Malaki

I te ’anotau o Malaki, ’ua patu a’ena te mau ’āti ’Īserā’ela i te hiero nō Ierusalema, terā rā ’ei nūna’a e tītauhia ia rātou ’ia patu fa’ahou i tō rātou aura’a ’e te Fatu. ’A ’imi māite ai ’outou te Malaki, ’a ’imi mai i te mau uira’a ’o tā te Fatu i ui atu i te mau ’āti ’Īserā’ela ’aore rā ’o tā rātou i ui atu iāna. ’A feruri i te ui ia ’outou iho i te mau uira’a mai teie (’ua hōro’ahia te tahi mau hi’ora’a i raro nei) nō te tauturu ia ’outou ’ia fāito o tō ’outou aura’a ’e te Fatu ’e ’ia ha’afātata atu iāna.

• Mea nāhea tō’u putapūra’a i te aroha o te Fatu nō’u ? (hi’o Malaki 1:2).

• Tā’u mau ō i te Fatu e fa’atura mau ānei iāna ? (hi’o Malaki 1:6–11).

• Mai te aha te huru e tītauhia ai iā’u ’ia « fāriu mai » i te Fatu ? (hi’o Malaki 3:7).

• Tē haru ra ānei au i tā te Atua ma te tahi atu ravera’a ? (hi’o Malaki 3:8–11).

• E nāhea tō’u huru i roto i te mau taime fifi i te fa’a’ite mai i tō’u mau nīno’a mana’o i te Fatu ? (hi’o Malaki 3:13–15 ; hi’o ato’a 2:17).

’A tai’o ai ’outou nō ni’a te mau menehe i fa’a’itehia i roto te Malaki 1, e aha tā ’outou i ’ite nō ni’a i te mau tusia tā te mau tahu’a e pūpū nei ? E aha tā teie mau tusia e fa’a’ite nei nō te mau nīno’a mana’o o te mau tahu’a nō ni’a te Fatu ? (hi’o Malaki 1:13). ’A feruri i te hāmani i te hō’ē tāpura nō te mau menehe, ’aore rā te mau tusia, ’o tā ’outou e rave nei i te Fatu. Nō te mau ’ohipa tāta’itahi i ni’a i te tāpura, ’a feruri i te mea e fa’ariro i te hō’ē menehe ’ei mea « vi’ivi’i » ’aore rā ’ei mea « maita’i » (Malaki 1:7, 11).

’A feruri nā, e hoa tō ’outou ’o tei fa’aro’o ē tē ’aufau nei ’outou i te tuha’a ’ahuru. « Nō te aha ’oe e rave ai i te reira ? » tē ui nei tō ’outou hoa. ’A feruri i te reira ’a tai’o ai ’outou te Malaki 3:8–12. E aha tā ’outou i ’ite mai ’o te nehenehe e tauturu i te pāhono atu i te uira’a a tō ’outou hoa ? E aha tā ’outou e hina’aro nei ’ia māramarama atu ā tō ’outou hoa nō ni’a i te tuha’a ’ahuru ? Nō te tahi atu ā tauturu, e nehenehe ’outou e ’imi i roto i te a’ora’a a Elder Neil L. Andersen « Tuha’a ’ahuru : ’Īritira’a i te mau ha’amāramarama o te ra’i » (Liahona, Novema 2023, 32–35), i te mau pāhonora’a i te mau uira’a mai teie :

• Nō te aha te Fatu i hina’aro ai ’ia ’aufau tātou i te tuha’a ’ahuru ?

• E aha te mea e tāpe’a i te hō’ē ta’ata ’ia ’aufau i te tuha’a ’ahuru, ’e e nāhea tātou ’ia upo’oti’a i ni’a i teie mau fifi ?

• Nāhea te ’aufaura’a i te tuha’a ’ahuru i te ha’apūai i tō tātou fa’aro’o i te Metua i te ao ra ’e ia Iesu Mesia ?

E nehenehe ato’a ’outou e fa’a’ite i tō ’outou hoa, e mea nāhea tō te Fatu ha’amaita’ira’a ia ’outou ’a ’aufau ai ’outou i te tuha’a ’ahuru. E nehenehe ’outou e ’ite mai i te mau mana’o i roto i te tuha’a pi’ihia « Ha’api’ira’a nūmera 1—Ha’amaita’ira’a rarahi e’ita rā e mana’ohia » i roto i te a’ora’a a Elder David A. Bednar « Te mau māramarama o te ra’i » (Liahona, Novema 2013, 17–18). E aha te huru ta’ata tā tātou e riro mai i te ’aufaura’a i te tuha’a ’ahuru ?

I tō ’outou mana’o, e aha te aura’a te parau « ’īriti i te mau ha’amāramarama o te ra’i » (’īrava 10) ? Penei a’e e nehenehe ’outou e hi’o na te ha’amāramarama ’e ’ia feruri i te mau ’ōpuara’a o te mau ha’amāramarama. Nō te aha te parau « te mau ha’amāramarama o te ra’i » e riro ai ’ei hō’ē rāve’a maita’i nō te fa’ata’a, e nāhea te Fatu i te ha’amaita’i ia tātou ’ia ’aufau ana’e tātou i te tuha’a ’ahuru ?

I tō Moroni fa’ahitira’a te Malaki 4:5–6 ia Iosepha Semita, ’ua rave ’oia ma te « huru ’ē ri’i te fa’ahitira’a i tō tei pāpa’ihia » i roto i te Bibilia (hi’o Iosepha Semita—’A’amu 1:36–39). E aha tā te ta’a-’ē-ra’a a Moroni i hōpoi mai i roto i tō ’outou māramaramara’a i teie tohura’a ? Maori rā, ’a feruri i te mau uira’a mai teie :

• ’O vai « te mau metua » ? (hi’o Deuteronomi 29:13). E aha te mau fafaura’a i ravehia nō rātou ? (hi’o Aberahama 2:9–11). Nāhea ’outou i te tauturu nō te fa’atupura’a i teie mau fafaura’a ?

• E aha te mau ’ohipa i tupu ’o tei tauturu ia ’outou ’ia fāriu i tō ’outou ’ā’au i tō ’outou mau tupuna ? Nō te aha e mea faufa’a roa nō te fa’anahora’a a te Metua i te ao ra ?

Nō te ha’api’i rahi mai ā nō ni’a i te taera’a mai o Elia ’e e mea nāhea teie parau tohu i te tupura’a i teie mahana, ’a hi’o Te Ha’api’ira’a Tumu ’e te mau Fafaura’a 110:13–16 ’e D. Todd Christofferson, « Te mana nō te tā’atira’a », (Liahona, Novema 2023, 19–22). Nō te aha ’outou i māuruuru ai i tō Elia haerera’a mai ?

Hi’o ato’a Gerrit W. Gong, « E ’ā’amu tō tātou tāta’itahi », Liahona, Mē 2022, 43–46 ; « ’A fāriu mai i tō ’ā’au », Te mau Hīmene, N 176 ; « The Sealing Power [Te mana nō te tā’atira’a] » (video), ChurchofJesusChrist.org.

3:38

• Nāhea ’outou ’e tā ’outou mau tamari’i e pāhono i te uira’a i roto te Malaki 1:2—Tei hea tō [te Fatu] arohara’a mai ia tātou ? » ’A fa’a’ite i te tahi ’e te tahi i te mau tumu ’ua ’ite ’outou tē aroha nei ’oia ia ’outou. Penei a’e e nehenehe tā ’outou mau tamari’i e pāpa’i hōho’a i te mea ’o te fa’aha’amana’o ia rātou i tōna aroha.

• Nāhea ’outou i te tauturu i tā ’outou mau tamari’i ’ia ha’api’i mai nō ni’a i te tuha’a ’ahuru ? E nehenehe ’outou e ani ia rātou ’ia tai’o 10 tao’a na’ina’i, mai te moni pa’ari i ni’a i te ’api ’ātivite nō teie hepetoma. I muri iho e nehenehe rātou e fa’ata’a ’ē hō’ē o te mau tao’a i te toe’a—’o te rahira’a ïa tā tātou e hōro’a i te Fatu ’ei tuha’a ’ahuru. ’Ia au te Malaki 3:8–12, nō te aha te Fatu e hina’aro ai ’ia ’aufau tātou i te tuha’a ’ahuru ? (hi’o ato’a « Malaki te peropheta » i roto Te mau ’ā’amu o te Faufa’a Tahito, 171–72 ; « First Things First ! [Te mau mea mātāmua nā mua !] » [video], Vaira’a buka ’evanelia).

  

  0:58

  

  1:18

• ’A tai’o ’āmui ai ’outou te Malaki 3:10, e nehenehe ’outou e ani i tā ’outou mau tamari’i ’ia ti’a i pīha’i iho i te ha’amāramarama ’ia tai’o ana’e ’outou i te pereota « ha’amāramarama o te ra’i. » ’Aore rā e nehenehe ’outou e mani’i i te pape i roto i te hō’ē ’āu’a ē tae roa e māni’i mai te reira i rāpae nō te fa’ahōho’a i te pereota « ’aita e vāhi nava’i nō te fa’ari’i i te reira ». ’A parau i te mau tamari’i nō te mau ha’amaita’ira’a tā te Atua i hōro’a mai nō ’outou, ’a ’aufau ai ’outou i te tuha’a ’ahuru. E nehenehe tā ’outou mau tamari’i e pāpa’i i te mau hōho’a e fa’a’ite nei i teie mau ha’amaita’ira’a, ’e e fa’atautau atu te reira i ni’a ’aore rā i pīha’i iho i te ha’amāramarama o tō ’outou fare.

• I roto te Malaki 4:5–6, e nehenehe tā ’outou mau tamari’i e ’imi mai i te mau pāhonora’a i te mau uira’a i muri nei, nō ni’a i te mau tohu a Malaki : ’O vai tā te Fatu i parau fafau e tono mai ’oia ? E aha te taime tāna i parau e tae mai teie ta’ata ? E aha tā te Fatu i parau e rave teie ta’ata ? Nō te aha e ti’a ai i teie ta’ata ’ia haere mai ? I hea teie parau tohu i te tupura’a ? (hi’o Te Ha’api’ira’a Tumu ’e te mau Fafaura’a 110:13–16).

• Nō te ’ite e mea nāhea te parau fafau a Malaki 4:5 i te tupura’a, e nehenehe ato’a ’outou e hi’o fa’ahou « ’Ua fa’ari’i Iosepha ’e ’o Oliver i te mau tāviri o te autahu’ara’a » i roto Te mau ’ā’amu o Te Ha’api’ira’a Tumu ’e te mau Fafaura’a, 26–30. E nehenehe te hō’ē hīmene mai « The Hearts of the Children [Te ’ā’au o te mau tamari’i] » (Children’s Songbook, 92) e tauturu i tā ’outou mau tamari’i ’ia māramarama nō te aha e mea faufa’a roa ’ia haere mai Elia. E nehenehe ato’a ’outou e haere e hi’o FamilySearch.org/discovery, te FamilySearch Tree app, ’aore rā te My Family [Tō’u ’utuāfare] buka iti nō te mau ’ātivite, ’o tē nehenehe e tauturu ia ’outou ’e tā ’outou mau tamari’i ’ia fāriu i tō ’outou ’ā’au i tō ’outou mau tupuna.