یسعیاہ 40–49

جب بنی اِسرائیل بابُل میں اَسیر تھے، تو بُہت سے لوگوں نے شاید یہ سوچا ہو گا کہ آیا اُنھوں نے ہمیشہ کے لیے خُدا کے چُنیدہ، اور موعُودہ اُمّت کے طور پر اپنا مقام کھو دِیا ہے۔ جب آپ یسعیاہ 40–49 پڑھتے ہیں، تو اُن حوالہ جات کو تلاش کریں جو شاید تسلّی اور اُمید فراہم کر سکتے ہیں۔ ہر حوالے پر غور کریں، اور لِکھیں کہ خُداوند اِن آیات میں آپ سے کیا کہنا چاہتے ہیں۔ یہاں چند آیات ہیں جن سے آپ شُروع کر سکتے ہیں:

• 40:‏11، 29–31:

• 41:‏10–13، 17–18:

• 42:‏6–7:

• 43:‏1–7، 25:

• 44:‏1–4، 21–24:

• 46:‏3–4:

• 49:‏7–16:

آپ کو کیا محسُوس ہوتا ہے کہ خُداوند آپ کو اپنے بارے میں کیا بتانا چاہتا ہے؟

آپ دیکھیں گے کہ یہ گیت ”کُتنی پُختہ ہے بُنیاد“ (گیت، نمبر 85) یسعیاہ 41:‏10؛ 43:‏2–5؛ 46:‏4 میں یسعیاہ کے کلام کی طرف مبذُول کراتا ہے۔ اِس گیت کو گانے یا سُننے پر غور کریں، اور یسعیاہ کی اِن آیات کے ساتھ گیت کے بولوں میں مُماثلت تلاش کریں۔ خُداوند نے اِن آیات میں دِیے گئے وعدوں کو آپ کی زِندگی میں کیسے پُورا کِیا ہے؟

مزید دیکھیں پیٹرک کیرون، ”وہ اپنی کِرنوں میں شِفا لیے جی اُٹھا: ہم فتح سے بھی بڑھ کر غَلبہ حاصِل کر سکتے ہیں،“ لیحونا، مئی 2022، 37–40۔

پُورے یسعیاہ 40–49 میں خُداوند اپنے ”خادِم“ اور اُس کے ”گواہوں“ کی بات کرتا ہے۔ یہ الفاظ یِسُوع مسِیح کا حوالہ دے سکتے ہیں (دیکھیں یسعیاہ 42:‏1–7)، اِسرائیل کے گھرانہ کی طرف (دیکھیں یسعیاہ 45:‏4)، اور خورس بادشاہ، جس نے یہُودی لوگوں کو یروشلیم واپس لوٹنے اور ہَیکَل کی تعمیرِ نو کی اِجازت دی (دیکھیں یسعیاہ 44:‏26–28؛ 45:‏1–4)۔ آپ یہ بھی سوچ سکتے ہیں کہ یہ آیات آپ پر خُداوند کے خادِم اور گواہ کے طور پر کس طرح لاگُو ہوتی ہیں۔ مِثال کے طور پر، اِس طرح کے سوالات پر غور کریں:

یسعیاہ 40:‏1–3، 9–11؛ 43:‏9–12۔ آپ کِن معنوں میں یِسُوع مسِیح کے گواہ ہیں؟ وہ کون سی ”خُوش خبری“ ہے جس کا بیان آپ اُس کے گواہ کے طور پر کر سکتے ہیں؟ آپ تصور کر سکتے ہیں کہ آپ کو کسی عدالت میں گواہ کے طور پر طلب کِیا گیا ہے۔ اِس مُقدمے میں، یِسُوع مسِیح پر وہ اِلزام عائد کِیا گیا ہے جو یسعیاہ 43:‏11 میں درج ہے۔ آپ یِسُوع کے دعوے کی حمایت میں کون سی گواہی دے سکتے ہیں؟ آپ اپنی زِندگی کا کون سا ثبُوت پیش کریں گے؟

یسعیاہ 41:‏8–13؛ 42:‏6؛ 44:‏21۔ خُداوند نے آپ کو کیا کرنے کے لیے بُلایا ہے؟ کلِیسیائی بُلاہٹوں کے ساتھ ساتھ خُداوند کی خِدمت کرنے کے دیگر مواقعوں پر بھی غور کریں۔ اُس نے آپ کو اپنے خادِم بننے کے لیے کس طرح ”بنایا“ یا تیار کِیا ہے؟ جب آپ خِدمت کرتے ہیں تو وہ آپ کی کیسے مُعاونت کرتا ہے؟

یسعیاہ 49:‏1–9۔ آپ کو اِن آیات میں کون سے پیغامات مِلتے ہیں جو مدد کر سکتے ہیں جب آپ کی کاوِشیں اور خِدمت ”بے فائدہ، بطالت میں صَرف“ ہوتی ہیں؟ (آیت 4)۔

یسعیاہ نے بار بار اپنے لوگوں کو خُدا کی بے مِثل قُدرت یاد دِلائی، حتیٰ کہ اِس ظالم دُنیاوی طاقت کے مُقابلے میں جو اُنھیں گھیرے ہُوئے تھی۔ جب آپ یسعیاہ 40:‏3–8، 15–23؛ 42:‏15–16؛ اور 47:‏7–11 کو پڑھتے ہیں تو اِس پیغام کو تلاش کریں (نوٹ کریں کہ باب 47 اِسرائیل کے قید کرنے والوں، بابُل سے مُخاطب ہے)۔ یہ اِقتباسات آپ کو دُنیاوی چیزوں کے بارے میں کیا سِکھاتے ہیں؟ یہ آسمانی باپ کی بابت آپ کو کیا سِکھاتی ہیں؟ غور کریں کہ یہ پیغام اَسیری میں یہُودی لوگوں کے لیے کیوں قابلِ قدر رہا ہوگا۔ یہ آپ کے لیے بیش قیمت کیوں ہے؟

جب آپ یسعیاہ 48:‏10 پڑھتے ہیں، تو اپنی ”مُصیبت کی کٹھالی“ پر غور کریں۔ خُداوند کیسے آپ کو ”صاف“ بنا رہا ہے؟ جب آپ مُصیبتیں برداشت کرتے ہیں تو یسعیاہ 49:‏13–16 آپ کی کیسے مدد کرتا ہے؟

مزید دیکھیں ”پاک کرنے والی آگ“ (ویڈیو)، گاسپل لائبریری۔

5:2

• یسعیاہ 40:‏3–5 میں بیان کردہ ”خُداوند کی راہ … تیار کرنے“ کے مطلب کو بیان کرنے کے چند طریقوں پر غور کریں۔ مِثال کے طور پر، آپ اور آپ کے بچّے کسی ایسی چیز کو سیدھا کر سکتے ہیں، بکھری ہُوئی جگہ کو صاف کر سکتے ہیں، یا پتھریلی زمین پر ایک صاف راستہ بنا سکتے ہیں۔ آپ یُوحنّا بپتِسما دینے والے اور جوزف سمِتھ کی تصاویر بھی دِکھا سکتے ہیں (دیکھیے اِنجِیلی فن پاروں کی کِتاب، نمبر 35، 87)۔ اُنھوں نے خُداوند کے آنے کے لیے راہ کیسے تیار کی؟ (دیکھیے لُوقا 3:‏2–18؛ عقائد اور عہُود 135:‏3)۔ ہم کیسے مدد کر سکتے ہیں؟ یہ اِس بارے میں بات کرنے کا موقع ہو سکتا ہے کہ ہارُونی کہانت کے حاملین خُداوند کی راہ تیار کرنے میں کس طرح مُعاونت کرتے ہیں (دیکھیے عقائد اور عہُود 84:‏26–28)۔

• یسعیاہ 43:‏10 کو اِکٹھے پڑھنے کے بعد، آپ اِس بارے میں بات کر سکتے ہیں کہ گواہ ہونے کا کیا مطلب ہے۔ ایک دُوسرے کے ساتھ اِن باتوں کا تذکرہ کریں جن کا آپ نے تجربہ کر چُکے ہیں اور جن کے آپ ”گواہ“ بن سکتے ہیں—مثلاً، کوئی کھانا جو آپ نے چَکھا ہو، کوئی جگہ جہاں آپ گئے ہوں، یا کوئی ایسا شخص جسے آپ جانتے ہوں۔ خُدا کے گواہ ہونے کا کیا مطلب ہے؟ ہم دُوسرے لوگوں کو اُس کی بابت کیا بتا سکتے ہیں؟

• اِن آیات کو پڑھنے کے بعد، آپ کی اولاد ایک پودے کو پانی دے سکتے ہیں اور اُن برکات کے مُتعلق بات کر سکتے ہیں جو خُداوند نے اُن پر اُنڈیلی ہیں۔ جب ہم کسی پودے کو پانی دیتے ہیں تو کیا ہوتا ہے؟ خُداوند کی برکات نے ہمیں بڑھنے میں کیسے مدد کی ہے؟

• دریاؤں اور سمُندر کی لہروں کی تصاویر یا ویڈیوز آپ کے بچّوں کو یسعیاہ 48:‏18 کو تصور کرنے میں مدد دے سکتی ہیں (جیسا کہ اِس خاکہ میں تصاویر ہیں)۔ آپ کے بچّے دریا کی مانِند اپنے ہاتھوں اور بازُوؤں کو سمُندر کی موجوں کی طرح ہِلانے سے لُطف اندوز ہو سکتے ہیں۔ اِطمینان کیسے دریا کی مانِند ہو سکتا ہے؟ راست بازی کیسے موجوں کی طرح ہو سکتی ہے؟ اِس بارے میں بات کریں کہ خُدا کے احکام کو ماننے سے آپ کو کیسے دریا کی طرح پُرسُکون یا لہروں کی مانِند مضبُوط محسُوس ہُوا۔

• آپ اِکٹھے مِل کر حُکموں کی بابت گیت گا سکتے ہیں، مثلاً ”حُکموں کو مانیں“ (بچّوں کے گِیتوں کی کِتاب، 146–47)۔ یہ گیت اِس بارے میں کیا سِکھاتا ہے کہ ہمیں خدا کے حُکموں پر عمل کیوں کرنا چاہیے؟

• یسعیاہ 49:‏14–16 آنے والے سالوں تک آپ کے بچّوں کے لیے عظیم تسلّی کا ذریعہ بن سکتا ہے۔ جب آپ آیت 14 پڑھتے ہیں، تو اِس بارے میں بات کر سکتے ہیں کہ کون سی چیزیں لوگوں کو لاپتہ یا تنہا محسُوس کرا سکتی ہیں۔ ہم کیسے جان سکتے ہیں کہ خُداوند نے ہمیں فراموش نہیں کِیا ہے؟

• آیات 15–16 کو مُتعارف کرواتے ہُوئے، آپ اپنے بچّوں سے کسی ایسے شخص کے بارے میں پُوچھ سکتے ہیں جسے وہ کبھی نہیں بھُولیں گے، جیسے کوئی خاندان کا فرد یا دوست۔ یسعیاہ 49:‏15–16 کے مُطابق، خُداوند ہمیں کبھی نہ بھُولے گا؟ پھر آپ ایک دُوسرے کے ساتھ یِسُوع مسِیح کی بابت اپنے احساسات کا تذکرہ کر سکتے ہیں۔