Ezayi 58–66

Poukisa pou yon moun ta volontèman rete san manje lè manje disponib? Pandan w ap etidye Ezayi 58:3–12 la, ou ka panse a rezon ki fè ou jene—osi byen ke rezon Senyè a genyen pou L bay lwa sa a. Men kèk lòt kesyon pou w medite:

• Poukisa moun ka pafwa panse ke jene se plis yon fado ke yon benediksyon? (gade Ezayi 58:3–5). Kijan ansèyman Senyè a nan chapit sa a chanje pèsepsyon sa a pou ou?

• Kisa sa ta ka vledi pou “demare kòd mechanste” ak “kraze tout jouk”? (Ezayi 58:6). Kijan jene ka beni lòt moun? (gade vèsè 7).

• Kijan jene te pote benediksyon yo dekri nan Ezayi 58:8–12 yo?

Nan mesaj li a “Èske Sa A Se Pa Jèn M Te Chwazi a?” (Liahona, Me 2015, 22–25), Prezidan Henry B. Eyring pataje plizyè egzanp sou fason moun beni pa jèn ak ofrann jèn. Kilè w konn wè menm benediksyon sa yo nan lavi ou?

Gade tou “Bless Our Fast, We Pray,” Hymns, no. 138; Sijè ak Kesyon, “Jèn ak Ofrann Jèn,” Bibliyotèk Levanjil la.

Èske jou Saba a se “yon delis” pou ou? Pandan w ap etidye Ezayi 58:13–14 la, konsidere kijan ou ta ka jwenn plis delis nan jou Senyè a. Pa egzanp, kisa sa ka vledi pou ou sispann “fè tèt ou plezi nan jou sakre [Li] a”? Ki diferans ki genyen ant “[rejwi] tèt ou nan Senyè a” ak “regle pwòp zafè pa ou”?

Gade tou Russell M. Nelson, “Saba a se yon Delis,” Lyawona, Me 2015, 129–32.

Ezayi 58–66 genyen anpil referans sou misyon ekspyatwa Jezikri a. Chèche jwenn yo pandan w ap etidye a. An patikilye, note tit ak mo yo itilize pou dekri Sovè a. Pa egzanp:

• Kisa ki enpresyone w nan deskripsyon sou “entèsesyon” an nan Ezayi 59:16–21 la? Kijan Sovè a simonte kondisyon yo dekri nan vèsè 9–15o yo?

• Lè Jezikri te anonse pèp Nazarèt la ke Li sete Mesi a, Li te site Ezayi 61:1–3 (gade Lik 4:16–21; gade tou videyo “Jezi Deklare Li se Mesi a,” Bibliyotèk Levanjil). Kijan Jezikri beni oumenm ak lòt yo nan fason yo nan vèsè sa yo? Kijan Li ba ou bote nan plas sann?

  

  3:24

• Ki “bonte Senyè a” ou ka “mansyone”? (gade Ezayi 63:7–9).

• Ki lòt referans a Sovè a ou jwenn nan Ezayi 58–66?

Gade tou Mozya 3:7; Doktrin ak Alyans 133:46–53.

Ezayi 60 ak 62 pale de limyè ak fènwa, de gade ak wè pou anseye konsènan fason levanjil Jezikri a pral beni mond lan nan dènye jou yo. Chèche jwenn konsèp sa yo nan Ezayi 60:1–5, 19–20; 62:1–2 Pandan w ap li vèsè sa yo, medite sou fason Bondye ap rasanble pitit li yo soti nan fènwa rive nan limyè Li. Ki wòl ou nan travay sa a?

Gade tou 1 Nefi 22:3–12; 3 Nefi 18:24; Doktrin ak Alyans 14:9; Bonnie H. Cordon, “Pou Yo Ka Wè,” Lyawona, Me 2020, 78–80.

Ezayi te pale de yon jou kote “nou bliye pwoblèm lontan yo” (Ezayi 65:16). Pandan ke pwofesi sa a gen plizyè akonplisman, nan tout sans li, jou sa a poko rive—lè Jezikri ap retounen an. Ezayi te dekri jou jou fiti sa a nan Ezayi 64:1–5;65:17–25; 66. Remake konbyen fwa li te itilize pawòl tankou “rejwi” ak “rejwisans.” Poukisa retou Sovè a pral tounen yon jou rejwisans pou ou? Kisa w ka fè pou prepare pou vini Li?

Gade tou Atik Lafwa 1:10; Russell M. Nelson, “Fiti Legliz la: Prepare Mond lan pou Dezyèm Vini Sovè a,” Ensign, Avr. 2020, 13–17.

• Petèt pi bon fason pou ankouraje pitit ou yo pou yo jene—lè yo pare—se nan ede yo konprann objektif Senyè a pou lwa sa a. Konsidere li ansanm Ezayi 58:6–11 pou jwenn repons pou kesyon sa yo: Poukisa nou jene? Kijan nou jene? Ou ta ka gade tou nan “Jene, Jèn” nan Gid Ekriti yo.

• Si w te fè yon eksperyans siyifikatif avèk jèn, pataje l avèk timoun ou yo. Ou kapab mande yo tou kijan yo t ap esplike yon zanmi poukisa Senyè a te ban nou lwa sa a.

• Apre w fin li Ezayi 58:13–14, ou ta ka atire atansyon sou jou yo nan semèn nan yon kalandriye epi envite timoun ou yo pou yo repete jou yo avèk ou. Lè nou rive sou Saba a, mande yo pou yo rele jou sa a “yon delis.” Di yo poukisa Saba a se yon delis pou ou.

• Pataje youn ak lòt fason ou ka “rejwi tèt ou nan Senyè a” nan Saba a. Petèt timoun ou yo te kapab trase ide yo epi mete yo nan yon “bwat delis Saba a.” Apresa, lè yo bezwen ide sou bagay pou yo fè nan Saba a, yo te ka rale yon ide soti nan bwat la.

• Envite timoun yo fèmen je yo pandan w ap li Ezayi 60:1-3. Mande yo pou yo ouvri je yo lè yo tande mo “limyè” a epi fèmen je yo lè yo tande mo “tenèb” la. Eksplike ke Jezikri ak levanjil Li a se tankou yon limyè ki ede nou wè wout pou retounen al jwenn Papa nou ki nan Syèl la.

• Ezayi 65:17-25 dekri kijan tè a pral ye lè Sovè a vini ankò. Pandan w ap li vèsè sa yo avèk timoun ou yo, ede yo chèche fason lavi a pral diferan nan “nouvo tè” Ezayi dekri a. Poukisa se pral yon tan pou nou “kontan e rejwi pou tout tan”? (vèsè 18).

• Nou ta ka chante yon kantik sou Dezyèm Vini an ansanm tou, tankou “Quand Jesus Reviendra” (Bibliyotèk Levanjil). Pataje youn ak lòt sa w ap tann de retou Sovè a. Kisa nou ka fè pou n prepare pou jou sa a?