“Okitobwa 12–18. ‘E na Nakomai te Tia Kaboi Mauira nako Tion: Itaia 58–66’” Nakomai, Iriirai–Ibukin te Mweenga ao te Taromauri: O Tetemanti 2026 (2026)
“Okitobwa 12–18. ‘E na Nakomai te Tia Kaboi Maiura nako Tion,’” Nakomai,Iriirai: Te O Tetemanti 2026
Iesu n te Tabo n Taromauri i Natareta, iroun Greg K. Olsen
Okitobwa 12-18: “E na Nakomai te Tia Kaboi Maiura nako Tion”
Itaia 58–66
Ni moan ana mwakuri iaon te aba, e kawara te tinakoke Iesu Kristo i Natareta, te kaawa are E ikawairake iai. Ikekei e tei ni wareware man koroboki aika a tabu, kauka ana boki Itaia, ao e wareka te bwai are ti ataia ngkai bwa Itaia 61:1–2. Imwina e katanoata, “N te bong aei e a kakoroaki bukin ana taeka te Baibara aei inanon taningami.” Aio teuana ana katanoata te Tia Kamaiu ae rang eti bwa bon ngaia are E Rineaki, are e na “kanakoia akana a uruaki nanoia” ao “n tuangiia taenikai te kanakoaki” (taraa Ruka 4:16–21). Aio n te baibara ni koauana e koro bukina n te bong anne. Ao, n aekakin ana taetae ni burabeti Itaia aika mwaiti, e reitinako ni kakoroaki bukiia inanon ara bong. Te Tia Kamaiu e reitinako ni kamaoi nanoia ake a uruaki nanoia ake a roko nako Ina. E bon mwaiti naba buure aika kainanoa te kamaiuaki. Ao iai te mimitong n taai aika a na roko are tina katauraoi nako iai—te tai are te Uea e na “karika karawa naba ngkai ao aonaaba naba ngkai” (Itaia 65:17) ao “e karikirakea te raoiroi ao te kamoamoaki i mataia bontanaomata ni kabaneia” (Itaia 61:11). Warekan Itaia e kaurei matara nakon te bwai are e a tia ni karaoi te Uea, n te bwai are E karaoi, ao ake E na karaoi ibukiia Ana aomata.
Iango ibukin te Kamatebwai n te Mweenga ao n te Taromauri
Itaia 58:3–12
Te aki mamatam e kakorakora tamneim ao e kakabwaiaia ake arootaki n te kainnano.
Tera bukina kai ena anganano temanna n aki amwarake e ngae ngkana bon iai te amwarake ae tauraoi? Ngkai ko kamatebwaia Itaia 58:3-12, ko na iangoi bwa tera bukin am aki mamatam—n raonaki naba ma ana kaantaninga te Uea ibukin anganakira te tua aio. Aikai tabeua titiraki aika ana iangoaki:
-
Tera bukin te aki mamatam e taraaki riki bwa te karawawata nakon te kakabwaia? (taraa Itaia 58:3-5). A kanga ana reirei te Uea n te mwakoro aio n bita te aekaki n taratara anne iroum?
-
Tera ae nanonaki n “kabwara ana bwai ni kabaebae te buakaka” ma “te kabane aamo n ururu i roumi”? (Itaia 58:6). E na kanga te aki mamatam n kakabwaiaia aomata? (taraa te kibu 7).
-
E kanga te aki mamatam n uota te kakabwaia are e kabwarabwaraaki n Itaia 58:8–12?
N ana rongorongo “Is Not This the Fast That I Have Chosen?” (Riaona, Meei 2015, 22–25), Beretitenti Henry B. Eyring e tibwai tabeua katooto n aroia aomata ake a tia ni kakabwaiaki man te aki mamatam ao te anganano n te aki mamatam. E kanga n tia ni karekei kakabwaia n aron aikai inanon maium?
Taraa naba “Bless Our Fast, We Pray,” Anene n Taromauri, nambwa. 138; Atuun reirei ao Titiraki, “Fasting and Fast Offerings,” Gospel Library.
Kinaia naake ko reireiniia. “Te riki bwa te tia reirei n aron Kristo e raonaki ma ataakiia aomata ake ko reireiniia ao te kekeiaki n ataa te bwai are n aia iango ao inanoia. … Ko kona ni kakaea bwa e kanga aron reiakinaia ae tamaroa. Ko kona n anga titiraki, kakauongo raoi, ao taraa te bwai ae riki. I aoia ni kabane, ko kona n tataro ibukin te atatai are tii te Tamnei ae e kona n anga. Kinaakin raoi te aomata, e na bon karekea ae tamaroa ni buoka teuanne ke neienne ni kunea i bon irouna nanon ao mwaakan ana euangkerio Iesu Kristo. N te tai are ko ataa iai aron batakatakan te aomata, e kona n reireiniko te Tamnei bwa ko na kanga ni buoka katokan te taka n ana ran ni kamaiu te Tia Kamaiu” (Reirei n ana Kawai te Tia Kamaiu, 13).
Itaia 58:13–14
Karinean te Uea n te Tabati e uota te kimwareirei.
E na kanga n riki te Tabati bwa te ”bong ni kamaiu” ibukira? Ngkai ko kamatebwaia Itaia 58;13-14, iangoia bwa kona kanga n karekea te kakukurei n ana bong te Uea. Te katooto, tera ae nanonaki n te bitaki man “karaoan oin nanora n [Ana] bong ae tabu”? Tera te kaokoro imarenan “[kimwareirei] iroun te Uea” ao “karaoan bwaai nakon are iroura”?
Taraa Russell M. Nelson, “Te Tabati Bon te Bong ni Kakukurei,” Riaona, Meei 2015, 129–32.
Itaia 59: 9–21; 61: 1–3; 63: 7– 9
Iesu Kristo bon au Tia Kamaiu ao te tia Kabooi maiura.
Itaia 58–66 e kona n kuneaki iai rongorongo aika a mwaiti ibukin ana mwakuri ni kamaiu Iesu Kristo. Tataraia ngkana ko kamatebwai. N etina raoi, korei atuuia ao taeka ake a kabonganaaki n kabwarabwara te Tia Kamaiu. Te katooto:
-
Tera am namakin ibukin kabwarabwaraan “te tia reitiira” n Itaia 59:16–21? E na kanga te Tia Kamaiu n tokanikai iaon kangaanga aika a kabwarabwaraaki n kiibu 9–15?
-
Ngke e taekinna Iesu Kristo nakoia aomata i Natareta ae Ngaia te Meetia, E taekina kanoan te koroboki man Itaia 61:1–3 (taraa Ruka 4:16–21; noora naba te witeo “Jesus Declares He Is the Messiah” Gospel Library). E kanga n tia ni kakabwaiako Iesu Kristo ao aomata n aro ake a kabwarabwaraaki inanon kiibu aikai? E kanga n tia n anganiko te tamaroa inanon te tabo ae mannang?
3:24Jesus Declares He Is the Messiah
-
Tera “ana atataiaomata te Uea” are ko kona n taekinna? (taraa Itaia 63:7–9).
-
Tera kabotau riki nakon te Tia Kamaiu aika ko kunei inanon Itaia 58–66?
Taraa naba Motiaea 3:7; Reirei ao Berita aika Tabu 133:46–53.
Te Bwaintangira n t Ota, iroun Eva Timothy
Itaia 60; 62
“Bon otam ae akea tokina Iehova.”
Itaia 60 ao 62 a taekina te ota n te roo, ao mata ao nonoori, ao e reirei aron ana euangkeiro Iesu Kristo are e na kakabwaia te aonaaba ni boong aika kaitira. Taratarai reirei aikai riki n Itaia 60:1–5, 19–20; 62:1–2. Ngkai ko wareki kiibu aikai, iangoia bwa e kanga te Atua n ikotiia Natina ni kaotinakoia man te roo nakon Otana. Tera tibwangam n te mwakuri aei?
Taraa naba 1 Nibwaai 22:3–12; 3 Nibwaai 18:24; Reirei ao Berita aika Tabu 14:9; Bonnie H. Cordon, “That They May See,” Riaona, Meei 2020, 78–80.
Itaia 64:1–5; 65:17–25; 66
E na tautaeka iaon te aba Kristo n tain te Mireniam.
Itaia e taekina te bong are a na “mwanuokaki rawawata ake rimoa” (Itaia 65:16). Ngkai te taetae ni burabeti aei a tia ni koro bukiia tabeua, n nanona ae bwanin, bwa e na roko te bong—are e na roko iai Iesu. E kabwarabwara te bong ae e na roko aei Itaia n Itaia 64:1–5; 65:17–25; 66. Nooria n tainako e kabonganai taeka n aron “kakatonga” ao “kimwareirei.” Iangoia bwa bukin tera okin te Tia Kamaiu e na riki bwa te bong ni kimwareirei nakoim? Tera ae ko kona ni katauraoia ibukin Rokona?
Taraa naba Taekan te Onimaki 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Eberi. 2020, 13–17.
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Itaia 58:6–11
Te aki mamatam e kakabwaiai ao ake a rootaki n te kainnano.
-
Tao te kabane n tamaroa n anga n kaungaia am ataei bwa ana aki mamatam—ngkana a tauraoi—bon ngkana ko buokiia ni kaotaia n ana kaantaninga te Uea ibukin te tua aio. Kam kona n ikotaki n wareka Itaia 58:6-11 n karekei kaekaan titiraki aika: Bukin tera tina aki mamatam? Tina kanga ni akimamatam? Ko kona n ukorii rongorongoia inanon “Aki mamatam, Te aki mamatam” n te Kairi nakon Koroboki aika Tabu.
-
Ngkana iai am taneiai ae korakora ibukin te aki mamatam, tibwauaia ma am ataei. Kaoiia ataei bwa a na iangoia bwa a na kanga aroia ni kabwarabwara nakon temanna bwa eaera e anganiira te tua aio te Uea.
Itaia 58:13–14
Te Tabati e kona n riki bwa te kakukurei nakoiu.
-
Imwiin warekan Itaia 58:13-14, kotei boongin te wiiki iaon te karenta ao ni kaoiia ataei bwa a na taekin boong aikane ma ngkoe. Ngkana kam roko n te Tabati, tuangiia bwa ana arana te bong anne bwa te “kakukurei.” Tuangiia ataei bukina ngkai te Tabati bon te bwai ae kakukurei nakoim.
-
Tibwaia i marenami anga aika kam kona n “kakukurei ngkami iroun te Uea” n te Tabati. Tao a konaa am ataei n korei tamnein aia iango ao n karinii n te “bwaokin te kakukurei n te Tabati.” Ngkane, ngkana a kainanoia iango ibukin bwaai aika ana karaoia n te Tabati, a kona n butii man te bwaoki.
Otara, iroun Dan Wilson
Itaia 60:1–3
Te Tia Kamaiu kanga ai aron te ota nakoiu.
-
Kaoiia ataei bwa a na kamakii mataia ngkai ko wareka Itaia 60:1–3. Tuangiia bwa a na kaurei mataia ngkana a ongo te taeka ae “ota” ao ni kamakii mataia ngkana a ongo te taeka ae te“rotongitong.” Kamataata bwa Iesu Kristo ao Ana euangkerio kanga aia aron te ota ae e buokira n tara kawaira n okira Tamara are I Karawa.
Itaia 65:17–25
Ngkana e roko Iesu, E na uota te rau ao te kimwareirei.
-
Itaia 65:17–25 e kabwarabwara bwa e na kanga aon te aba ngkan e a manga roko te Tia Kamaiu. Ngkai ko wareki kiibu aikai ma am ataei, buokiia n tarai kaokoron maiuia ma te “aonaaba nabangkai” are e kabwarabwaraa Itaia. Bukin tera ngkai e na riki te tai aei bwa te tai “ni kakatonga ao ni kimareirei n aki toki”? (te kibu 18).
-
Kam kona naba n uaia n anenea kunan te Kauaoki, n aron “When He Comes Again” (Gospel Library). Tibwaia i marenami ami namakin ibukin rokon te tia Kamaiu. Tera ae ti kona ni karaoia ni katauraoi ngkai imwain te bong anne?
Ibukin iango riki tabeua, taraa te beeba ni kaongora n te namwakaina aio n te Te Rao maekatiin.