“23–29 Novanm. ‘Chèche Senyè a, epi W ap Gen Lavi’: Amòs; Abdyas; Jonas,” Vini, Suiv Mwen—Pou Moun yo ak Fanmi yo: Ansyen Testaman 2026 (2026)

“23–29 Novanm. ’Chèche Senyè a, epi W ap Gen Lavi,’” Vini, Suiv mwen: Ansyen Testaman 2026

Jonas bò Lanmè a nan Niniv, pa Daniel Lewis

23–29 Novanm: “Chèche Senyè a, epi W ap Gen Lavi”

Amòs; Abdyas; Jonas

Jonas te sou bato a nan direksyon Tasis. Pa genyen anyen mal nan fè vwal pou Tasis, eksepte ke li te lwen Niniv, kote Jonas te sipoze ale pou delivre mesaj Bondye a. Lè bato a te rankontre yon gwo tanpèt, Jonas te konnen sete akoz dezobeyisans li. Sou ensistans Jonas, asosye maren li yo te jete li nan fon lanmè a pou yo te kanpe tanpèt la. Sa te sanble tankou lafen Jonas ak ministè li a. Men Senyè a pa t abandone Jonas—menmjan Li pa te abandone pèp Niviv la, ni kay Izrayèl la, ni okenn nan nou.

Se konsa, Li kontinye voye pwofèt—tankou Jonas, Amòs, Abdyas, ak pwofèt nou yo jodia--avèk mesaj ke si nou repanti, nou pa pral rejte pou tout tan. Nan tout “sekrè” Bondye revele yo (gade Amòs 3:7), se sa a ki pi presye a: sèke akoz Jezikri , li pa twò ta pou n chanje. Li toujou vle ede nou viv nan alyans nou te fè avèk Li yo, epi Li dispoze ofri nou yon lòt chans.

Pou plis konsènan liv sa yo, gade “Amòs,” “Abdyas,” ak “Jonas” nan Diksyonè Bib la.

Ide pou Aprantisaj nan Fwaye a ak nan Legliz la

Amòs 3:1–8; 7:10–15

Senyè a revele laverite atravè pwofèt Li yo.

Nan Amòs 3:3–6, pwofèt Amòs te prezante egzanp sou konklizyon nou ka tire nan siy nou tande oswa wè: lè yon lyon gwonde, li dwe te kaptire jibye; si yo kenbe yon zwazo nan yon pyèj, dwe te gen yon zwazo la. Nan vèsè 7–8, Amòs te aplike lojik sa pou pwofèt yo. Ki konklizyon nou ka tire lè yon pwofèt pwofetize? Ki lòt bagay ou aprann konsènan pwofèt yo apati Amòs 7:10–15?

Kisa Senyè a te revele pou nou pa mwayen pwofèt Li yo?

Èldè Ulisses Soares te di ke “gen pwofèt se yon siy lanmou Bondye” (“Pwofèt yo Pale pa Pouvwa Sentespri a,” Liahona, Me 2018, 99). Konsidere fason ou ta konplete fraz sa a: “Mwen konnen Bondye renmen m, paske Li voye pwofèt ki …” Men kèk ekriti ki ka ede: Detewonòm 18:18; Ezekyèl 3:16–17; Efezyen 4:11–14; 1 Nefi 22:2; Doktrin ak Alyans 21:4–6; 84:36–38; 107:91–92.

Kisa w t ap di yon moun ki santi pwofèt yo pa nesesè jodi a?

Gade Sijè ak Kesyon tou, “Pwofèt yo,” Bibliyotèk Levanjil la.

Amòs 4—5

“Chèche Senyè a, epi w ap gen lavi.”

Selon Amòs 4:6–13, kisa Senyè a te espere ki t ap rive apre Izrayelit yo te travèse eprèv yo? (gade tou Elaman 12:3). Pandan eprèv nou yo ka se pa Bondye ki te voye yo, kijan yo te ba nou opòtinite pou vire kote Li?

Pandan n ap li Amòs 5:4, 14–15, medite sou fason Senyè a te montre anpil gras pou nou. Kijan chèche Li te pote lavi pou ou?

Amòs 8:11–12

Pawòl Senyè a ka satisfè grangou ak swaf espirityèl.

Pandan n ap li Amòs 8:11-12, reflechi konsènan rezon ki fè famin se yon bon konparezon pou viv san pawòl Bondye (gade tou Jan 6:26–35; 2 Nefi 9:50–51; 32:3; Enòs 1:4–8). Kijan ou konnen lè ou grangou espirityèlman?

Vèsè sa yo ta ka aplike tou a Gran Apostazi a (gade Sijè ak Kesyon, “Apostazi,” Bibliyotèk Levanjil la). Kijan “famin” espirityèl sa a te afekte pitit Bondye yo? Kijan Retablisman levanjil la te ede satisfè grangou espirityèl ou?

Gade tou “Gran Apostazi a” (videyo), Bibliyotèk Levanjil la.

Abdyas 1:21.

Kiyès ki se “sovè …. sou mòn Siyon an”?

An referans a Abdyas 1:21, Prezidan Gordon B. Hinckley te eksplike ke nou vin sovè sou Mòn Siyon lè nou resevwa òdonans pou mò yo nan tanp lan (gade “Remak Fèmti,” Liahona, Nov. 2004, 105). Kijan fè travay sa a—menmsi se tou piti—sanble ak sa Sovè a te fè pou nou? Kijan travay sa a ede ou santi ou pi pre Sovè a?

Gade tou “Tanp Sakre sou mòn Siyon yo,” Hymns, no. 289.

Jonas 1–4

Senyè a gen mizerikòd pou moun ki vire jwenn Li.

Niniv sete yon ènmi Izrayèl ki te repite pou vyolans ak kriyote li. Pou Jonas, li pa t sanble reyalis ke yo te pare pou repanti. Li ka enteresan pou konpare atitid Jonas la (gade Jonas 1; 3–4) ak santiman Alma ak pitit gason Mozya yo (gade Mozya 28:1–5; Alma 17:23–25 Kisa ou aprann apati Jonas 3 ki enspire ou pou pataje levanjil la menm avèk moun ki pa sanble yo pare pou chanje?

Pandan w ap li Jonas, chèche jwenn egzanp sou mizerikòd Senyè a. Poukisa ou santi Jonas te “mekontan” ak “trè fache” (Jan 4:1) lè Senyè a ofri mizèrikòd pou pèp Niniv la? Kisa ou santi Senyè a t ap eseye anseye li nan chapit 4 Medite sou fason ou te fè eksperyans mizerikòd Li nan lavi ou. Kisa w aprann de Jonas ki ka ede w gen plis mizèrikòd?

Ide pou Anseye Timoun yo

Paske Dimanch sa a se senkyèm Dimanch nan mwa a, nou ankouraje enstrikè Primè yo pou itilize aktivite aprantisaj yo nan “Apendis B: Prepare Timoun yo pou Tout yon Lavi sou Chemen Alyans Bondye a.”

Amòs 3:7

Pwofèt yo se mesaje Jezikri.

Pou ede pitit ou konprann Amòs 3:7, ou ta ka chichote yon mesaj senp pou youn nan yo epi mande yo pou yo pataje mesaj la avèk lòt timoun yo. Kijan mesaje a nan aktivite sa a se tankou yon pwofèt? Poukisa Senyè a ba nou pwofèt yo?
Pou aprann plis konsènan kisa pwofèt yo fè, ou ak timoun ou yo te kapab revize mesaj resan ki soti de Prezidan aktyèl Legliz la. Nou ta ka chante tou yon kantik tankou “Suis les prophètes” (Chants pour les enfants, 58-59). Pataje youn ak lòt poukisa ou chwazi suiv pwofèt Bondye a.

Ede timoun yo memorize ekriti yo. Èldè Richard G. Scott te pataje: “Memorize yon vèsè se fòje yon nouvo amitye. Se tankou dekouvri yon nouvo moun ki ka ede nan moman bezwen, bay enspirasyon ak rekonfò, epi vin yon sous motivasyon lè yon chanjman nesesè” (Richard G. Scott, “Le pouvoir des EcrituresEnsign, Nov. 2011, 6). Pou ede timoun ou yo memorize tout oswa yon pati nan Amòs 3:7, ou ka ekri li epi repete li ansanm. Apresa ou ta ka efase oswa kouvri kèk mo alafwa jiskaske timoun ou yo ka repete vèsè a tout antye nan memwa.

Amòs 8:11–12

Retablisman levanjil la te mete fen a famin apostazi a.

Envite timoun ou yo pou yo pretann yo grangou pandan n ap li Amòs 8:11–12. Kijan nou santi n lè nou grangou pou pawòl Bondye? Petèt timoun ou yo ka pretann y ap manje pandan n ap pataje youn ak lòt kèk nan ekriti favori nou yo.
Ou ta ka itilize Gid pou Ekriti yo, “Apostazi”, Bibliyotèk Levanjil la), oswa “Apre Nouvo Testaman an” (nan Istwa Nouvo Testaman yo, 167–70) pou ede timoun ou yo konprann “famin” ki te soti nan Gran Apostazi a ak kijan li te fini avèk Retablisman an. Pataje youn ak lòt rezon ki fè nou rekonesan dèske Senyè a te retabli levanjil li a nan epòk pa nou an.

2:52
After the New Testament

Jonas 1–3

Senyè a ap ede m obeyi l, menm lè li difisil.

Pou ede timoun ou yo aprann istwa Jonas la, ou ta ka egzamine “Jonas Pwofèt la” nan Istwa Ansyen Testaman yo; gade tou paj aktivite semèn sa a). Apresa ou ta ka mande:
- Kisa k te pase lè Jonas pa t obeyi Senyè a? (gade Jonas 1:4–17).
- Kssa Jonas te fè pou l repanti? (gade Jan 1:10–12; 2:1–4, 9; 3:1–4).
- Kisa k te pase lè l te obeyi? (gade Jonas 3:3–5).
2:30
Jonah the Prophet
Timoun ou yo ka kontan rakonte istwa Jonas oswa monte senaryo sou li. Pataje youn ak lòt eksperyans lè Senyè a te vle nou fè yon bagay ki te difisil pou nou. Kijan Li te ede ou obeyi Li?

Jonas 1–4

Senyè a gen mizerikòd pou moun ki vire kote Li.

Petèt timoun ou yo te ka pretann y ap fè entèvyou ak Jonas konsènan eksperyans li te fè a. Ki kesyon yo t ap poze l? Ankouraje yo pou yo poze kesyon pou chèche konnen kisa Jonas te aprann sou Senyè a. Kisa Jonas ta ka di, pa egzanp, konsènan mizèrikòd Seyè a? (gade, pa egzanp, Jonas 2:7–10; 3:10; 4:2).

Jezi rive nan direksyon yon mesye yo te glise desann soti sou do kay la — Kris la ak Mesye Paralize a, pa J. Kirk Richards

Ede timoun ou yo panse ak egzanp lè Sovè a te montre lòt moun mizerikòd, tankou Mak 2:3–12; Lik 23:33–34; ak Jan 8:1–11 Ou ak timoun ou yo te kapab chèche foto egzanp sa yo. Ki opòtinite nou genyen pou n montre mizerikòd pou lòt moun?

Pou plis, gade piblikasyon pou mwa sa a sou revi Zanmi an.

Yo te voye Jonas jete soti nan yon bato tonbe nan lanmè a, kote lonbraj yon gwo pwason se apèn vizib — Jonas ak Reken an, pa Kevin Carden

Paj aktivite Primè: Senyè a ap ede m obeyi l, menm lè li difisil — Jonas ak Reken an, pa Kevin Carden