Hagai 1–2 ; Zekaria 1–4 ; 7–14

’Ua rau te mau mea faufa’a roa e rave nō te patu fa’ahou ia Ierusalema. Terā rā fātata 15 matahiti i muri a’e i te ho’ira’a mai te mau ’āti ’Īserā’ela, ’ua ’ino’ino te Fatu ē ’aita te patu-fa’ahou-ra’a i te hiero i riro ’ei ’ohipa rahi mātāmua roa (hi’o Hagai 1:2–5 ; hi’o ato’a Ezera 4:24). ’A tai’o ai ’outou te Hagai 1 ; 2:1–9, ’a feruri i te mau uira’a mai teie :

• E aha te mau fa’ahope’ara’a tā te mau ’āti ’Īserā’ela i fa’aruru nō te mea ’aita rātou i fa’aoti i te hiero ?

• E aha te mau ha’amaita’ira’a tā te Fatu i fafau ia rātou mai te mea e fa’aoti rātou i te patu i tōna fare ?

• E aha te parau poro’i a te Fatu ia ’outou i roto te Hagai 1:5–7 ? Nāhea ’outou ’ia ’āna’i i tā ’outou mau ’ohipa mātāmua roa i ni’a i tā te Fatu ? E aha te taime i ha’amaita’ihia ai ’outou nō te tu’ura’a i te Atua nā mua roa i roto i tō ’outou orara’a ?

’Ua fa’aruru te feiā mo’a mātāmua o te mau mahana hope’a nei i te hō’ē ā ’ohipa mai teie tō te mau ’āti ’Īserā’ela i te ’anotau o Hagai (hi’o Te Ha’api’ira’a Tumu ’e te mau Fafaura’a 95). E aha tā ’outou i ’apo mai nā roto mai i teie nā hi’ora’a e piti nō ni’a i te mau nīno’a mana’o o te Fatu i ni’a i te mau hiero ?

Hi’o ato’a Dale G. Renlund, « ’O Iesu Mesia te tao’a rahi », Liahona, Novema 2023, 96–99 ; Terence M. Vinson, « Te mau pipi mau a te Fa’aora, » Liahona, Novema 2019, 9–11 ; « ’Ua here mātou i tō ’oe na fare », Te mau Hīmene, N 150 ; « Provo City Center Temple Completed [Hiero nō Provo City Center i fa’aotihia] » (video), ChurchofJesusChrist.org.

7:17

I tō ’outou mana’o, e aha te faufa’a nō te nana’o « ’ei maita’i i mua i te aro o Iehova » i ni’a i te mau tao’a o te mau mahana ato’a, mai tei fa’ahitihia i roto te Zekaria 14:20 ? (hi’o ato’a Exodo 28:36–38). E aha te faufa’a i te nana’ora’a te reira i ni’a i te mau hiero i teie mahana ? E aha te aura’a o teie pereota nō ’outou ? Nāhea ’outou i te fa’aō mai i te mo’ara’a i tō ’outou orara’a i te mau mahana ato’a ? ’A feruri i teie mau uira’a ’a tai’o ai ’outou i te mau anira’a manihini a te Fatu, i tōna mau ta’ata ’ia riro ’ei mea mo’a a’e i roto te Zekaria 1:1–6 ; 3:1–7 ; 7:8–10 ; 8:16–17.

E nehenehe ato’a ’outou e tai’o te Zekaria 2:10–11 ; 8:1–8 ; 14:9–11, 20–21 nō te ’apo mai, mai te aha te huru o te orara’a i te mau mahana i muri nei i te taime e pārahi ai tātou pā’āto’a i pīha’i iho i te Fatu i roto i te huru o te mo’ara’a. E aha tā ’outou e fa’ahiahia nei i roto i te ’ōrama o Zekaria nō te ananahi o Ierusalema ? E aha tā ’outou i ’ite mai i’ō nei ’o tā ’outou e hina’aro ’ia ’ite i roto i tā ’outou ’āmuira’a ? Nāhea ’outou ’ia fa’aineine ia ’outou nō te ora i roto i te mau tītaura’a tei fa’ata’ahia mai e Zekaria ?

E rave rahi pāpa’ira’a a Zekaria e fa’ahiti nei i te tāvinira’a a Iesu Mesia i te fenua nei ’e tōna ho’i-fa’ahou-ra’a mai pāpū. I raro nei tē vai ra te tahi mau parau tohu a Zekaria ’e tae noa atu te mau pāpa’ira’a mo’a nō ni’a i tō rātou tupura’a. ’A ’imi māite ai ’outou i teie mau ’īrava, ’a ui ia ’outou iho : E aha tā teie e ha’api’i nei iā’u nō ni’a i te Fa’aora ?

• Zekaria 9:9–11 (hi’o Mataio 21:1–11 ; 1 Petero 3:18–19)

• Zekaria 11:12–13 (hi’o Mataio 26:14–16 ; 27:1–7)

• Zekaria 12:10 (hi’o Ioane 19:37 ; Apokalupo 1:7)

• Zekaria 13:6–7 ; 14:1–9 (hi’o Mataio 26:31 ; Te Ha’api’ira’a Tumu ’e te mau Fafaura’a 45:47–53)

I tō ’outou mana’o mai te aha te huru te vaira’a Iesu i rotopū i te feiā tei fa’ari’i pōpou iāna i Ierusalema, mai tā Zekaria 9:9–11 e fa’ata’a nei ? Nāhea ’outou i te fa’ari’i pōpou iāna i roto i tō ’outou orara’a, tō ’outou mau ’utuāfare ’e tō ’outou orara’a ’āmui ?

Hi’o ato’a i te Arata’i nō te mau pāpa’ira’a mo’a, « Mesia », Vaira’a buka ’evanelia ; « The Lord’s Triumphal Entry into Jerusalem [Te tomora’a hanahana a te Fatu i Ierusalema] » (video), Vaira’a buka ’evanelia ; Ronald A. Rasband, « Hosana i te Atua teitei roa », Liahona, Mē 2023, 108–12.

1:22

• ’A tai’o ai ’outou i te mau tuha’a a Hagai 1:2–5 ’e tā ’outou mau tamari’i, ’a tauturu ia rātou ’ia ’ite mai nō te aha ’aita te Fatu i māuruuru i te mau ta’ata. E nehenehe paha tā ’outou mau tamari’i e mā’iti i te hō’ē pereota nō roto mai te ’īrava 6 ’e e pāpa’i hōho’a i te reira. E fa’a’ite rātou i te tahi ’e te tahi i te reira ’e e feruri e aha te pereota tā te hōho’a tāta’itahi e fa’a’ite nei. ’Ia rave ana’e tātou i te taime nō te rave i te tahi atu ’ohipa i te mau mea tā te Fatu e hina’aro, nāhea te reira e riro ai mai te ’amura’a ē ’aita rā e pa’ia ra ? E ’āparau ’outou te tahi ’e te tahi e nāhea ’outou i te fa’ata’a i te taime nō te mau mea faufa’a roa a’e nō te Fatu.

• E nehenehe ato’a ’outou e tai’o te ’īrava 8 i tā ’outou mau tamari’i ’e e ani ia rātou ’ia fa’ahua i te « haere i ni’a i te mou’a », « e hōpo’i i te rā’au » ’e « e patu i te fare [o te Fatu] ». I muri iho ’ia hāmani tā ’outou mau tamari’i i te hō’ē tāpura nō te mau mea tā rātou e rave i roto i te mahana hō’ē, ’oia ato’a te mau mea tā te Fatu i ani ia rātou e rave. ’A ani i tā ’outou mau tamari’i ’ia « ha’amana’o māite na i tō [rātou] nā mau haere’a » ma te ha’apuni i te mau mea tā te Fatu e nehenehe e parau e riro ’ei mau mea faufa’a roa a’e nō tā rātou tāpura.

• I roto i te hō’ē ’ōrama, ’ua ’ite atu Zekaria i te hō’ē tahu’a rahi ’o tei « ’ahuhia i te ’ahu vi’ivi’i » (Zekaria 3:3). ’Ua hōro’a te hō’ē melahi iāna te ’ahu mā. ’A tauturu i tā ’outou mau tamari’i ’ia ’ite mai i te mau parau mau faufa’a roa ma te tai’o-’āmui-ra’a te Zekaria 3:1–7 ’e ma te ’āparau e aha te fa’ahōho’ara’a nō te mau ’ahu repo ’e te mau ’ahu mā. Nāhea tātou ’ia tāmāhia i tā tātou mau hara, ’oia ato’a i muri a’e i tō tātou bāpetizora’ahia ? Nāhea tā tātou mau fafaura’a o te bāpetizora’a i te tauturu ia tātou ’ia « haere nā te mau ’ē’a [o te Fatu] » ?

• E nehenehe ’outou ’e tā ’outou mau tamari’i e hi’o i te hō’ē hōho’a nō te bāpetizora’a, mai te hō’ē i roto i teie arata’i ha’api’ira’a. Nō te aha tātou e ’ahu ai i te ’ahu ’uo’uo i tō tātou bāpetizora’a ? E nehenehe ato’a ’outou e hīmene i te hō’ē hīmene nō ni’a i te bāpetizora’a, mai te « Le jour de mon baptême » (Chants pour les enfants, 53) ; e aha tā teie hīmene e ha’api’i nei nō ni’a i te tumu te Fatu e hina’aro ai ’ia bāpetizohia tātou ?

• E ’oa’oa paha tā ’outou mau tamari’i ’ia hi’o fa’ahou i te ’ohipa i tupu tei tohuhia i roto te Zekaria 9:9, i te taime ’a tomo ai Iesu i Ierusalema i te hepetoma hope’a o tōna orara’a i te tāhuti nei. Nō te tauturu i te reira, ’a fa’a’ite ia rātou i te hō’ē hōho’a nō te ’ohipa i tupu, mai teie i roto i te arata’i ha’api’ira’a. E nehenehe ato’a ’outou e fa’a’ite ia rātou « Te Fa’aora e haere ra i Ierusalema » (i roto Te mau ’ā’amu o te Faufa’a ’Āpī, 110–12). E nehenehe tā ’outou mau tamari’i e fa’atoro i ni’a i te mau hōho’a i te feiā e « ’oa’oa rahi » nei. ’O vai te ari’i i roto te Zekaria 9:9 ? Nō te aha tātou e māuruuru ai iāna ?

  

  1:35

• ’A feruri i te tauturu i tā ’outou mau tamari’i ’ia fa’aau te mau parau tohu a Zekaria ’e te mau ’īrava o te Faufa’a ’Āpī e fa’ata’a ra i tō rātou tupura’a. Teie te tahi mau hi’ora’a : Zekaria 9:9 ’e te Mataio 21:5–9 ; Zekaria 9:11 ’e te 1 Petero 3:18–19 ; Zekaria 11:12 ’e te Mataio 26:14–16 ; Zekaria 13:7 ’e te Mataio 26:31. E aha tā tātou i ’apo mai i ni’a i te Fa’aora nā roto mai i teie mau ’īrava ?