan fare pow nibay rogon ko biney e gam’ing. Mang e be yipfan e biney e pow? Uw rogon nibe michmicheg mornga’agen Yesus Kristus? Biney erayog ninge fal’ag rogon fakam nge tafney nag fan fapi pow ko fapi gam’ing u temple, ni’ir e kuma michmicheg nag mornga’agen Yesus Kristus.

• Ayuweg fakam nge guy rogon nibe ayuweg fare m’ag ko tawfe nikan weliy rogon ulane Mosiah 18:10, 13 (ngkum guy ko fapi vers 8–9, nibe weliy mornga’agen fapi fal’ngin e m’ag). Ngkum ayuweg fakam nge guy rogon nibe tawa’ath nag Somoel rad. Pi’ e athamgil ngak fakam ninge gay rogon nga i fil ko fapi m’ag.

• Gubin ngiyal’ ma nga um weliy rogon fapi m’ag rom ko temple nibe powi’iy etin ni gabe mel’eg nge rogon nibe chugur nigem ngak Yesus Kristus. Yus nag fare General Handbook, 27.2, ngan guy fapi m’ag ni gadad ma ngongliy ulane temple. Ra kam thapeg fare endowment, rayog ningam weliy ngak fakam rogon e pi garment ney ko temple nibe pugoran ngom fapi m’ag rom ngak Yesus Kristus (guy ko “Maad ko Temple nib Thothup” [video], Gospel Library; Anette J. Dennis, “Mu Tay nga Dakeanem Yesus Kristus,” Liahona, May 2024, 10–13).

  

  4:12

Elder David A. Bednar e machibnag: “Bin th’abi ga’fan ni rayog ningam rin’ ninge fal’ag rogom ko fare pigpig e ngam mang reb e tamachib um’on ningam maen ko mission. … Gathi kemus ni ngan yean ko mission; ya ngan mang reb e tapigpig mag pigpig un’umngin napan e yafos rom u polo’ i gum’ircha’em, lanin’um, nge gelngim. … Gabe fal’ag rogom ko ba muruwel ko tamachib ni n’umngin napan e yafos rom” (“Mang Reb e Tamachib,” Liahona, Nov. 2005, 45–46). Tin nira buch rok fakam ninge mang reb e tamachib era tawa’ath nag e yafos rok ni n’umngin napan, ni gathi kemus ni ngiyal’ nem nibe pigpig nag e mission rok.

Ra ngam fil boech mornga’agen, muguy ko Russell M. Nelson, “Machibnag e Gospel ko Gapas,” Liahona, May 2022, 6–7; Gary E. Stevenson, “T’ufeg, Pining, Ngan Un Ngay,” Liahona, May 2022, 84–87; “Fil Rogon e Par ko Tamachib,” Gospel Library.

• Dag rogon ningan ser nag e gospel nib moem rogon. Gubin ngiyal’ ma ngamu fal’ag rogom ko ngiyal’ nrayog ningam weliy ko gidii’ mornga’agen etin ni gabe thamiy ni mornga’agen e Chitamangiy nu Tharmiy nge fare Tathapeg nge pi tawa’ath nikam thapeg ko fare gospel rok fare Tathapeg nge gur nireb gidii’en chonggin e Galasia Rok. Pining e gidii’ nge un ngom ko activities nibay rogon ko Galasia fa tabinaew rom.

• Gay rogon ngam nonad fa ngam uned kotin nibe un fapi tamachib ngay. Piningrad ni ngar machib niged e pi tafagar romed, fa piningrad ngar machib niged be’ ulane tabinaew rom. Fith ko fapi tamachib ko mang e be buchbuch boech ulane yafos rrad nge rogon e pigpig ko tamachib nibe chugur nagrad ngak Yesus Kristus. Makum fith ko mang e kar rin’ed (fa mang e kar athapeged ni yaedra rin’) ni ngar fal’aged rograd ningar manged e tamachib.

• Fa’anra kam maen ko mission, mu weliy mornga’agen e tin ni buch rom. Fa mu pining reb e tafagar fa be’ ko tabinaew rom ninge weliy mornga’agen e mission rok. Ma krayog ni ngam weliy rogon nikam ser nag e gospel ngak e gidii’ ulane yafos rom. Ayuweg fakam nge tafney nag rogon ni rayog ninge ser nag e gospel.

• Pag fakam nge machib ngak e tabinaew rom mornga’agen fapi yalen e gospel. Ma krayog ninge gay rogon fakam nge weliy etin nib michuwun’um ngay ngak e gidii’. Woed ni, sana rayog ningam weliyed e duwer ni woed e “Uw rogon marayog nigan weliy mornga’agen fare Babyor ku Mormon ngak be’ ni dariy bi’id nike rung’ag mornga’gaen?” fa “Uw rogon marayog ningan weliy mornga’agen nib t’uf fare Tathapeg ngak be’ ni gathi ba Kristian?” (Muguy ko Ahmad S. Corbitt, “Gamanang Fan ni Gag rebe Kristian nib Michuwun’ug Yesus Kristus?,” Liahona, May 2023, 119–21.)

• Ayuweg fakam nge nang rogon e non ngak e gidii’ nib thilthil. Mang boche kanawo’ nib mangil ni rayog ningan taban nag e sabathin? Pi’ e athamgil ngak fakam nge gay rogon e motoyil ko n’en nibe yoeg e gidii’, nanged fan e pin’en nibay ulane gum’ircha’enrad, nge weliy e gospel nib riyul’ nrayog ninge tawa’ath nagrad.

• Gay rogon nge fil fakam boch e yalen fa boech e mich nib thilthil. Ayuwegrad ni ngar guyed miyad tayfan etin nib mangil mab riyul’ ko yalen ko gidii’.

Ulan e temple, figirngiy nge le’engiy e rayag ni ngar mabgol gow ni dariy bi’id manemus. Biney e ma buch ko ba gam’ing ni kanoeg e “sealing ko temple” ngay. Demuturug rogon ni fa’anra kab n’uw napan fani taw ko ngiyal’ ninge un fakam ko fare gam’ing, tin nib achichig ban’en, ni gimed be rin’ u ta’abang ma gubin ngiyal’ erayog ninge ayuweg fakam ko tin nga m’on e duw ko pi tawa’ath ney nirib mangil.

• Be’eged u ta’abang e “Tabinaew: Bugethin nifan ngak e Fayleng”” (Gospel Library). Mang e be machib nag e re bugethin ney ni mornga’agen e falfalaen’ ko tabinaew nge mabgol nirib mangil? Un ngak fakam, ngam mel’egew reb fapi yalen nibay ko fare bugithin ngak e tabinaew ngan fil mornga’agen. Rayog ni ngam be’eg fapi babyor nib thothup nibay rogon ko pi yalen ney ulan fare Guide ko Babyor nib Thothup. Ma krayog ni ngam fal’ag boch en’en ningam nameg nag ko pi yalen ney ngalan e tabinaew rom. Napan e bay mu rin’ e pin’ey ni gabe nameg nag, weliy rogon ni biney e yalen e rayog ni nge ayuweg e tabinaew rom.

• Un fakam ngay, min be’eg e mulwol rok Dieter F. Uchtdorf “Og nag e Falfalaen’ Ngak e Pi’in nima Ayuw” (Liahona, May 2016, 77–80). Napan e bay mu taw ko giney e guruy ni“Ba Ulung Nrayog ningan N’ag,” ma rayog ni ngam sapnag etin nrayog ni ngan n’ag nge tin ni dabiyog. Weliy rogon ni gara ayuweg ban’en ni fa’anra gaba’adag ninge par nib n’uw napan. Mang ebe yoeg e biney ko mornga’agen rogon ni ayuweg e mabgol nge tha’ ko tabinaew rodad? Mang boch ban’en nikad filed ko mulwol rok President Uchtdorf ko rogon nira ayuwegdad fare Tathapeg nge gelnnag e tha’ ko mabgol rodad nge tabinaew?

• Moeg nib tomilang rogon ngak fakam ni gamew be gay rogon le’ngim fa figirngim ningam tew Kristus ni’ir e th’abi ga’fan ulane mabgol romew nge rogon ni gamew be mon’og. Fa’anra kam mabgol gow le’ngim fa figirngim ulane temple, mu dag ngak fakam rogon ni gabe ayuweg fapi m’ag rom nikam michmicheg nag ngak Somoel. Moeg ngak fakam rogon ni gabe tay e Chitamangiy nu Tharmiy nge fare Tathapeg ni’ir e bay ni th’abi ga’fan ko tha’ rom nge rogon ni yow be ayuwegnem (ngkum guy ko Ulisses Soares, “Un ngan Mang Ngak Somoel,” Liahona, Nov. 2022, 42–45).

• Fa’anra bay ban’en nib t’uf ninge duugliy e tabinaew rogon, ba tu’uf ningan tay e mo’olung min weliy rogon. Muguy ni gubin chongin fare tabinaew ma ngan matal ko n’en ninge yoeg. Tay e pin’ey ni yibe puruy’nag ni nge mang bang ko rogon ni yibe dag e numon nib mangil ulane tabinaew, ni ku demuturug ni fa’anra ba thilthil e tafney ko gidii’. (Muguy ko M. Russell Ballard, “Mo’olung ko Tabinaew,” Liahona, May 2016, 63–65.)

• Fa’anra bay bangiyal’ ni dar puluw lunguy ulane tabinaew. rib t’uf ningan dag e gamaen’ nge murnguy. Ayuweg fakam nge guy rogon i duugliy e tin nib momaw’ ban’en u dakean Kristus e rayog ni nge ayuwegrad ko mabgol nibay e falfalane’ riy. Be’eged u ta’abang e Doctrine and Covenants 121:41–42, min weliy rogon e pi yalen ney nibay rogon ko fapi vers ney ni rayog ni ngan fek ngalan e mabgol.