Isaia 1–12

Nampianatra ny Mpamonjy fa “ny zavatra rehetra izay [notenenin’i Isaia] dia efa nisy sy mbola hisy, araka ny teny izay noteneniny” (3 Nefia 23:3). Rehefa mandalina ny bokin’i Isaia ianao, dia manaova tabilao ahitana faminaniana misy lohateny tahaka ireto: Ny andron’i Isaia, Ny asa fanompoan’ny Mpamonjy teto an-tany, ary Ny andro farany. Mariho fa faminanian’i Isaia maro no tanteraka amin’ny fomba mihoatra ny iray (jereo ny Torolalana ho an’ny Soratra masina, “Isaia”).

Nampianatra ny Filoha Dallin H. Oaks hoe: “Ny bokin’i Isaia dia ahitana faminaniana maro izay toa tanteraka amin’ny endriny maro. Ny anankiray amin’izany dia toa mahakasika ny olona tamin’ny andron’i Isaia na ny toe-javatra niainan’ny taranaka manaraka. Ny anankiray hafa, izay matetika ara-tsarinteny, dia toa milaza tranga amin’ny mitataovovonan’ny fotoana, raha noravana i Jerosalema ary naparitaka ny olony taorian’ny fanomboana ny Zanakalahin’ Andriamanitra tamin’ny hazofijaliana. Ny heviny na fahatanterahany iray hafa ny amin’ny faminaniana iray ihany dia toa mifandray amin’ireo zavatra hitranga amin’ny Fiavian’ny Mpamonjy Fanindroany. Ny fananan’ireo faminaniana ireo heviny maro dia manamafy ny maha-zava-dehibe ny fikatsahantsika fanambarana avy amin’ny Fanahy Masina mba hanampy antsika hahafantatra ny hevitr’izy ireny” (“Scripture Reading and Revelation,” Ensign, Jan. 1995, 8).

Tahaka ireo mpaminany tamin’ny fotoana rehetra, i Isaia dia nampitandrina hatrany ny vahoaka momba ny toe-panahin’izy ireo. Eo am-pamakianao ny Isaia 1; 3; 5, dia tadiavo ireo andian-teny izay mamariparitra hoe nanao ahoana ny toetry ny fiainam-panahin’ny vahoaka (jereo ohatra ny Isaia 1:2–4, 21–23; 3:9, 16–17; 5:11–12, 20–23). Inona no olana mitovitovy amin’izany hitanao amin’izao androntsika izao? Azonao atao ihany koa ny mitady andininy izay mampitandrina mikasika ny vokatry ny toe-panahin’ny Isiraelita (toy ny Isaia 1:7; 3:17–26; 5:5–7, 13–15).

Ankoatra ireo fampitandremana dia nanome hafatra mifono fanantenana hahazoana fanavotana amin’ny alalan’ny Mpamonjy i Isaia (jereo ohatra ny Isaia 1:16–19, 25–27; 3:10; 4). Inona no zavatra ianaranao momba ny Tompo avy amin’ireo hafatra ireo? Inona no tsy mampitovy ny hafatra ao amin’ireo andinin-tsoratra masina ireo amin’ny zavatra izay tian’i Satana hinoantsika?

Tahaka an’i Isaia, ireo mpaminany ankehitriny dia mampitandrina antsika momba ny fahotana sy ny vokatr’izany, ary manome hafatra mifono fanantenana amin’ny alalan’i Jesoa Kristy izy ireo. Inona avy ireo ohatra azonao eritreretina? Mety ho tianao ny hamerina hijery hafatra iray avy tamin’ny fihaonamben’ny Fiangonana maneran-tany teo aloha mba hitadiavana fampitandremana sy fampanantenana toy izany.

Maro amin’ireo faminanian’i Isaia no manana heviny manokana ho an’izao androntsika izao. Mba hahitana azy ireo dia tadiavo ireo matoanteny amin’ny filazam-potoana ho avy (toy ny hoe “ho” na “handeha”). Ohatra hoe tadiavo ireo matoanteny ireo eo am-pamakianao ny Isaia 2; 4; 11–12. Mety hanandrana hanolo izany amin’ny alalan’ny matoanteny amin’ny filazam-potoana ankehitriny mihitsy aza ianao. Inona amin’ireo faminaniana ireo no tena manentana ny fanahinao indrindra? Inona no ianaranao avy amin’ireo faminaniana momba an’i Ziona sy ny fanorenana tempoly ary ny fanangonana an’i Isiraely?

Ny Isaia 2:2–3 dia tena manan-danja manokana ho an’ny Olomasin’ny Andro Farany. Ahoana no ahatanterahan’ireo faminaniana ireo amin’izao? Inona no ianaranao momba ny “làlan’ny Tompo” ao amin’ny Tranony? (andininy 3).

Jereo koa ny Isaia 5:26; “An-tendrombohitra,” Fihirana sy Hiran’ny Ankizy, lah. 59.

Mitantara ny niantsoana azy ho mpaminany i Isaia ao amin’ny Isaia 6. Rehefa mamaky io toko io ianao, dia inona no manaitra anao momba ny zavatra niainan’i Isaia? Inona no fiantraikan’io toko io amin’ny fomba fiheveranao ny Tompo sy ny mpaminaniny ary ny asa izay nanirahana azy ireo?

Nandritra ny asa fanompoan’i Isaia dia nikambana tamin’i Syria i Isiraely mba hiarovany tamin’i Asyria. Tian’i Isiraely sy i Syria hoterena i Ahaza, mpanjakan’i Joda mba hanatevin-daharana azy ireo. Saingy naminany i Isaia fa tsy hahomby izany fanakambanana ny hery izany, ka dia nanoro hevitra an’i Ahaza izy mba hatoky ny Tompo (Isaia 7: 7–9: 8:12–13).

Rehefa nanoro hevitra an’i Ahaza i Isaia dia nanao faminaniana maro izay fanta-daza izy, toy ireo hita ao amin’ny Isaia 7:14; 8:13–14; 9:2, 6–7. Na toy ny ahoana na toy ny ahoana ny lanjan’ireo faminaniana ireo ho an’i Ahaza, dia mazava tsara fa izy ireo dia momba an’i Jesoa Kristy (jereo ihany koa ny Matio 1:21–23; 4:16; 21:44; Lioka 1:31–33). Nahoana no anarana fiantsoana tsara ho an’ny Mpamonjy ny hoe “Imanoela”? (jereo ny Matio 1:23). Ahoana no maha-“Mpanolo-tsaina” na “Andrian’ny fiadanana” Azy ho anao? (Isaia 9:5). Inona koa no ianaranao momba ny Mpamonjy avy amin’ireo andininy ireo?

• Afaka mahita ireo antony tsy nahafaly ny Tompo tamin’ireo vahoaka ianao sy ny zanakao ao amin’ny Isaia 1:2–4. Mariho ilay fampitahana amin’ny biby ao amin’ny andininy 3—iza no “tompontsika”? Ahoana no fomba hanehoantsika fa tia Azy isika?

• Mba hakana sary an-tsaina ny Isaia 1:16–18, dia afaka mijery zavatra menamena be sy zavatra fotsy mangatsakatsaka ianao sy ny zanakao. Na mety ho azonareo atao ny miara-manasa zavatra iray. Ahoana no fomba ahatongavantsika ho maloto ara-panahy? Ahoana no anampian’i Jesoa antsika ho lasa madio? Inona no zavatra ianarantsika momba ny Mpamonjy avy amin’ireo andininy ireo? Zarao amin’ny zanakao ny zavatra tsapanao momba Azy sy ny zavatra efa nataony ho anao.

• Nahita mialoha ny fotoana iray izay hahatonga “ny tendrombohitra misy ny tranon’i Jehovah” hahasarika ny olona avy amin’ny “[firenena] rehetra” (Isaia 2:2) i Isaia. Ahoana no ahafahanao manampy ny ankizy sahaninao hahatsapa fientanentanana amin’ny fandehanana any amin’ny tranon’ny Tompo? Azonao atao ny manasa azy ireo hanao ny sarin’ny tranon’izy ireo. Avy eo dia iaraho vakina ny Isaia 2:2, ary asao izy ireo hanao sary ny “tranon’i Jehovah,” dia tempoly izany. Iaraho mamaky ny Isaia 2:3. Asao izy ireo hanampy sarin’olona maromaro manatona ilay tempoly eo amin’ny sary nataon’izy ireo, isan’izany ny fianakavian’izy ireo.

• Azonareo atao ihany koa ny miara-mamaky ny Isaia 2:2–3 ary mamantatra zavatra izay mitaona anao sy ny ankizy sahaninao handeha ho any amin’ny tempoly. Avy eo, rehefa avy miara-mamaky ny Isaia 2:4 ianareo dia afaka mifanakalo hevitra momba ny fomba hitondran’ny tempoly fiadanana ho azy ireo. Azonareo iarahana mihira ny hira iray momba ny tempoly, toy ilay hoe “Mahita ny tempoly no mahafinaritra ahy” (Bokin-kiran’ny ankizy, 99). Ampio ny ankizy sahaninao hitady teny ao amin’ilay hira izay mampianatra ny atao hoe tempoly sy ny zavatra ataontsika any.

• Mba hampahafantarana ny faminanian’i Isaia momba an’i Kristy dia afaka miresaka momba ireo anarana fiantsoana olona ianao sy ny zanakao, toy ny filoha, eveka, na mpampianatra. Inona no ambaran’ireo anarana fiantsoana ireo amintsika mikasika ireo olona ireo? Ampio ny zanakao hitady anarana fiantsoana an’i Jesoa Kristy ao amin’ny Isaia 7:14 sy ny 9:6–7 (jereo koa ny pejin’ny sahanasa ho an’ny Kilonga ho an’ity herinandro ity). Inona no ampianarin’ny tsirairay avy amin’ireo anarana fiantsoana ireo momba Azy? Inona koa no ianarantsika momba an’i Jesoa Kristy avy amin’ireo andininy ireo?

• Azonao zaraina amin’ny zanakao ihany koa ny “Isaia mpaminany” (ao amin’ny Tantara ao amin’ny Testamenta Taloha, 150–51). Miatoa imbetsaka mba hanontaniana ny zavatra fantatr’i Isaia momba an’i Jesoa Kristy taona maro talohan’ny nahaterahany. Azonao ampiasaina avy eo ny Matio 1:21–23; Lioka 1:31–33 mba hiresahana momba ny fomba nahatanterahan’ireo faminanian’i Isaia ao amin’ny Isaia 7:14; 9:6–7.

  

  1:18