Daniel 1–7

Chanchan naq chiqajunilo wanko sa’ Babilonia. Wan naq noko’aaleek chixjalb’al li qawanjik ut chixnajtob’resinkil qib’ rikin li qapaab’aal chirix li Kristo. Naq taawil Daniel 1, 3, ut 6, k’e reetal chan ru naq laj Daniel, laj Sidrak, laj Misak, ut laj Abednego ke’reek’a naq minb’ileb’ ru chixb’aanunkil li k’a’ru ke’xnaw naq ink’a’ us. K’a’ru ke’xb’aanu sa’eb’ li hoonal a’an? (chi’ilmanq Daniel 1:10–13; 3:15–18; 6:10). K’a’ru kik’ulman sa’ xk’ab’a’ lix paab’aaleb’? K’a’ru nakatzol rik’in li ke’xk’ul li naru tatxtenq’a chixpaab’ankil li Qaawa’ us ta nayale’ aawix? K’oxlan ajwi’ chirixeb’ li patz’om a’in:

• Jo’q’e hoonal aaweek’ahom naq minb’ilat chixb’aanunkil k’a’ruhaq nakanaw naq ink’a’ us? K’a’ru nakatrosob’tesi wi’ li Qaawa’ xb’aan roxloq’inkil lix taqlahom?

• K’a’ru taak’ulmanq wi laa paab’aal ink’a’ naxk’e chi uxk li ninqi sachb’a-ch’oolej li nakasik’? (chi’ilmanq Alma 14:8–13). A’ yaal li nakawil sa’ Daniel 3:13–18, chan raj ru naq laj Sidrak, laj Misak, ut laj Abednego ke’xsume li patz’om a’in? Chan ru naq lix b’aanuhomeb’ naru tatxtenq’a sa’ lix yalb’al aawix?

• Chan ru naq li k’a’ru chaab’il nakasik’ ru xb’aanunkil naru naxtenq’aheb’ laa was aawiitz’in chixnimob’resinkil lix paab’aaleb’ chirix li Qaawa’? (chi’ilmanq Daniel 2:47; 3:28–29). K’oxlan chirix lix wankilal laa b’aanuhom sa’ xyu’ameb’ laa was aawiitz’in.

Chi’ilmanq ajwi’ Dieter F. Uchtdorf, “Matxiwak, ka’ajwi’ naq wan aapaab’aal,” Jolomil ch’utub’aj-ib’ re octubre 2015.

Chi k’utb’esinb’il chiru, laj Daniel kiril naq lix matk’ laj Nabukodonosor kixye resil li ruchich’och’il awa’b’ejihom li te’wanq, jo’ ajwi’ lix awa’b’ejihom li Dios, li “maajun wa taajuk’manq” (Daniel 2:44). ”Li Iglees, a’an li awa’b’ejihom a’an sa’ roso’jikeb’ li kutan,” kixye li Elder D. Todd Christofferson, “li ink’a’ yiib’anb’il xb’aan li winq, xaqab’anb’il b’an xb’aan lix Dios li Choxa, ut yoo chi tololnak jo’ jun pek “k’okb’il chaq sa’ li tzuul moko xb’aan ta uq’ej,” re xnujob’resinkil li ruchich’och’” (“K’a’ut naq wan li Iglees,” Jolomil ch’utub’aj-ib’ re octubre 2015). K’oxlan chirix lix awa’b’ejihom li Dios sa’ roso’jikeb’ li kutan naq nakawil lix ch’olob’ankil li pek sa’ Daniel 2:34–35, 44–45. K’a’ru laa k’anjel sa’ xtz’aqob’resinkil ru li profeetil aatin a’an?

Chi’ilmanq ajwi’ “Ex tenamit, ak xtaw xkutankil,” Eb’ li B’ich, 171; “Dios les dio conocimiento” (video), ChurchofJesusChrist.org.

13:49

Naq taawil Daniel 2:1–15, k’oxla k’a’ raj ru taaweek’a wi wanqat raj sa’ xna’aj laj Daniel. K’a’ru kixb’aanu laj Daniel? (chi’ilmanq Daniel 2:16–18). K’a’ru nakatzol sa’ Daniel 1:17 chirix li kixb’aanu li Dios re xkawresinkil laj Daniel? K’a’ru nakatzol rik’in li raatin ut xb’aanuhom laj Daniel chirix naq kitenq’aak xb’aan li Qaawa’? (chi’ilmanq Daniel 2:19–30).

Chiru lix k’anjel li Kolonel sa’ li ruchich’och’, naab’aleb’ aj Judio ke’xk’oxla naq li k’ab’a’ej “Ralal li winq” wan sa’ Daniel 7:13 a’an xk’ab’a’ li Mesias li taachalq. K’a’ru nakatzol chirix li Mesias sa’ Daniel 7:13–14? (chi’ilmanq ajwi’ Moises 6:57).

Li Kolonel chi kok’ aj xsa’ kixye naq a’an “li Ralal li winq.” Naru nakawileb’ junjunqeb’ reetalil a’an sa’: Mateo 25:31; Markos 9:31; 10:45. K’a’ru naxk’ut chirix a’an sa’eb’ li raqal a’in? Sa’ Markos 14:61–64, li Jesus kiroksi li k’ab’a’ej a’in sa’ roso’jik lix kutan sa’ lix yu’am sa’ ruchich’och’. K’e reetal k’a’ru ke’xk’oxla li kristiaan naq ke’rab’i li raatin. Chan ru naq lix profeetil aatin laj Daniel chirix li Ralal li Winq naxjal laa week’ahom chirix li k’a’ru kik’ulman sa’ Markos 15?

Jo’ naq li Jesus xik’ ki’ile’ xb’aan xyeeb’al naq a’an “li Ralal li winq,” laa’at ajwi’ naru nakathob’e’ xb’aan xyeeb’al li yaal. Juntaq’eeta li profeetil aatin wan sa’ Daniel 7:13–14 rik’in li yeechi’ihom wankeb’ sa’ Tzol’leb’ ut Sumwank 121:29, 46.

Chi’ilmanq ajwi’ Tzol’leb’ ut Sumwank 49:6; Li K’utul Raqal reheb’ li Loq’laj Hu, “Ralal li Winq,” Biblioteca del Evangelio.

• Re xtenq’ankileb’ laa kok’al chi tzolok sa’eb’ li musiq’anb’il seraq’ wankeb’ sa’ li hu Daniel, naru taasik’eb’ xjalam-uuch li k’a’ru kik’ulman sa’ Daniel 1, 3, ut 6 (chi’ilmanq li perel re kok’ k’anjel re li xamaan a’in malaj li Hu reheb’ li Jalam-uuch re li Evangelio, 23, 25, 26). Chirix a’an, naru nakak’eheb’ li jalam-uuch chi huphu ut taapatz’ re jun reheb’ li kok’al naq tixb’alq’usi junaq ut tixwotz li seraq’ nareetali. (Re xtawb’al li tenq’, chi’ilmanq “Laj Daniel ut eb’ li ramiiw,” “Laj Sidrak, laj Misak, ut laj Abednego,” ut “Laj Daniel ut xna’ajeb’ li kaqkojl” sa’ Eb’ li Esilal sa’ li Najter Chaq’rab’, 154–156, 160–162, 163–165.)

  

  1:39

  

  1:39

  

  1:45

• Tenq’aheb’ laa kok’al chixjultikankil hoonal b’ar wi’ maare te’reek’a naq neke’mine’ ru chixsik’b’al ru li k’a’ru ink’a’ us, jo’ laj Daniel ut eb’ li ramiiw sa’ Daniel 1, 3, ut 6. Wotzomaq cherib’il eerib’ chan ru naq nekex’osob’tesiik xb’aan naq nekesik’ ru li k’a’ru us, us ta ch’a’aj. Naru ajwi’ nekeb’icha jun li b’ich chirix li na’leb’ a’an, jo’ “Sik’ li us” (Eb’ li B’ich, 151).

• Rilb’al li seraq’ chirix laj Daniel ut eb’ li ramiiw li ink’a’ ke’xtzeka lix tib’ ut lix viin li rey naru nekexxk’e chi aatinak chirix li chaq’rab’ re kawilal xk’e chaq anajwan qe li qaChoxahil Yuwa’ (chi’ilmanq Tzol’leb’ ut Sumwank 89). Maare naru nakasik’ li osob’tesihom ke’xk’ul laj Daniel ut eb’ li ramiiw ut taajuntaq’eeta rik’in li osob’tesihom neke’yeechi’iman sa’ li Aatin re Chaab’il Na’leb’ (chi’ilmanq Daniel 1:15–17 ut Tzol’leb’ ut Sumwank 89:18–21).

• Naq taawil Daniel 2:31–35, 44–45 rik’ineb’ laa kok’al, naru nakapatz’ reheb’ naq te’xyiib’ xjalam-uuch lix matk’ laj Nabukodonosor. Tenq’aheb’ chixtawb’al ru naq li pek sa’ lix matk’ nareetali Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’a’ru naqatzol chirix li Iglees sa’ li matk’ a’in? Eb’ laa kok’al naru te’xye junjunq li k’a’aq re ru xb’aanu li qaChoxahil Yuwa’ re xk’ojob’ankil wi’chik lix Iglees sa’ roso’jikeb’ li kutan. Wi neke’raj xtenq’, k’uteb’ xjalam-uuch li kik’ulman sa’ lix k’ojob’ankil wi’chik li Iglees (chi’ilmanq Hu reheb’ li Jalam-uuch re li Evangelio, 90–95).

• K’a’ut naq aajel ru choq’ re laj Daniel li tijok chiru li qaChoxahil Yuwa’? Maare laa’at ut eb’ laa kok’al naru nekex’aatinak chirix li patz’om a’an naq teeril Daniel 6. Chirix a’an naru nekeye cherib’il eerib’ k’a’ut naq aajel ru li tijok choq’ eere. Maare taawulaq chiruheb’ laa kok’al xyiib’ankileb’ xjalam-uucheb’ a’an naq neke’tijok sa’ jalan jalanq hoonal. Naru neke’roksi lix jalam-uucheb’ re te’xwotz chirib’ileb’ rib’ naq naru nokotijok chiru li qaChoxahil Yuwa’ yalaq ta b’ar wanko malaj yalaq k’a’ru li naqaj ru.