“7–13 Disemba. ‘I Tabu, I blong Hae God”: Hagae 1–2; Sekaraea 1–4; 7–14,’ Kam Folem Mi—Blong Hom mo Jos: OlTesteman 2026 (2026)
“7–13 Disemba. ‘I Tabu, I blong Hae God,’” Kam Folem Mi: OlTesteman 2026
Lae Hawae Tempol
7–13 Disemba: “I Tabu, I blong Hae God”
Hagae 1–2; Sekaraea 1–4; 7–14
Afta ten yia we oli stap olsem prisena, wan grup blong Ol Man Isrel, maet insaed i gat ol profet ia, Hagae mo Sekaraea, oli bin givim raet long olgeta blong gobak long Jerusalem. Sam, insaed long grup ia, oli bin tingbaot se tempol ia i luk olsem wanem bifo God i prapa spolem gud. Long olgeta ia we oli stap askem olgetawan se, bae hem i luk olsem haos blong Lod long fasfala taem, (Hagae 2:3), Hagae i talem ol toktok blong Lod, blong leftemap tingting se: “Be yufala i no mas harem nogud from samting ya. Mi wantem se yufala evriwan i mas wok, from we mi mi stap wetem yufala.” “Niufala haos ya blong mi bambae i flas we i flas gud, … mo bambae mi mekem we yufala i gat plante samting, mo bambae yufala i gat pis” (Hagae 2:4–5, 7, 9)
Mo i no jes tabu tempol ia nomo we oli bin nidim blong bildimbak. Long plante wei, ol pipol blong God, olgeta tu oli brokbrok long pisis i stap. Mo blong bildimbak wan tabu pipol, i tekem moa bitim blong katem mo putum stret ol ston blong bildim wan tabu haos. Hem i minim se toktok ia “I Tabu, I blong Hae God” oli mas raetem i no long wol blong tempol nomo, o iven long “, o iven long “ol bel we oli fasem i stap hang long ol strap blong ol hos” mo “ol sospen we oli stap long haos blong Hae God” (Sekaraea 14:20–21). Oli mas raetem olgeta tu insaed long evri hat.
Blong gat wan bigfala lukluk long Buk blong Hagae mo Sekaraea, luk long “Hagae” mo “Sekaraea” insaed long Gaed long Ol Skripja.
Ol aedia blong Stap Lanem Samting long Hom mo long Jos
Hagae 1; 2:1–9
“Tingting long ol rod blong yu.”
I bin gat plante impoten samting blong mekem blong bildimap Jerusalem bakegen. Be afta samples 15 yia we i pas afta we Ol Man Isrel oli kambak, Lod i no bin glad se oli no putum faswan, wok ia, blong bildimbak tempol (luk long Hagae 1:2–5; luk tu long Esra 4:24). Taem yu ridim Hagae 1; 2:1–9, tingting long ol kwestin olsem hemia:
-
?Wanem ol risal nao we Ol Man Isrel oli bin fesem from se oli bin finisim tempol?
-
?Wanem blesing nao Lod i bin promesem olgeta sapos oli finisim wok blong bildim haos blong Hem?
-
?Wanem nao mesej blong Lod we i kam long yu insaed long Hagae 1:5–7? ?Olsem wanem nao yu save stretem ol samting we i kam faswan, wetem hemia blong Lod? ?Wetaem nao yu bin kasem blesing ia blong stap putum God i kam faswan long laef blong yu?
Ol fas Lata dei Sent oli bin fesem wan semmak situesen olsem Ol Man Isrel long dei blong Hagae (luk long Doktrin mo Ol Kavenan 95). ?Wanem nao yu lanem aot long tufala eksampol ia abaot ol filing blong Lod long saed blong ol tempol?
Luk tu long Dale G. Renlund, “Jisas Kraes I Tresa Ia,” Liahona, Nov. 2023, 96–99; Terence M. Vinson, “Tru Disaepol blong Sevya,” Liahona, Nov. 2019, 9–11; “We Love Thy House, O God,” Hym, namba 247; “Provo City Center Temple Completed” (vidio), ChurchofJesusChrist.org.
Provo City Center Temple Completed
Sekaraea 1–3; 7–8; 14
Lod i save mekem mi mi tabu.
Long tingting blong yuwan, ?wanem nao valiu blong stap gat toktok ia “i tabu, i blong Hae God” we oli raetem long evridei samting olsem olgeta we oli talem insaed long Sekaraea 14:20? (luk tu long Exodus 28:36–38). ?Wanem nao valiu blong hem, blong stap raetem long ol tempol tedei? ?Toktok ia i minim wanem long yu? ?Olsem wanem nao yu save mekem fasin blong yu i tabu, i kam pat blong evri dei laef blong yu? Tingting hevi long ol kwestin ia taem yu ridim ol invitesen blong Lod we i go long ol pipol blong oli kam mo tabu insaed long Sekaraea 1:1–6; 3:1–7; 7:8–10; 8:16–17.
Mo tu, yu save ridim Sekaraea 2:10–11; 8:1–8; 14:9–11, 20–21 blong lanem se laef bae i olsem wanem, long wan dei long fiuja, taem yumi evriwan i stap wetem Lod long wan ples we i tabu. ?Wanem i tajem yu abaot visen blong Sekaraea long saed blong fiuja blong Jerusalem? ?Wanem nao yu faenem long ples ia we yu wantem blong luk long komuniti blong yu? ?Olsem wanem nao yu save mekem rere yu blong laef long fasin we Sekaraea i bin tokbaot?
“Yufala i luk, King blong yufala i stap kam long yufala. Hem i win finis,mo i glad tumas from we hem i winim ol enemi blong hem. Be tingting blong hem i stap daon, nao i stap ron antap long wan dongki” (Sekaraea 9:9). Viktri Wokbaot, i kam long Harry Anderson
Sekaraea 9:9–11; 11:12–13; 12:10; 13:6–7; 14:1–9
Jisas Kraes i Mesaea ia we God i promesem.
Plante long ol raeting blong Sekaraea oli poenem tugeta yumi i go long eli taem blong seves blong Jisas Kraes, mo long taem ia we bambae Hem i kambak long Seken Kaming. Daon ia, hem i sam long ol profesi blong Sakaraea, we i go wetem ol skripja abaot taem ol profesi ia oli bin hapen. Taem yu stadi long ol sentens ia, askem yuwan: “?Wanem nao hemia i stap tijim mi abaot Sevya?
-
Sekaraea 9:9–11 (luk long Matiu 21:1–11; 1 Pita 3:18–19)
-
Sekaraea 11:12–13 (luk long Matiu 26:14–16; 27:1–7)
-
Sekaraea 12:10 (luk long Jon 19:37; Revelesen 1:7)
-
Sekaraea 13:6–7; 14:1–9 (luk long Matiu 26:31; Doktrin mo Ol Kavenan 45:47–53)
?Yu ting se bae yu filim olsem wanem blong stap long medel blong ol pipol we oli stap welkamem Jisas i kam long Jerusalem, olsem we oli tokbaot insaed long Sekaraea 9:9–11? ?Olsem wanem nao bae yu welkamem Hem i kam long laef blong yu, long hom blong yu, mo long komuniti blong yu?
Luk tu long Gaed long Ol Skripja, “Mesaea,” Gospel Library; “The Lord’s Triumphal Entry into Jerusalem” (vidio), Gospel Library; Ronald A. Rasband, “Hosana long Hae God we I Hae Olgeta,” Liahona, Mei 2023, 108–12.
The Lord's Triumphal Entry into Jerusalem
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Hagae 1:2–8
“Tingting long ol wei blong yu.”
-
Taem ridim ol pat blong Hagae 1:2–5 wetem ol pikinini blong yu, helpem olgeta blong faenemaot from wanem Lod i no bin glad wetem ol pipol. Maet ol pikinini blong yu oli save jusum wan sentens aot long ves 6 mo droem wan pikja blong hem. Oli save soem long wanwan long olgeta mo traem talemaot se wanwan droing ia i ripresentem wanem sentens. Taem yumi spenem taem long ol samting bitim wanem we Lod i wantem, ?long wanem wei nao, hemia i olsem blong stap kakae be yu no fulap? Maet yufala save toktok wetem wanwan long yufala abaot olsem wanem yufala save mekem taem blong ol samting we oli impoten long Lod.
-
Yu save ridim tu, ves 8 long ol pikinini blong yu mo invaetem olgeta blong mekem olsem se “[oli] mas go long bus,” “katem ol timba,” mo “wokem haos blong Lod].” Ol pikinini blong yu oli save mekem wan lis blong ol samting we oli stap mekem long wan nomol dei, mo i gat tu ol samting we Lod i askem olgeta blong mekem. Askem ol pikinini blong yu blong “tingting long ol wei [blong olgeta]” mo raetem sekol i go raon long wanem ol samting we maet Lod i talem se i moa impoten long lis blong olgeta.
Hom we i senta blong stap tij. Presiden Russell M. Nelson i bin tijim se hom i mas kam “senta blong lanem gospel” (“Blong Kam Ol Lata-dei Sent we I Givim Eksampol,” Liahona, Novemba 2018, 113). Taem famli blong yu oli stadi long kaonsel blong Hagae we i blong “?Olsem wanem? ?Yufala i no luksave ol samting ya we i stap kasem yufala? [tingting long ol wei blong yufala],” yufala save tokbaot olsem wanem blong putum God i kam faswan long famli laef blong yufala.
Sakaraea 3:1–7
Blong mekem mo kipim ol kavenan, i save helpem mi blong kam moa olsem Papa long Heven mo Jisas Kraes.
-
Long wan visen, Sakaraea i bin luk wan hae pris we nem blong hem i, Josua, we “klos blong hem i doti we i doti.” (Sakaraea 3:3). Wan enjel i givim klin klos long hem. Yu save helpem ol pikinini blong yu blong faenemaot ol impoten trutok taem tugeta, yufala i ridim Sekaraea 3:1–7 mo stap tokbaot wanem ol doti mo klin klos, oli ripresentem. ?Olsem wanem nao yumi save kam klin aot long ol sin blong yumi, iven afta we yumi kasem baptaes? ?Olsem wanem nao kavenan blong baptaes blong yumi i helpem yumi blong “wokbaot long ol wei [blong Lod]”?
-
Yu mo ol pikinini blong yu, yufala save lukluk long wan pikja blong wan baptaes, olsem wan long aotlaen ia. ?From wanem yumi werem waet klos long taem blong baptaes? Yufala save singsing tu wan singsing abaot “When I Am Baptized” (Children’s Songbook, 103); ?wanem nao singsing i tijim abaot Lod we i wantem yumi blong kasem baptaes?
Sakaraea 9:9–11; 11:12; 13:6–7
Jisas Kraes i Mesaea ia we oli promesem.
-
Maet ol pikinini blong yu bae oli wantem blong pikjarem long maen blong olgeta, samting we oli bin talem finis we bae i hapen, insaed long Sekaraea 9:9, taem we Jisas i bin kam long Jerusalem long las wik blong Hem blong laef long wol ia. Blong help wetem hemia, soem long olgeta wan pikja blong samting we i hapen, olsem wan long aotlaen ia. Mo tu, yu save serem wetem olgeta “Sevya I Go long Jerusalem” (insaed long Ol Niu Testeman Stori, 110–12). Ol pikinini blong yu oli save poenem ol pipol insaed long ol pikja we oli “stap glad bigwan.” ?Huia nao King insaed long Sekaraea 9:9? ?From wanem yumi talem tangkyu from Hem?
1:35Chapter 44: The Savior Goes to Jerusalem
-
Tingting blong stap helpem ol pikinini blong yu blong komperem ol profesi we i stap long Sakaraea wetem ol ves blong Niu Testeman, blong stap tokbaot taem we oli stap kam tru. Hemia sam eksampol: Sekaraea 9:9 mo Matiu 21:5–9; Sekaraea 9:11 mo 1 Pita 3:18–19; Sekaraea 11:12 mo Matiu 26:14–16; Sekaraea 13:7 mo Matiu 26:31. ?Wanem nao yu lanem abaot Sevya long ol ves ia?
Blong kasem moa aedia, luk long magasin blong Fren blong manis ia.