Mme Prophet ye Prɔfesi

Mme Prophet ye prɔfesi enyene akpan ubiɔŋ utom ke ofuri Akani Testament. Abraham, Isaac, ye Jacob ema ekut mme ŋkukut enyuŋ etiŋ ikɔ ye mme isuŋ utom heaven. Moses ama etiŋ ikɔ ye Abasi iso ye iso onyuŋ eneme uduak Esie ɔnɔ nditɔ Israel. Akpa ye udiana ŋwed Ndidem etiŋ abaŋa mme utom ye mme etop emi etide eke mme Prophet Elijah ye Elisha. Akani Testament ŋko etiŋ abaŋa mme prophet iban nte Miriam ye Deborah, ye mme iban efen emi ekediɔŋde ye spirit prɔfesi, utɔ nte Rebekah ye Hannah. Ndien okposuk edi ke idighe mme prophet emi ekemekde ekewet mme Psalm, mmɔ ŋko eyɔhɔ ye spirit prɔfesi, akpan akpan nte mmɔ ewutde edidi Messiah.

Ndomo kiet ke otu emi edide mbuari enɔ mbon Ufɔk Abasi Jesus Christ Mme Ndisana Owo ke Ukperedem Usen. Ke akpanikɔ, ikɔ-Abasi Jesus Christ emi ekefiakde emen edi ekpep nnyin ete ke mme prophet inyeneke ekikere kabaŋa mme ibat ŋkpɔ eset ikpɔŋ edi ekere ebaŋa akpan ŋkpɔ ke uduak Abasi. Okposuk edi ke usuk ekeme ndikut mme prophet nte saŋa saŋa eke mme ini Akani Testament, nnyin ikut mmɔ nte ŋkpɔ emi nnyin inyenede kiet ye mme ini Akani Testament.

Edi ndikot ibuot-ŋwed nto Isaiah ye Ezekiel ekeme nditie nte enyene ukpuhɔde ye ndikot etop ke akwa mbono nto President Ufɔk Abasi ke eyo emi. Usuk ini esisɔŋ ndikut nte ke mme prophet eset ama enyene ŋkpɔ nditiŋ nnɔ nnyin. Ke ofuri ebede, ererimbot emi nnyin iduŋde mfin eneghede ɔkpuhɔde ye ererimbot emi mmɔ ekekwɔrede ikɔ enyuŋ etiŋde prɔfesi. Ndien ke ntak ke nnyin iminyene odu uwem prophet ada mbume edi: Ntak emi utom emi odotde—ndien enye oyom utom—ndikot mme ikɔ eke mme prophet eset?

Ke ediwak ini, mme owo mfin emi idighe mbon emi mme prophet eke Akani Testament ekewetde enɔ. Mme prophet ema enye mme mfina ke ini oro emi mmɔ eketiŋde ebaŋa ke ini ye ebiet mmɔ—ukem nte mme prophet eyo emi etiŋde mme mfina nnyin mfin.

Ke ukem ini oro, mme prophet ekeme ndikut mbe ŋkpɔŋ mme mfina idahaemi. Mmɔ ekpep mme nsinsi akpanikɔ, emi enyenede ufɔn ɔnɔ ini ye ebiet ekededi. Ke edidiɔŋde ye ediyarere, mmɔ mkpon-ŋkan usuŋ eke utom Abasi. Ke nte uwut-ŋkpɔ, Isaiah ama ɔtɔt mme owo ke eyo esie abaŋa mme idiɔk ŋkpɔ mmɔ. Enye ŋko ama ewet abaŋa edinyaŋa eke mbon Israel emi edidude uwen ke isua 200 ke iso. Ke ukem ini oro, enye ama ekpep abaŋa edinyaŋa emi kpukpru ikɔt Abasi eyomde. Ndien enye ama ewet mme prophecy emi, kpa mfin, ekade iso ebet ndisu—nte mme eŋwɔŋɔ eke “obufa ererimbot” (Isaiah 65:17) emi “ediyɔhɔde ye ifiɔk Abasi” (Isaiah 11:9), emi edibokde mme ufɔk Israel emi ekesopde ye emi “mme idut” midi “kpepke ekɔŋ aba” (Isaiah 2:4). Ubak idaresit ye ifiɔk emi otode ndikot mme ikɔ eke mme prophet Akani Testament edi ndifiɔk nte ke nnyin iminyene ubiɔŋ utom ke ediye usen emi mmɔ ekekutde.

Ke ntre ke ini nnyin ikotde mme prophecy eke eset, enye ekeme ndinyaŋa ke ndikpep mbaŋa idaha emi ekewetde mmɔ—edi ana nte afo ŋko okut idem fo ke mmɔ, mme “odomo mmɔ ye [idem fo]” (1 Nephi 19:24; se ŋko ufaŋ 23). Usuk ini oro ɔwɔrɔ ndikut Babylon nte idiɔŋɔ idiɔkŋkpɔ ye ntaŋidem, idighe akani obio ikpɔŋ. Ekeme ndiwɔrɔ ndikut Israel nte ikɔt Abasi ke ini ye ebiet ekededi. Midighe ekeme ndiwɔrɔ ndikut Zion nte usuŋ eyo mfin emi ikɔt Abasi emade, idighe ndikut enye nte ikpikpu ikɔ efen emi adade ɔnɔ Jerusalem.

Nnyin imikeme ndidomo mme ŋwed Abasi ye uwem nnyin koro nnyin imifiɔk ite ke prophecy ekeme ndisu ke ediwak usuŋ. Eti uwut-ŋkpɔ edi prophecy emi odude ke Isaiah 40:3: “Uyo andifiori ke wilderness ete, Mbufo ediɔŋ usuŋ Jehovah enim.” Etiŋde enɔ mbon ŋkpɔkɔbi ke Babylon, ikɔ emi ekeme ndidi ke akabaŋa Abasi ndinɔ usuŋ ndiwɔrɔ ke ŋkpɔkɔbi mfiak nyɔŋ Jerusalem. Etiŋde enɔ Matthew, Mark, ye Luke, prɔfesi emi akabaŋa John Baptist, emi ekebeŋede usuŋ ɔnɔ utom uwem isɔŋ eke Andinyaŋa. Ndien Joseph Smith ama ɔbɔ ediyarede ete ke prophecy emi ke osu mfin ke mbeŋeidem ɔnɔ utom Christ ke millinium. Ke mme usuŋ emi nnyin idide ndifiɔk, mme prophet eset ema etiŋ ikɔ enɔ nnyin. Ndien mmɔ ema ekpep ediwak nti, mme nsinsi akpanikɔ emi edide enɔ nnyin nte mmɔ ekedide enɔ Israel ke eset.

Edi kpa se ifɔnde ikan ndikut idem fo ke mme prophecy eke Akani Testament edi ndikut Jesus Christ ke mmɔ. Edieke afo oyomde Enye, afo oyokut Enye, okposuk edi ke owo ikotke Enye enyiŋ. Ekem ndinwam ndinyene ke esit ete ke Abasi Akani Testament, Ɔbɔŋ Ͻbɔŋ, edi Jesus Christ. Ini ekededi emi mme prophet etiŋde ebaŋa se Ͻbɔŋ anamde mme se Enye edinamde, mmɔ etiŋ ebaŋa Andinyaŋa.

Afo ŋko oyokut mme ikɔ emi etiŋde ebaŋa Enye emi Eyetde Aran, Andifak, ye Edidem ini iso emi otode ubon David. Kpukpru emi edi mme prophecy ebaŋade Jesus Christ. Ke ofuri idaha, afo oyokot abaŋa edibɔhɔ, edifen nnɔ, edifak, ye ndifiak nnim ke itie. Ye Andniyaŋa ke ekikere ye esit fo, mme prɔfesi emi edinyan iwut Eyen Abasi. Ke ekurede ofuri, usuŋ emi ɔfɔnde akan ndifiɔk prɔfesi edi ndinyene “spirit prophecy,” emi John ɔdɔhɔde nnyin ke edi “ikɔ ntiense Jesus” (Eriyarare 19:10).