Esekiel 1–3; 33–34; 36–37; 47

Sa’ Esekiel 3 ut 34, li Qaawa’ na’aatinak chirixeb’ laj jolominel sa’ lix tenamit jo’ aj k’aak’alenel ut aj ilol karneer. Naq taawileb’ li ch’ol a’in, k’oxlan chirix li neke’xye li k’ab’a’ej a’in chirix li k’a’ru naraj naxye li wank choq’ aj jolominel.

Aniheb’ li “karneer” naraj li Qaawa’ naq taach’oolani? K’a’ru nakataw sa’ Esekiel 34 li naru naxtenq’a junaq kristiaan chixkawresinkil rib’ re xik sa’ jun mision, re k’iiresink kok’al, malaj xb’aanunkil junaq xk’anjel? Chan ru taataaqe xb’aanuhom li Qaawa’ jo’ aj k’aak’alehom qe? (che’ilmanq li raqal 11–31).

Naru ajwi’ nakatz’ileb’ rix li eetalil taataweb’ sa’ li ch’ol a’in. K’a’ru neke’reetali li “chaab’il pim” ut li “chaab’il na’ajej” sa’ li raqal 14? B’ar wan xjalanil junaq li karneer “sachenaq” ut jun “li xcha’cha’iik”? (raqal 16). K’a’ chik ru li eetalil nakataw?

Chi’ilmanq ajwi’ Jwan 21:15–17; Gerrit W. Gong, “Rilb’aleb’ li komon,” Jolomil ch’utub’aj-ib’ re abril 2023.

“Oso’jenaqo sa’ li maak,” ke’xye laj Israelita, “chan ta chik ru naq tookole’q?” (Esekiel 33:10). Re xsumenkileb’, li Qaawa’ kiraatinaheb’ chirix li jalb’a-k’a’uxlej ut li kuyuk maak. Eb’ li patz’om a’in naru nakate’xtenq’a chi k’oxlak chirix li k’a’ru kixk’ut:

• K’a’ru naraj naxye “kole’k xb’aan li chaab’ilal xb’aanuhom chaq”? (chi’ilmanq Esekiel 33:12–13).

• K’a’ raj ru taaye re li ani nareek’a naq moko tiik ta li xb’aanuman reheb’ li kristiaan sa’ Esekiel 33:12–19? (chi’ilmanq ajwi’ Mateo 21:28–31; Lukas 18:9–14).

• K’a’ru nakataw sa’eb’ li raqal a’in li nakatxtenq’a chixtawb’al ru k’a’ru naraj naxye li jalok k’a’uxlej? K’a’ chik ru nakataw sa’ Esekiel 36:26–27 ut Alma 7:14–16?

Na’eetaliman lix ch’utub’ankil Israel sa’ Esekiel 37 rik’in wiib’ li eetalil. Naq nakatzol li xb’een—xk’eeb’al wi’chik xyu’am li chaqi b’aq (che’ilmanq li raqal 1–14)—k’oxla k’a’ru naxye aawe chirix xch’utub’ankil Israel li yo’yookeb’ jo’eb’ ajwi’ li kamenaqeb’ (chi’ilmanq Esekiel 36:24–30). K’oxlan chirixeb’ li patz’om jo’ a’in:

• K’a’ru yoo chixsik’b’al li Qaawa’ rik’in xch’utub’ankileb’ laj Israel?

• Chan ru naq yoo chixb’aanunkil a’an?

Naru ajwi’ nakapatz’eb’ li na’leb’ a’an naq nakattzolok chirix li xkab’ eetalil, sa’eb’ li raqal 15–28. Li eetalil a’in na’aatinak chirix wiib’ li che’ li neke’xye naab’aleb’ aj tzolonel naq a’aneb’ li perel che’ junajinb’ileb’ rik’in jun bisagra. Li perel che’ re Juda nareetali li Santil Hu (lix k’ihal li Santil Hu tz’iib’anb’il xb’aaneb’ li riyajil laj Juda), ut li perel che’ re Efrain nareetali lix Hu laj Mormon (lix junkab’al laj Lehi, a’aneb’ li riyajil laj Jose re Egipto). Rik’in a’an sa’ aak’a’uxl, k’a’ru neke’xk’ut li raqal a’in chawu chirix xk’anjeleb’ li loq’laj hu sa’ xch’utub’ankil Israel?

K’oxla chan ru naq li Santil Hu ut lix Hu laj Mormon neke’k’anjelak sa’ kab’ichal sa’ laa yu’am—re tz’aqal aatenq’ankil chi chalk rik’in li Kristo. B’ar wankeb’ li raqal li wankeb’ xyaalal choq’ aawe?

Chi’ilmanq ajwi’ 2 Nefi 3:11–13; 29:14; “Ex aj Israel, abʼihomaq,” Eb’ li B’ich, 6; Temas y preguntas, “Biblia,” “Libro de Mormon,” Biblioteca del Evangelio; “El Libro de Mormón recoge al Israel disperso” (video), Biblioteca del Evangelio.

1:31

Naq taawil Esekiel 47:1–12, maare us xnawb’al naq li Palaw Kamenaq, a’an jwal atz’am ru ut aran ink’a’ naru neke’wan li kar chi moko eb’ li pim. K’a’ru naxsach aach’ool chirixeb’ li ha’ neke’aatinak wi’ li raqal 1–12? (chi’ilmanq ajwi’ Apokalipsis 22:1). K’a’ raj ru neke’reetali li ha’ a’an? K’a’ru neke’xk’utb’esi li che’ na’aatinak wi’ li raqal 12?

K’a’ru xkomon aana’leb’ naxk’e li raatin li Elder Dale G. Renlund sa’ “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink”? (chi’ilmanq Jolomil ch’utub’aj-ib’ re abril 2018). Tz’il rix chan ru nakataw rusilal laa yu’am sa’ musiq’ej ut aak’irtesinkil sa’ xk’ab’a’ li santil ochoch.

• Maare taawulaq chiruheb’ li kok’al toj kok’eb’ xb’aanunkil k’a’aq re ru neke’xk’am rib’ rik’in Esekiel 3:17. Qayehaq, naru neke’xk’ut lix sa’eb’ ru, lix xikeb’, ut lix tz’uumal reheb’ naq te’rab’i li aatin “aj k’aak’alenel,” “tinye aawe,” ut “waatin.” Maare ajwi’ taawulaq chiruheb’ b’eek—sa’ junaq yamyookil na’ajej malaj sa’ li na’ajej wankeb’ wi’ Naq te’b’eeq, ye reheb’ naq wan k’a’aq re ru sa’ li b’e, jo’ li roq ha’ tento te’xpisk’o, ruq’ che’ b’ar wi’ tento te’xk’achab’ rib’, malaj eb’ li xul li tento te’xkol wi’ rib’ (li tz’aqal xul malaj yal k’oxlanb’il). A’in naru nekexxk’e chi aatinak chirix chan ru naq lix profeet li Qaawa’ nokoxtij chirixeb’ li xiwxiw li ink’a’ nokoru chirilb’al.

• Arin wan jun chik na’leb’ re xk’utb’al Esekiel 3:17; 33:1–5. Jun reheb’ laa kok’al naru naxpak’ naq a’an jun aj “k’aak’alenel” li na’ilok chiru jun ventaan ut naxseraq’i reheb’ lix komon k’a’ru yoo chi k’ulmank chirix kab’l. Naru ajwi’ nekeril li video “Los atalayas en la torre” (ChurchofJesusChrist.org). Chan ru naq li qayo’yookil profeet chanchan aj k’aak’alenel choq’ qe?

  

  4:17

• Chirix naq teeril Esekiel 37:15–23, laa’at ut eb’ laa kok’al naru nekesik’eb’ wiib’ li che’ ut teetz’iib’a chiru jun Choq’ re laj Juda (Li Santil Hu) ut chiru li jun chik Choq’ re laj Jose (Lix Hu laj Mormon). Chirix a’an naru nekewotz seraq’ malaj raqal sa’ li Santil Hu ut lix Hu laj Mormon li neke’tenq’ank eere chireek’ankil naq nach’ wankex rik’in li Kolonel ut naq wankex jo’ “lix tenamit” (raqal 23). K’a’ut naq us naq wanqeb’ qik’in sa’ wiib’ li loq’laj hu a’an?

• Esekiel 47 naxye resil lix k’utb’esinb’il matk’ laj Esekiel chirix li nima’ li na’el chaq sa’ li santil ochoch ut naxk’irtesi li Palaw Kamenaq—jun palaw li k’a’jo’ xk’ihal li ratz’amil, jo’kan naq maajun kar maajun q’een wan chi sa’. Eb’ laa kok’al maare te’ruuq chixyiib’ankil xjalam-uuch jun malaj wiib’ k’a’aq re ru yeeb’il sa’ li k’utb’esinb’il matk’, jo’ li santil ochoch, li nima’, li yamyookil ch’och’, li Palaw Kamenaq, jun tuub’ li kar, malaj jun che’ naxk’e li ru. Chirix a’an, naq yooqex chirilb’aleb’ li raqal 1–12, naru neke’xwotz lix jalam-uuch b’ar wi’ natawman resil li k’a’aq re ru a’an. K’a’ru li osob’tesihom ke’chal chaq sa’ li nima’ sa’ li kutb’esinb’il matk’ a’in? Tenq’aheb’ li kok’al chixk’eeb’al reetal naq eb’ li osob’tesiik a’an chanchaneb’ li osob’tesiik neke’xyeechi’i li Kolonel reheb’ li neke’xpaab’ lix sumwank re li santil ochoch. Li video “Y el río aumentará” (Biblioteca del Evangelio) naru natenq’an.

  

  3:43

• Naru ajwi’ nekeb’icha jun li b’ich li na’aatinak chirix li rosob’tesihom li santil ochoch, jo’ “Taaruuq toowanq aran sa’ choxa” (B’ichleb’aal choq’ reheb’ li Kok’al, 98). K’a’ru naxk’ut li b’ich a’in chirix chan ru nokorosob’tesi li Qaawa’ sa’ lix santil ochoch?