Mga Awit 102–103; 110; 116–119; 127–128; 135–139; 146–150

Pansinin kung paano inilalarawan ng Mga Awit 102:1–11 ang pagkabalisa at pag-iisa na kadalasang nadarama sa panahon ng mga pagsubok. Siguro ay naranasan mo na o ng iba pang mga kakilala mo ang mga damdaming iyon. Habang binabasa mo ang Mga Awit 102:12–28; 103; 116, maghanap ng mga pariralang nagbibigay sa iyo ng kumpiyansa na maaari kang “[tumawag] sa pangalan ng Panginoon” sa iyong mga pagsubok (Awit 116:13). Maaari mong markahan, isaulo, o ibahagi sa iba ang mga pariralang nagbibigay sa iyo ng pag-asa sa Kanya.

Tingnan din sa Isaias 25:8; Mga Hebreo 2:17–18; Alma 7:11–13; Camille N. Johnson, “Si Jesucristo ay Kaginhawahan,” Liahona, Mayo 2023, 81–83; “Saan Naroon ang Aking Kapayapaan?” (Mga Himno, blg. 74).

Ang Mga Awit ay naglalaman ng mga talatang tumutukoy sa buhay at ministeryo ni Jesucristo. Narito ang ilang halimbawa:

• Mga Awit 110:1–4 (tingnan sa Mateo 22:41–45; Mga Hebreo 5:4–10; 6:20)

• Mga Awit 118:22 (tingnan sa Mateo 21:42; Mga Gawa 4:10–11; 1 Pedro 2:7)

• Awit 118:25–26 (tingnan sa Mateo 21:9)

Ano ang itinuturo sa iyo ng mga talatang ito tungkol kay Jesucristo? Bakit mahalagang malaman ito tungkol sa Kanya?

Ang Mga Awit 119 ay naglalaman ng maraming parirala na ikinukumpara ang ating buhay sa paglalakbay pabalik sa Ama sa Langit. Habang nagbabasa ka, hanapin ang mga salitang tulad ng “lumalakad,” “landas,” “daan,” “mga paa”, at “maligaw.” Pagnilayan ang iyong paglalakbay sa buhay—saan ka nanggaling, nasaan ka na ngayon, at saan ka papunta. Ano ang natutuhan mo mula sa awit na ito tungkol sa iyong paglalakbay pauwi? Ano ang natutuhan mo sa pagmamasid sa landas ng iba? Ayon sa awit na ito, ano ang inilaan ng Diyos upang tulungan kang manatili sa Kanyang landas?

Isipin ang isang pagkakataon kung saan nakatulong sa iyo ang pagtahak sa isang landas o pagsunod sa mapa na makarating sa iyong patutunguhan. Ano ang itinuturo sa iyo ng karanasang iyan tungkol sa pagtahak sa landas ng Diyos?

Sa maraming iba pang mga banal na kasulatan, binanggit ng Panginoon at ng Kanyang mga propeta ang isang landas. Nasa ibaba ang ilang halimbawa. Isiping saliksikin ang mga talatang ito at isulat o ibahagi sa iba ang natutuhan mo.

Paano makatutulong ang mga katotohanang ito sa iyo na manatili sa landas ng Diyos?

Anong karagdagang mga kaalaman ang matututuhan mo mula sa sumusunod na payo ni Pangulong Russell M. Nelson?

“Kung nais nating maging matagumpay ang paglalakbay natin sa buhay, kailangang sumunod tayo sa banal na gabay. Sinabi ng Panginoon, ‘Isaalang-alang ako sa bawat pag-iisip; huwag mag-alinlangan, huwag matakot’ [Doktrina at mga Tipan 6:36]. At isinulat ng Mang-aawit, ‘Ilawan sa aking mga paa ang salita mo, at liwanag sa landas ko’ [Awit 119:105]. …

“Sa paglalakbay ninyo sa buhay, nakakaharap ninyo ang maraming hadlang at nakakagawa kayo ng ilang pagkakamali. Tinutulungan kayo ng mga banal na kasulatan na makilala ang inyong mga pagkakamali at gumawa ng nararapat na pagwawasto. Humihinto kayo sa pagpunta sa maling direksyon. Pinag-aaralan ninyong mabuti ang mga banal na kasulatan na gagabay sa inyo. Pagkatapos ay nagsisisi at nagsasauli kayo ng mga bagay na kinuha ninyo o itutuwid ang maling nagawa ninyo upang makarating sa ‘makipot at makitid na landas na patungo sa buhay na walang hanggan’ [2 Nephi 31:18]” (“Living by Scriptural Guidance,” Ensign, Nob. 2000, 17).

Tingnan din sa Dieter F. Uchtdorf, “Ang Alibugha at ang Daan Pauwi,” Liahona, Nob. 2023, 86–88.

Pansinin, ayon sa Mga Awit 135:15–18, kung bakit kamangmangan ang magtiwala sa mga huwad na diyos. Ano ang maaaring matukso kang pagkatiwalaan mo na katulad ng isang diyus-diyusan? Maaari mong ilista ang mga bagay na magagawa ng Panginoon, tulad ng ginawa ng mga mang-aawit sa Mga Awit 134–36. Anong makapangyarihang mga bagay ang ginawa Niya para sa iyo?

Ano ang mahahanap mo sa Awit 139 na tumutulong sa iyo na maunawaan na kilala ka ng Panginoon—ang iyong mga iniisip at ginagawa, kalakasan at kahinaan? Paano naiimpluwensyahan ng katotohanang ito ang iyong buhay at mga pagpili?

Habang binabasa mo ang huling mga awit na ito ng papuri, pag-isipan ang mga dahilan kung bakit dapat mong purihin ang Panginoon. Bakit mahalagang purihin Siya? Ano ang ilang paraan na maaari mong purihin Siya?

• Maaari mong basahin o ng isa sa iyong mga anak ang Mga Awit 102:1–2, na inaalam kung paano tayo tinutulungan ng Panginoon sa panahon ng ating mga paghihirap. Paano natin mahahanap ang Kanyang tulong? Maaari din ninyong ibahagi sa isa’t isa ang mga pagkakataong kailangan ninyo ng tulong at nadama ninyo na dininig ng Diyos ang inyong mga panalangin.

• Maaaring ikatuwa ng mga anak mo na pag-usapan kung ano ang pakiramdam ng nasa madilim na lugar. O kaya’y talakayin nila ang mga bagay na mahirap gawin sa dilim. Maaari mo silang anyayahan na gumawa ng isang bagay nang nakapikit, tulad ng pagdrowing ng isang larawan. Ano ang natutuhan natin sa Mga Awit 119:105 tungkol sa liwanag at sa salita ng Diyos?

• Hanapin ang isang bagay na ibinigay sa atin ng Ama sa Langit para tulungan tayong manatili sa Kanyang landas sa mga sumusunod na talata: Mga Awit 119:47–48; 119:105; 1 Nephi 11:25; 2 Nephi 31:20. Ano ang kailangan nating gawin upang manatili sa landas ng Diyos?

• Maaaring masiyahan ang iyong mga anak sa pagtingin sa mga larawan ng mga bagay na binanggit sa Awit 119:105. Maaari nilang ayusin ang mga larawan ayon sa pagkakasunud-sunod habang binabasa nila ang talata. Maaari din kayong kumanta ng isang kaugnay na awit nang magkasama, tulad ng “Turuang Lumakad sa Liwanag” (Aklat ng mga Awit Pambata, 70) o “Sa Aking Paglakad, Jesus ang Kasama” (Gospel Library).

• Isiping gumawa ng maikling listahan ng mga bagay na alam mo tungkol sa bawat isa sa iyong mga anak. Habang isa-isa mong binabasa ang mga nakalista, pahulaan sa mga anak kung sino ang inilalarawan mo. Pagkatapos basahin nang magkakasama ang Mga Awit 139:1–3, maaari ninyong ilista ang mga bagay na alam ng Ama sa Langit at ni Jesus tungkol sa atin.

• Isulat ang mga salita sa Awit 139:23–24 sa isang papel o sa pisara. Sabihin sa iyong mga anak na salungguhitan ang mga salitang naglalarawan ng mga bagay na magagawa ng Diyos para sa atin. Bakit natin gugustuhing gawin ng Diyos ang mga bagay na ito?

• Marahil ay maaaring magbahagi ang iyong mga anak ng mga karanasan nila nang pinuri sila ng isang tao o sinabihan sila na maganda ang ginawa nila. Ibahagi ang ilan sa mabubuting bagay mula sa Mga Awit 146:6–9 na ginawa ng Panginoon (tulungan ang iyong mga anak na maunawaan ang mga salitang hindi pamilyar). Anyayahan ang iyong mga anak na magsabi ng iba pang mga bagay na ginagawa Niya para sa atin. Paano natin Siya pupurihin sa mga bagay na iyon?