Hosea 1–6; 10–14; Yoeli

Mke wa Hosea, Gomeri, hakuwa mwaminifu kwake, na Mungu alionyesha tukio hili la kusikitisha ili kuwafundisha Waisraeli jinsi alivyojisikia kuhusu wao na maagano yao na Yeye. Unaposoma Hosea 1–3, tafakari jinsi Bwana anavyoona uhusiano Wake na watu Wake wa agano. Ni kwa jinsi gani kufanya agano na Bwana ni kama kuingia katika ndoa? Ni kwa jinsi gani kushindwa kushika agano hilo ni kama kutokuwa mwaminifu kwa mwenzi? (ona Hosea 2:5–7, 13). Ni nini Hosea 2:14–23 inatufundisha sisi kuhusu upendo na rehema za Bwana? Je, ni kwa jinsi gani wewe unamwonyesha Yeye upendo na uaminifu wako?

Katika Hosea 14, tafuta ahadi nyingi nzuri ambazo Bwana hufanya kwa wale wanaorudi Kwake. Kishazi “nitawapenda kwa moyo mkunjufu” kinamaanisha nini kwako? (mstari wa 4). Je, sitiari ya mmea katika mstari wa 5–8 inatufundisha nini kuhusu baraka za Bwana, ikijumuisha baraka ya toba? Kama sehemu ya kujifunza kwako, fikiria kuimba au kusikiliza wimbo kuhusu rehema ya Mwokozi, kama vile “Njoo kwa Yesu” (Nyimbo za Dini, na. 59).

Watu katika siku za Hosea walikuwa wakitoa dhabihu za wanyama, lakini walikuwa wakivunja amri muhimu zaidi. Unafikiria inamaanisha nini kwamba Bwana “alitaka rehema, na sio dhabihu; na kumjua Mungu kuliko sadaka za kuteketezwa”? (Hosea 6:6). Unafikiria inamaanisha nini kwa haki kuwa kama wingu au kama umande? (ona Hosea 6:4). Je, haki yetu inapaswa kuwa kama nini? (ona Isaya 48:18; 1 Nefi 2:9–10).

Ungeweza pia kusoma Mathayo 9:10–13; 12:1–8 ili kuona jinsi Mwokozi alivyotumia Hosea 6:6 wakati wa huduma Yake. Je, vifungu hivi vinakusaidiaje kuelewa maneno ya Hosea?

Wakati unaposoma Yoeli 2:12–13, ingeweza kusaidia kujua kwamba mtu kurarua au kuchana nguo zake ilikuwa ishara ya nje ya kuomboleza au kujuta. Je! Ni kwa jinsi gani kurarua mioyo yetu ni tofauti na kurarua mavazi yetu?

Ni mifanano gani unayoiona kati ya siku yetu na siku ambayo Yoeli aliiona? (ona hasa Yoeli 2:1–2, 11, 18–32). Je, ni kitu gani kinakuvutia kuhusu baraka alizoahidi Bwana katika Yoeli 2:12–32? Kwa nini baraka hizi zingeweza kuwa zenye thamani hususani leo?

Ingeweza kuwa ya kuvutia kusoma kile Moroni alichosema kuhusu Yoeli 2 wakati alipomtembelea Joseph Smith mwaka 1823 (ona Joseph Smith—Historia 1:41). Je, unahisi unabii katika Yoeli 2:28–32 unatimizwa vipi katika siku yetu? (ona pia Matendo ya Mitume 2:1–21). Unafikiri inamaanisha nini kwamba Bwana “atamimina roho [Yake] juu ya wote wenye mwili.”? (Yoeli 2:28).

Ungeweza kutafakari maneno haya kutoka kwa Rais Russell M. Nelson: “Katika siku zijazo, haitawezekana kunusurika kiroho bila mwongozo, maelekezo, faraja na ushawishi endelevu wa Roho Mtakatifu.” (“Ufunuo kwa Kanisa, Ufunuo kwa Ajili ya Maisha Yetu,” Liahona,” Mei 2018, 96). Kwa nini ufunuo ni muhimu kwa kunusurika kwako kiroho?

Ni nini tunaweza kufanya kama tunahisi hatupokei ongezeko la mmiminiko kama huo? Hapa kuna baadhi ya mifano ambayo inaweza kusaidia. Watu katika maandiko haya walifanya nini ili kupokea mmiminiko wa Roho wa Bwana?

• Mosia 4:1–3, 19–20; 18:7–11

• Helamani 6:34–36

• Mafundisho na Maagano 19:37–41

Unaposoma maneno haya kutoka kwa Mzee David A. Bednar, tafakari inamaanisha nini kwako kuhisi mmiminiko wa Roho Mtakatifu katika maisha yako ya kila siku:

“Mara nyingi tunafanya iwe vigumu kupokea ufunuo binafsi. Kwa kusema hilo ninamaanisha, ahadi ya agano ni kwamba tunapoheshimu maagano yetu, tunaweza daima kuwa na Roho Mtakatifu kama mwenzi wetu wa kudumu. Lakini tunaongea juu yake na tunachukulia kama kusikia sauti ya Bwana kupitia Roho Wake ni tukio la nadra. … [Roho] anapaswa kuwa pamoja nasi nyakati zote. Sio kila sekunde, lakini kama mtu anajitahidi vizuri awezavyo—hauhitaji kuwa mkamilifu—lakini kama wewe na mimi tunajitahidi tuwezavyo na hatutendi dhambi nzito, basi tunaweza kutegemea Roho Mtakatifu anatuongoza. …

“… Tunaonekana kuamini kwamba Roho Mtakatifu ni mkubwa na mkubwa na wa ghafla, wakati bado ni tulivu na mdogo na kuongezeka baada ya muda” (“Mzee David A. Bednar Discussion” [evening with a General Authority, Feb. 7, 2020], broadcasts.ChurchofJesusChrist.org).

Ona pia Gary E. Stevenson, “Ushawishi wa Roho,” Liahona, Nov. 2023, 42–45; “Enemy Territory” (video), Gospel Library.

3:38

• Katika kitabu cha Hosea, Bwana alilinganisha maagano Yake na watu Wake na ndoa. Ili kujifunza kutokana na ulinganisho huu, wewe na watoto wako mngeweza kutazama picha ya bibi harusi na bwana harusi na kuzungumza kuhusu jinsi Baba wa Mbinguni anavyotaka mume na mke kutendeana. Wasaidie watoto wako watafute maneno katika Hosea 2:19–20 ambayo yanaelezea jinsi Bwana anavyojisikia kuhusu sisi. Ni jinsi gani tunaweza kumwonesha Bwana kwamba tunampenda na tutakuwa waaminifu Kwake?

• Hosea 10:12 hurejelea kupanda mbegu, kuvuna, majira na mvua ili kutualika sisi kumtafuta Bwana. Unaposoma mstari huu, ni mawazo gani ya ubunifu huja akilini ambayo yanaweza kuwapa ushawishi watoto wamtafute Yeye? Kwa mfano, pengine watoto wako wangeweza kuchora saa na kuandika njia wanazoweza kumtafuta Bwana kwa nyakati tofauti siku nzima. Wimbo kama “Anytime, Anywhere” (Gospel Library) ungeweza kukusaidia kufundisha kwamba daima ni wakati mzuri wa kumtafuta Bwana.

• Au watoto wako wangeweza kufanya vitendo rahisi vinavyoendana na mstari, kama vile kujifanya kupanda mbegu, kuchuma mboga, au kusimama katika mvua. Wasaidie watoto wako walinganishe kupanda mbegu na kuvuna chakula kizuri na kuishi kwa uadilifu na kupokea baraka za Bwana. Kisha mngeweza kusimiliana kuhusu baraka ambazo Bwana amezimimina juu yako wakati ulipojaribu kumtafuta Yeye.

• Ili kusisitiza ukweli katika Hosea 13:4 kwamba hakuna Mwokozi isipokuwa Yesu Kristo, ungeweza kuwaonyesha watoto wako picha za watu kadhaa, ikijumuisha Yesu. Watoto wako wangeweza kuchukua zamu kumwonyesha mtu ambaye ana uwezo wa kutuokoa kutokana na dhambi na kifo. Shiriki ushuhuda wako juu ya Yesu Kristo na Upatanisho Wake.

• Watoto wako wangeweza kutafuta maneno katika Hosea 13:4, 14 ambayo yanamwelezea Yesu Kristo. Je, maneno haya yanatufundisha nini kumhusu Yeye? Fikiria kuwasaidia watoto wako kutumia Mwongozo wa Maandiko kutafuta maandiko mengine ambayo yanafundisha kwamba Yesu ni Mwokozi na Mkombozi wetu. Shirikianeni jinsi mnavyojisikia kuhusu Yesu Kristo.

• Pengine ungeweza kuwasaidia watoto wako waelewe Yoeli 2:28–29 kwa kuwaacha wamimine kimiminiko na kisha kukitofautisha na tone au mchuruzo. Inaweza kumaanisha nini kwa Roho “kumiminwa” juu yetu?

• Mnaposoma Yoeli 2:28–29 pamoja, mnaweza kuwaalika watoto wako waweke majina ya kila mmoja badala ya virai “wana wenu” na “mabinti zenu.” Kisha wasaidie kupekua maandiko kama Yohana 14:16; Moroni 10:5; Mafundisho na Maagano 42:17 ili kujua jinsi Roho anavyoweza kuwasaidia.