EyeNkanga 30–EyoMnga 6. ‘Yena Uthanda Ukwenza Inceba’: UMika; UNahum; UHabhakuki; UZefaniya,” Yizani, Nindilandele—EyeKhaya neBandla: ITestamente eNdala 2026 (2026)
EyeNkanga 30–EyoMnga 6. ‘Yena Uthanda Ukwenza Inceba,’” Yizani, Nindilandele—EyeKhaya neBandla: ITestamente eNdala 2026
Ekuqaleni Ube Ekho uLizwi, nguEva Timothy
EyeNkanga 30–EyoMnga 6.: “Yena Uthanda Ukwenza Inceba”
UMika; UNahum; UHabhakuki; UZefaniya
Ukufunda ITestamente eNdala kuhlala kuthetha ukufunda iziprofeto ngentshabalalo. INkosi yayisoloko ibiza abaprofeti ukuba balumkise abangendawo ngemigwebo yaKhe. Ubulungiseleli bukaMika, uNahum, uHabhakuki noZefaniya yimizekelo emihle. Ngenkcukacha eyokekayo, aba baprofeti bakuxela kwangaphambili ukuwa kwezixeko, ngelo xesha, ezazibonakala zomelele yaye zinamandla : iNineve, iBhabhiloni neYerusalem. Kodwa oko kwakungamawaka eminyaka eyadlulayo. Kutheni kuxabisekile ukufunda ezi ziprofeto namhlanje?
Nangona ezo zixeko zinekratshi, nezingendawo zatshatyalaliswayo, ubungendawo bekratshi busaqhubeka. Sisenokuqaphela imikhondo yabo ezintliziyweni zethu. Abaprofeti beTestamente eNdala batyhila indlela esinokusuka ngayo kobu bubi. Mhlawumbi sisizizathu esinye sisafunda amazwi abo namhlanje. Babengengobaprofeti nje bentshabalalo—babengabaprofeti bentlangulo. Iinkcazelo zentshabalalo ziphenjelelwa zizimemo zokuza kuKrestu kwaye samkele uxolelo lwaKhe. Njengoko uMika eyibeka, INkosi ayavuyiswa kukusigweba, kodwa “yena uthanda ukwenza inceba” (UMika 7:18). Le yayiyindlela yeNkosi mandulo, kwaye iyindlela yakhe namhlanje. “Iindlela zakhe yena zisephakadeni” (Habhakuki 3:6).
Ngoshwankathelo lwezi ncwadi, bona “UMika,” “UNahum,” “UHabhakuki,” kunye “UZefaniya” kuso IsiKhokelo kwiZibhalo.
Iingcebiso zokufunda eKhaya naseBandleni
UMika 6: 1–8
“Akubizayo uYehova kuwe?”
UMika usimema ukuba sicinge ukuba kunganjani na “[u]kumkhawulela uYehova, [kwaye sizigobe] … kuThixo ophezulu? (UMika 6: 6). Yintoni imiqolo 6–8 eyicebisayo malunga ngokubalulekileyo eNkosini xa ihlola ubomi bakho?
Bona kananjalo uDale G. Renlund, “Do Justly, Love Mercy, and Walk Humbly with God,” Liyahona, EyeNkanga. 2020, 109–12.
“INkosi ilungile, iligwiba ngemini yembandezelo” (UNahum 1:7).
UNahum 1
INkosi inamandla kwaye inenceba.
Umsebenzi kaNahum yayikukuxela kwangaphambili intshabalalo yeNineve—isixeko esikhulu sobukumkani bobundlobongela base-Asiriya, obathi basasaza uSirayeli kwaye baphatha gadalala uYuda. UNahum waqala ngokuchaza ingqumbo namandla kaThixo angenakuthelekiswa nanto, kodwa wathetha nangenceba nokulunga kukaThixo. Khangela imiqolo kuso isahluko 1 ekunceda uqonde nganye yezi mpawu—nezinye iimpawu zikaThixo oziphawulayo. Kutheni ucinga ukuba kubalulekile ukwazi nganye yezi zinto malunga neNkosi?
UHabhakuki
Ndingayithemba intando yeNkosi nexesha laYo.
Nkqu nabaprofeti ngamanye amaxesha baba nemibuzo malunga neendlela zeNkosi. UHabhakuki, owayephila ngexesha lenkohlakalo eyayixhaphakile kwaYuda, waqala ingxelo yakhe ngemibuzo eNkosini (bona UHabhakuki 1:1–4). Ungazishwankathela njani iinkxalabo zikaHabhakuki? Yeyiphi imibuzo efanayo abantu abayibuzayo ngoThixo namhlanje? Ingaba wawukhe wabaneemvakalelo ezifanayo? Ungathelekisa kananjalo imibuzo yakhe neminye kwizibhalo, njengaleyo ifumaneka ku Marko 4:37–38 kunye neMfundiso neMinqophiso 121:1–6.
INkosi yayiphendula imibuzo kaHabhakuki ngokuthi Yona yayiza kuthumela amaKaledi (amaBhabhiloni) ukuba ohlwaye uYuda. (bona UHabhakuki 1:5–11). Kodwa uHabhakuki wayesakhathazekile, kuba kwakubonakala kungalunganga ukuba iNkosi ime “xa [e]ngendawo [iBhabhiloni] [i]ginya olilungisa [uYuda]” (bona imiqolo 12–17). Yintoni oyifumanayo ku Habhakuki 2:1–4 ekukhuthazayo ukuba uyithembe iNkosi xa unemibuzo engaphendulekiyo? (bona kananjalo UMarko 4:39–40; IMfundiso neMinqophiso 121:7–8; “God Will Lift Us Up” [video], Ithala leeNcwadi zeVangeli).
God Will Lift Us Up
Isahluko 3 ngumthandazo kaHabhakuki wendumiso nokholo. Ithoni kaHabhakuki kuso isahluko 3 yohluke njani kwisahluko 1? Nali icebo lokukunceda ucingisise imiqolo 17–19: Yenza uluhlu lweentsikelelo zexeshana nezomoya UThixo akunike zona. Emva koko cinga ukuba ulahlekelwe ziintsikelelo zexeshana. Oko kunokukwenza uzive njani ngezinye iintsikelelo? Kutheni kunokuba nzima “ukuvuya ENkosini” (umqolo 18) ngexesha lobunzima obufana nobo buchazwe umqolo 17? Cingisisa ngendlela ongaphuhlisa ngayo ukholo olukhulu kuThixo, naxa ubomi bubonakala bungalunganga.
Bona kananjalo Gerrit W. Gong, “All Things for Our Good,” Liyahona, May 2024, 41–44; “Lead, Kindly Light,” Hymns, no. 97; Topics and Questions, “Seeking Answers to Questions,” Ithala leeNcwadi zeVangeli.
Yiba nomonde. Ngamanye amaxesha sifuna iimpendulo kwimibuzo kwangoko, kodwa iingqiqo zokomoya zithatha ixesha kwaye azinakunyanzelwa. Njengoko iNkosi yayixelele uHabhakuki, “Wulinde, kuba uya kuza” (UHabhakuki 2:3).
UZefaniya
“Funani uYehova, nonke balulamileyo belizwe”
Njengoko ufunda iziprofeto zikaZefaniya, qaphela izimo zengqondo nokuziphatha okwakhokelela kwintshabalalo—bona ngokukodwa UZefaniya 1:4–6, 12; 2:8, 10, 15; 3:1–4. Emva koko ujonge iimpawu zabantu uThixo awayeya kubagcina—bona UZefaniya 2:1–3; 3:12–13, 18–19. Ngowuphi umyalezo ova ukuba iNkosi ikuphethele wona kule miqolo?
UZefaniya 3:14–20
INkosi iya kuvuya kunye nabantu bayo eZiyon.
Emva kokufunda UZefaniya 3:14–20, bona ukuba zingaphi iindlela onokusigqibezela ngazo esi sivakalisi: “Vuya ugcobe ngentliziyo yonke” ngenxa yokuba… Kutheni kubalulekile kuwe ukwazi ngezi zizathu zokuvuya? Usenokuthelekisa le miqolo namava awachazwa ku 3 Nifayi 17 kwaye ucingisise ngendlela uYesu Krestu aziva ngayo ngabantu baKhe—kuquka nawe.
Ngokungakumbi, bona ukhutsho lwale nyanga lweencwadi Liyahona nako Okwenzelwe Ukomeleza uLutsha.
Iingcebiso Zokufundisa Abantwana
UMika 5:2
UYesu Krestu wazalelwa eBhetelehem.
-
Kusenokwenzeka ukuba abantwana bakho abazi ukuba sisiprofeto sikaMika esanceda izilumko zafumana usana olunguYesu eBhetelehem. Usebenzisa UMika 5:2 kunye UMateyu 2:1–6, mhlawumbi abantwana bakho banokulinganisa amava abo. Emva koko unokuthetha ngokuba kutheni ukuzalwa kukaYesu kubaluleke kangangokuba abaprofeti babesazi kwiminyaka emininzi ngaphambi kokuba azalwe.
Umntwana Oyingcwele Uzelwe, nguDana Wood
UNahum 1:7
“INkosi ilungile, kwaye iligwiba ngemini yembandezelo.”
-
Emva kokufunda UNahum 1:7, abantwana bakho banokwakha okanye bazobe “indawo eqinileyo” okanye inqaba (kukho umfanekiso wayo kolu lwandlalo). Zeziphi ezinye zezizathu zokuba abantu badinge inqaba? Yintoni eyenza umhla wethu ube “yimini yembandezelo”? UYesu Krestu ufana njani negwiba lethu?
UHabhakuki 2:3
UThixo uya kusoloko ezizalisekisa izithembiso zaKhe.
-
Ukwazisa UHabhakuki 2:3, wena nabantwana bakho ninokuthetha ngezinto ezintle kuphela emva kokuba silindile—njengesiqhamo esifuna ukuvuthwa okanye intlama ekufuneka ivuthwe. Bekuya kwenzeka ntoni ukuba sinokuzama ukutya isiqhamo okanye intlama ngaphambi kokuba ilunge? Emva koko unokuthetha ngomprofeti uHabhakuki, owayefuna ukwazi ukuba iNkosi yayiza kubuphelisa nini ubungendawo emhlabeni. Funda impendulo yeNkosi ku Habhakuki 2:3. Unokunceda abantwana bakho bacinge ngezinto ezithenjiswe nguThixo. Kumzekelo ngamnye, ninokuthi kunye, “Yilindele; ngokuba iya kuza okunene.”
UHabhakuki 2:14
Ndinokunceda ekuzaliseni umhlaba ngolwazi lukaYesu Krestu.
-
Ukuzekelisa UHabhakuki 2:14, wena nabantwana bakho ninokuzalisa ingqayi okanye esinye isikhongozeli ngemifanekiso okanye amazwi amela izinto ezenziwayo nezifundiswa nguYesu. Singanceda njani ukugcwalisa ihlabathi ngolwazi lweNkosi?
-
Usenokubonisa abantwana bakho imephu yehlabathi (bona IiMaphu zeMbali yeBandla, nani 7, “IMaphu yeHlabathi”). Bancede bafumane indawo abahlala kuyo neendawo apho abafundisi benvangeli ababaziyo bake bakhonza khona. Singabaxelela ntoni abanye ngoYesu Krestu?
UZefaniya 3:14–20
UYesu Krestu uyavuya kunye nabo bamlandelayo Yena.
-
Ku Zefaniya 3:14–20, abantwana bakho banokukhangela into ebenza bafune “ukucula, … gcoba kwaye [ba]vuye ngentliziyo yonke.” Mhlawumbi ningacula amaculo ovuyo okanye iingoma kunye kwaye nithethe ngovuyo olufumaneka kwivangeli kaYesu Krestu.
Ngokungambi, bona ukhutsho lwale nyanga lwencwadi Umhlobo.