“30 Novemba–6 Disemba. ‘Oltaem Yu Yu Glad blong Soemaot long Mifala we Yu Stap Lavem Mifala Tumas’: Maeka; Nahum; Habakuk; Sefanaea,” Kam Folem Mi—Blong Hom mo Jos: OlTesteman 2026 (2026)
“30 Novemba–6 Disemba. ‘Oltaem Yu Yu Glad blong Soemaot long Mifala we Yu Stap Lavem Mifala Tumas,’” \Kam Folem Mi: OlTesteman 2026
Long Stat, Tok blong God i bin Stap, i kam long Eva Timothy
30 Novemba–6 Disemba: “Oltaem Yu Yu Glad blong Soemaot long Mifala we Yu Stap Lavem Mifala Tumas”
Maeka; Nahum; Habakuk; Sefanaea
Blong stap ridim OlTesteman, plante taem i minim blong stap ridim ol profesi abaot ol taem we ol samting oli prapa lus evriwan. Plante taem, Lod i bin singaotem ol profet blong oli givim woning long ol nogud man abaot jajmen blong Hem. Ol seves blong Maeka, Habakuk, mo Sefanaea, oli ol gudfala eksampol. Wetem plante ditel, ol profet oli bin talemaot finis we ol siti bae oli foldaon, we long tetaem ia, i luk se oli strong mo gat paoa: olgeta siti ia olsem Nineve, Babilon, mo Jerusalem. Be, hemia i bin plante taosen yia i pas. ?From wanem hem i impoten tumas blong stap ridim ol profesi ia tedei?
I nomata we ol siti ia we oli gat hae tingting mo oli gat nogud fasin, Lod i bin prapa spolem gud olgeta, fasin ia blong gat hae tingting mo nogud fasin i bin strong i stap. Samtaem, bae yumi faenem wan smol pis blong hem we oli stap yet insaed long hat blong yumi bakegen. Ol profet blong OlTesteman oli talemaot olsem wanem yumi save tanem yumi i go longwe long ol ivel ia. Maet hemia nao i wan risen from wanem, tedei, yumi stap ridim yet ol toktok blong olgeta tedei. Oli no ol profet blong tokbaot ol tudak samting nomo—oli bin ol profet blong mekem man i kam fri. Ol raeting ia we oli tokbaot ol nogud taem ia, oli no luk strong tumas from i gat ol invitesen blong kam long Kraes, mo kasem sore blong Hem. Olsem we Maeka i tijim, “Lod i no glad blong stap panisim yumi, be Hem i glad blong soemaot sore blong Hem” (Maeka 7:18). Hemia i bin wei we Lod i mekem long man long taem bifo, mo hem i stil wei blong Hem tedei. “[Ol rod blong Hem, oli no save lus]” (Habakuk 3:6).
Blong gat wan bigfala lukluk long ol buk ia, luk long “Maeka,” “Nahum,” “Habakuk,” mo “Sefanaea” insaed long Bible Dictionary.
Ol aedia blong Stap Lanem Samting long Hom mo long Jos
Maeka 6:1–8
?Wanem nao Lod i nidim long yu?
Maeka i stap invaetem yumi blong traem tingting se i olsem wanem blong go long fored blong Lod, mo bodaon long fes blong Hae God (Maeka 6:6). ?Wanem nao ol ves 6–8 oli talem long yu abaot wanem i impoten long Lod taem Hem i stap skelem laef blong yu?
Luk tu long Dale G. Renlund, “Mekem Stret mo Gud Fasin, Lavem Ol Man Tumas, mo Wokbaot wetem God wetem Tingting I Stap Daon,” Liahona, Novemba 2020, 109–12.
“Hae God i gud tumas, Taem ol man blong Hem oli stap long trabol, Hem i lukaot gud long olgeta” (Neham 1:7).
Nahum 1
Lod i gat tufala samting ia: Hem i gat paoa mo Hem i gat sore.
Misin blong Neham, hem i blong talemaot fastaem se Nineve bae i lus evriwan—Nineve i kapitol siti blong bigfala nogud rul blong Asiria, we i bin mekem se Isrel i seraot mo go olbaot, mo i mekem nogud long Juda. Neham i stat blong tokbaot nogud kros blong God, mo paoa blong Hem we i no gat samting blong komperem wetem; be tu, Hem i tokbaot sore mo gud fasin blong God. Lukaotem ol ves insaed long japta 1 we oli helpem yu blong andastanem wanwan long ol fasin ia—mo ol nara fasin blong God we yu bin luk. ?From wanem nao, long tingting blong yu, i impoten blong save wanwan long ol samting ia abaot Lod?
Habakuk
Mi save trastem tingting mo taem blong Lod.
Iven ol profet, samtaem, oli gat ol kwestin abaot ol wei blong Lod. Habakuk, we i bin laef long wan taem we nogud fasin i stap goraon bigwan long Juda, i stat blong raetemdaon ol kwestin blong hem i go long Lod (luk long Habakuk 1:1–4). ?Olsem wanem nao bae yu talemsot ol wari ia blong Habakuk? Wanem ol semmak kwestin ol pipol i stap askem abaot God tedei? ?Yu yu bin gat ol semmak filing olsem? Yu save komperem ol kwestin blong hem tu wetem ol narawan insaed long ol skripja, olsem olgeta we oli stap long Mak 4:37–38 mo Doktrin mo Ol Kavenan 121:1–6.
Lod i bin ansabak long ol kwestin blong Habakuk taem Hem i bin talem se bambae Hem i sendem Ol Man Koldia (Ol Man Babilonia) blong i panisim Juda (luk long Habakuk 1:5–11 Be tingting blong Habakuk i trabol yet, from i luk se i no stret blong Lod i stanap i stap nomo “Taem oli [Babilonia] stap kilim ol man we fasin blong olgeta i stret lelebet [Juda], oli winim olgeta” (luk long ol ves 12–17). ?Wanem nao yu faenem insaed long Habakuk 2:1–4 we i givim insperesen long yu blong trastem Lod taem yu gat ol kwestin we i no gat ansa? (luk tu long Mak 4:39–40; Doktrin mo Ol Kavenan 121:7–8; “God Will Lift Us Up” [vidio], Gospel Library).
God Will Lift Us Up
Japta 3 hem i prea blong Habakuk blong givim pres mo fet. ?Saon blong toktok blong Habakuk insaed long japta 3 i defren long japta 1? Hemia wan aedia blong helpem yu blong tingting hevi long ol ves 17–19: Mekem wan lis blong ol samting blong wol mo ol blesing long saed blong spirit, we God i bin givim long yu. Afta, pikjarem long maen se yu bin lusum ol blesing long saed blong ol samting blong wol. ?Olsem wanem nao hemia i mekem yu filim abaot ol narafala blesing? ?From wanem maet i had blong “glad long Lod” (ves 18) long taem blong ol hadtaem we oli tokbaot insaed long ves 17? Tingting hevi long olsem wanem yu save developem moa bigfala fet long God, iven taem we yu luk se laef i no mekem gud long yu.
Luk tu long Gerrit W. Gong, “Evri Samting I blong Gud blong Yumi,” Liahona, Mei 2024, 41–44; “Lead, Kindly Light,” Hym, namba 97; Topics and Questions, “Seeking Answers to Questions,” Gospel Library.
Gat fasin blong save wet longtaem. Samtaem, yumi wantem ol ansa blong ol kwestin blong yumi oli kam kwiktaem, be ol niu tingting long spirit oli tekem taem blong kam mo yumi no save fos blong oli kam. Olsem we Lod i bin talem long Habakuk: “Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Habakuk 2:3).
Sefanaea
“Yufala long ples ya, we tingting blong yufala i stap daon, mo oltaem yufala i stap obei long ol tok blong Hae God, i gud yufala i stap prea long hem.”
Taem yu stap ridim olgeta profesi ia, teknot long ol kaen fasin mo aksen we i bin lidim Juda mo ol nara grup blong God i prapa spolem gud olgeta—speseli, lukluk long Sefanaea 1:4–6,12; 2:8, 10,15; 3:1–4. Afta, yu lukluk long ol fasin blong ol pipol we God bae i holemtaet olgeta oli laef i stap luk long Sefanaea 2:1–3; 3:12–13, 18–19. ?Wanem mesej nao yu yu harem se Lod i stap talem long yu long ol ves ia?
Sefanaea 3:14–20
Lod bae i glad wetem ol pipol blong Hem long Saeon.
Afta we yu ridim Sefanaea 3:14–20, luk hamas wei yu save komplitim sentens ia: “Mas glad wetem ful hat” from se … ?From wanem hem i impoten long yu blong save abaot ol risen blong stap glad? Yu save komperem ol ves ia wetem ol eksperiens we oli tokbaot long 3 Nifae 17 mo tingting hevi long wei we Jisas Kraes i bin filim abaot ol pipol blong Hem—we i tekem yu tu.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Maeka 5:2
Jisas Kraes i bon long Betlehem.
-
Maet ol pikinini blong yu oli no save se hem i wan profesi we i kam long Maeka we i bin helpem Ol Waes Man blong faenem bebi Jisas long Betlehem. Stap yusum Maeka 5:2 mo Matiu 2:1–6, maet ol pikinini blong yu oli save aktem eksperiens blong olgeta. Afta, yufala save tokbaot from wanem taem we Jisas i bon i kam long wol ia i impoten tumas we mekem se, ol profet oli bin save abaot hemia blong plante yia i pas bifo Hem i bon.
Tabu Pikinini Ia I Bon, i kam long Dana Wood
Neham 1:7
“Hae God i gud tumas. Taem ol man blong hem oli stap long trabol, hem i save lukaot gud long olgeta.”
-
Afta we yu ridim Nahum 1:7, ol pikinini blong yu oli save bildim o dro wan simpol “sef ples blong stap strong” o wan ston wol (i gat wan pikja blong wan long aotlaen ia). ?Wanem nao sam long ol risen we sam pipol oli gat blong talem se oli nidim wan strong ston wol raon long haos blong olgeta? ?Wanem i mekem se taem blong yumi, i wan taem blong trabol? ?Long wanem wei nao Jisas Kraes i olsem wan sef ples we i strong, blong yumi?
Hababuk 2:3
God bae i oltaem mekem ol promes blong Hem oli kam tru.
-
Blong introdiusum Habakkuk 2:3, yu mo ol pikinini blong yu i save tokbaot ol samting we oli gud, be bae i kam nomo afta we yumi wet—olsem wan frut we i mas raep bifo yu karem o wan flaoa we i no tan yet mo i nid blong go long oven bifo i rere blong kakae. ?Wanem bae i hapen sapos yumi traem blong kakae frut o flaoa ia bifo i rere? Afta, yu save tokbaot profet Habakuk we i wantem save wetaem bae Lod i stopem ol nogud fasin long wol. Ridim ansa blong Lod insaed long Habakuk 2:3. Yu save helpem ol pikinini blong yu blong tingting long ol samting we God i bin promes blong mekem o givim. Wetem wanwan eksampol, yufala save talem tugeta “From we taem blong ol samting ya i no kam yet, be bambae oli mas kamtru i no longtaem.”
Hababuk 2:14
Mi save help blong fulumap wol ia wetem save abaot Jisas Kraes.
-
Blong soem Habakuk 2:14, yu mo ol pikinini blong yu i save fulumap wan jag o wan narafala kontena wetem ol pikja o ol toktok we i stap ripresentem ol samting we Jisas i bin mekem o i bin tijim. ?Long wanem wei nao yumi save help blong fulumap wol ia wetem save blong Lod?
-
yu save soem tu long ol pikinini blong yu wan map blong wol (luk long Jos Histri Map, namba 7, “Map blong Wol”). Helpem olgeta blong faenem weaples oli stap long hem mo ol ples we oli misinari we oli save oli bin givim seves long hem. Mo tu, yu save singsing tugeta, wan singsing abaot stap serem gospel olsem “We’ll Bring the World His Truth” (Children’s Songbook, 172–73). ?Wanem nao yumi save talem abaot Jisas Kraes long ol narafala man?
Sefanaea 3:14–20
Jisas Kraes i glad wetem olgeta we oli folem Hem.
-
Insaed long Sefanaea 3:14–20, ol pikinini blong yu oli save lukaotem wan samting we i stap mekem olgeta oli wantem blong “singsingaot, … mas stap glad wetem ful hat [blong olgeta].” Maet yufala save singsing hym blong glad o ol singsing tugeta mo tokbaot glad ia we yu faenem insaed long gospel blong Jisas Kraes.
Blong kasem moa aedia, luk long magasin blong Fren blong manis ia.