Obubuo 16–22 ‘Mɛfiri M’akoma Mu Adɔ Wɔn’: Hosea 1–6; 10–14; Joel,” Bra, Di M’akyi—De ma Efie ne Asɔre: Apam Dada 2026 (2026)
Obubuo 16–22 ‘Mɛfiri M’akoma Mu Adɔ Wɔn’,’” Bra, Di M’akyi De ma Efie ne Asɔre: Apam Dada 2026
Obubuo 16–22: “Mɛfiri M’akoma Mu Adɔ Wɔn”
Hosea 1–6; 10–14; Yoel
Na ɛwɔ sɛ Israel ne Awurade apam no yɛ deɛ emu dɔ na nteaseɛ wom yie ara ma Awurade de totoo awareɛ ho. Apam no, te sɛ awareɛ, yɛ daa ahofama, suahunu a wɔkyɛ, abrabɔ a wɔbom kyekyere, nokorɛdie a ɛyɛ kann, ne, ne kɛseɛ pa ara, ɔdɔ a ɛfiri akoma mu. Awerɛhosɛm ne sɛ, Israelfoɔ no anni nokorɛ amma wɔn apam no. Nanso Awurade nkrasɛm a ɔde kɔmaa wɔn no nyɛ “Mɛpo mo afebɔɔ.” Mmom na ɛyɛ “Mɛsan afrɛ wo” (hwɛ Hosea 2:14–15). Ɔnam nkɔnhyɛni Hosea so paee mu kaa sɛ: “Mɛgye wo awareɛ ama me ho wɔ tenenee mu” (Hosea 2:19). “Mɛsa wɔn akyirisan yadeɛ, mɛfiri m’akoma mu adɔ wɔn” (Hosea 14:4). Yei ne nkrasɛm korɔ no a Ɔde ma yɛn nnɛ berɛ a yɛhwehwɛ sɛ yɛde ɔdɔ ne ahofama bɛdi yɛn apam so no.
Yoel kaa nkrasɛm a ɛte saa ara ho asɛm sɛ: “Monkɔ Awurade mo Nyankopɔn nkyɛn, na ɔyɛ ɔdomfoɔ ne mmɔborɔhunufoɔ, ne bo kyɛre fu, na ɔwɔ ayamyɛ yɛ kɛseɛ” (Yoel 2:13). Nkɔnhyɛfoɔ yi nsɛm akenkan bɛtumi akanyan wo ma woadwennwene w’ankasa wo ne Awurade ntam ayɔnkofa ho—adwene sɛdeɛ Ne nokorɛdie de ma wo no kanyan wo ma wodi nokorɛ ma No.
Sɛ wopɛ Hosea ne Yoel nwoma no mu nkyerɛkyerɛmu a, hwɛ “Hosea, anaasɛ Hoshea” ne “Yoel” wɔ Twerɛ Kronkron Nsɛm nkyerɛaseɛ.
Nsusuiɛ de ma Adesua wɔ Efie ne Asɔre
Hosea 1–3; 14
Awurade frɛ me berɛ biara sɛ mensan mmra Ne nkyɛn.
Hosea yere Gomer anni nokorɛ amma no, na Onyankopɔn twee adwene sii awerɛhosɛm yi so de kyerɛkyerɛɛ Israelfoɔ no sɛdeɛ ɔtee nka wɔ wɔn ne apam a wɔne No yɛeɛ no ho. Berɛ a wokenkan Hosea 1–3no, dwene sɛdeɛ Awurade hunu N’ayɔnkofa a ɛda Ɔne N’apam nkorɔfoɔ ntam ho. Sɛn na apam a wo ne Awurade bɛyɛ no te sɛ aware mu a wobɛkɔ? Sɛn na apam a woanni so no te sɛ deɛ woanni nokorɛ amma wo hokani? (hwɛ Hosea 2:5–7, 13). Deɛn na Hosea 2:14–23 kyerɛkyerɛ wo fa Awurade dɔ ne mmɔborɔhunu ho? Sɛn na wokyerɛ No wo dɔ ne nokorɛdie?
Wɔ Hosea 14, hwehwɛ bɔhyɛ fɛfɛ bebree a Awurade de ma wɔn a wɔsan ba Ne nkyɛn no. Deɛn na kasasin “firi akoma mu dɔ wɔn” asekyerɛ ma wo? (nkyekyɛmu 4). Deɛn na afifideɛ ho nnyinahɔma a ɛwɔ nkyekyɛmu 5–8 kyerɛkyerɛ wo fa Awurade nhyira, a adwensakra nhyira ka ho ho? Sɛ w’adesua mu fa no, dwene ho sɛ wobɛto anaasɛ wobɛtie nnwom bi a ɛfa Agyenkwa no mmɔborohunu ho, te sɛ“Come unto Jesus” (Nnwom, no. 117).
Gomer a ɔgyina hɔ ma Israel fie ne wɔn apam a wɔabu so no, Awurade maa no ɔgyeɛ. Nkyerɛkyerɛmu firi Deb Minnard, hokwan-ma firi goodsalt.com
Hosea 6:4–7; Yoel 2:12–13
Ɛsɛ sɛ wɔnya ahofama ma Onyankopɔn wɔ akoma mu, na ɛnyɛ sɛ wɔda no adi wɔ anisoɔ kɛkɛ.
Na nkorɔfoɔ a wɔwɔ Hosea berɛ so no rebɔ mmoa afɔreɛ, nanso na wɔrebu mmara a ɛho hia kɛseɛ no so. Wodwene sɛ deɛn na Awurade “pɛɛ mmɔborohunu, na ɛnyɛ afɔrebɔ; na Onyankopɔn ho nimdeɛ dɔɔso sene ɔhyeɛ afɔreɛ” ase kyerɛ? (Hosea 6:6). Wodwene sɛ deɛn na ɛkyerɛ, sɛ teneneeyɛ bɛyɛ te sɛ mununkum anaasɛ sɛ bosuo? (hwɛ Hosea 6:4). Deɛn na ɛsɛ sɛ yɛn teneneeyɛ te sɛ? (hwɛ Yesaia 48:18; 1 Nephi 2:9–10).
Wobɛtumi nso akenkan Mateo 9:10–13; 12:1–8 ahwɛ sɛdeɛ Agyenkwa no de Hosea 6:6 yɛɛ adwuma wɔ Ne som adwuma mu. Sɛn na nkyekyɛmu ahoroɔ yi boa wo ma wote Hosea nsɛm no ase?
Berɛ a wokenkan Yoel 2:12–13no, ɛbɛtumi aboa ama woahunu sɛ obi resunsuan anaasɛ ɔretete n’ataadeɛ mu yɛ awerɛhoɔ anaasɛ ahonu ho sɛnkyerɛnneɛ. Sɛn na yɛresunsuan yɛn akoma mu yɛ soronko firi yɛresunsuan yɛn ntaadeɛ mu ho?
Yoel 2
“Mɛhwie me honhom agu honam nyinaa so.”
Nsɛdie bɛn na wohunu wɔ yɛn berɛ yi ne da a Yoel hunu sieɛ no ntam? (hwɛ titire Yoel 2:1–2, 11, 18–32). Deɛn na ɛsɔ w’ani fa nhyira ahoroɔ a Awurade hyɛɛ ho bɔ wɔ nkyekyɛmu 18–32no ho? Adɛn nti na nhyira ahoroɔ yi bɛtumi asom bo titire ɛnnɛ?
Ɛbɛyɛ anika sɛ yɛkenkan deɛ Moroni ka faa Yoel 2 ho berɛ a ɔkɔsraa Joseph Smith wɔ 1823 (hwɛ Joseph Smith—Abakɔsɛm 1:41). Sɛn wote nka sɛ nkɔnhyɛ ahoroɔ a ɛwɔ Yoel 2:28–32 no reba mu ɛnnɛ? (san hwɛ Asomafoɔ 2:1–21). Wodwene sɛ deɛn na ɛkyerɛ, sɛ Awurade “bɛhwie [Ne] honhom agu honam nyinaa so”? (Yoel 2:28).
Wobɛtumi adwene Titenani Russell M. Nelson nsɛm yi ho: “Wɔ nna a ɛreba no mu, ɛrenyɛ yie sɛ yɛbɛtena ase a Honhom Kronkron no bammɔ, akwankyerɛ, awerɛkyekyerɛ, ne nkɛntɛnsoɔ a ɛkɔ so daa nni mu” (“Revelation for the Church, Revelation for Our Lives,” Liahona, Kɔtɔnima 2018, 96). Adɛn nti na adiyisɛm ho hia ma wo honhom mu asetena?
Deɛn na wobɛtumi ayɛ, berɛ a ɛyɛ wo sɛ wonnya saa atenka no? Nhwɛsoɔ binom a ɛbɛtumi aboa nie. Deɛn na nnipa a wɔwɔ twerɛnsɛm yi mu no yɛeɛ a wɔnyaa Awurade Honhom a ɛrehwie no?
Berɛ a wokenkan Elder David A. Bednar nsɛm yi no, dwene deɛ ɛkyerɛ ma wo sɛ wobɛte Honhom Kronkron a ɛrehwie no nka wɔ wo daa daa abrabɔ mu:
“Yɛtaa ma ɛyɛ den ma yɛn ho sɛ yɛbɛnya ankorankoro adiyisɛm. Ɛno no mekyerɛ sɛ apam bɔhyɛ no ne sɛ, sɛ yɛdi yɛn apam so a, berɛ biara yɛbɛtumi anya Honhom Kronkron no sɛ ɔbɛka yɛn ho daa. Nanso yɛka ho asɛm na yɛfa no te sɛ deɛ Awurade nne a yɛbɛte afa Ne Honhom so no yɛ adeyɛ a ɛntaa nsi. Ɛwɔ sɛ [Honhom] no ka yɛn ho berɛ biara. Ɛnyɛ berɛ biara, nanso sɛ obi reyɛ deɛ ɔbɛtumi biara—ɛnhia sɛ woyɛ pɛ—nanso sɛ me ne wo reyɛ deɛ yɛbɛtumi biara na yɛnto mmara kɛseɛ a, ɛnneɛ yɛbɛtumi de yɛn ho ato Honhom Kronkron no akwankyerɛ so
“Ayɛ sɛ yɛdwene sɛ Honhom Kronkron no yɛ anwanwa, ɛso na ɛyɛ mpofirim, berɛ a ɛyɛ brɛoo, ketewa na ɛkɔ anim nkakrankakra” (“Elder David A. Bednar Discussion” [evening with a General Authority, Ogyefuo 7, 2020], broadcasts.ChurchofJesusChrist.org).
San hwɛ Gary E. Stevenson, “Promptings of the Spirit,” Liahona, Obubuo. 2023, 42–45; “Enemy Territory” (sini), Asɛmpa Akoraeɛ.
Enemy Territory
Yɛ honhom fam tebea. “Ɛdeɛn na woahunu a ɛboa honhom mu tebea ma yɛdesua asɛmpa no? Deɛn na ɛtwe adwene firi so? Dwene baabi a wotaa kyerɛkyerɛ [anaasɛ wosua] no ho. Sɛ wowɔ hɔ a, atenka bɛn na wonya? Sɛn na wobɛtumi afrɛ Honhom no yie ama waba hɔ?” (Teaching in the Savior’s Way, 7).
Nkwadaa Adekyerɛ ho Adwenkyerɛ
Hosea 2:19–20
Mɛtumi adi m’apam so nokorɛ mu.
-
Wɔ Hosea nwoma no mu no, Awurade de Ɔne Ne nkorɔfoɔ apam totoo awareɛ ho. Sɛ wobɛsua biribi afiri ntotoho yi mu a, wo ne wo nkwadaa bɛtumi ahwɛ ayeforɔ ne ayeforɔkunu mfonin na moaka sɛdeɛ Ɔsoro Agya pɛ sɛ okunu ne ɔyere bu wɔn ho wɔn ho. Boa wo nkwadaa ma wɔnhunu nsɛm a ɛwɔ Hosea 2:19–20 a ɛkyerɛkyerɛ sɛdeɛ Awurade dwene yɛn ho. Sɛn na yɛbɛtumi akyerɛ Awurade sɛ yɛdɔ No na yɛbɛdi nokorɛ ama No?
Hosea 10:12
“Berɛ aso sɛ yɛhwehwɛ Awurade.”
-
Hosea 10:12 de toto dua berɛ, twa berɛ, ne osutɔ ho de frɛ yɛn sɛ yɛnhwehwɛ Awurade. Berɛ a wokenkan nkyekyɛmu yi no, adebɔ ho adwene bɛn na ɛba w’adwene mu a ɛbɛtumi akanyan nkwadaa no ama wɔahwehwɛ No? Nhwɛsoɔ, ebia wo nkwadaa bɛtumi ayɛ wɔɔkye mfonin na wɔatwerɛ akwan a wɔbɛfa so ahwehwɛ Awurade wɔ mmerɛ ahodoɔ wɔ da mu no nyinaa. Nnwom te sɛ “Anytime, Anywhere” (Asɛmpa Akoraeɛ) bɛtumi aboa ma woakyerɛkyerɛ sɛ berɛ biara yɛ berɛ pa sɛ wɔhwehwɛ Awurade.
-
Anaasɛ wo nkwadaa bɛtumi ayɛ nneyɛɛ tiawa a ɛne nkyekyɛmu no kɔ, te sɛ wɔreyɛ sɛdeɛ wɔredua aduaba, wɔretete atosodeɛ, anaasɛ wɔbɛgyina osuo mu. Boa wo nkwadaa ma wɔmfa aduaba a wɔdua na wɔtwa so aduane pa ntoto tenenee asetena a ɛma Awurade nhyira ho. Afei mobɛtumi aka nhyira a Awurade ahwie agu mo so berɛ a moabɔ mmɔden sɛ mobɛhwehwɛ No no akyerɛ mo ho mo ho.
Hosea 13:4, 14
Yesu Kristo yɛ m’Agyenkwa ne Odimafoɔ.
-
Sɛdeɛ wobɛsi nokorɛ a ɛwɔ Hosea 13:4 so dua sɛ Agyenkwa biara nni hɔ gye sɛ Yesu Kristo no, wobɛtumi de nkorɔfoɔ bebree a Yesu ka ho mfonin akyerɛ wo nkwadaa. Wo nkwadaa bɛtumi de wɔn nsa akyerɛ onipa a ɔwɔ tumi sɛ ɔbɛgye yɛn afiri bɔne ne owu mu no so mmaako mmaako. Kyɛ w’adanseɛ fa Yesu Kristo ne Ne Mpata no ho.
-
Wo nkwadaa no bɛtumi ahwehwɛ nsɛm wɔ Hosea 13:4, 14 a ɛka Yesu Kristo ho asɛm. Deɛn na saa nsɛm yi kyerɛ yɛn fa Ne ho?” Dwene ho sɛ wobɛboa wo nkwadaa ma wɔde Guide to the Scriptures ahwehɛ twerɛnsɛm afoforɔ a ɛkyerɛkyerɛ sɛ Yesu yɛ yɛn Agyenkwan ne Odimafoɔ. Mo ne mo ho mo ho nkyɛ atenka a mowɔ fa Yesu Kristo ho.
Yoel 2:28–29
Sunsum Kronkron no bɛtumi akyerɛ me kwan.
-
Wobɛtumi aboa wo nkwadaa ma wɔate Yoel 2:28–29 ase berɛ a woma wɔhwie nsuo gu na afei wɔde toto deɛ ɛsosɔ ko, ko anaasɛ a ɛtene nyaa ho. Deɛn na Honhom a “wɔahwie” agu yɛn so no bɛtumi akyerɛ?
-
Berɛ a mobom kenkan Yoel 2:28–29 no, wobɛtumi ama wo nkwadaa de wɔn din ahyehyɛ kasasin “mo mma mmarima” ne “mo mma mmaa” ananmu. Afei boa wɔn ma wɔnhwehwɛ twerɛnsɛm te sɛ Yohane 14:16; Moroni 10:5; Nkyerɛkyerɛ ne Apam 42:17 nhwehwɛ sɛdeɛ Honhom no bɛtumi aboa wɔn.
Sɛ wopɛ bebree a, hwɛ bosome yi Adamfoɔ nsɛmma nwoma mu.