Isaias 1–12

Itinuro ng Tagapagligtas na “lahat ng bagay na sinabi [ni Isaias] ay nangyari na at mangyayari, maging alinsunod sa mga salitang kanyang winika” (3 Nephi 23:3). Habang pinag-aaralan mo ang aklat ni Isaias, isiping gumawa ng chart ng mga propesiya na may mga heading na tulad nito: Panahon ni Isaias, Ang mortal na ministeryo ng Tagapagligtas, at Ang mga huling araw. Pansinin na marami sa mga propesiya ni Isaias ang natutupad sa mahigit sa isang paraan (tingnan sa Gabay sa mga Banal na Kasulatan, “Isaias”).

Itinuro ni Pangulong Dallin H. Oaks: “Ang aklat ni Isaias ay naglalaman ng maraming propesiya na tila maraming katuparan. Ang isa ay tila kinabibilangan ng mga tao noong panahon ni Isaias o ng kalagayan ng susunod na henerasyon. Ang isa pang kahulugan, na kadalasan ay simboliko, ay tila tumutukoy sa mga pangyayari sa kalagitnaan ng panahon, nang wasakin ang Jerusalem at ikalat ang kanyang mga tao matapos ipako sa krus ang Anak ng Diyos. Ang isa pang kahulugan o katuparan ng propesiya ring iyon ay tila nauugnay sa mga kaganapang mangyayari sa Ikalawang Pagparito ng Tagapagligtas. Ang katotohanan na magkakaroon ng maraming kahulugan ang marami sa mga propesiyang ito ay malinaw na nagsasaad na mahalagang hingin natin ang paghahayag mula sa Espiritu Santo upang tulungan tayong maipaliwanag ang mga ito” (“Scripture Reading and Revelation,” Ensign, Ene. 1995, 8).

Tulad ng mga propeta sa lahat ng panahon, patuloy na binalaan ni Isaias ang mga tao tungkol sa kanilang espirituwal na kalagayan. Habang binabasa mo ang Isaias 1; 3; 5, maghanap ng mga parirala na naglalarawan ng espirituwal na kalagayan ng mga tao (tingnan, halimbawa, sa Isaias 1:2–4, 21–23; 3:9, 16–17; 5:11–12, 20–23). Anong mga problema na katulad nito ang nakikita mo sa ating panahon? Maaari ka ring maghanap ng mga talatang nagbababala tungkol sa mga bunga ng espirituwal na kalagayan ng mga Israelita (tulad ng Isaias 1:7; 3:17–26; 5:5–7, 13–15).

Bukod pa sa mga babala, nagbigay si Isaias ng mga mensahe ng pag-asa para sa pagtubos sa pamamagitan ng Tagapagligtas (tingnan, halimbawa, sa Isaias 1:16–19, 25–27; 3:10; 4). Ano ang natututuhan mo sa mga mensaheng ito tungkol sa Panginoon? Paano naiiba ang mensahe ng Panginoon sa mga talatang ito sa nais ni Satanas na paniwalaan natin?

Tulad ni Isaias, binabalaan tayo ng mga propeta sa kasalukuyang panahon tungkol sa kasalanan at sa mga bunga nito, at nagbibigay sila ng mga mensahe ng pag-asa sa pamamagitan ni Jesucristo. Anong mga halimbawa ang naiisip mo? Maaari mong pag-aralang muli ang isang mensahe mula sa pangkalahatang kumperensya noon, na hinahanap ang gayong mga babala at pangako.

Marami sa mga ipinropesiya ni Isaias ay may partikular na kahulugan para sa ating panahon. Para mahanap ang mga ito, maghanap ng mga pandiwa na panghinaharap (tulad ng “magiging” o “pupunta”). Halimbawa, hanapin ang mga pandiwang ito habang binabasa mo ang Isaias 2; 4; 11–12. Maaari mong subukang palitan ang mga ito ng mga pandiwa na pangkasalukuyan (tulad naging o pumupunta). Aling mga propesiya ang lalong kapana-panabik sa iyo? Ano ang natutuhan mo mula sa mga propesiyang ito tungkol sa Sion, pagtatayo ng mga templo, at pagtitipon ng Israel?

Ang Isaias 2:2–3 ay nauugnay lalo na sa mga Banal sa mga Huling Araw. Paano natutupad ang mga propesiyang ito? Ano ang natutuhan mo tungkol sa “mga daan” at “mga landas” ng Panginoon sa Kanyang bahay? (talata 3).

Tingnan din sa Isaias 5:26; “Sa Tuktok ng Bundok,” Mga Himno, blg. 4.

Sa Isaias 6, ikinuwento ni Isaias ang pagtawag sa kanya na maging propeta. Habang binabasa mo ang kabanatang ito, ano ang hinangaan mo tungkol sa karanasan ni Isaias? Paano naiimpluwensyahan ng kabanatang ito ang pag-iisip mo tungkol sa Panginoon, sa Kanyang mga propeta, at sa gawain na ipinagagawa sa kanila?

Sa panahon ng ministeryo ni Isaias, ang Israel ay nakipag-alyansa sa Siria upang ipagtanggol ang sarili nito laban sa Asiria. Gusto ng Israel at Siria na pilitin si Ahaz, ang hari ng Juda, na sumama sa kanila. Ngunit nagpropesiya si Isaias na mabibigo ang alyansa at pinayuhan si Ahaz na magtiwala sa Panginoon (Isaias 7:7–9; 8:12–13).

Nang payuhan ni Isaias si Ahaz, nagsabi siya ng ilang kilalang propesiya, tulad ng matatagpuan sa Isaias 7:14; 8:13–14; 9:2, 6–7. Anuman ang kahulugan ng mga propesiyang ito kay Ahaz, malinaw na patungkol ang mga ito kay Jesucristo (tingnan din sa Mateo 1:21–23; 4:16; 21:44; Lucas 1:31–33). Bakit magandang titulo ang “Emmanuel” para sa Tagapagligtas? (tingnan sa Mateo 1:23). Paano Siya naging isang “Tagapayo” o “Prinsipe ng Kapayapaan” sa iyo? (Isaias 9:7). Ano pa ang natutuhan mo tungkol sa Tagapagligtas mula sa mga talatang ito?

• Sa Isaias 1:2–4, ikaw at ang iyong mga anak ay makakahanap ng mga dahilan kung bakit hindi masaya ang Panginoon sa mga tao. Pansinin ang paghahambing sa mga hayop sa talata 3—sino ang ating “panginoon”? Paano natin ipinapakita sa Diyos na kilala natin Siya?

• Para mailarawan sa isipan ang Isaias 1:16–18, maaari kayong maghanap ng mga anak mo ng isang bagay na matingkad na pula at isang bagay na puting-puti. O siguro ay pwede kayong magtulungan sa paglalaba o paghuhugas ng isang bagay. Paano tayo nagiging malinis sa espirituwal? Paano tayo tinutulungan ni Jesus na maging malinis? Ano ang matututuhan natin tungkol sa Tagapagligtas mula sa mga talatang ito? Ibahagi sa iyong mga anak ang nadarama mo tungkol sa Kanya at ang ginawa Niya para sa iyo.

• Nakinita ni Isaias ang panahon na ang templo, “ang bundok ng bahay ng Panginoon,” ay aakit sa mga tao mula sa “lahat ng bansa” (Isaias 2:2). Paano mo matutulungan ang iyong mga anak na maging sabik na pumunta sa bahay ng Panginoon? Maaari mo silang anyayahan na magdrowing ng larawan ng kanilang tahanan. Pagkatapos ay sama-samang basahin ang Isaias 2:2, at anyayahan silang idrowing ang larawan ng “bahay ng Panginoon,” na isang templo. Basahin ang Isaias 2:3 nang sabay-sabay. Sabihin sa kanila na idagdag sa kanilang larawan ang maraming taong nagpupunta sa templo, pati na ang kanilang pamilya.

• Maaari din ninyong sabay-sabay na basahin ang Isaias 2:2–3 at tukuyin ang isang bagay na nagbibigay-inspirasyon sa iyo at sa iyong mga anak na magpunta sa templo. Matapos sabay-sabay na basahin ang Isaias 2:4, maaari ninyong talakayin kung paano nagdadala sa kanila ng kapayapaan ang templo. Isiping kumanta ng isang awit tungkol sa templo, tulad ng “Templo’y Ibig Makita” (Aklat ng mga Awit Pambata, 99). Tulungan ang iyong mga anak na maghanap ng mga salita sa awit na nagtuturo kung ano ang templo at ano ang ginagawa natin doon.

• Para ipakilala ang mga propesiya ni Isaias tungkol kay Cristo, maaari ninyong pag-usapan ng iyong mga anak ang mga titulo ng mga tao, tulad ng pangulo, bishop, o guro. Ano ang sinasabi sa atin ng mga titulong ito tungkol sa mga taong ito? Tulungan ang iyong mga anak na mahanap ang mga titulo ni Jesucristo sa Isaias 7:14 at 9:6–7 (tingnan din sa pahina ng aktibidad sa linggong ito). Ano ang itinuturo ng bawat isa sa mga titulong ito tungkol sa Kanya? Ano pa ang natututuhan natin tungkol kay Jesucristo mula sa mga talatang ito?

• Maaari mo ring ibahagi sa iyong mga anak ang “Ang Propetang si Isaias” (sa Mga Kuwento sa Lumang Tipan, 150–51). Huminto paminsan-minsan para magtanong kung ano ang alam ni Isaias tungkol kay Jesucristo maraming taon na ang nakalipas bago Siya isinilang. Magagamit mo ang Mateo 1:21–23; Lucas 1:31–33 para pag-usapan kung paano natupad ang mga propesiya ni Isaias Isaias 7:14; 9:6–7.

  

  1:18