Akai 1–2; Tekaria 1–4; 7–14

A rang ni mwaiti bwaai aika a kakaawaki aika a na karaoaki ibukin manga katean Ierutarem. Ma tao imwiin 15 te ririki n nako imwin okiia tibun Iteraera, te Uea e nanokawaki bwa manga katean te tembora e aki rangi ni moanibwaiaki (taraa Akai 1:2–5; taraa naba Etira 4:24). Ngkai ko wareka Akai 1; 2:1–9, iangoi titiraki n aron aikai:

• Tera tokin are a kaitara mangaia tibun Iteraera ibukina ngkai e aki tia katean te tembora irouia?

• Tera kakabwaia ae e berita iai te Uea nakoia ngkana a katia katean Ana auti?

• Tera ana rongorongo te Uea nakoim n Akai 1:5–7? Ko na kanga ni kabooraoi bwaai aika a moanibwai iroum ma ake iroun te Uea? Nningai ae ko a tia ni kakabwaiaaki iai ngkai ko moanibwaia moa te Uea inanon maium?

Aika Itiaki n taai ake ngkoa a kaitara naba te aekaki ni kangaanga are a rinanon tibun Iteraera n ana tai Akai (taraa Reirei ao Berita aika Tabu 95). Tera ae ko reiakinna man katooto aika uoua aikai ibukin ana namakin te Uea ibukin te tembora?

Taraa naba Dale G. Renlund, “Iesu Kristo bon te Kaubwai ae rangi ni Kakawaki,” Riaona, Nob. 2023, 96–99; Terence M. Vinson, “True Disciples of the Savior,” Riaona, Nob. 2019, 9–11; “We Love Thy House, O God,” Anene n Taromauri, nambwa 247; “Provo City Center Temple Completed” (video), ChurchofJesusChrist.org.

7:17

N am iango, tera kakawakin karekean “e tabu bwa ana bwai te Uea” ni koreaki iaon bwaai ni katoa bong n aron ake a taekinaki n Tekaria 14:20? (taraa naba Te Otinako 28:36–38). Tera kakawakin karekean ae koreaki iaon taian tembora ni boong aikai? Tera nanon te kibuntaeka aio iroum? Ko na kanga ni karaoa ae e tabu bwa mwakoron maium n te bong ae koraki? Iangoi inanom titiraki aikai ngkai ko wareka ana kakao te Uea nakoia Ana aomata bwa a na riki n tabu n Tekaria 1:1–6; 3:1–7; 7:8–10; 8:16–17.

Ko kona naba ni wareka Tekaria 2:10–11; 8:1–8; 14:9–11, 20–21 n reiakinna bwa aekakira aron te maiu ni boong aika a na roko ngkana ti bane ni maeka ma te Uea n te tabo ae mimitong. Tera ae e ringa nanora iaon miin n burabeti Tekariai ibukin Ierutarem n taai aika a na roko? Tera ae ko kunei ikekei are ko tangiria ni kan nooria n am komiuniti? Ko na kanga ni katauraoiko ni maiu inanon te aeka ni waaki are e kabwarabwara Tekaria?

Tabeua man ana koroboki Tekaria e katerea ana mwakuri iaon te aba Iesu Kristo ao nakon naba Manga Okina. Aika inano bon ana taetae ni burabeti Tekaria, n ikotaki ma koroboki aika tabu ibukin kakoroan bukiia. Ngkai ko kamatebwai kiibu aikai, titirakiniko i bon iroum, “Tera ae I reiakinaki n aio ibukin Te Tia Kamaiu?

• Tekaria 9:9–11 (taraa Mataio 21:1–11; 1 Betero 3:18–19)

• Tekaria 11:12–13 (taraa Mataio 26:14–16; 27:1–7)

• Tekaria 12:10 (taraa Ioane 19:37; Kaotioti 1:7)

• Tekaria 13:6–7; 14:1–9 (taraa Mataio 26:31; Reirei ao Berita aika Tabu 45:47–53)

N am iango e na aekakira aron ae ko a mena ibuakoia aomata ake a butimwaea rokon Iesu i Ierutarem n aron ae kabwarabwaraaki n Tekaria 9:9–11? Ko na kanga ni butimwaea nakon nanon maium, mweengam, ao am komiuniti?

Taraa naba Kairi nakon Koroboki aika Tabu, “Messiah,” Gospel Library; “The Lord’s Triumphal Entry into Jerusalem” (video), Gospel Library; Ronald A. Rasband, “Otanna nakon te Atua ae Moan te Rietaata,” Riaona, Meei 2023, 108–12.

1:22

• Ngkai ko wareka mwakoron Akaii 1:2–5 ma am ataei, buokiia bwa a na ukeria bukin tera ngkai e aki kukurei te Uea irouia aomata. Tao a kona am ataei rinea te mwakoro n taeka man te kibu 6 ao korea tamneina. A kona ni kaotia i bon imarenaia ao ni keetinna tera kibuntaeka are a tei ibukin tamnei n tatabeua. Ngkana ti kabanea ara tai iaon bwaai nakon are e tangiria te Uea, aekakira ma aron are ko a amwarake ma ko aki nuai? Kam kona ni marooroakinna imarenami bwa ko na kanga ni karekea am tai ibukin bwaai ake a kakawaki iroun te Uea.

• Ko kona naba ni wareka te kibu 8 nakoia ataei, ao kaoiia bwa aongkoa are a “nako aon te maunga,” “n uoti taian kai,” ao “ni katea ana auti [te Uea].” A kona naba am ataei ni korei ni karinani bwaai ake a karaoi n ae a taneiai ni karaoia inanon te bong, n raonaki ma bwaai are e tua te Uea bwa a na karaoi. Tuangiia ataei bwa a na “iangoi [aia] kawai” ni kamronroni baike e taekinna te Uea bwaai aika moan te kakawaki iaon baike a korei ni karinani.

• N te mii ni burabeti, Tekaria e noora te ibonga ae rietaata are e “kunnikaiaki ni kunnikai aika kamwara” (Tekaria 3:3). Te anera e anganna kunnikaina ae itiaki. Ko kona ni buokiia am ataei ni kunei koaua aika a kakawaki man warekan Tekaria 3:1–7 ao maroroakinna tera ae e tei ibukin te kunnikai ae bareka ao ae itiaki. Ti na kanga n itiaki man ara bure, e ngkae ngkana ti a tia ni bwabetitoaki? A kanga ara berita ae tabu n te bwabetitio ni buokiira “n toua mwini kawain [te Uea]”?

• Ko kona ngkoe ma am ataei n taraa tamnein te bwabetito, n aron teuana inanon te kamataata aio. Bukin tera ngkai ti kunnikainiira n te mainaina n ara tai ni bwabetito? Kam kona naba n anenea te kuna ibukin te bwabetito, n aron “When I Am Baptized” (Aia Boki n Anene Ataei, 103); Tera ae reiakinaki man te anene bwa e aera ngkai e tangiria te Uea bwa ti na bwabetitoaki?

• A na bae n tangiria am tai ni katamneia n aia iango te bwai are e kaman taekinaki ngkoa n Tekaria 9:9, ngke e roko Iesu i Ierutarem n Ana tai ni maiu n te maiu ae mamate. N ibuobuoki ibukin aio, kaota tamnein te tai ane e riki anne, n aron teuana inanon te kamataata aio. Ko kona naba n tibwa nakoia “E Nako te Tia Kamaiu nako Ierutarem” (in Karaki man te Nu Tetemanti, 110–12). A kona am ataei ni koteiia aomata inanon te tamnei ake a “rootaki n te kimwareirei.” Antai te Uea n Tekaria 9:9? Bukin tera ti kakaitau Ibukina?

  

  1:35

• Iangoia buokiia am ataei bwa a na kabotaui ana taetae ni burabeti Tekaria ma kiibu n te Nu Tetemanti ni kabwarabwara are a koro bukiia. Aikai tabeua katooto: Tekaria 9:9 ao Mataio 21:5–9; Tekaria 9:11 ao 1 Betero 3:18–19; Tekaria 11:12 ao Mataio 26:14–16; Tekaria 13:7 ao Mataio 26:31. Tera ae ti reiakinna n rongorongon te Tia Kamaiu man kiibu aikai?