Noera

’Ua mātauhia te Noera ’ei tau ’oa’oa nō te ’oa’oa tā Iesu Mesia e hōpoi mai i te ao nei. Te mau tenetere hou te fānaura’a o te Fa’aora, ’ua putapū ato’a te mau peropheta o te Faufa’a Tahito i te ’oa’oa ’a paraparau ai rātou nō te taera’a mai o te Mesia. ’A tai’o i te tahi o te mau ’īrava i muri nei, ’e ’a feruri nō te aha e mea faufa’a mau nō te feiā e tīa’i nei ma te rū i te misiōni a te Fa’aora : Salamo 35:9 ; Isaia 25:8–9 ; 44:21–24 ; 51:11 ; Zephania 3:14–20 ; Mose 5:5–11. Nō te aha e mea faufa’a mau teie mau ’īrava nō ’outou ? E aha te mau tumu teie mau ’īrava o te pāpa’ira’a mo’a e hōro’a mai ai te ’oa’oa ?

Hi’o ato’a Dallin H. Oaks, « Good Tidings of Great Joy [Parau ’āpī nō te ’oa’oa rahi] » (Purera’a Noera a te Peresidenira’a Mātāmua, 4 nō Tītema 2022), Vaira’a buka ’evanelia ; « ’Ua tae mai te Mesia », Te mau Hīmene, N 118.

E rave rahi peu tumu i ’āpitihia i te Noera, e nehenehe e hōro’a mai i te mau aura’a tāipe ’o tē fa’atoro atu ia tātou i te Mesia ra. ’A ’imi māite ai ’outou i te Faufa’a Tahito i teie matahiti, ’ua ’ite mai paha ’outou e rave rahi tāpa’o nō te Fa’aora. ’Ua tāpurahia te tahi i raro nei. ’A feruri i te ’imi māite i te reira ’e ’a pāpa’i i te mau mea tā te reira e ha’api’i nei ia ’outou nōna.

• Feti’a (Numera 24:17 ; Mataio 2:2 ; Apokalupo 22:16).

• Tīa’i māmoe (Salamo 23 ; Luka 15:4–7 ; Ioane 10:11)

• ’Ārenio (Genese 22:8 ; Exodo 12:5 ; 1 Petero 1:18–20).

• Pape (Exodo 17:1–6 ; Ieremia 2:13 ; Ezekiela 47:1–12 ; Ioane 4:7–14).

• !’Ōfa’i (1 Samuela 2:2 ; 2 Samuela 22:2–3 ; Salamo 118:22–23 ; Isaia 28:16 ; Ephesia 2:20).

• Āma’a (Isaia 11:1–2 ; Ieremia 23:5 ; 33:15).

• Māramarama (Salamo 27:1 ; Isaia 9:2 ; 60:19 ; Mika 7:8 ; Ioane 8:12).

E aha te tahi atu mau tāpa’o, mau ’īrava ’e te mau parau pāpa’i tā ’outou i ’ite mai i roto i te mau pāpa’ira’a mo’a ’o tē fa’a’ite pāpū nei nō Iesu Mesia ?

Hi’o ato’a 2 Nephi 11:4 ; Mosia 3:14–15 ; Mose 6:63 ; « Te mau huru ’aore rā te mau tāpa’o o te Mesia » ’e « Iesu Mesia », i roto Arata’i nō te mau pāpa’ira’a mo’a (Vaira’a buka ’evanelia).

’Ua fa’ata’ahia Iesu Mesia rave rahi i’oa ’e te mau ti’ara’a ta’a ’ē. ’A ’imi mai i te mau ti’ara’a i roto i te mau ’īrava i muri nei : Salamo 23:1 ; 83:18 ; Isaia 7:14 ; 9:6 ; 12:2 ; 63:16 ; Amosa 4:13 ; Zekaria 14:16 ; Mose 7:53. E aha te tahi atu mau ti’ara’a tā ’outou e nehenehe e feruri ? E au paha ’outou i te tāpura i te mau ti’ara’a o Iesu Mesia ’o tā ’outou i ’ite mai i roto i te mau hīmene Noera. Nāhea te ti’ara’a tāta’itahi i te fa’auru i te huru ’a feruri ai ’outou iāna ?

’A feruri i te mā’iti i te hō’ē ti’ara’a ’aore rā i te hō’ē ’ohipa a te Fa’aora ’o tē tauturu ia ’outou ’ia ha’amana’o iāna i te roara’a o te matahiti i muri nei.

Hi’o ato’a Quentin L. Cook, « Te hau o te ta’ata iho i roto i te mau tau fifi », Liahona, Novema 2021, 89–92 ; « Hīmene te melahi i te ari’i ’āpī ! », Te mau Hīmene, N 126

• ’Ia roa’a ia ’outou ’e tā ’outou mau tamari’i i te tahi mau fa’anehenehe nō Noera, ’o tā ’outou e fa’a’ohipa nō te ha’amata i te hō’ē ’āparaura’a nō Iesu Mesia. Penei a’e e nehenehe ’outou e parau nāhea te hō’ē feti’a nō Noera, te mau mōrī, ’aore rā te hō’ē tao’a hōro’a e fa’aha’amana’o ia tātou i te Fa’aora. I muri iho ’ia ’imi ’outou i roto i te hō’ē ’aore rā hau atu o te mau pāpa’ira’a mo’a i muri nei, i te tahi ’ohipa ’o te nehenehe e fa’aau ia Iesu Mesia : Genese 22:8 ; Nūmera 24:17 ; Salamo 23:1 ; 27:1. Penei a’e e nehenehe tā ’outou mau tamari’i e ’āfa’i i ni’a i te hō’ē hōho’a ’aore rā te hō’ē fa’anehenehe e tū’ati i te ’īrava tāta’itahi, ’a tai’o ai rātou i te reira. Nāhea Iesu e riro ai mai te ’ārenio te huru, te feti’a, te tīa’i māmoe ’aore rā, te māramarama ? ’A feruri i te hīmene ’āmui i te hō’ē hīmene nō Noera, mai te « Nuit de Noël » (Chants pour les enfants, 24).

• E nehenehe ato’a tā ’outou mau tamari’i e hi’o i te hōho’a i te pae hope’a o teie arata’ira’a ha’api’ira’a, ’a tai’o ai ’outou i te Isaia 9:6 ia rātou. ’A ani i tā ’outou mau tamari’i ’ia fa’atoro te rima i ni’a te ’aiū Iesu, ’ia fa’aro’o ana’e rātou i te pereota « ’ua fānauhia mai te hō’ē tama ». ’A fa’a’ite i tō ’outou ’itera’a pāpū ē, ’ua ’ite te mau peropheta o te Faufa’a Tahito ē e fānauhia mai Iesu.

• ’A fa’aineine ai ’outou nō te ’imi māite i te orara’a o Iesu Mesia i roto i te Faufa’a ’Āpī i te matahiti i muri nei, ’a feruri i te hi’o fa’ahou ’e tā ’outou mau tamari’i, i te mea tā rātou i ha’api’i mai nō ni’a iāna i teie matahiti i roto i te Faufa’a Tahito. E nehenehe ’outou e hi’o fa’ahou i te mau arata’ira’a i roto i teie mātēria ’e te mau fa’ata’ara’a nō te ’imira’a māite a te ta’ata hō’ē, nō te tauturu ia ’outou ’ia ha’amana’o i te mea tā ’outou i ’apo mai. E fāna’o te mau tamari’i ’āpī i te tai’o-fa’ahou-ra’a i Te mau ’ā’amu o te Faufa’a Tahito ’aore rā te mau hōho’a i roto te Mai, pe’e mai. E aha te mau parau tohu ’aore rā te mau ’ā’amu i mātara mai ? E aha tā tātou i ha’api’i mai nō ni’a i te Fa’aora ?

• E mau peu tumu tā te mau ’utuāfar o ’Īserā’ela, mai te Pāsa ’e te tahi atu mau ’ōro’a, ’o tei fa’ata’ahia e fa’afāriu atu i tō rātou ’ā’au ’e tō rātou ferurira’a i ni’a i te Fatu (hi’o Exodo 12). E aha te mau peu tumu tā ’outou ’e tā tā ’outou mau tamari’i e vai ra i te tau nō Noera, ’o te tauturu ia ’outou ’ia rōtahi i ni’a ia Iesu Mesia ? E aha te mau peu tumu tā ’outou i ’ite nā roto mai i tō ’outou ’ā’amu ’utuāfare ? E nehenehe ’outou e feruri i te ’āparau ’e tā ’outou mau tamari’i, i te tahi mau peu tumu tā ’outou e hina’aro i te ha’amata. Teie te tahi mau mana’o : E tāvini i te hō’ē ta’ata i roto i te fifi, e mā’iti i te hō’ē ’ohipa ’o tā ’outou e pūpū ’ei « ō » i te Fa’aora, e ani manihini i te hō’ē hoa e māta’ita’i ’e ’o ’outou i te purera’a Noera a te Peresidenira’a Mātāmua (broadcasts.ChurchofJesusChrist.org), e pāpa’i i tā ’outou iho hīmene nō Noera, ’aore rā e ’imi i te tahi rāve’a ha’arau nō te fa’a’ite i te parau poro’i o te fānaura’a o te Mesia.

• Nāhea ’outou i te tauturu i tā ’outou mau tamari’i ’ia putapū i te fa’aturara’a ’e te ’oa’oa o te fānaura’a o te Mesia ? E nehenehe ’outou e māta’ita’i te video « The Christ Child [Te tama Mesia] » (Vaira’a buka ’evanelia) ’aore rā e tai’o ’āmui te Mataio 1:18–25 ; 2:1–12 ; Luka 1:26–38 ; 2:1–20. E nehenehe te mau tamari’i tāta’itahi e mā’iti i te hō’ē ta’ata i roto i te video ’aore rā i roto i te ’ā’amu pāpa’ira’a mo’a, ’e ’ia fa’a’ite mai e aha te mana’o o te reira ta’ata nō te Fa’aora. I muri iho e nehenehe ’outou e fa’a’ite i te tahi ’e te tahi i tō ’outou iho mau mana’o nōna [Iesu Mesia].

  

  17:57

• Penei a’e e nehenehe ’outou ’e tā ’outou mau tamari’i e paraparau i te mau ō tā ’outou e hōro’a ’aore rā e fa’ari’i i te roara’a o te mau matahiti ’e ’o tei hōpoi mai i te ’oa’oa. I muri iho e nehenehe ’outou e tai’o ’āmui te Isaia 25:9 ’e e ’āparau nō te aha ’outou e ’oa’oa ai i te tonora’a mai te Metua i te ao ra i te Fa’aora nō tātou. Nō te tauturu i tā ’outou mau tamari’i ’ia māramarama maita’i i te ti’ara’a o Iesu Mesia ’ei Fa’aora nō tātou, ’a ani ia rātou ’ia tai’o te Isaia 25:8–9 ; 53:3–5 ; ’e Hosea 13:14. E aha tā teie mau pāpa’ira’a mo’a e ha’api’i nei ia tātou, e mea nāhea tō te Fatu fa’aorara’a ia tātou ?

• E nehenehe ato’a ’outou e hīmene ’āmui i te hīmene Noera, mai « Oh loin dans l’étable » (Chant pour les enfants, 26) ’aore rā « E Betelehema e » (Te mau Hīmene, N 125). ’A tauturu i tā ’outou mau tamari’i ’ia ’ite mai i te mau pereota i roto i te hīmene ’o tē tauturu ia rātou māramarama ē ’ua here te Metua i te ao ra ’e ’o Iesu Mesia ia rātou.