Ohng Pahpa Nohno—Kaunopada Noumwail Seri kan en Weweid nan Sapwelimen Kohl Ahl en Inou Kohkohlahte

Nihpai padahngki me “wenihmw en kehl me [kitail] pahn pidelong loale me iei” ahl en inouo “iei koluhla oh pepdaiski pihl” (2 Nephi 31:17). Ahmw sawas ohng kaunopada seri kan ohng pepdais oh kasarawihla kak katengeiraildi en alialu nan ahlo. Sawas pwukat kin tepkihda padahngki pwoson Sises Krasi oh koluhla. Oh pil padahngki duwen atail kin kakapwa atail inou en pepdais sang ni atail kin tungoale kamadipw sarawi nan wihk kan koaros.

Iet ekei wasahn sawas me kak seweseiuk:: 2 Nihpai 31; special issue of the Friend magazine me pid pepdais ; Oaralap kan, oh Kalelapak kan,, “Pepdais,” Gospel Library.

• Ansou koaros me kumwail kin lelohng mehkot ieu me kin kakehlaka amwail pwoson Sahm Nanleng oh Sises Krais, ehukihong noumwail seri kan. Seweseirail en esehla me pwoson wia mehkot ieu me kak kekeirda oh kehkehlaila erein arail mour. Iahnge soahng kan me noumwail seri kan kak wia pwehn kalaudehla arail pwoson Krais mwohn arail pepdaisla?

• Ansou me noumwail seri kan kin wiahda sapwung, kosoiahng irail duwen kisakis en koluhla ni popohl. Oh ansou me ke kin wiahda sapwung, ehukihda duwen popohl me kin kohdo sang ni ahmw kin koluhla rahn koaros. Kadehdehki me pwehki Sises Krais ah lokolokiher oh pwoukilahr dipatail kan, kitail kak koluhla rahn koaros, ale mahkepe, oh alehdi kehl en weliakapw. Ansou me noumwail seri kan kin peki mahk, mahkehng irail ni popohl oh soh pweipwei.

• Kosoiahiong noumwail seri kan duwen amwail pepdaislahu. Kasalehiong irail kilel oh mehn ketemen kan. Kosoiahda duwen ahmw pepehm, oh ia mwomwen kolokol ahmw inou sarawi en pepdais ah seweseiuk en kalaudehla ahmw ese Sises Krais, oh duwen ahmw inou kan ah doudoulahte kapaiada ahmw mour. Nantihong noumwail seri kan en kin peidek.

• Ansou koaros me mie pepdais wiawi nan amwail peneinei de ward, wahla noumwail seri kan en iang kilang. Kosoiapene dahme kumwail oh noumwail seri kahn kilang oh kehn. Ma kak, lokaiahng aramas me pepdaislahu oh idek soangen peidek pwukat: “Ia mwomwen ahmw pilada pilipil wet? Ia mwomwen ahmw kaunopada?”

• Ansou koaros me kumwail kin kilang noumwail seri kan ahr kin kapwaiada dahme irail inoukihong kumwail, kasalehiong irail ahmw perenikihda ni mehlel. Kasalehda me kapwaiada inou kan kin sewese kitail en kaunopada en kolokol inou sarawi kan ansou me kitail pepdaisla. Dahme kitail kin inoukihong Koht ansou me kitail kin pepdailsa? Dahme E ketin inoukihong kitail? (Kilang Mosaia 18:8–10, 13.)

• Kosoiahda kapai me ke alehdi sang ni ahmw kasarawihla oh wiahla towe en Mwomwohdiso en Sises Krais en Souleng en Imwin Rahn Akan. Me rasohng, ia mwomwen ahmw karaniala Sahm Nanleng oh Sises Krais sang ni ahmw papah mehteikan oh mehteikan ahr papahiuk? Sewese noumwail seri kan en medewehda soangen ahl akan me re kak papahki oh kakehlailihki mehteikan nin duwen towe en Mwomwohdiso wet men. Pil seweseirail en kilang oh kehnda popohl me kin kohsang ni papah mehteikan.

• Ansou kan me kumwail oh noumwail seri kan kin patpene oh kehn de lelohng mehkot kesempwal (me duehte ni ihmw sarawi kan, ansou me kumwail wie wadwadek pwuhk sarawi, de ansou me kumwail kin papah mehteikan), kosoiahiong irail pepehm en kaweid en ngehn sarawi de madamadau kan me ke ahneki. Lukehiong noumwail seri kan en ehukihda arail pepehm kan. Kilelehdi soangen ahl tohto kan me Ngehno kin doadoahngki pwehn lokaiahng aramas akan, me iangahki soangen ahl akan me E kin doadoahngki pwehn lokaiahng uhk. Sewese noumwail seri kan en kak kasawiada oh ehukihda ansou kan me irail kin kehn kaweid en Ngehn Sarawi.

• Kumwail kilang pene ekei kasdo nan Gospel Library me kahdaniki “Rong Ih!” Kumwial kosoiapene soangen ahl akan me Sapwelimen Kauno sounpapah kan kin doadohngki pwehn rong Ih. Lukehiong noumwail seri kan en mahleniada kilel ehu de wiahda kasdo ehu me pid mwomwen arail kin rong ngilen Sounkomouro

• Wiahiong kamadipw sarawi en wia mehkot me sarawi oh wia ansou en popohl ehu nan ahmw peneinei. Ehukihong noumwail seri kan duwen amwail kin medemedewehte Sises Krais nan ansou en kamadipw sarawi. Sewese noumwail seri kan en koasoanehdi ahl ehu me re kak kasalehkihda me kamadipw sarawi wia mehkot sarawi ehu ong irail. Karasepe, koasoai kan en nan kapakap en kamadipw sarawio kak sewese kataman kin kitail atail inou sarawi kan en pepdais ma kitail pahn rongorong.

• Diren ire nan makesihn en Kempoakepah audaudki lepin lokaia, soai, oh kamwadong kan me kak sewese seri kan en kaunopada en ale pepdais oh kisakis en ngehn sarawi. Mweidehng noumwail seri kan en pilada ekei pwehn wadekehng kumwail. (Pil kak kilang pwuken “Kaunopada ohng Pepdais” nan pali en irail seri kan nan Gospel Library.)

Prihsduhd iei manaman oh mweimwei en Koht me e kin kapaikihda Sapwelime seri kan. Sapwelimen Koht prihsduhd mihmi pohn sampah rahnwet nan Mwomwohdiso en Sises Krais en Souleng en Imwin Rahn Akan. “Tohn Mwomwohdisoht koaros me kin kolokol arail inou sarawi kan—lih, ohl, oh seri kan—kapaikidahr manaman en prihsduhd nan imawarail kan pwehn kakehlailih pein irail oh arail peneinei kan” (General Handbook:Papah nan Mwomwohdiso en Sises Krais en Souleng en Imwin Rahn Akan, 3.6, Gospel Library). Manaman wet pahn sewese toweh kan en wia Sapwelimen Koht doadoahk en komour oh mour soutuk nan pein arail mour oh peneinei kan (kilang General Handbook, 2.2).

Ansou me ohl oh lih akan kin papah nan pwukoahn Mwomwohdiso, irail kin papah ki mweimwei en prihsduhd, pahn kaweidpen irail akan me kolokol kih kan en prihsduhd. Sapwelimen Sahm Nanleng seri koaros—Sapwelime pwutak oh serepein kan—pahn kapaida ma irail pahn kalaudehla arail wehwehki Sapwelime prihsduhd.

Kitail kin alehdi tiahk sarawi kan sang ni mweimwei en prihsduhd. “Irail ohl akan me warohng kin alehdi mweimwei en prihsduhd sang emen me kolokolehr prihsduhd oh kin kasarawihong nan ohpis kan en prihsduhd” (General Handbook, 3.4). Irail akan me kolokol mweimwei en prihsduhd kin alehdi mweimwei sang rehn me kolokol kih kan pwehn kak pahda tiahk sarawi kan en prihsduhd.

pwehn kalaudehla ahmw wehwehki prihsduhd, kilang kaweid en Russell M. Nelson, “Dipwisou Kesempwal kan en Pali Ngehn,” Liahona, Nop. 2019, 76–79; Russell M. Nelson, “Kapai pen Manaman en Prihsduhd,” Liahona, Mei 2016, 66–69; “Koasoandien Prihsduhd kan,” iralaud 3 nan General Handbook.

• Kaiahnehki ahmw peneinei tiahk sarawi kan en prihsduhd. Karasepe, sewese noumwail seri kan en kin kaunopada pali ngehn pwehn ale kamadipw sarawi nan wihk koaros. Kakehlailihki noumwail seri kan en rapahki kapai en prihsduhd ansou koaros me irail kin soumwahuda de ma re kin anahne meleilei de kaweid. Kaiahnehkiuhk en kin kalapw kasalehda ahl akan koaros me Kauno kin kapaikihda ahmw peneinei sang ni Sapwelime manaman.

• Ni amwail pahn wadek pene pwuhk sarawi, kilang ansou mwahu kan en kosoiapene mwomwen Koht ah ketin kapaiada aramas akan sang Sapwelime manaman. Ehukihda dahme ke kehnehr de kilangehr me pid ansou kan me Koht kapaiukada sang Sapwelime prihsduhd. Ohng karasepen kapai kan me kitail kin alehdi sang Koht pwehki sapwelime prihsduhd, kilang General Handbook, 3.2, 3.5.

• Padahkihong noumwail seri kan me mwurin pepdais, irail kak alehdi manaman en Koht ma irail pahn kolokol arail inou sarawi kan en pepdais. Ehukipene kaweid en Presiden Russell M. Nelson’s “Dipwisou Kesempwal Kan en Pali Ngehn” (Liahona, Nop. 2019, 76–79). Kosoiahiong noumwail seri kan duen manaman en Koht me kohdo nan amwail mour sang tiahk sarawi kan en prihsduhd. Ohng ire teikan me kileledier me pid ahl akan me kin kapaikitailda sang manaman en Koht, kilang General Handbook, 3.5.

• Kosoiapene peidek me nda “Ia mwomwen soun papah en Kauno men?” Wadek pene Doctrine and Covenants 121:36–42, oh rapahki pasapeng kan. Ansou koaros me kumwail kin kilang noumwail seri kan (de emen tohrorhr) ahr kin doadoahngki iren kaweid pwukat de wihwia pwukat me sansal nan ire tikitik pwukat, kasalehiong irail.

• Ansou kan me kumwail oh noumwail seri kan kin doadoahngki kih pwehn ritingada wenihmw de kamaurada sdohsa, ahneki ansou mwahu en karasahiong kih pwukat ohng kih kan me irail soun kaweid en prihsduhd kan kolokol. (ohng kawehwehpen kih kan en prihsduhd, kilang General Handbook, 3.4.1). Dahme kih kan en prihsduhd kin “retingada” de “kamaurada” ohng kitail Pil kilang Gary E. Stevenson, “Ia Kih kan oh Mweimwei kan en Prihsduhd?,” Liahona, May 2016, 29–32; “Ia Kih kan?” (kasdo), Gospel Library.

  

  2:51

Tehnpas Sarawi kan wia kisehn sapwleimen Sahm Nanleng pilahn ohng Sapwelime Seri kan. Nan tehnpas en Kauno, kitail kin wiahda inou sarawi kan ohng Sahm Nanleng ni atail kin wia tiahk sarawi kan, oh mepwukat koaros kin uhlahng Sises Krais. Sahm Nanleng kaunopadahr ahl ehu ohng Sapwelime Seri kan pwe ren kak wiahda inou Sarawi kan oh iang wia tiahk sarawi kan, ohng irail akan me sohte alehdi mepwukat nan mour wet. Tepdahn pahr me noumwail seri kan pahn karadahng sounpar 12, irail kakehr pepdaiski oh ale kisakis en ngehn sarawi ohng arail peneinei kan me melahr (pil kilang 1 Korint 15:29).

• Kohla ni tehnpas sarawi en Kauno ansou koaros me ke kak. Kosoiahiong noumwail seri kan dahme kahrehda amwail kin kohla oh mwomwen tehnpas sarawi ah seweseiuk en karaniala Sahm Nanleng oh Sises Krais.

• Ehukipene oh kosoiapene peidek kan ohng kisin likoun mweimwei en pidelong nan tehnpas sarawi. Ke kak diar peidek pwukat nanteh 36–37 en pwukenOhng kakehlepen me Pwulopwul Kan:: Kaweid Ohng Pilada Me Pwung. Kosoiahiong noumwail seri kan dahme kin wiawi nan kapeidekpen kisin likoun mweimwei en pidelong nan tehnpas sarawi. Ehukiong irail kahrepen kisin likou wet ah kesempwal ohng uhk.

• Wadek pene Malakai 4:6. Kosoiapen mwomwen amwail mohngiong kan ah kak uhlahng amwail peneinei kan me melahr. Kalaudehla amwail wehwehki amwail peneinei en mahsoko sang ni amwail pahn kilang poadepen amwail peneinei nan FamilySearch.org. Rapahki irail akan me anahne pepdaisla oh alehdi kisakis en ngehn sarawi. Soun sawas en palien tehnpas sarawi oh poadepen peneinei kan kak seweseiuk.

• Ehukipenen mehn kaweid teikan me kahdaniki “Tehnpas Sarawi” nan pali en irail seri kan nan Gospel Library. (Pil kilang “Kaunopada Noumw Seri Ohng Pepdais oh Kasarawi en Nan Tehnpas Sarawi” nan ChurchofJesusChrist.org.)

Amwail kapai kan en peitriahk kak wia mehn kaweid, kaloalamwahu, oh koudiahl. E audadukihda mehn kaweid ohng pein kitail sang Sahm Nanleng oh kin sewese kitail en wehwehki ihs kitail oh atail pwukoah. Sewese noumwail seri kan en kaunopada pwehn alehdi kapai en peitriahk sang ni amwail pahn padahkihong irail kesempwalpe, oh kahrepe sarawi en kapai wet.

Kalaudpen ire wet, kilang oaralap kan oh Peidek kan, “Kapai en Peitriahk,” Gospel Library.

• Ehukihong noumwail seri kan duwehn amwail pepehm ansou me kumwail alehdi amwail kapai en peitriahk. Ke kak ehukihiong irail dahme ke wia pwe ken kak kaunopada en ale, iamwomwen ah seweseiuk en kak karaniala Koht, oh iamwomwen Ah kin kaukaweid uhk ohng momourki kapai wet. Ke pil kak lukehiong noumw seri en lokaiahiong ekei kisehn peneinei me iangehr ale kapai en peitriahk.

• Onopiki pene en Elder Randall K. Bennett padahk “Ahmw Kapai en Peitriahk—wia mehn kaweid sang rehn Sahm Nanleng” oh en Elder Kazuhiko Yamashita’s padahk “Iahd Me Ke Kak Ale Kapai en Peitriahk” (Liahona, Mei 2023, 42–43, 88–90). Ehukipene dahme kumwail esehla sang nan padahk kan me pid dahme kahrehda Sahm Nanleng Kupwurkihki kitail en ale kapai en peitriahk. Pwe kumwail en kak esehla iamwomwen amwail pahn kaunopada en ale kapai en peireiahk, kilang General Handbook, 18.17.

• Ma mie ahmw peneinei me melahr me iang ale kapai en peitriahk, e pahn mwahu ma kumwail kak wadekehng ekei rehn noumw seri. Pwe ken kak alehdi daropwehn kapai kan en omw peneinei me melahr kan, ke kak douda nan ChurchofJesusChrist.org, kohla wasa me nda Tools nan keimw pali koahiek en powe, oh pilada Patriarchal Blessing.

• Mwurin noumw seri en ah pahn ale ah kapai en peitriahk, lukehiong sohte lipilipil en peneinei me mihmi rehmwa en ntingiedi arail pepehm kan oh ehukihiong noumw seri o.

Koht kupwurki en wiahda inou, de kapaiada, Sapwelime seri koaros ki “sapwelime manaman” (Doctrine and Covenants 95:8). Kitail kin kohla nan tehnpas sarawi pwe kitail en alehdi pein atail inou sarawi pak ehute, ahpw inou sarawi kan me kitail wiahiong Koht oh manaman en ngehi me E ketkihong kitail me wia kisehn inouo kak kihiong kitail kapai rahn koaros.

• Langahda kilel en tehnpas sarawi Nan imwomwo. Ehukihiong soumw serien pepehm me ke kin ahneki nan tehnpesen Kauno. Kin kalapw kosokosoia ahmw limpoak ohng Kauno oh Tehnpese oh inou sarawi me ke wiadahr wasahu. Rapahkida ehu ansou me ke kak wahla noumw seri nan tehnpas sarawi pwehn wia pepdais oh kasarawi en arail peneinei me melahr akan.

• Kilang pene temples.ChurchofJesusChrist.org. Wadek ire kan me pid “Inou Sarawi en Tehnpas Sarawi” and “Kaunoada ohng Tehnpesen Kauno.” Mweidohng seri kan en peidengki kalelapak kan me ahneki me pid tehnpas sarawi. Ohng mehn kaweid pwe ken kak ese dahme ke kak kosoia, kilang en Elder David A. Bednarpadahk “Prepared to Obtain Every Needful Thjng” (Liahona, Mei 2019, 101–4; kilang wasa me oaralapki “Home-Centered and Church-Supported Learning and Temple Preparation”).

• Ni amwail pahn patehng de kilang ekei tiahk sarawi Kan (me rasehng kamadipw sarawi de kapai en kamwahuiala), ahneki ansou mwahu en kosoiapene dahme tiahk sarawi pwukat rasehng. Ia wehwehn mehn karasaras pwukat? Iamwomwen arail kadehdeh Sises Krais? Met kak sewese noumw seri en onopada oh medemedewe wehwehn karasaras pwukat ohng tiahk sarawi en tehnpas sarawi kan, me kin kadehde duwen Sises Krais.

• Sewese noumw seri en kilangada iamwomwen arail kak kapwaiada arail inou en pepdais kan me sansal Mosaia 18:10, 13 (pil kilang ire tikitik 8–9, me kawehwehda wahn inou wet). Pil sewesehki noumw seri en kilangada kapai kan me Kauno ketkihong irail. Sewese kalaudehla en noumw seri kehl en kapwaiada arail inou kan.

• kin poaden kosoiapene iamwomwen amwail inou sarawi en tehnpas sarawi kan ah kin kaweid ahmw mehn pilipil kan oh sewesei kumwail karaniala Sises Krais. Ke kak doadoahngki General Handbook, 27.2, pwe ken kak onopiki inou kan me kitail kin wiahda nan tehnpas sarawi. Ma ke wiadahr omw inou sarawi, padahkihiong seri kan iamwomwen likou sarawi en tehnpas sarawi ah kin katakataman kin Uhk omw inou kan ohng Sises Krais (kilang “Sacred Temple Clothing” [kasdo], Gospel Library; Anette J. Dennis, “Put Ye On the Lord Jesus Christ,” Liahona, Mei 2024, 10–13).

  

  4:12

Elder David A. Bednar padahngki: “Ehu mehkot kesempwal me ke kak wia iei kaunopada ohng doadoahk en misineri mwohn omw pahn kohla wia doadoahk wet. … Sohte kahpwal en kohla wia doadoahk wet, Ih kahpwal en iei wiahla misineri oh wia doadoahk en pahpa erein atail mour sang nan atail mohngiong, wen atail kak, madamadau, oh kehl unsek. Kumwail wie kaunopehng doadoahk en misineri ohng uhwen ansou ieu” (“Wiahla Misineri,” Liahona, Nohpempe. 2005, 45–46). Mehkoaros me noumw seri pahn lelohng ohng doadoahk en misineri pahn kapai irailda kohkohlahte, kaidehnte ohng uhwen ansou me re wiahki doadoahk en misineri.

Pwehn wehwehkihla laud, kilang Russell M. Nelson, “Preaching the Gospel of Peace,” Liahona, Mei 2022, 6–7; Gary E. Stevenson, “Love, Share, Invite,” Liahona, Mei 2022, 84–87; “Adjusting to Missionary Life,” Gospel Library.

• Sohngada mwomwen kalohngki rongamwahuo. Ansou koaros kilkilang ansou mwahu en ehukihiong mehteikan omw pepehm duwen Sahmw Nanleng oh Sounkomouro oh kapai kan me ke kin ale sang Sapwelimen Sounkomouro rongamwahu kopwurupwurdohu oh nin duwen souleng en Sapweime mwomwohdiso. Lukehiong mehteikan en patehng omw peneinei kohla sarawi- oh kemwekid- teikan en peneinei.

• Rapahkida ansou mwahu ohng peneinei en tuhweng misineri kan. Lukehiong irail en kalohk ohng kempoakepahmw kan, de lukehiong irail en kalohk ohng aramas kan ni imwomwo. Kalelapak rehn misineri kan duwen dahme re kin lelohng oh iamwomwen doadoahk en misineri ah seweseirail en karaniala Sises Krais. Pil kalelapak rehrail dahme re wia (de kasik re wia) pwehn kaunopada ren wiahla misineri kei.

• Ma ke kanekelahr doadoahk en misineri, kosoiahda dahme ke lelohng oh esehla kan. De lukehiong kempoakepahmw de peneinei me wiahier arail doadoahk en misineri en kosoiahda mwomwen arail kan. Ke pil kak kosoia wiepe teikan me ke wia nan omw mour pwe ken kak ehukihiong mehteikan rongamwahuo. Sewese seri kan en medewehda dahme re kak wia pwe ren kak ehukihiong mehteikan duwen rongamwahu wet.

• Mweidohng noumw seri en ehukihiong omw peneinei duwen rongamwahuo. Noumwail seri kan pil kak sohngada ehukihiong mehteikan duwen dahme re kamehlele kan. Ni karasepe, kumwail kak kosoiapene kalelapak kan me duwehte “Iamwomwen atail pahn ehukihiong Pwuken Mormon ohng aramas emen me saikinte rong?” de “Iamwomwen atail kak kawehwehda anahnepen Sounkomouro ohng aramas emen me sohte kamehlele Krais?” (Kilang Ahmad S. Corbitt, “Do You Know Why I as a Christian Believe in Jesus Christ?,” Liahona, Mei 2023, 119–21.)

• Sewese noumwail seri kan en kak eimah en koasoakoasoai ohng aramas. Iahnge wiepe mwahu en tapiada koasoakoasoai pene? Sewesehki noumwail seri kan en esehla rong dahme mehteikan kin kosoia, wehwehkihla audepen ahr mohngiong kan, oh kosoiahda kapai en rongamwahu wet nan ahr Mour.

• Rapahkida ansou mwahu ohng noumw seri en esehla duwen tiahk oh pelien lamalam kan. Seweseirail en kak kilang oh wauneki en mehteikan pelien lamalam kan.

Nan tehnpas sarawi, pwopwoud ieu kak pwopwoud kohkohlahte. Met kin wiawi sang tiahk sarawi me kahdanki “katengteng pene nan tehnpas sarawi.” Mendahte ma tiahk sarawi sousou keren en kak wiawihieng noumwail seri kan, kumwail kak wia mehkot me tikitik oh mengei pwehn kak kaunopada irailda ohng kapai kesempwal wet.

• Wadek pene “The Family: A Proclamation to the World” (Gospel Library). Dahme padahk wet padahngki duwen peren nan moumour en peneinei oh pwopwoud me loaloapwoat kan? Sewese noumw seri, oh pilada ehu iren kaweid me sansal nan padahk wet oh onopiki. Kumwail kak rapahkida iren pwuhk sarawi me kosoia oaralapo nan Guide to the Scriptures. Kumwail pil kak koasoahnehdi mwomwen doadoahngki oaralap wet ohng nan amwail peneinei kan. Ni amwail pahn nanantiohng kapwaiada koasoandi wet, ehukipene weklahkan me sansal nan amwail peneinei.

• Kowe oh nomw seri kak wadek em President Dieter F. Uchtdorf padahk “In Praise of Those Who Save” (Liahona, Mei 2016, 77–80). Ni omw pahn lel wasa me oaralap iei “A Society of Disposables,” ke kak rapahki mehkan nan imwomwo me kin kak ohla oh me sohte kak. Kosoia wekpeseng en omw kin apwalih soahng pwukat pwe ren kak mihmi werei. Dahme me wet kasalehda duwen wekpeseng en atail pahn apwalih atail inou sarawi en pwopwoud oh peneninei? Iangehr kan me kitail esehsang nan en President Uchtdorf Padahk duwen iamwomwen Sounkomouro ah kak sewesei kitail en kakehlailih atail inou sarawi en pwopwoud oh peneinei lan?

• Kosoiahiong noumw seri duwen mehkan me kowe oh omw pwoud esehla duwen poasoanehkihda Krais amwail inou sarawi en pwopwoud oh wiepehkan me kumwa nanantihiong en kamwahuiala. Ma kowe oh omw pwoud katengteng penehr nan tehnpas sarawi, kasalehiong noumwa seri karasaras en mwomwen amwa kin nannantihiong en kokolokol amwa inou sarawi ohng Kauno kan. Padahkihiong noumwail seri kan iamwomwen amwail kin nantihong poahsoanehki Sahm Nanleng oh Sounkomouro amwail pwopwoud oh iamwomwen Ara kin sewesei kumwail; (pil kilang Ulisses Soares, “In Partnership with the Lord,” Liahona, Nohpempe. 2022, 42–45).

• Koasoandi en nan peneinei anahne en wiawihda, ohng koasoakoasoaipenehn nan pwungen peneinei kan. Karonge oh kesempwaliki iren madamadau kan koaros en emen emen tohn ahmw peneinei. Doadoahngki iren madamadau pwukat oh ahneki ansou mwahu en kasalehda mwomwen poahsoan kehlail en koasoakoasoaipene oh kadek nan pwungen peneinei, mendahte ma amwail iren madamadau kan wekpeseng. (Kilang M. Russell Ballard, “Family Councils,” Liahona, Mei 2016, 63–65.)

• Ma mie kahpwal pahn pwarada nan peneinei, ah ke kasalehda mwomwen kanengamah oh mahk. Sewese noumw seri en kilang iamwomwen apwalih kahpwal kan nin duwen dahme Krais kin wia eh kak seweseirail en Kauno ohng ahneki peren nan ahr inou sarawi en pwopwoud. Wadek pene Doctrine and Covenants 121:41–42, oh kosoiapene iamwomwen ire pwukat ah pahn doadoahk ohng inou sarawi en pwopwoud.