Fjalët e Urta 1–4; 15–16; 22; 31; Predikuesit 1–3; 11–12

Librat Fjalët e Urta dhe Predikuesit janë të mbushur me ide rreth diturisë. Merrni parasysh të shënjoni fjalët “dituri”, “urtësi” dhe fjalë të lidhura me to si “njohje”, “dije”, “arsye”, “gjykim” dhe “mend”, “mençuri”, “mendja”, “i zgjuar”, ndërsa i gjeni te Fjalët e Urta 1–4; 15–16; Predikuesit 1–3; 11–12. Si ndikojnë këta kapituj në mënyrën se si ju mendoni për diturinë? Bazuar tek ato që gjeni, si do ta përshkruanit diturinë që “Zoti jep”? (Fjalët e Urta 2:6.) Çfarë bekimesh vijnë nga dituria e Perëndisë?

Shihni edhe te Mateu 7:24–27; 25:1–13.

Një temë tjetër që gjendet gjatë gjithë librave Fjalët e Urta dhe Predikuesit, është “frik[a] nga Zoti”. Vëzhgoni për këtë frazë ndërsa lexoni. Çfarë mendoni se do të thotë të kesh frikë Zotin? Kërkoni ide në mesazhin e Plakut Dejvid A. Bednar, “Prandaj, Ata e Përmbajtën Frikën” (Liahona, maj 2015, f. 46–49). Si është frika nga Zoti e ndryshme nga llojet e tjera të frikës?

Shihni edhe te Fjalët e Urta 8:13.

Si do të përpiqeshit ta bindnit dikë që është më mirë të ketë “besim tek Zoti” sesa të “mbështet[et] në gjykimin [e vet]”? (Fjalët e Urta 3:5.) Çfarë krahasimesh ose mësimesh me sende do të përdornit? Ndërsa përsiatni vargjet te Fjalët e Urta 3:5–7, mendoni për mënyrat se si mund t’i plotësoni fjalitë si këto: Mirëbesimi te Zoti është si … Mbështetja në vetë gjykimin tonë është si …

Përse është diçka jo e urtë që të mbështetemi në vetë gjykimin tonë? Si e keni zbuluar që Zoti është i besueshëm?

Megjithëkëtë, me raste mund ta kemi të vështirë të mirëbesojmë te Zoti. Përse ndodh kjo? Plaku Gerit W. Gong sugjeron disa arsye së bashku me këshillën e dobishme, te “Mirëbesoni Sërish” (Liahona, nëntor 2021, f. 97–99). Çfarë historish ose mësimesh gjeni në këtë mesazh që mund ta ndihmojë dikë për ta rivendosur mirëbesimin e vet te Zoti?

Si e krahasojnë Fjalët e Urta 3:6 dhe Fjalët e Urta 4 jetën me një “shteg” ose një “udhë”. Si mendoni, çfarë do të thotë ta lini Zotin “të drejtojë shtigjet [tuaja]”? (Fjalët e Urta 3:6.) Çfarë gjeni te kapitulli 4 që ju ndihmon të “shesho[ni] shtegun e këmbëve të tua”? (Vargu 26.) Për shembull, çfarë na mësojnë vargjet 11–12 dhe 18–19 rreth bekimeve të ndjekjes së shtegut të duhur? Çfarë domethënie kanë për ju vargjet 26–27?

Shihni edhe te 2 Nefi 31:18–21; “Zot, Un’ Ty do të t’Ndjek”, Himne, nr. 137.

Disa nga idetë te Fjalët e Urta 15–16 mund t’ju frymëzojnë ta përmirësoni mënyrën se si komunikoni me të tjerët, sidomos me njerëzit tuaj të dashur. Për shembull, mendoni rreth rasteve të caktuara kur “përgjigja e ëmbël” ndihmoi për ta “fashit[ur] zemërimin” (Fjalët e Urta 15:1).

Gjithashtu mund të mendoni për raste kur Shpëtimtari ishte shembull i mësimeve te Fjalët e Urta 15:1–4, 18 (shihni te Marku 12:13–17; Gjoni 8:1–11). Si mund ta ndiqni shembullin e Tij kur ndërveproni me të tjerët?

Si mund të gjejë zbatim këshilla te Fjalët e Urta 15; 16:24–32 në komunikimin e sotëm elektronik? Shihni nëse mund të gjeni një varg në këta kapituj që mund ta riformuloni si këshillë rreth ndërveprimit në mediat shoqërore ose nëpërmjet mesazheve në celular.

Shihni edhe te Nil L. Andersen, “Ndjekja e Jezusit: Të Qenit Paqebërës”, Liahona, maj 2022, f. 17–21; Ronald A. Rasband, “Fjalët Kanë Rëndësi”, Liahona, maj 2024, f. 70, 75–77; Për Forcën e Rinisë: Një Udhëzues për Bërjen e Zgjedhjeve (2022), f. 11–12.

Vargjet te Fjalët e Urta 31:10–31 përshkruajnë “një grua … të virtytshme” ose një grua me forcë, aftësi dhe ndikim të madh shpirtëror. Ju mund të përpiqeni ta përmblidhni me vetë fjalët tuaja atë që thotë secili prej këtyre vargjeve rreth grave të virtytshme. Cilat prej këtyre tipareve mund të merrni si shembull për veten tuaj?

Përse ka vlerë që ju të mbani mend se shumë gjëra në këtë botë, siç pohohet te Predikuesit 1–2, janë “kotësi” (ose të përkohshme dhe shpesh të parëndësishme)? Çfarë gjeni te Predikuesit 12 që i jep jetës vlerë të përjetshme?

• Për t’i ndihmuar fëmijët tuaj që t’i kuptojnë fragmentet rreth të pasurit frikë nga Perëndia, mund ta zëvendësoni fjalën “frikë” me fjalë si nderim, dashuri ose bindje (shihni edhe te Hebrenjve 12:28). Si ndikon kjo te mënyra se si ne mendojmë rreth këtyre vargjeve? Si e tregojmë se e kemi frikë Zotin?

• Ju dhe fëmijët tuaj mund të krijoni veprime që u përshtaten vargjeve te Fjalët e Urta 3:5–7, si bërjen e një zemre me duar, përkuljen në njërën anë, ecjen në vend dhe të treguarit me gisht drejt syve. Si mund ta tregojmë se i mirëbesojmë Jezu Krishtit me gjithë zemër?

• Për të treguar se ç’do të thotë fraza “mos u mbështet në gjykimin tënd” (Fjalët e Urta 3:5), merreni parasysh t’i ftoni fëmijët të mbështeten te diçka e fortë dhe e qëndrueshme, si një mur. Më pas, ata mund të përpiqen të mbështeten te diçka që nuk është e fortë, si një fshesë. Ose mund të përpiqen të mbështetin një kunj ose laps te sende me fortësi të ndryshme, të tilla si te një libër ose një fletë letre. Përse është e rëndësishme të kemi “besim tek Zoti” (vargu 5) dhe jo tek “gjykimi [ynë]”?

• Mbase ju dhe fëmijët tuaj mund të mendoni për situata kur ju ose ata mund të ndiheni të zemëruar. Lexoni së bashku te Fjalët e Urta 15:1 dhe ndihmojini fëmijët tuaj që ta zbatojnë këtë varg te situatat për të cilat menduan. Ndoshta mund të ushtrojnë disa “përgjigj[e të] ëmb[la]”. Një këngë rreth dashamirësisë, e tillë si “Dashuri Këtu Ka” (Libri i Këngëve të Fëmijëve, f. 102–103), mund ta përforcojë këtë parim.

• Për të mësuar se ç’do të thotë të mos “zemërohe[sh] shpejt” (Fjalët e Urta 15:18), ju dhe fëmijët tuaj mund të tregoni për raste kur ju (ose dikush që e njihni) u ndiet të zemëruar, por zgjodhët të tregoheshit dashamirës. Ndihmojini fëmijët tuaj të mendojnë për gjëra që ne mund t’i bëjmë shpejt, në qoftë se “nuk zemërohe[mi] shpejt”. Për shembull, ata mund të mendojnë shpejt rreth Jezusit, t’i kërkojnë Atit Qiellor ndihmë, të mendojnë për një këngë të Fillores ose, po të jetë e mundur, të largohen me të shpejtë.