Ieremia 1–3; 7; 16–18; 20

Iangoia aongkoa are ko a taetae nakon raoraom are e bon tuai ongoongo taekaia burabeti mai imwaaina, ao ko baireia bwa ko na kabwarabwara oin te iango ni kabongana wetean Ieremia n riki bwa te burabeti n Ieremia 1:4–19. Tera ae ko kunea inanon kiibu aikai are e reiakina taekaia burabeti? Ko kona naba ni kakaea n Ieremia 7:1–7; 20:8–9 ao te anene n taromauri n aron “We Listen to a Prophet’s Voice” (Anene n Taromauri, nambwa. 22).

Ko na tangiria naba ni kan reireina raoraom taekan te burabeti ni boong aikai. Iai te bwai mai buakon kiibu aikai ae e na kona n ibuobuoki? N aron te katooto, tera ae a karaoia burabeti ni bong aikai ni “kouwakaai” ke ni “kabwakai”? Tera ae a “katei” man “uniki”? (Ieremia 1:10). Ko kanga n ataia ae ara burabeti ae maiu e weteaki iroun te Atua?

Taraa naba Taekan te Onimaki 1:6, 9; “Why Do We Have Prophets?” (witeo), ChurchofJesusChrist.org.

1:37

Tera ae reiakinna Ieremia i bon ibukina n Ieremia 1:5? N aron te burabeti ae boou ae e a tibwa weteaki, bukin tera ngkai e rangi ni kakawaki irouna bwa e na ataia?

Angiin te bwai ae e reiakinna Ieremia i bon ibukina n Ieremia 1:5 e bon koaua naba ibukim. E a kaman ataiko naba te Atua imwaain ae ko bungiaki ao ni katauraoiko ibukin mwiokoam aika a onoti. N reiakina riki aron maium imwaain bungiakim, wareka Aramwa 13:1–4; Reirei ao Berita aika Tabu 138:53–56; ao Aberaam 3:22–23. Ko na bae ni korei ni karinan koaua aika ko kunei. Bukin tera e kakaawaki te rongorongo aei bwa ti na ataia?

N reiakinna bwa a kanga koaua aikai n roota maiun Unimwaane Ahmad S. Corbitt, kamatebwaia ana marooro “Kam Kona n Ikotiia Iteraera!” (Riaona,, Meei 2021, 63–64). E kanga ataakin maiura imwain te maiu aei n roota arora ni maiu ni maiura n rabwata?

Aio ae e taku Beretitenti Russell M. Nelson ibukin maium imwaain te maiu aei:

“Tamam are i Karawa e kinako i nanon te tai ae rangi ni maan. Ngkoe, bwa Natina te mwaane ke te aine, ko rineaki i Rouna bwa ko na roko nako aonteaba n te tai aei, n riki bwa te tia kairiiri n Ana mwakuri ae korakora i aon te aba. Ko rineaki tiaki ibukin taraan rabwatam ma ibukin arom n te maiu n tamnei n aron te ninikoria, te unganano, te itiaki n nano, te taka ibukin te koaua, tangira te rabakau, ao te nano ni kan buokiia tabeman.

“Ko karekei tabeua anua aikai n te maiu are imwain te maiu aei. Ko kona ni karikirakei ikai iaon te aba ngkana ko ukoukori ma te nanomwaaka” (“Decisions for Eternity,” Riaona, Nobembwa. 2013,107).

Iangoi tabeua kangaanga ake ko bae n tia ni kaitara ma ngaai are e kakawaki bwa ko na uringi koaua aikai ibukin maium imwaain te maiu aei. Tera ae ko kona ni karaoia ni kauringko ibukin koaua aikai?

Taraa naba Russell M. Nelson, “Decisions for Eternity,” Riaona, Nob. 2013, 106–9; Topics and Questions, “Foreordination,” “Premortal Life,” Gospel Library.

N te aono ae mwauteretere are a maeka iai tibun Iteraera, aomata a kawakin aia ran i aan te aba ni nnen te ran ae aranaki bwa te tititen. N am iango tera “nen ran aika tabwena” ae taekinaki n Ieremia 2:13 ae kona n tei ibukina? Bukin tera karekean te ran man koburaken te ran e tamaroa riki nakon te katan iaon te tititen? Tera ae e nanonaki ni kiitanan “koburaken ran aika a maiu”? Ngkai ko wareka Ieremia 2 ao 7, ataia bwa a kanga aomata ni katoka ana ran ni kamaiu te Uea (taraa, te katooto, Ieremia 2:26–28; 7:2–11). Bukin tera te “ran ni kamaiu” bon te kabotau ae tamaroa ni baike e anganiko te Tia Kamaiu? Iangoia bwa ko kanga ni karekea te ran ae maiu.

Ieremia 7 e kanakoaki nakoia aomata ake a rin n “ana auti te Uea … n taromauria te Uea,” ma aia mwakuri e aki boraoi ma aia taromauri mai nanoia (taraa kiibu 2–11). Tera kibu aika ko namakinna bwa te Uea e katauraoia ibukim inanon kibu 21–23?

N Ieremia 16:14–15, Ieremia e kabotaua ikotakiia Iteraera ni boong aika kaitira ma Otinakoia Iteraera mai Aikubita. N am iango bukin tera e rangi ni kakawaki riki ikotakiia ana aomata te Atua nakon te Otinako?

Tera ae taekinaki n Ieremia 3:14–18; 16:14–21 bwa e kanga n riki te ikoikotaki aei?

N ana marooro “Hope of Israel,” Beretitenti Russell M. Nelson, n aron Ieremia, e taku bwa ikotakiia Iteraera “bon te bwai ae rangi ni kakawaki are e riki iaon te aba ni boong aikai”(worldwide youth devotional, June 3, 2018, Gospel Library). Wareka ke ongoro n ana marooro, ao n taraia ngkana ko kona ni kunea (a) e kanga Beretitenti Nelson ni kabwarabwara nanon ikotakiia Iteraera (b) e kanga ni kabwarabwara aron kakawakina, ao (c) ko na kanga n riki bwa mwakoron te ikotaki anne.

• Ni kabwarabwara kakawakin te koaua are e taekinaki n Ieremia 1:5, ko kona ni kaota tamnein te teei ae uarereke nakoia am ataei (ke, ngkana e riai, ko kona n taraia tamneia am ataei ngke a uarereke). Titirakiniia am ataei ngkana a ataia bwa a maeka iaara imwaain bungiakiia. Kam kona naba n uaia n anenea te kuna are e reiakina taekan te maiu imwaain te maiu aei, n aron “I Lived in Heaven” (Aia Boki n Anene Ataei, 4).

• Ngkana a tangiria am ataei ni kan reiakina riki ae mwaiti, ko kona ni buokiia ni kakaea “Te Maiu imwaain te Maiu aei” inanon te Kairi nakon Koroboki aika Tabu. A kona ni kakaei kaeka nakon “antai,” “nningai,” ao “tera” titiraki ibukin te maiu imwaain te maiu aei.

• Iangoia kaota tamnein te burabeti ae maiu ke burabeti man koroboki aika tabu (ko kona ni kunei tabeua n ana maekatiin te Ekaretia, n te Boki n Tamnei n te Euangkerio, ao Nakomai, Iriirai). Titirakiniia ataei bwa tera ae a ataia ibukiia burabeti aikai.

• N reiakinna tera ae a karaoia burabeti aikai, ko na n riinei tabeua kiibu aika a na kona n ibuobuoki man Ieremia 1, n aron kiibu 5, 7, 10. ao 19. A kona am ataei n anaa kaka teuana mai buakon kiibu aikai, ni warekia, ao n tibwa te bwai are a reiakinna ibukiia burabeti.

• Ngkana ko wareka Ieremia 16:16, a kona am ataei ni baka n ae aongkoa a nako n “akawa” ke ni “kaeman” ni kabonganai bwaai aika a mena inanon te ruu. Beretitenti Nelson e a tia ni kabotauia taan akawa ao taan kaeman n te kibu aei nakoia mitinare ni boong aika kaitira (taraa “The Gathering of Scattered Israel,” Riaona, Nob. 2006, 81). Tera ae a karaoia mitinare? Ti na kanga n ibuobuoki n “akawa” ao ni “kaeman” ibukin Iteraera ae uamaenako? (taraa “A Message for Children from President Russell M. Nelson” [video], ChurchofJesusChrist.org).

  

  3:30

• Ni kakaei kiibu aikai, ko kona ni maroroakina ke ni kaotia bwa e kanga ni karaoaki te mwangko (taraa te tamnei ni kabanean te kamataata aei). Tera ana rongorongo te Uea ibukira n Ieremia 18:1–6? Tera e nanonaki n riki bwa te bokaboka ni bain te Uea? (taraa naba Itaia 64:8). Ibukin teuana riki te karaki are e kabotauiira ma ana bokaboka te tia karao mwangko, taraa ana marooro Unimwaane Richard J. Maynes “The Joy of Living a Christ-Centered Life” (Riaona, Nob. 2015, 27–30).