Okitobwa 5–11. ‘E anai Rawawatara, ao E uouoti Nanokawakira’: Itaia 50-57,” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
Okitobwa 5–11. ‘E Anai Rawawatara, ao E Uouoti Nanokawakira,’” Nakomai, Iriirai: O Tetemanti 2026
Kaenaenakin Kristo, iroun Carl Heinrich Bloch
Okitobwa 5-11: “E Anai Rawawatara, ao E Uouoti Nanokawakira”
Itaia 50–57
N iteran nako ana mwakuri, Itaia e taekina te tia kamaiu ae moan te korakora. Taetae ni burabeti aikai a tara n onoti nakon aia katebubua n ririki kaain Iteraera imwiina riki ngke a tautoronaki i Bwaburon. Temanna are e kona ni kabwaka oon Bwaburon ni koauana ao e riki bwa te tia tokanikai ae moan te korakora. Ma anne tiaki aekan te Meetia are e kabwarabwara Itaia ni mwakoro 52–53: “E riribaki ao e kakiaki irouia aomata; te aomata ae nanokawaki, ao e ata naba te rawawata: ao a karaba mataia aomata mairouna. … Ti taku bwa e boaki man oreaki iroun te Atua, ao e karawawaraki” (Itaia 53:3–4).
Man kanakomaian te tia kamaiu ae akea kaantaningaana, e reireiniira te Atua ibukin te kamaiu ae koaua. Ni kamanoira man te bwainikirinaki ao te karawawataki, te Atua e kanakomaia Temanna are Ngaia “e bwainikirinaki, ao … karawawataki.” Ngke tabeman a kantaninga te raian, E kanakomaia te tiibu te tei (taraa Itaia 53:7). Ni koauana, ana kawai te Atua bon tiaki ara kawai (taraa Itaia 55:8–9). E aki tii kainaomataira Iesu Kristo ni kauka te karabuuti ma e oneimwiira ikekei. E karaui nanora man tienin rawawatara ao nanokawakira ni keiakin n uouoti n tii Ngaia (taraa Itaia 53:4–5, 12). E irekereke ma kamaiuara ngaira n tatabemaniira. E karawawataki mangaira, n te mwakuri n “nanoanga n atataiaomata ae akea tokina “e na aki nako mai roum” (Itaia 54:8, 10).
Iango ibukin te Kamatebwai n te Mweenga ao n te Taromauri
Itaia 50–52
Taai aika a na roko e kakukurei ao iai te kantaninga ibukiia ana aomata te Uea.
E ngae ngke a kabanei ririki aika a mwaiti kaain Iteraera inanon te tautoronaki—ao e ngae ngke te tautoronaki anne e riki bon mai imwiin aia rinerine aika a buakaka—e tangiria te Uea bwa a na tarai taai aika a na roko ma te kaantaninga. Tera ae ko kunea n ana rongorongo Itaia ae anganiko te kaantaninga? Te tiaata n aron aio e kona n buoka am kamatebwai:
|
Tera ae I reiakinna ibukin te Atua (taraa, te katooto, Itaia 50:2, 5–9; 51:3–8, 15–16; 52:3, 9–10) | |
|
Rongorongo ibukin te kaantaniga (taraa, te katooto, IItaia 50:9; 51:3–5, 11–12, 22–23; 52:9–10) | |
|
Tera ae I kona ni karaoia n kakoroa nanon te kaantaniga (taraa, te katooto, Isaiah 50:10; 51:1–2, 6–9; 52:1–3, 9–11) |
Taraa naba Motiaea 12:20–24; 15:13–18; 3 Nibwaai 20:29–46; Reirei ao Berita aika Tabu 113:7–10; Russell M. Nelson, “Embrace the Future with Faith,” Riaona, Nobembwa. 2020, 73–76.
Ibukin te Tangira,, iroun Angela Johnson
Buokiia taan reiakinaki n roko nakon Iesu Kristo. “Akea te bwai ae ko karaoia ngkai te tia reirei ngkoe ae e na kakabwaiaia taan reiakinaki nakon riki ae ko buokiia n ataa Tamara are i Karawa ao Iesu Kristo ao n namakina Aia tangira” (Reirei n ana Kawai te Tia Kamaiu, 8). Ngkai ko katauraoi n anga reirei iaon Itaia 50-57 nakoia aomata, iangoia bwa kona kanga n buokiia n nora te reitaki imarenana kataakiia Iteraera, ana taeka ni burabeti Itaia, ao karekean te buoka mai karawa n oin aia kangaanga.
Itaia 53
Iesu Kristo e katokaa Iaona au bure ao rawawatau.
Iai tabeua mwakoron koroboki aika tabu ae a kabwarabwaraa ana mition Iesu Kristo ibukin kaboan maiura ae a rangi n tamaroa riki nakon Itaia 53. Iangoi waaki ni kakukurei n aron aikai bwa e na katamaroaa riki kaotaan ao kammwakuran reirei aikai korakora aikai:
-
Iangoia inanom ke maroroakinii aron karaki ma tamnei aika aki toki n katei bannaia aekita aika kakamaiuia aomata. Kabotauiia am tamnei aikanne ma kabwarabwaraan te Tia Kamaiu n Itaia 53.
-
Imwiin warekan kiibu n tatabeua nako, tooki n iangoia bwa tera ae rootaki iai te Tia Kamaiu—te “rawawata,” “nanokawaki,” ao “riaoan te tua” E uouotia—ibukiia aomata ni kabane ao ai moarara riki bon ibukim. Ko kona n onei mwiin taeka n aron “ngaira” ao “ara” ma “Ngai” ao “au” ngkai ko wareware. Tera namakin ke iango are ko kaungaaki ni kiibu aikai?
-
Ko kona naba ni mataku n te witeo “My Kingdom Is Not of This World” (Gospel Library), ao ni maroroakinna bwa a kanga taetae ni burabeti n Isaiah 53 ni kakoroaki bukiia. Tera tabeua rawawata ao nanokawaki are e uouotia te Tia Kamaiu ibukira?
5:25My Kingdom Is Not of This World
-
Kaota tamnein bwaai aika a riki aika a kaeti ma Ana Mwakuri ni Kamaiu Iesu Kristo (tara Bokin Tamnein te Euangkerio, nambwa 56-60). Ko kona ni kakaei kibuntaeka n Itaia 53 ake a kabwarabwarai bwaai aika riki n te tai anne inanon te tamnei. Tera ae kaungaa nanora te reirei aei bwa ti na karaoia?
Taraa naba “Behold the Great Redeemer Die, ” Anene n Taromauri, nambwa 191.
Itaia 54; 57:15-19
Iesu Kristo e tangirai bwa N na oki nako Ina.
A bon bane n reke ara tai ngke ti namakina te raroa mairoun te Uea ibukin ara bure ao mamaarara. Tabeman a bwarannano n akea te kaantaninga bwa E na bon kabwarai aia bure. Itaia 54 ao 57 bon mwakoro aika moan te korakora ni warekaki ibukin te kakoaua ao te kaunganano n aron taai akanne. Ma inanon Itaia 54:4–10; 57:15–19, tera ae ko reiakinna ibukin ana namakin te Tia Kamaiu ibukim? Tera te kaokoro ae riki nakon maium n atai bwaai aikai ibukina?
E reirei Beretitenti Dieter F. Uchtdorf:
“E aki kakaawaki bwa tao aekakira aron uruakin maiura. E aki kakaawaki bwa mwaitira aekakin ara bure, mwaitira te riribai iroura, te maroaa, kakeakira, ke uruakin nanora aika reke. Irouia naake akea irouia te kantaninga, aika a maeka ni iangoia bwa aakea manen maiuia, aika a tia ni kakea onimakinaia, ni katinanikua karaoan te etieti ke n tannako mairoun te Atua e kona ni manga kateaki. …
“Kakimwareirein te euangkerio e kangai: ibukin te babaire ni kakukurei ae akea tokina ae katauraoaki iroun Tamara are i Karawa ae tangira ao rinanon te anga karea ae akea tiana are e anga Iesu te Kristo, tiaki n ae ti na ti kamaiuaki man ara bure ao ni kaokaki nakon te itiaki, ma ti kona naba ni karekea are iaon riki ae e iangoaki n te maiu ae mamate aei ao n riki bwa taan bwaibwai n te maiu are akea tokina ao taan bwaibwai ni mimitongin te Atua ae akea aron kabwarabwarana” (“He Will Place You on His Shoulders and Carry You Home,” Riaona, Meei 2016, 102).
Taraa naba Patrick Kearon, “God’s Intent Is to Bring You Home,” Riaona, Meei 2024, 87–89.
Isaiah 55–56
Te Uea e kaoia ni kabane “tautaua au berita.”
Ibukiia rooro, e a tia Iteraera ni kinaaki bwa ana aomata ni berita te Atua. E ngae n anne, n ana baibaire te Atua n taainako ao e karina ae mwaiti nakon ae tii teuana te aba, bwa “ngkami aika kam kani moi” a kaoaki n “nakomai … nakon ran” (Itaia 55:1). Iangoia n am iango ngkai ko wareka Itaia 55 ao 56, ao iangoia raoi tera ae nanonaki n riki bwa ana aomata te Atua. Tera ana rongorongo te Atua nakoia naake a namakina “te karaureaki” mai Irouna? (Itaia 56:3). Iangoa mwaakenan kiibu ake a kabwarabwarai anuaia naake a “tautaua au berita” (taraa Itaia 56:4–7).
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Itaia 51:52
E kaoai te Uea bwa N na “karina [au] korakorau.”
-
E na kona n kaunga irouia am ataei n kakaei taeka n aron “uti,” “teirake,” ao “katoka korakorana” n Itaia 51:9, 17; 52:1–2, 9 ao n kamwakuri taeka aikai. Imwiin aei, a kona n taekinna bwa tera nanon ae ana uti, teirake ao ni katoka korakoran tamneia. Tera ae e tuangiira te Uea bwa ti na karaoia n te kibu aei?
-
Kaoia ataei bwa ana wareka Itaia 51:1, 4, 7 ao kina bwa antai ae taetae te Uea nakoina ao tera ae E tangiria bwa ana karaoia. Tera ae nanonaki n “ongo nakon ana taeka te Uea? Ti na kanga ni kaotia nakon te Uea bwa ti “kan ongo” Irouna?
Itaia 53:3–9
Iesu Kristo e katokaa Iaona au bure ao rawawatau.
-
Kaoti tabeua tamnei aika a kaota karawawatakin ao maten Iesu Kristo (taraa, ibukin te katooto, Gospel Art Book, nambwa. 56, 57, 58). Botaki ni wareka Itaia 53:3–6, 9 ao kakaei mwakoro n taeka aika a kabwarabwarai bwaai aika riki n taian n tamnei. Buokia kaotaia am ataei bwa Itaia e tibwauai koaua aikai irabubua te ririki n nako imwain ae a riki. Bukin tera e kakawaki ibukiia aomata bwa ana atai imwain taia bwaai aikai inanon rikiriki aika mwaiti n nako? (taraa Aramwa 39:15–19).
-
Imwiin warekan Itaia 53:4, “E anai rawawatara, ao E uouoti nanokawakira,” a kona am ataei n kataia n mwemweka te bwai ae rawawata (ke ni kataia n mwemweka teuana). Kabwarabwara bwa te “rawawata” ao te “nanokawaki” a kona n rangi n tinebu ao ni kangaanga ni uouotaki. Bukin tera E karawawataaki n “rawawatara,” “n nanokawakira,” ao “ni buakakara”? (taraa naba Aramwa 7:11–12).
Itaia 55:6
I kona n ukoukora te Uea ao ni Weteia.
-
N reireiniia am ataei iaon Itaia 55:6, ko kona ni karaba tamnein Iesu inanon te ruu. Ko kona ni kaoia ataei bwai ana kakaea te tamnei ao n anga te kawai teuana ae a kona n “ukora … te Uea ngkai e kona n reke.” Te anene n aron “Seek the Lord Early” (Aia Boki n Anene Ataei108) e kona n anganiia tabeua iango. Ngkanne ko kona n angan am ataei temanna bwa e na karabaa te tamnei ao n manga waaki naba iaon te waaki ni kakukurei aio.
Itaia 55:8–9
A rietaata riki ana kawai te Uea nakon au kawai.
-
Imwiin warekan Itaia 55:9,e kona n kaunga irouia am ataei bwa ana tei iaon te kaintekateka ao n marooroakina bwa a kanga n kaokoro bwaai ngkana ko tei n ae “rietata.” Ke a kona n korea te tamnei ae nanonaki n Itaia 55:9 irouia. Maroroakinna ma ataei tabeua ana kawai te Uea aika a rietaata riki nakon ara kawai. Te katooto, tera Ana kawai ni buokiia taan bure? (taraa Mareko 2:15–17). Tera Ana kawai ni kairiia tabeman? (taraa Mataio 20:25–28). Tuangiia ataei bwa ko kanga n onimakin ana kawai ao ana iango te Uea aika rietaata riki.
Ibukin iango riki tabeua, taraa te beeba ni kaongora n te namwakaina aio n te Te Rao maekatiin.