Ezayi 50–57

Menm si Izrayelit yo te pase anpil ane an kaptivite—e menm si kaptivite sa a se te rezilta pwòp move chwa yo—Senyè a te vle pou yo te gade lavni avèk espwa. Kisa w jwenn nan mesaj Ezayi a ki ba w espwa? Yon tablo tankou sa a ta ka ede w etidye:

Gade tou Mozya 12:20–24; 15:13–18; 3 Nefi 20:29–46; Doktrin ak Alyans 113:7–10; Russell M. Nelson, “Anbrase Lavni avèk Lafwa,” Liahona, Nov. 2020, 73–76.

Gen kèk chapit nan ekriti a ki dekri misyon redanmsyon Jezikri a yon fason ki pi bèl pase Ezayi 53. Konsidere aktivite tankou sa yo pou w pi byen konprann ak aplike ansèyman puisan sa yo:

• Reflechi oswa diskite sou kijan istwa ak sinema souvan dekri ewo ki sekouri moun. Konpare deskripsyon sa yo avèk deskripsyon Sovè a nan Ezayi 53 yo.

• Apre w fin li chak vèsè, pran yon poz pou kontanple sa Sovè a te andire— “doulè,” “lapenn,” ak “transgresyon” Li te pote—pou tout moun epi sitou pou ou. Ou ta kapab ranplase mo tankou “nou” ak “pa nou” yo avèk “mwen” ak “pa m” pandan w ap li a. Ki santiman oswa panse vèsè sa yo enspire nan oumenm?

• Konsidere gade videyo “Wayòm mwen an se pa nan mond sa a” (Bibliyotèk Levanjil la), epi reflechi sou fason pwofesi ki nan Ezayi 53 yo te akonpli. Ki kèk chagren ak lapenn Sovè a pote pou ou?

  

  5:25

• Chèche foto sou evènman ki antoure Ekspyasyon Jezikri a (gade Liv Ilistrasyon Levanjil la, nos 56–60). Apre sa, ou ta ka jwenn fraz nan Ezayi 53 ki dekri evènman ki te pase nan foto yo. Kisa ansèyman sa yo enspire ou pou ou fè?

Gade tou nan “Voyez: il meurt le Rédempteur,” Cantiques, no. 115

Nou tout gen moman kote nou santi nou lwen Senyè a akozde peche oubyen feblès nou. Kèk moun menm abandone espwa ke Li ap janm padone yo. Ezayi 54 ak 57 se gwo chapit pou nou li pou reyasirans ak ankourajman pandan tan konsa. Patikilyèman nan Ezayi 54:4–10; 57:15–19, ki pawòl ki anseye ou kijan Sovè a santi L konsènan ou? Ki diferans sa fè nan lavi w lè w konnen bagay sa yo konsènan Li.

Prezidan Dieter F. Uchtdorf te anseye:

“Sa pa di anyen si lavi nou ta sanble l konplètman detwi. Sa pa di anyen kijan peche nou sal, ki pwofondè amètim nou, kijan nou nan solitid, abandone oubyen kè nou brize. Menm moun ki san zespwa yo, k ap viv nan dezespwa yo, sa yo te trayi konfyans yo, sa ki abandone entegrite yo, oubyen ki detounen ale lwen Bondye yo kapab restore. …

“Bòn nouvèl levanjil la se sa a: gras a plan bonè etènèl Pè Selès byeneme nou an ba nou an epi gras a sakrifis enfini Jezikri a, non sèlman nou ka rachte anba eta dechi nou epi retabli nan pwòpte, men tou, nou ka pwogrese plis pase sa nou ka imajine pou nou vin eritye lavi etènèl epi moun k ap pataje laglwa endeskriptib Bondye sa a” (“L ap Mete w sou Zepòl Li epi Pote w Lakay,” Liahona, Me 2016, 102).

Gade Patrick Kearon, “Entansyon Bondye a se Mennen Ou Lakay,” tou Liahona, Me 2024, 87–89.

Pandan dè jenerasyon, Izrayèlit yo te toujou idantifye kòm pèp alyans Bondye a. Sepandan, plan Bondye a toujou enkli plis pase jis yon nasyon, paske “chak moun ki swaf” envite pou yo “vini … nan dlo yo” (Ezayi 55:1). Kenbe sa nan lespri w pandan w ap li Ezayi 55 and 56, epi medite sou kisa sa vledi pou nou se pèp Bondye. Ki mesaj Bondye voye pou moun ki santi yo “separe totalman” de Li yo? (Ezayi 56:3). Anvizaje pou w make vèsè ki dekri atitid ak aksyon moun ki “kenbe alyans mwen an” (gade nan Ezayi 56:4–7).

• Sa ta ka amizan pou pitit ou yo ta dekouvri fraz tankou “reveye,” “leve,” ak “mete fòs ou sou ou” nan Ezayi 51:9, 17; 52:1–2, 9 yo epi apresa fè ajstib siy fraz sa yo. Apre w fin fè sa, ou ta ka pale sou kisa sa vle di pou w reveye, leve kanpe, epi mete w fòs sou ou espirityèlman. Kisa Senyè a mande nou pou nou fè nan vèsè sa yo?

• Timoun ou yo ta ka li Ezayi 51:1, 4, 7 tou epi idantifye a kiyès Senyè a ap pale ak kisa L vle pou yo fè. Kisa “koute” Senyè a vle di? Kijan nou ka montre Senyè a ke nou “koute” Li?

• Oumenm ak timoun ou yo ta ka gade plizyè foto ki montre soufrans ak lanmò Jezikri (gade, pa egzanp, Liv Ilistrasyon Levanjil la,, nos. 56, 57, 58). Apresa, nou ta ka li ansanm Ezayi 53:3–6, 9 epi chèche mo ki dekri sa k ap pase nan foto yo. Ede pitit ou yo konprann ke Ezayi te pataje verite sa yo dè santèn ane anvan yo te rive. Poukisa l tap enpòtan pou moun yo te konnen bagay sa yo pandan si anpil alavans konsa? (gade nan Alma 39:15–19).

• Apre nou fin li nan Ezayi 53:4, “Li te pote chagren nou yo, epi li te pote lapenn nou yo,” pitit ou yo te kapab eseye leve yon bagay lou (oswa pretann ke y ap leve youn). Eksplike ke “soufrans” ak “lapenn” oubyen tristès kapab lou ak difisil pou nou pote. Poukisa Jezi te pote “soufrans,” “lapenn,” ak “inikite” oswa peche nou yo? (gade tou nan Alma 7:11–12).

• Pou anseye pitit ou yo sou Ezayi 55:6, ou ta ka kache yon foto Jezi yon kote nan sal la. Ou ta ka envite pitit ou yo pou yo chèche foto a epi site yon fason yo ka “chèche … Senyè a pandan yo ka jwenn Li.” Yon kantik tankou “Sans tarder, je recherche mon Sauveur” nan (Chants pour les enfants, 67) ka ba yo kèk ide. Apresa, ou ta ka kite youn nan timoun yo kache foto a epi repete aktivite a.

• Apre w fin li Ezayi 55:9, li ta ka amizan pou pitit ou yo ta kanpe sou yon tabourè epi pale sou kijan bagay yo parèt diferan lè ou “pi wo.” Oubyen yo te kapab desine yon foto sou sa Ezayi 55:9 vle di pou yo. Apresa, nou ta ka diskite sou kèk fason Senyè a ki pigran pase fason pa nou. Pa egzanp, kijan Li trete moun ki fè peche? (gade nan Mak 2:15–17). Ki fason L dirije lòt moun? (gade Matye 20:25–28). Pataje avèk timoun ou yo kijan w te aprann pou w mete konfyans nan fason ak panse elve Senyè a.