Micah; Nahum; Habakkuk; Zephaniah

Micah a tingorei kich ach sipwe anchangei ita ifa usun nikinikin ach sipwe “feito mwen ewe Samon, me pworotiw … me mwen ewe Kot mi tekia” (Micah 6:6). Met ekkei uwokisin 6–8 ra pesei ngeni kemi usun met mi auchea ngeni ewe Samon nupwen I a akkatona manauom?

Nengeni pwan Dale G. Renlund, “Fori Pungun, Tong Umoumoch, me Fetan Tekisoson ren Kot,” Liahona, Nov. 2020, 109–12.

An Nahum misin pwe epwe osini ewe tanon Nineveh—ewe capital ren ewe namanamengawen muu Assyria, minne a fen atoropasa Israel me atangawei Judah. Nahum a poputa ne anapanapa an Kot song me an manaman ese wor nonnon, nge I a pwan kapas usun an Kot umoumoch me murino. Kutta ekkewe uwokisin non sopwun 1 ekkewe ra anisuk om kopwe weweiti eu me eu ekkei napanap—me ekkoch napanapen Kot ka apareni. Pwata ka ekieki pwe mi auchea ne sinei eu me eu ekketi mettoch usun ewe Samon?

Pwan mwo soufos fan ekkoch mi wor ar kapaseis usun anen ewe Samon. Habakkuk, ewe mi manau non eu fansoun chewnon fofforungaw non Judah, a poputani an rekot ren kapaseis ngeni ewe Samon (nengeni Habakkuk 1:1–4). Ifa usun ka tongeni mennapei an Habakkuk aurek? Pwan met ekkoch kapaseis mi nonno fengen aramas ra eis usun Kot ikenai? Mi mwo pwan wor om memmef nonno ngeni? Ka pwan tongeni anonno fengeni an kapaseis ngeni ekkoch non ekkewe pukefel, usun ekkewe mi pwa non Mark 4:37–38 me Doctrine and Covenants 121:1–6.

Ewe Samon a ponuweni an Habakkuk kapaseis ren an apasa pwe I epwe tinato ekkewe Chon Chaldea (ekkewe Chon Babylon) repwe efeiengawa Judah (nengeni Habakkuk 1:5–11). Nge Habakkuk mi chok osukosuk, pun usun ese pungoch an ewe Samon epwe chok fanafaneno “nupwen ewe mi ngaw [Babylon] a nieno ewe mi kon tupwon [Judah]” (nengeni uwokisin 12–17). Met ka kuna non Habakkuk 2:1–4 mi peseok om kopwe epinukunuku ewe Samon nupwen mi wor om kapaseis rese ponu? (nengeni pwan Mark 4:39–40; Doctrine and Covenants 121:7–8; “God Will Lift Us Up” [fitio], Gospel Library).

4:59

Sopwun 3 an Habakkuk iotekin mwareiti me nuku. Ifa usun napanapen Habakkuk we non sopwun 3 mi sokkono seni sopwun 1? Iei eu ekiek an epwe anisuk ne ekipwichi uwokisin 17–19: Fori eu etettenin feiochun inis me ngun Kot a fen ngonuk. Iwe anchangei pwe a turusonuk ekkewe feiochun inis. Ifa usun ita ena epwe fori om kopwe mefi usun ekkewe ekkoch feioch? Ita pwata epwe weires ne “pwapwa non ewe Samon” (uwokisin 18) fansoun weires usun ekkena mi awewetiw uwokisin 17? Ekipwichi ifa usun ka tongeni awatteno nuku non Kot, pwan mwo nupwen manau ese pungoch.

Nengeni pwan Gerrit W. Gong, “All Things for Our Good,” Liahona, May 2024, 41–44; “Lead, Kindly Light,” Kon mi fel, nampa. 97; Topics and Questions, “Seeking Answers,” Gospel Library.

Nupwen ka anneani an Zephaniah kewe osini, apareni ewe napanap me nikinik mi emwen ngeni kiteter—nengeni akkaewin Zephaniah 1:4–6, 12; 2:8, 10, 15; 3:1–4. Mwirin kutta ekkewe napanapen ekkewe aramas Kot epwe tumunur—nengeni Zephaniah 2:1–3; 3:12–13, 18–19. Met porous ka mefi pwe an ewe Samon fani itom me non ekkei uwokisin?

Mwirin om anneani Zephaniah 3:14–20, katon ukukun chommongun napanap ka tongeni awesano ei sentence: “Oupwe pwapwa me mweireir ren unusen netip” pokiten … Pwata mi auchea ngonuk om kopwe sinei usun ekkei popun ne mweireir? Ka tongeni anono fengeni ekkei uwokisin ngeni ekkewe mettoch mi fis mi awewetiw non 3 Nifai 17 me ekipwichi ifa usun Jises Kraist a mefi usun Noun aramas—en mi pachenong.

• Noum kewe semirit menin resap sinei pwe eu osini seni Micah ewe a anisi ekkewe Mwan Mwirin a repwe kuna ewe mwonukon Jises non Bethlehem. Aea Micah 5:2 me Matthew 2:1–6, menin noum kewe semirit ra tongeni pwomesefani ei mettoch. Mwirin ka tongeni kapas usun pwata uputiwen Jises we a fokkun auchea minne soufos ra sinei usun chommong ier me mwen I a uputiw.

• Mwirin om anneani Nahum 1:7, noum kewe semirit ra tongeni aueta ika chungani eu mecheresin “neni mi pochokun” ika nenien eppet (mi wor ech sasingin eu me non ei etetten mi makketiw). Met ekkoch popun a namot ngeni aramas eu nenien eppet? Met a fori ranich pwe eu “ranin osukosuk”? Ifa usun Jises a usun eu neni mi pochokun fan itach?

• Ne esinei usun Habakkuk 2:3, en me noum kewe semirit oua tongeni porous usun mettoch mi och nge ren chok mwirin ach witiwit—usun foun ira ewe mi namot an epwe nupuno ika och pinewa amas epwe kuk. Met epwe fis ika sia sossot ne ochei ewe foun ira ika ewe pinewa mi amas me mwen ar mwonneta? Mwirin ka tongeni kapas usun ewe soufos Habakkuk, ewe a mochen an epwe sinei inet ewe Samon epwe akounoi fofforungaw non ewe fonufan. Anneani ponuwan me ren ewe Samon Habakkuk 2:73. Ka tongeni anisi noum kewe semirit repwe ekieki usun mettoch Kot a pwonei. Ren eu me eu awewe, ka tongeni apasa, “Kopwe witi; pokiten epwe ennetin feito.”

• Ne chungani usun Habakkuk 2:14, en me noum kewe semirit oua tongeni amwosowa eu rume ika och pén mettoch ren sasing ika kapas mi tupuni mettoch Jises a fori ika afanafana. Ifa usun sia tongeni aninis ne amwosowa ewe fonufan ren mirit usun ewe Samon?

• Ka pwan tongeni pwar ngeni noum kewe semirit eu mappun ewe fonufan (nengeni Mappun Uruon Mwichefen, nampa. 7, “Map of the World”). Anisir repwe kutta ewe neni ikewe ra nonnom ie me ekkewe neni ikewe ekkwe misineri ir mi sisiner ra angang ie. Oua tongeni kon fengeni echo kon usun afanafana ewe kapas allim, usun ren “We’ll Bring the World His Truth” (Noun Semirit Puken Kon, 172–73). Met sia tongeni ureni ekkoch usun Jises Kraist?

• Non Zephaniah 3:14–20, noum kewe semirit ra tongeni kutta och mettoch a forir repwe “kon, … me pwapwa me mweireir ren unusen netip.” Menin ka tongeni konu ekkoch apwapwan kon mi fen ika kon fengen me kapas usun ewe pwapwa ka kuna non ewe kapas allimen Jises Kraist.