Jeremi 1–3; 7; 16–18; 20

Imajine w ap pale avèk yon zanmi ki pa janm tande pale de pwofèt, epi ou deside eksplike konsèp la nan itilize apèl Jeremi pou l vin yon pwofèt la nan Jeremi 1:4–19. Kisa w twouve nan vèsè sa yo ki anseye yon bagay konsènan pwofèt Bondye yo? Ou ta ka gade tou nan Jeremi 7:1–7; 20:8–9 ak yon kantik tankou “Viens écouter la Voix de Dieu” (Cantiques, no. 12).

Ou ta ka vle anseye zanmi w lan sou pwofèt vivan jodia tou. Èske gen yon bagay nan vèsè sa yo ki ta ka ede? Pa egzanp, kisa pwofèt nan epòk pa nou yo “derasinen” oswa “anrasinen”? Kisa yo “bati” ak “plante”? (Jeremi 1:10). Kijan w te vin konnen ke se Bondye ki aple pwofèt vivan nou an?

Gade tou Atik Lafwa 1:6, 9; “Poukisa Nou Genyen Pwofèt?” (videyo), ChurchofJesusChrist.org.

1:37

Kisa Jeremi te aprann sou tèt li nan Jeremi 1:5? Antanke yon pwofèt ki te fèk aple, poukisa enfòmasyon sa a t ap enpòtan pou l te konnen?

Anpil nan sa Jeremi te aprann sou tèt li nan Jeremi 1:5 yo vrè pou ou tou. Bondye te konnen w anvan w te fèt epi Li te prepare w pou responsablite espesifik. Pou aprann plis konsènan lavi ou anvan w te fèt, li Alma 13:1–4; Doktrin ak Alyans 138:53–56; ak Abraram 3:22–23. Ou ka fè yon lis verite ou dekouvri yo. Poukisa enfòmasyon sa a enpòtan pou w konnen?

Pou aprann konsènan fason verite sa yo te afekte lavi Èldè Ahmad S. Corbitt, etidye mesaj li ki rele “Ou Ka Rasanble Izrayèl!” la. (Lyawona, Me 2021, 63–63). Kijan konesans sou lavi premòtèl nou afekte fason nou viv lavi mòtèl nou?

Men sa Prezidan Russell M. Nelson te di konsènan lavi premòtèl ou:

“Papa nou ki nan Syèl la konnen w depi lontan. Oumenm, antanke pitit gason oswa pitit fi Li, se Li ki te chwazi w pou w te vin sou tè a nan moman presi sa a, pou w ka yon dirijan nan gwo travay Li a sou tè a. Ou te chwazi non pa pou karakteristik kò w men pou atribi espirityèl ou, tankou bravou, kouraj, entegrite nan kè, yon swaf pou verite, yon grangou pou bon konprann, ak yon dezi pou sèvi lòt moun.

“Ou te devlope kèk nan atribi sa yo nan lavi premòtèl la. Genyen lòt ou ka devlope isit sou tè a pandan w ap kontinye chèche yo” (“Desizyon pou Letènite,” Lyawona, Nov. 2013, 107).

Reflechi sou kèk sitiyasyon ou ka rankontre kote li ta enpòtan pou w sonje verite sa yo sou lavi premòtèl ou a. Kisa w ka fè pou w sonje verite sa yo?

Gade tou Russell M. Nelson, “Desizyon pou Letènite,” Lyawona, Nov. 2013, 106–9; Sijè ak Kesyon, “Preòdinasyon,” “Lavi premòtèl,” Bibliyotèk Levanjil la.

Nan rejyon arid kote Izrayelit yo te viv la, moun yo te konsève dlo presye nan rezèvwa souteren ki te rele sitèn. Kisa w panse “sitèn kraze” yo mansyone nan Jeremi 2:13 yo ta gen dwa senbolize? Poukisa resevwa dlo nan yon fontèn te pi bon pase konte sou yon sitèn? Kisa sa vledi pou n abandone “sous dlo lavi” a? Pandan n ap li Jeremi 2 ak 7, remake kijan pèp la t ap abandone dlo vivan Senyè a (gade, pa egzanp, Jeremi 2:26–28; 7:2–11). Poukisa “dlo vivan” se yon bon senbòl pou sa Sovè a ba nou? Fè yon ti reflechi sou fason w ap resevwa dlo vivan.

Jeremi 7 adrese a moun ki t ap antre nan “kay Senyè a…. pou adore Senyè a,” men aksyon yo pa t matche avèk devosyon yo sou deyò (gade vèsè 2–11). Ki mesaj ou santi Senyè a gendwa genyen pou ou nan vèsè 21–23yo?

Nan Jeremi 16:14–15, Jeremi te konpare rasanbleman Izrayèl la nan dènye jou yo avèk Egzòd Izrayèl la soti kite Ejip la. Nan opinyon pa w, poukisa rasanbleman sa a ta menm pi enpòtan pou pèp Bondye a pase Egzòd la?

Kisa Jeremi 3:14–18; 16:14–21 sigjere sou fason rasanbleman an fèt?

Nan mesaj li a “Espwa Izrayèl” la, Prezidan Russell M. Nelson, tankou Jeremi, te anseye ke rasanbleman Izrayèl la “se bagay ki pi enpòtan k ap akonpli sou tè a jodi a” (devosyonèl mondyal jèn yo, 3 Jen 2018, Bibliyotèk Levanjil la). Li oswa koute mesaj li a, epi gade pou w wè si w ka dekouvri (a) kijan Prezidan Nelson defini rasanbleman Izrayèl la, b) fason li dekri enpòtans li, epi (c) kijan ou ka fè pati rasanbleman an.

• Pou prezante verite enpòtan ki anseye nan Jeremi 1:5, ou ta ka montre timoun ou yo yon foto yon tibebe (oswa, si sa posib, ou ta ka gade foto timoun ou yo lè yo te tibebe) Mande timoun ou yo si yo konnen ki kote yo te viv anvan yo te fèt. Nou ta ka chante ansanm yon chan ki anseye sou lavi premòtèl nou, tankou “I Lived in Heaven” (Children’s Songbook, 4).

• Si timoun ou yo ta renmen aprann plis, ou ta ka ede yo jwenn “Lavi premòtèl” nan Gid ekriti yo. Yo te kapab chèche repons pou kesyon “kimoun,” “kilè,” ak “kisa” yo sou lavi premòtèl la.

• Konsidere montre foto pwofèt vivan an oswa pwofèt nan ekriti yo (ou ka jwenn kèk nan revi Legliz, Liv Ilistrasyon Levanjil la, ak nan Vini, Suiv Mwen). Mande timoun yo kisa yo konnen konsènan pwofèt sa yo.

• Pou anseye sou sa pwofèt yo fè, ou ka seleksyone kèk vèsè ki itil nan Jeremi 1, tankou vèsè 5, 7, 10 ak 19. Timoun ou yo te kapab chwazi youn nan vèsè yo, li l, epi pataje yon bagay yo aprann konsènan pwofèt yo.

• Pandan w ap li Jeremi 16:16, timoun ou yo te ka pretann ke y ap fè “lapèch” oswa “lachas” pou jwenn objè yo nan sal la. Prezidan Russell M. Nelson te konpare pechè yo ak chasè yo nan vèsè sa a avèk misyonè yo (gade “Rasanbleman Izrayèl ki te Dispèse a,” Lyawona, Nov. 2006, 81). Kisa misyonè yo fè? Kijan nou ka ede “peche” ak fè “lachas” pou Izrayèl ki dispèse a? (gade “Yon Mesaj pou Timoun yo de Prezidan Russell M. Nelson” [videyo], ChurchofJesusChrist.org).

  

  3:30

• Pou eksplore vèsè sa yo, ou ta ka diskite oswa montre kijan potri fèt (gade foto a ki nan fen plan leson sa a). Ki mesaj Senyè a genyen pou nou nan Jeremi 18:1–6? Kisa sa vledi pou ou se ajil nan men Senyè a? (gade tou Ezayi 64:8). Pou yon lòt istwa ki konpare nou avèk ajil potye a, gade mesaj Èldè Richard Maynes la “Lajwa pou Viv yon Lavi Santre sou Kris” (Lyawona, Nov. 2015, 27–30).