Ísáíàh 1–12

Olùgbàlà kọ́ni pé “gbogbo ohun tí [Ìsàíàh] sọ ti jẹ́, yíò sì rí, àní gẹ́gẹ́bí àwọn ọ̀rọ̀ tí ó ti sọ (3 Néfì 23:3). Bí ẹ ṣe nṣe àṣàrò ìwé Ìsàíàh, gẹ yẹ ṣíṣe àtẹ àwọn àsọtẹ́lẹ̀ kan tí ó ní àwọn àkọlé bí ìwọ̀nyí: Ọjọ́ Ìsàíàh, Iṣẹ́ ìrànṣẹ́ Ayé ikú Olùgbàlà, àti Àwọn ọjọ́ ìkẹhìn. Ẹ ṣe àkíyèsí pé ọ̀pọ̀lọpọ̀ àsọtẹ́lẹ̀ Ìsàíàh ló ní ìmúṣẹ lọ́nà tó ju ẹyọ kan lọ (wo Ìtumọ̀ Ìwé mímọ́, “Ìsàíàh”).

Ààrẹ Oaks kọ́ni: “Ìwé Ìsàíàh pẹ̀lú àwọn ọ̀pọ̀lọpọ̀ àsọtẹ́lẹ̀ tí ó dà bíi pé ó ní ọ̀pọ̀ ìmúṣẹ. Ó dà bíi pé ẹnìkan ní íṣe pẹ̀lú àwọn ènìyàn ìgbà ayé Ìsàíàh tàbí àwọn nkan tó ṣẹlẹ̀ sí ìran tó kàn. Ìtumọ̀ míràn, tí ó nṣe àpẹẹrẹ nígbàkugbà, dà bí ẹni pé ó ntọ́ka sí àwọn ìṣẹ̀lẹ̀ ní agbedeméjì àkókò, nígbàtí a pa Jerúsálẹ́mù run tí àwọn ènìyàn rẹ̀ sì fọ́nká lẹ́hìn tí wọ́n kàn Ọmọ Ọlọ́run mọ́ àgbélèbú. Síbẹ̀ ìtumọ̀ míràn tàbí ìmúṣẹ àsọtẹ́lẹ̀ kannáà dà bíi pé ó ní ìbámu sí àwọn ìṣẹ̀lẹ̀ tí ó wà ní Bíbọ̀ Ẹ̀ẹ̀kejì Olùgbàlà. Òtítọ́ náà pé ọ̀pọ̀lọpọ̀ àwọn àsọtẹ́lẹ̀ wọ̀nyí lè ní ìtumọ̀ púpọ̀ ntẹnumọ́ jíjẹ́pàtàkì wíwá ìfihàn láti ọ̀dọ̀ Ẹ̀mí Mímọ́ láti ràn wá lọ́wọ́ láti túmọ̀ wọn” (“Kíka Ìwé mímọ́ àti Ìfihàn,” Ẹ́nsáìn, Oṣù Kínní 1995, 8).

Gẹ́gẹ́bí àwọn wòlíì gbogbo ìgbà, Ìsàíàh máa nkìlọ̀ fún àwọn ènìyàn náà nípa ipò ti ẹ̀mí wọn. Bí ẹ ṣe nka Ìsàíàh 1; 3; 5, wá àwọn gbólóhùn tí ó ṣe àpèjúwe bí àwọn ènìyàn náà ṣe nṣe nípa ti ẹ̀mí (wo, fún àpẹrẹ, Ìsàíàh 1:2–4, 21–23; 3:9, 16–17; 5:11–12, 20–23). Àwọn ìṣòro irúkannáà wo lẹ rí ní àkókò wa? Ẹ tún lè wá àwọn ẹsẹ tó kìlọ̀ nípa àwọn àbájáde ipò ti ẹ̀mí àwọn ọmọ Ísráẹ́lì (bíi Ìsàíàh 1:7; 3:17–26; 5:5–7, 13–15).

Ní àfikún sí àwọn ìkìlọ̀, Ìsàíàh fúnni ní àwọn ọ̀rọ̀ ìrètí fún ìràpadà nípasẹ̀ Olùgbàlà (wo, fún àpẹrẹ, Ìsàíàh 1:16–19, 25–27; 3:10; 4). Kíni ẹ kọ́ nípa Olúwa látinú àwọn ẹsẹ wọ̀nyí? Báwo ni ọ̀rọ̀ Olúwa nínú àwọn ẹsẹ wọ̀nyí ṣe yàtọ̀ sí ohun tí Sátánì fẹ́ ká gbàgbọ́?

Bíi ti Ìsàíàh, àwọn wòlíì ní òní kìlọ̀ fún wa nípa ẹ̀ṣẹ̀ àti àbájáde rẹ̀, wọ́n sì npèsè àwọn ọ̀rọ̀ ìrètí nípasẹ̀ Jésù Kristi. Àwọn àpẹrẹ wo ni ẹ lè ronú nípa rẹ̀? Ẹ lè fẹ́ láti ṣe àtúnyẹ̀wò ọ̀rọ̀ kan látinú ìpàdé àpapọ̀ gbogbogbò tí ó kọjá, ní wíwá irú àwọn ìkìlọ̀ àti àwọn ìlérí bẹ́ẹ̀.

Ọpọ̀lọpọ̀ àwọn àsọtẹ́lẹ̀ Ìsàíàh ní ìtumọ̀ pàtó fún ọjọ́ wa. Láti wá wọn, ẹ wá àwọn ọ̀rọ̀ ìṣe ọjọ́ iwájú (bíi “yíò jẹ́” tàbí “yíò lọ”). Fún àpẹrẹ, ẹ wá àwọn ọ̀rọ̀ ìṣe wọ̀nyí bí ẹ ṣe nka Ìsàíàh 2; 4; 11–12. Pàápàá ẹ lè gbìyànjú láti rọ́pò wọn pẹ̀lú àwọn ọrọ-iṣe lọ́wọ́lọ́wọ́ (bíi sí tàbí ó nlọ). Àwọn àsọtẹ́lẹ̀ wo ló mísí yín nípàtàkì? Kíni ẹ kọ́ nínú àwọn àsọtẹ́lẹ̀ wọ̀nyí nípa Síónì, kíkọ́ tẹ́mpìlì, àti kíkójọ Ísráẹ́lì?

Ìsàíàh 2:2–3 nípàtàkì ṣe kókó fún àwọn Ènìyàn Mímọ́ Ọjọ́-ìkẹhìn. Báwo ni àwọn àsọtẹ́lẹ̀ wọ̀nyí ṣe ndi mímúṣẹ? Kíni ẹ kọ́ nípa àwọn “ọ̀nà Olúwa” àti “àwọn ipa-ọ̀nà” nínú ilé Rẹ̀? (ẹsẹ 3).

Bákannáà wo Ìsàíàh 5:26; “Lórí Òkè Ténté,” Àwọn orin, nọ́mbà 5.

Nínú Ìsàíàh 6, Ìsàíàh ṣe àtúnsọ ìpè rẹ̀ láti jẹ́ wòlíì. Bí ẹ ṣe nka orí yìí, kí ló wú yín lórí nípa ìrírí Ìsàíàh? Báwo ni orí yi ṣe ní ipa lórí ọ̀nà tí ẹ fi nronú nípa Olúwa, àwọn wòlíì Rẹ̀, àti iṣẹ́ tí a pè wọ́n láti ṣe?

Ní ìgbà iṣẹ́ ìrànṣẹ́ Isaiah, Ísráẹ́lì dá àjọṣepọ̀ pẹ̀lú Síríà láti dá ààbò bo ara rẹ̀ lọ́wọ́ Ásíríà. Ísráẹ́lì àti Síríà fẹ́ fi agbára mú Áhásì ọba Júdà láti darapọ̀ mọ́ wọn. Ṣùgbọ́n Ìsàíàh sọ tẹ́lẹ̀ pé àjọ náà yíò kùnà ó sì gba Áhásì ní ìmọ̀ràn láti gbẹ́kẹ̀ lé Olúwa (Ìsàíàh 7:7–9; 8:12–13).

Nígbàtí Ìsàíàh ngba Áhásì ní ìmọ̀ràn, ó sọ ọ̀pọ̀lọpọ̀ àsọtẹ́lẹ̀ tí àwọn ènìyàn mọ̀ dáadáa, bí irú èyí tí a rí nínú Ìsàíàh 7:14; 8:13–14; 9:2, 6–7. Ohun èyíówù kí àwọn àsọtẹ́lẹ̀ wọ̀nyí túmọ̀ sí fún Áhásì, wọ́n wúlò sí Jésù Krístì ní kedere (bákannáà Máttéù 1:21–23; 4:16; 21:44; Lúkù 1:31–33). Kínìdí tí “Ìmmánuẹ́lì” jẹ́ àkọ́lé rere fún Olùgbàlà? (wo Máttéù 1:23). Báwo ni Ó ṣe jẹ́ “Olùdámọ̀ràn” tàbí “Ọmọ-Aládé Àláfíà” fún yín? (Ìsàíàh 9:7). Kíni ohun míràn tí ẹ kọ́ nípa Olùgbàlà láti àwọn ẹsẹ wọ̀nyí?

• Nínú Ìsàíàh 1:2–4, ẹ̀yin àti àwọn ọmọ yín lè rí àwọn èrèdí tí inú Olúwa kò fi dùn sí àwọn ènìyàn náà. Ẹ ṣe àkíyèsí ìfiwéra pẹ̀lú àwọn ẹranko ní ẹsẹ 3—tani “olùkọ́ni wa”? Báwo ni a ṣe lè fi hàn pé a mọ̀ Ọ́?

• Láti fi ojú inú wò Ìsàíàh 1:16–18, ẹ̀yin àti àwọn ọmọ yìn lè wo ohun pupa kan dídán àti ohun funfun kan àìlábàwọ́n. Tàbí bóyá ẹ lè ṣiṣẹ́ pàpọ́ láti wẹ ohunkan. Báwo ni a ṣe lè di aláìmọ́ nípa ti ẹ̀mí? Báwo ni Jésù ṣe ràn wá lọ́wọ́ láti di mímọ́? Kíni a kọ́ nípa Olùgbàlà láti inú àwọn ẹsẹ wọ̀nyí? Ẹ ṣe àbápín bí ẹ ṣe nímọ̀lára nípa Rẹ́ àti ohun tí Ó ti ṣe fún yín pẹ̀lú àwọn ọmọ yín.

• Ìsàíàh rí ìgbà kan tẹ́lẹ̀ nígbàtí “òkè ńlá ilé Olúwa” yíò fa àwọn ènìyàn wá láti “gbogbo orílẹ̀-èdè” (Ìsàíàh 2:2). Báwo ni ẹ ṣe lè ran àwọn ọmọ yín lọ́wọ́ kí inú wọn dùn nípa lílọ sí ilé Olúwa? Ẹ lè pè wọ́n láti ya àwòrán ilé wọn. Lẹ́hìnnáà ẹ ka Ìsàíàh 2:2papọ̀, kí ẹ sì pè wọn láti ya àwòrán “ilé Olúwa,” èyí tí ó jẹ́ tẹ́mpìlì. Ẹ ka Ìsàíàh 2:3 papọ̀. Ẹ pè wọ́n láti ṣe àfikún ọ̀pọ̀lọpọ̀ àwọn ènìyàn tí ó wá sí tẹ́mpìlì, pẹ̀lú àwọn ẹbí wọn.

• Tún lè ka Ìsàíàh 2:2–3 papọ̀ kí ẹ sì dá ohun kan tó mọ̀ tí ó mísí ẹ̀yin àti àwọn ọmọ yín láti lọ sí tẹ́mpìlì. Nígbànáà, lẹ́hìn kíka Ìsàíàh 2:4–3 papọ̀, ẹ lè sọ̀rọ̀ bí tẹ́mpìlì ṣe nmú àláfíà wá fún wọn. Ẹ yẹ kíkọ orin kan nípa tẹ́ńpìlì, bíi irú “Mo Fẹ́ láti Rí Tẹ́mpìlì” (Ìwé Orin Ọmọdé, 95). Ẹ ran àwọn ọmọ yín lọ́wọ́ láti wa àwọn ọ̀rọ̀ nínú orin tí ó kọ ohun tí tẹ́mpìlì jẹ́ àti ohun tí a nṣe níbẹ̀.

• Láti ṣe àlàyé àwọn àsọtẹ́lẹ̀ Ìsàíàh nípa Krístì, ẹ̀yin àti àwọn ọmọ yín lè sọ̀rọ̀ nípa àwọn orúkọ oyè ènìyàn, bí ààrẹ, bíṣọ́pù, tàbí olùkọ́. Kíni àwọn àkọlé wọ̀nyí sọ fún wa nípa àwọn ènìyàn wọ̀nyí? Ẹ ran àwọn ọmọ yín lọ́wọ́ láti rí àwọn àkọ́lé Jésù Krístì nínú Ìsàíàh 7:14 àti 9:6–7 (bákannáà wo ojú-ewé ìṣe ṣíṣe ti ọ̀sẹ̀ yí pẹ̀lú). Kíni àwọn àkọlé wọ̀nyí kọ́ wa nípa Rẹ? Kíni a tún kọ́ nípa Jésù Krístì látinú àwọn ẹsẹ wọ̀nyí?

• Ẹ tún lè ṣe àbápín pẹ̀lú àwọn ọmọ yín “Wòlíì Ìsàíàh” (nínú Àwọn Ìtàn Májẹ̀mú Láéláé, 150–51). Ẹ sọ̀rọ̀ lẹ́ẹ̀kọ̀ọ̀kan láti béèrè ohun tí Ìsàíàh mọ̀ nípa Jésù Krístì ní ọ̀pọ̀ ọdún ṣáájú kí wọ́n tó bí I. Lẹ́hìnnáà ẹ lè lo Máttéù 1:21–23; Lúkù 1:31–33 láti sọ̀rọ̀ nipa bí àsọtẹ́lẹ̀ Ìsàíàh nínú Ìsàíàh 7:14; 9:6–7 ṣe di mímúṣẹ

  

  1:18