ესაია 1–12

მხსნელმა ასწავლა, რომ „ყველაფერი, რაც [ესაიამ] ილაპარაკა, ახდა და ახდება იმ სიტყვების შესაბამისად, რაც მან ილაპარაკა“ (3 ნეფი 23:3). ესაიას წიგნის შესწავლისას შეგიძლიათ გააკეთოთ წინასწარმეტყველებების სქემა ასეთი სათაურებით: ესაიას დღე, მხსნელის მოკვდავი მსახურება და უკანასკნელი დღეები. გაითვალისწინეთ, რომ ესაიას მრავალი წინასწარმეტყველება ერთზე მეტი გზით სრულდება (იხილეთ Bible Dictionary, „ესაია“).

პრეზიდენტი დალინ ჰ. ოუქსი ასწავლიდა: „ესაიას წიგნი შეიცავს უამრავ წინასწარმეტყველებას, რომელთაც, როგორც ჩანს, მრავალჯერადი აღსრულება უწერიათ. როგორც ჩანს, ერთი მათგანი ესაიას დროინდელ ხალხს ან მომავალი თაობის გარემოებას ეხება. სხვა მნიშვნელობა, ხშირად სიმბოლური, როგორც ჩანს, ეხება მერიდიანის ზენიტის მოვლენებს, როდესაც ღვთის ძის ჯვარცმის შემდეგ იერუსალიმი განადგურდა, მისი ხალხი კი გაიფანტა. იმავე წინასწარმეტყველების კიდევ ერთი მნიშვნელობა ან აღსრულება, როგორც ჩანს, დაკავშირებულია მხსნელის მეორედ მოსვლის ამსახველ მოვლენებთან. ის ფაქტი, რომ ბევრ ამ წინასწარმეტყველებას შეიძლება ჰქონდეს მრავალი მნიშვნელობა, ხაზს უსვამს ჩვენი სულიწმიდის გამოცხადების ძიების მნიშვნელობას, რათა დაგვეხმაროს მათ წვდომაში“ („Scripture Reading and Revelation“ Ensign, იანვარი, 1995, 8).

ყველა დროის წინასწარმეტყველების მსგავსად, ესაია განუწყვეტლივ აფრთხილებდა ხალხს მათი სულიერი მდგომარეობის შესახებ. როცა კითხულობთ ესაია 1; 3; 5, მოძებნეთ ფრაზები, რომლებიც აღწერს, თუ როგორი იყო ხალხის სულიერი მდგომარეობა (იხილეთ, მაგალითად, ესაია 1:2–4, 21–23; 3:9, 16–17; 5:11–12, 20–23). რა მსგავს პრობლემებს ხედავთ ჩვენს დროში? თქვენ ასევე შეგიძლიათ მოძებნოთ მუხლები, რომლებიც გვაფრთხილებს ისრაელიელების სულიერი მდგომარეობის შედეგების შესახებ (როგორებიცაა ესაია 1:7; 3:17–26; 5:5–7, 13–15).

გაფრთხილებების გარდა, ესაია ასევე ესაუბრებოდა ხალხს მხსნელის მეშვეობით გამოსყიდვის იმედის შესახებ (იხილეთ, მაგალითად, ესაია 1:16–19, 25–27; 3:10; 4). რას სწავლობთ უფლის შესახებ ამ გზავნილებიდან? რით განსხვავდება უფლის გზავნილი ამ მუხლებში იმისგან, რაც სატანას სურს, რომ გვჯეროდეს?

ესაიას მსგავსად, დღეს წინასწარმეტყველები გვაფრთხილებენ ცოდვისა და მისი შედეგების შესახებ და იესო ქრისტეს მეშვეობით იმედის გზავნილებს გვიზიარებენ. სხვა რა მაგალითები შეიძლება, გაიხსენოთ? თქვენ შეგიძლიათ გადახედოთ გზავნილს ჩატარებული გენერალური კონფერენციიდან და მოძებნოთ ასეთი გაფრთხილებები და დაპირებები.

ესაიას მრავალ წინასწარმეტყველებას აქვს განსაკუთრებული მნიშვნელობა ჩვენს დროში. მათ საპოვნელად მოძებნეთ მომავალი დროის ზმნები (როგორებიცაა „იქნება“ ან „წავიდეს“). მაგალითად, მოძებნეთ ეს ზმნები, როცა კითხულობთ ესაია 2; 4; 11–12-ს. თქვენ შეგიძლიათ სცადოთ მათი ჩანაცვლება აწმყო დროის ზმნებით (მაგალითად არის ან მიდის). რომელი წინასწარმეტყველებებია თქვენთვის განსაკუთრებით შთამაგონებელი? რას სწავლობთ ამ წინასწარმეტყველებიდან სიონის, ტაძრების აშენებისა და ისრაელის შეკრების შესახებ?

ესაია 2:2–3 განსაკუთრებით ეხება უკანასკნელ დღეთა წმინდანებს. როგორ აღსრულდება ეს წინასწარმეტყველებები? რას იგებთ უფლის „გზებისა“ და „ბილიკების“ შესახებ მის სახლში? (მუხლი 3).

აგრეთვე იხილეთ ესაია 5:26; „მაღლა მთის მწვერვალზე“, საგალობლები და საბავშვო სიმღერები, 30.

ესაია 6-ში ესაია მოყვა თავისი მოწოდების შესახებ, ყოფილიყოს წინასწარმეტყველი. ამ თავის წაკითხვისას რა შთაბეჭდილებას ახდენს თქვენზე ესაიას გამოცდილება? როგორ მოქმედებს ეს თავი თქვენს უფლის მიმართ დამოკიდებულებაზე, მის წინასწარმეტყველებზე და იმ საქმეზე, რომლის შესასრულებლადაც ისინი არიან მოწოდებულნი?

ესაიას მსახურების დროს ისრაელმა ასურეთისგან თავის დაცვის მიზნით შეთანხმება დადო სირიასთან. ისრაელსა და სირიას სურდათ ეიძულებინათ ახაზი, იუდეის მეფე, შეერთებოდა მათ. მაგრამ ესაიამ იწინასწარმეტყველა, რომ ალიანსი ჩავარდებოდა და ურჩია ახაზს, უფალს მინდობოდა (ესაია 7:7–9; 8:12–13).

როცა ესაია ახაზს რჩევას აძლევდა, მან რამდენიმე ცნობილი წინასწარმეტყველება გააკეთა, როგორებიცაა ესაია 7:14; 8:13–14; 9:2, 6–7. რა მნიშვნელობაც არ უნდა ჰქონოდათ ამ წინასწარმეტყველებებს ახაზისთვის, ისინი აშკარად ეხებოდა იესო ქრისტეს (იხილეთ აგრეთვე მათე 1:21–23; 4:16; 21:44; ლუკა 1:31–33). რატომ არის „ემანუელი“ კარგი სახელი მხსნელისთვის? (იხილეთ მათე 1:23). როგორ დაგეხმარათ ის როგორც „მრჩეველი“ ან „მშვიდობის უფლისწული“? (ესაია 9:7). სხვას რას იგებთ მხსნელის შესახებ ამ მუხლებიდან?

• ესაიას 1:2–4-ში თქვენ და ბავშვებს შეგიძლიათ იპოვოთ მიზეზები, რომელთა გამოც უფალი ხალხით ბედნიერი არ იყო. ყურადღება მიაქციეთ ცხოველებთან შედარებას მე-3 მუხლში — ვინ არის ჩვენი „ბატონი“? როგორ ვაჩვენოთ, რომ ვიცნობთ მას?

• ესაია 1:16–18-ის წარმოსადგენად თქვენ და ბავშვებს შეგიძლიათ შეხედოთ რამეს კაშკაშა წითელს და რამე სუფთა თეთრს. ან იქნებ, სცადოთ, ერთად გარეცხოთ რამე. როგორ ვხდებით სულიერად უწმინდურები? როგორ გვეხმარება იესო განწმენდაში? რას ვიგებთ მხსნელის შესახებ ამ მუხლებიდან? გაუზიარეთ თქვენს შვილებს, რას გრძნობთ მის მიმართ და რა გააკეთა მან თქვენთვის.

• ესაიამ იწინასწარმეტყველა დრო, როდესაც „მთა უფლის სახლისა“ მოიზიდავდა „ყველა [ერს]“ (ესაია 2:2). როგორ შეგიძლიათ დაეხმაროთ ბავშვებს, რომ უფლის სახლში აღტაცებით დადიოდნენ? სთხოვეთ მათ, თავიანთი სახლის სურათი დახატონ. შემდეგ ერთად წაიკითხეთ ესაია 2:2 და სთხოვეთ, დახატონ „უფლის სახლი“, რომელიც არის ტაძარი. ერთად წაიკითხეთ ესაია 2:3. სთხოვეთ მათ, თავიანთ სურათებს დაამატონ ტაძარში მოსული ბევრი ადამიანი, მათ შორის მათი ოჯახები.

• თქვენ ასევე შეგიძლიათ ერთად წაიკითხოთ ესაია 2:2–3 და ამოიცნოთ ის, რაც შთაგაგონებთ თქვენ და ბავშვებს, წახვიდეთ ტაძარში. მერე ესაია 2:4-ის ერთად წაკითხვის შემდეგ, შეგიძლიათ ისაუბროთ იმაზე, თუ როგორ მოაქვს ტაძარს მათთვის მშვიდობა. იმღერეთ სიმღერა ტაძრის შესახებ, როგორიცაა „I Love to See the Temple“ (Children’s Songbook, 95). დაეხმარეთ თქვენს შვილებს, სიმღერაში იპოვონ სიტყვები, რომლებიც ასწავლის, თუ რა არის ტაძარი და რას ვაკეთებთ იქ.

• ესაიას ქრისტეს შესახებ წინასწარმეტყველებების გასაცნობად თქვენ და ბავშვებს შეგიძლიათ ისაუბროთ ადამიანების წოდებებზე, როგორებიცაა: პრეზიდენტი, ეპისკოპოსი ან მასწავლებელი. რას გვეუბნება ეს წოდებები ამ ადამიანებზე? დაეხმარეთ ბავშვებს იპოვონ იესო ქრისტეს წოდებები ესაია 7:14 -სა და 9:6–7 -ში (იხილეთ აგრეთვე ამ კვირის ღონისძიებების გვერდი). რას გვასწავლის თითოეული ეს წოდება მის შესახებ? კიდევ რას ვიგებთ იესო ქრისტეს შესახებ ამ მუხლებიდან?

• თქვენ ასევე შეგიძლიათ, გაუზიაროთ თქვენს შვილებს „Isaiah the Prophet“ (Old Testament Stories, 150–51). პერიოდულად შეჩერდით და იკითხეთ, რა იცოდა ესაიამ იესო ქრისტეს შესახებ მის დაბადებამდე მრავალი წლით ადრე. ამის შემდეგ შეგიძლიათ გამოიყენოთ მათე 1:21–23; ლუკა 1:31–33 რათა ისაუბროთ იმაზე, თუ როგორ აღსრულდა ესაიას წინასწარმეტყველებები ესაია 7:14; 9:6–7 -ში.

  

  1:18