“14–20 Disemba. ‘Hae God I Talem long Yumi Se: Oltaem Mi Mi Lavem Yufala’: Malakae,” Kam Folem Mi—Blong Hom mo Jos: OlTesteman 2026 (2026)

“14–20 Disemba. ‘Hae God I Talem long Yumi Se: Oltaem Mi Mi Lavem Yufala,’” Kam Folem Mi: OlTesteman 2026

14–20 Disemba: “Hae God I Talem long Yumi Se: Oltaem Mi Mi Lavem Yufala”

Malakae

“Oltaem mi mi lavem yufala,” Lod i bin talem long ol pipol blong Hem tru long profet Malakae. Be Ol Man Isrel, we oli bin safa tru long plante jeneresen blong ol hadtaem mo fasin blong stap prisena, oli bin askem: “Yu yu soemaot olsem wanem long mifala se yu lavem mifala tumas?” (Malakae 1:2). Afta evri samting we Isrel i bin gotru long hem, oli bin stap askem olgetawan sapos histri blong olgeta i rili wan stori blong lav blong God long ol kavenan pipol blong Hem, o nogat. Long sam wei, hem i moa isi blong luk plante eksampol blong wiknes mo agens blong ol man. Be yet, truaot long evri samting ia, God i neva stop blong stretem han blong Hem long ol man wetem lav. Taem we ol boe blong Jekob oli no mekem gud long brata blong olgeta, Josef, Lod i stil sevem olgeta long taem blong hanggri (luk long Jenesis 45:4–8). Taem we Isrel i komplen long waelples, Hem i bin fidim olgeta wetem mana (luk long Eksodas 16:1–4). Iven taem we Isrel, oli tanem olgeta i luk long ol narafala god, mo oli bin seraot olbaot, God i bin promesem se, sapos oli sakem sin, bambae Hem i mekem olgeta oli kam tugeta wanples, mo bae i pemaot olgeta “we i glad blong tekembak olgeta” (luk long Aesea 54:7). I tru se, taem yu lukluk long wei ia, OlTesteman i wan stori blong lav ia blong God we i save wet longtaem, mo i save stap strong tru long hadtaem. Mo stori ia i gohed tedei. Jisas Kraes, “bambae paoa blong mi blong sevem man mo blong mekem hem i stret man long fes blong mi, bambae i kavremap yufala olsem san we i girap, nao laet blong hem i saen, i kavremap olgeta samting, nao bambae yufala i kam gud bakegen” (Malakae 4:2). Hem i bigfala pruf ia blong lav blong God long Isrel blong bifo, mo blong yumi evriwan.

Blong gat moa infomesen abaot buk blong Malakae, luk long “Malakae” insaed long Gaed long Ol Skripja.

Ol aedia blong Stap Lanem Samting long Hom mo long Jos

Malakae 1–4

“Naoia sapos yufala i tanem tingting blong yufala, yufala i kambak long mi, mi bambae mi save kambak long yufala bakegen.”

Long taem blong Malakae, Ol Man Isrel oli bin bildimbak tempol finis long Jerusalem, be, olsem wan pipol, oli stil nid blong bildimbak rilesensip blong olgeta wetem Lod. Taem yu stap stadi long Malakae, lukaotem ol kwestin we Lod i bin askem Ol Man Isrel, o ol kwestin we olgeta oli bin askem Lod. Tingting blong askem yuwan ol semmak kwestin, (sam eksampol oli stap daon ia) blong helpem yu blong skelem rilesensip blong yu wetem Lod mo kam kolosap moa long Hem.

?Olsem wanem mi mi bin filim lav we Lod i gat long mi? (luk long Malakae 1:2).
?Weswe? ?Ol ofring blong mi long Lod oli rili givim ona long Hem? (luk long Malakae 1:6–11)
?Long wanem wei mi mi nidim blong gobak long Lod? (luk long Malakae 3:7).
?Mi mi stap stilim Hem long eni wei? (luk long Malakae 3:8–11).
?Olsem wanem nao, fasin blong mi long taem blong hadtaem i soemaot ol filing blong mi long Lod? (luk long Malakae 3:13–15; luk tu long 2:17).

Malakae 1:6–14

Lod i askem “wan ofring we klin gud.”

Taem yu rid abaot ol ofring we oli tokbaot insaed long Malakae 1, ?wanem nao yu luk abaot ol sakrifaes we ol pris oli stap givim? ?Wanem nao ol sakrifaes ia oli stap talem abaot ol filing blong ol pris ia long Lod? (luk long Malakae 1:13). Tingting blong stap mekem wan lis blong ol ofring, o ol sakrifaes, we yu mekem i go long Lod. Long wanwan aetem long lis ia, tingting hevi long wanem nao i save mekem ofring ia i “no klin” ofring o wan we i “klin” ofring (Malakae 1:7,11).

Malakae 3:8–12

Lod i openem ol windo blong heven taem mi soem fet blong mi tru taem mi stap pem taeting.

Pikjarem long maen se yu gat wan fren we i jes faenemaot se yu pem taeting. “?From wanem yu mekem hemia?” fren blong yu i askem. Tingting long hemia taem yu stap ridim Malakae 3:8–12. ?Wanem nao yu faenem long ples ia we i save help blong ansarem kwestin blong fren blong yu? ?Wanem bakegen bae yu wantem fren blong yu blong andastanem abaot taeting? Blong kasem moa help, yu save lukaotem mesej blong Elda Neil L. Andersen “Taeting: Stap Openem Ol Windo blong Heven” (Liahona, Novemba 2023, 32–35), stap lukaotem ol ansa blong ol kwestin olsem hemia:

?From wanem Lod i wantem yumi blong pem taeting?
?Wanem nao i stap blokem wan blong no stap pem taeting, mo olsem wanem yumi save winim ol samting ia we oli stap blokem yumi?
Taem yumi stap pem taeting, ?olsem wanem nao hemia i mekem fet blong yumi i kam moa strong long Papa long Heven mo Jisas Kraes?

Mo tu, yu save serem wetem blong yu abaot olsem wanem Lod i bin blesem yu taem yu stap pem taeting. Yu save faenem ol aedia insaed long taetol seksen “Lesson Number 1—Significant but Subtle Blessings” insaed long mesej blong Elda David A. Bednar “The Windows of Heaven” (Liahona, Nov. 2013, 17–18). ?Yumi kam ol wanem kaen pipol taem yumi stap pem taeting?

?Wanem nao yu ting se sentens ia, “mi openem skae” (ves 10) maet i minim? Maet yu save lukluk i go aotsaed long windo mo tingting abaot stamba tingting blong ol windo. ?From wanem “windo blong Heven” i wan gudfala wei blong tokbaot olsem wanem Lod i stap blesem yumi taem yumi pem taeting?

Jisas i kamkamaot long Josef Smit insaed long Ketlan Tempol — Visen insaed long Ketlan Tempol, i kam long Gary E. Smith

Malakae 4:5–6

“Bae Mi Sendem Profet Elaeja I Kam long Yu.”

Taem we Moronae i bin kwotem Malakae 4:5–6 long Josef Smit, hem i mekem mo i “jenisim smol long wei blong ridim” olsem we i stap long Baebol (luk long Josef Smit—Histri 1:36–39). ?Smol jenis ia blong Moronae, i ademap long andastaning blong yu, abaot profesi ia? Speseli, tingting hevi long ol kwestin olsem:

?Huia nao “ol papa ia”? (luk long Dutronome 29:13). ?Wanem ol promes nao we oli bin mekem long olgeta? (luk long Ebraham 2:9–11). ?Long wanem wei nao yu stap help blong mekem ol promes ia oli kam tru?
?Wanem ol eksperiens nao we i bin helpem hat blong yu blong i tanem i go long ol bubu blong yu? ?From wanem hemia i impoten tumas long plan ia blong Papa?

Blong lanem moa abaot kaming blong Elaeja, mo wei we profesi ia i stap kamtru tedei, luk long Doktrin mo Ol Kavenan 110:13–16 mo D. Todd Christofferson, “Paoa blong Siling” (Liahona, Nov. 2023, 19–22). ?From wanem yumi talem tangkyu se Elaeja i bin kam?

Luk tu long Gerrit W. Gong, “Yumi Wanwan I Gat Wan Stori,” Liahona, Mei 2022, 43–46; “Turn Your Hearts,” Hym, namba 291; “The Sealing Power” (vidio), ChurchofJesusChrist.org.

Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.

Sam Aedia blong Tijim Ol Pikinini

Malakae 1:2

Lod i lavem mi.

?Olsem wanem nao ol pikinini blong yu bae oli ansarem kwestin we i stap long Malakae 1:2—“Yu yu soemaot olsem wanem long mifala se yu [Lod] lavem mifala tumas?” Serem wetem wanwan long yufala, ol narafala risen we yu save se Hem i lavem yu. Maet ol pikinini blong yu oli save droem ol pikja we oli rimaenem olgeta abaot lav blong Hem.

Mekem ol pikinini oli stap storian o toktok raon long ol topik blong gospel. Sapos yu stap tijim ol smol pikinini, maet bae yu nidim blong tingting long ol wei blong krietem samting blong mekem se oli tekpat long ol storian blong tokbaot. Eksampol, ol pikinini blong yu oli pasem wan balong i go raon; taem oli stap holem balong, oli save serem wan risen we oli save se Jisas i lavem olgeta.

papa mo mama mo wan yang boe, oli stap lukluk i go aotsaed tru long wan windo

Malakae 3:8–12

Lod bae i blesem mi taem i pem taeting.

?Olsem wanem nao bae yu helpem ol pikinini blong yu blong lan abaot taeting? Yu save askem olgeta blong kaontem 10 smosmol samting, olsem ol koen long aktiviti pej blong wik ia. Afta, oli save seperetem wan long ol samting aot long ol narawan we i stap—hemia nao i hamas yumi givim long Lod olsem taeting. Folem wanem we i stap long Malakae 3:8–12, ?from wanem Lod i wantem yumi blong pem taeting? (luk tu long “Profet Malakae” insaed long Ol Stori long OlTesteman, 171–72; “First Things First!” [vidio], Gospel Library).

0:58
Malachi the Prophet

1:18
First Things First!
Taem yufala stap ridim Malakae 3:10 tugeta, yu save invaetem ol pikinini blong yu blong stanap long saed o kolosap long wan windo taem yu ridim sentens ia “ol windo blong heven.” O yu save kapsaetem wota i go insaed long wan kap kasem wota i ova long kap ia blong soem sentens ia “bae i no gat inaf rum blong tekem hem.” Talem long ol pikinini abaot ol blesing we God i bin givim long yu taem yu pem taeting. Ol pikinini blong yu oli save droem ol pikja we oli ripresentem ol blesing ia mo hangem olgeta long windo o kolosap long wan windo insaed long hom blong yu.

Malakae 4:5–6

Elaeja i kam blong tanem hat blong yumi i go long ol famli blong yumi.

Long Malakae 4:5–6, ol pikinini blong yu oli save lukaotem ol ansa blong ol kwestin ia abaot profesi blong Malakae: ?Huia nao Lod i promes blong sendem long hem? ?Wetaem nao Hem i talem se man ia bae i kam? ?Wanem nao Lod i talem se bae man ia i mekem? ?From wanem man ia i nidim blong kam? ?Weaples nao profesi ia i bin kam tru? (luk longDoktrin mo Ol Kavenan 110:13–16).
Blong faenemaot olsem wanem nao promes insaed long Malakae 4:5 i bin kam tru, yu save luk tu long “Joseph and Oliver Receive Priesthood Keys” in Ol Stori long Doktrin mo Ol Kavenan, 26–30. Singsing wan singsing olsem“The Hearts of the Children” (Children’s Songbook, 92) i save helpem ol pikinini blong yu blong oli lanem from wanem hem i impoten blong Elaeja i kam. Yu save visitim tu FamilySearch.org/discovery, mo FamilySearch Tree app, o My Family booklet blong ol aktiviti we oli save helpem yu mo ol pikinini blong yu blong tanem hat blong yufala i go long ol bubu blong yufala.

Blong kasem moa aedia, luk long magasin blong Fren blong manis ia.

wan woman i stap saksakem wan hankijif blong tata — Hosana blong Mourning, i kam long Rose Datoc Dall. Wan woman we nem blong hem, Mourning, i stanap long spirit wol, mo ol bubu blong hem oli raonem hem. Hem i stap selebretem we oli kam fri long fasin blong stap long kalabus long saed blong spirit.

Praemeri aktiviti pej: Lod i stap blesem mi taem mi pem taeting — Hosana blong Mourning, i kam long Rose Datoc Dall. Wan woman we nem blong hem, Mourning, i stanap long spirit wol, mo ol bubu blong hem oli raonem hem. Hem i stap selebretem we oli kam fri long fasin blong stap long kalabus long saed blong spirit.