“EyeKhala 20–26. ‘Amehlo Ethu Akuwe,’: IziKronike II 14–20; 26; 30 Yizani, Nindilandele—EyeKhaya neBandla: ITestamente eNdala 2026 (2026)
“EyeKhala 20–26. ‘Amehlo Ethu Akuwe,’” Yizani, Nindilandele: 2026
King Jehoshaphat’s Prayer [Umthandazo kaKumkani uYehoshofati], nguKeeley Rae
EyeKhala 20–26: “Amehlo Ethu Akuwe”
IziKronike II 14–20; 26; 30
Ubukumkani bakwaYuda babungqongiwe. Imikhosi eyayiphuma kwizizwe ezintathu eziziintshaba ezinamandla zaziqhubela phambili ngaxeshanye, zilungele idabi. Ngeli xesha linzima lesidingo, uYehoshafati, uKumkani wakwaYuda, waguqukela kuKumkani wezulu nomhlaba. UYehoshafati wahlanganisa abantu bakhe etempileni waza wathandaza. Wabuvuma ubuthathaka babo bobuntu waza wababongoza ukuba bakhululwe. Ephendula, iNkosi yathembisa ukhuselo lwaYo: “Musani ukoyika, musani ukuqhiphuka umbilini” (IziKronike II 20:17).
Sisenokungabinawo umkhosi ohlaselayo emnyango wethu osongela ukusitshabalalisa, kodwa ngamanye amaxesha siye sizive singqongwe bubunzima nobubi. Indlela yethu eya ekuhlangulweni iyafana naleyo wayeyifunwa nguYehoshafati, kwaye umthandazo wethu unokufana nowakhe: “Thixo wethu, … asinamandla okumelana nale ngxokolo ininzi isizelayo; thina asazi ukuba sothini na, kodwa amehlo ethu akuwe.” (IziKronike II 20:12).
Kuzo IziKronike II 14–30, uya kufunda ngoYehoshafati nabanye ookumkani kwaYuda. Cinga indlela iinguqu zabo eziqhutywa lukholo, uloyiso, nemicelimngeni ezinokusebenza ngayo kubomi bakho.
Ngesishwankathelo sencwadi yeziKronike II, bona “IziKronike” kwisiKhokelo kwiZibhalo.
Iingcebiso zokufunda eKhaya naseBandleni
IziKronike II 14–16
Ukuthembela kuThixo kuya kundizisela uxolo.
Xa u‑Asa wayengukumkani wakwaYuda, wajamelana nemicelimngeni emininzi—kanye njengokuba kunjalo nakuthi namhlanje. Njengoko ufunda ngezilingo awajamelana nazo, phawula indawo awabeka ithemba lakhe kuyo nendlela oko kwatshintsha ngayo ekuhambeni kwexesha.
|
Isalathiso |
Imicelimngeni awajamelana nayo u‑Asa |
Apho u‑Asa wabeka ithemba lakhe |
|---|---|---|
Isalathiso IziKronike II 14:9–12 | ||
Isalathiso IziKronike II 15:1–8 | ||
Isalathiso IziKronike II 16:1–10 |
Kutheni ngamanye amaxesha siyeka ukuthembela kwiNkosi? Yintoni enye oyifundayo kubomi buka-Asa?
IziKronike II 18
Ndiyakwazi ukuyikhusela inyaniso, nangona ingathandwa.
Umprofeti uMikaya umele ukuba waziva ephantsi kwengcinezelo yokuxela kwangaphambili impumelelo yookumkani uYehoshafati no-Ahabhi kwimfazwe yabo ngokuchasene neSiriya. Khangela ubungqina bolu xinzelelo kuzo IziKronike II 18:1–12. Bubuphi ubungqina obufumanayo benkalipho nengqibelelo kaMikaya kuyo imiqolo 13–27? (Phawula ukuba kuwo umqolo 14, uMikaya unikela impendulo ephoxayo; eyona mpendulo yakhe ukuwo umqolo 16). Azaliseka njani amazwi kaMikaya kuyo imiqolo 28–34?
Ziziphi ezinye iimeko onokujamelana nengcinezelo njengoMikaya? Yintoni ekwenza ube nesibindi sokumela iNkosi neemfundiso zaYo?
Ngemihla kaKumkani uYehoshafati, izizwe ezintathu zahlasela iYerusalem.
IziKronike II 20:1–25
Ngamaxesha anzima, ndiyakwazi ukubhenela kuThixo nakubaprofeti baKhe.
Njengoko ufunda IziKronike II 20: 1–12, khangela into eyenziwa nguKumkani uYehoshafati xa izizwe ezininzi zeza kuhlasela uYuda. Unokuzisebenzisa njani izenzo zakhe kwiimeko ezinzima ojamelana nazo?
Impendulo yeNkosi kumthandazo kaYehoshafati ifumaneka kuyo imiqolo 14–17. Ngawaphi amabinzana owafumana apho anokuthuthuzela wena okanye umntu omaziyo ngamaxesha anzima?
Ngemini elandelayo, abantu baseYerusalem baphuma besiya kuhlangabeza umkhosi ochasene nabo. Njengoko ufunda IziKronike II 20:20, khangela umyalezo uYehoshafati awawudlulisela kubantu baseYerusalem. Azaliseka njani amazwi akhe? (bona imiqolo 22–23). UThixo ukusikelele njani ngokukholelwa kuYe nokulandela abaprofeti baKhe?
UMongameli uRussell M. Nelson wathi: “Amava am kukuba xa uyekile ukubeka amanqaku emibuzo emva kweengxelo zomprofeti kwaye ubeke isikhuzo endaweni yoko, kwaye ukwenze, iintsikelelo ziya kuthululwa. Andizange ndizibuze, ‘Kunini na umprofeti ethetha njengomprofeti kwaye kunini xa engenzi njalo?’ Umdla wam ibikukuba, ‘Ndingafana njani ngakumbi naye?’” (in Lane Johnson, “Russell M. Nelson: A Study in Obedience,” Ensign, EyeThupha. 1982, 24)
bona kananjalo IMfundiso neMinqophiso 21:4–6.
A Secure Anchor
Chonga iingxelo ezilula zenyaniso. Umdala uNeal A. Maxwell wafundisa: “Izibhalo zisinika iidayimani ezininzi zemfundiso. Kwaye xa ukukhanya koMoya kudlala kumacala ayo ahlukeneyo, akhazimla ngengqiqo yesilestiyali kwaye akhanyise indlela esifanele siyilandele” (“According to the Desire of [Our] Hearts,” Ensign, EyeNkanga 1996, 21). Njengokuba ufunda izibhalo, cinga ngokuthatha ixesha lokuchonga, ukuphawula, kwaye ucingisise ngemiyalezo emifutshane kodwa enamandla. Eminye imizekelo ingafumaneka kuzo IziKronike II 14:11; 15:7; 18:13; 20:15; 26:5. Zeziphi ezinye “iidayimani zemfundiso” onokuzifumana?
IziKronike II 26:3–21
Ikratshi likhokelela entshabalalweni.
Njengabanye ookumkani abaninzi bakwaYuda, ulawulo luka-Uziya lwaqalisa ngempumelelo enkulu kodwa lwaphela ngentlekele. Khangela lo mzekeliso kuzo IziKronike II 26. Unokuthi yintoni eyatshintsha ubomi buka-Uziya?
Njengoko ufunda imiqolo 16–23, gcina engqondweni ukuba ngeli xesha, ngababingeleli kuphela ababevunyelwa ukuba batshise isiqhumiso etempileni. Ucinga ukuba kwakutheni ukuze uKumkani u-Uziya angamthobeli uThixo? Ufunda ntoni kula mava abuhlungu?
IziKronike II 30
Mna ndingaba nguye umxolelanisi.
Kuzo IziKronike II 30, uHezekiya wayengukumkani wakwaYuda. Wamema uBukumkani obukhuphisanayo bakwaSirayeli ukuba buhlanganisane eYerusalem ukuze bubhiyozele iPasika—nto leyo amaSirayeli ayengazange akwazi ukuyenza iminyaka emininzi (bona imiqolo 1–12). Yintoni ekuchukumisayo ngesi simemo nendlela esamkelwa ngayo—ngazo zombini iindwendwe ezingamaSirayeli nangabamkeli kwaYuda?
Ekubeni kwakusele kudlule ixesha elide, abanye abantu ababetyelele eYerusalem babengazazi iinkcukacha zendlela ababenokuba nenxaxheba ngayo kwiPasika. Njengoko ufunda IziKronike II 30:18–27, ufunda ntoni kwimpendulo kaHezekiya neziphumo zempendulo yakhe?
Bona kananjalo uRussell M. Nelson, “Abaxolisi Bayafuneka,” Liyahona, UCanzibe 2023, 98–101.
Ngokungakumbi, bona ukhutsho lwale nyanga lweencwadi Liyahona nako Okwenzelwe Ukomeleza uLutsha.
Iingcebiso Zokufundisa Abantwana
IziKronike II 14–16–20
Ndingamthemba uThixo.
-
Ukwazisa imbono yokuthemba iNkosi, ungabonisa abantwana bakho into oyithembileyo ukuba ikugcine womile xa kunetha, njengesambrela okanye ibhatyi. Bavumele bathethe ngokuba kutheni sinokuzithemba ezi zinto. Emva koko bancede bathelekise oko nokuthembela kwethu eNkosini. Kutheni simthemba Yena ukuba asigcine sikhuselekile ngokwasemoyeni?
-
Unokunceda abantwana bakho babone indlela uKumkani u-Asa noKumkani uYehoshafati abasabela ngayo kwimicelimngeni ngokuthembela eNkosini (bona IziKronike II 14:11; 20:3–5, 12). Yabelanani ngeendlela eninokuthi nibonise ngazo iNkosi ukuba niyithembile Yona.
IziKronike II 20:1–29
UThixo uyakuyiva kwaye ayiphendule imithandazo yam.
-
Iphepha lomsebenzi wale veki linokunceda abantwana bakho baqonde ibali lo mthandazo kaYehoshafati nempendulo yeNkosi. Wena nabantwana bakho ninokwabelana ngamaxesha apho uThixo wayivayo kwaye wayiphendula imithandazo yenu. Cinga ukuquka amaxesha apho iimpendulo zifike ngeendlela okanye ngamaxesha obungawalindelanga.
IziKronike II 26:3–23
Ndingathobeka.
-
Ukuze bafunde ngeengozi zekratshi, abantwana bakho banokwakha inqaba ngeebloko okanye iikomityi ezincinci. Njengoko bebeka ibhloko nganye okanye ikomityi nganye kwinqaba, bancede bachonge enye yezinto zika-Uziya aziphumezayo kuzo IziKronike II 26:3–15. Emva kokuba beyigqibile inqaba, xoxa nabantwana bakho ngendlela u-Uziya anokuyigcina ngayo inde kwaye yomelele. Yintoni enokwenza ukuba iwe? Emva koko, njengoko ufunda umqolo 16, usenokuthetha ngokuba kuthetha ukuthini ukuba neentliziyo “eziphakanyiselwe kwintshabalalo [yethu].” Yabelana nabantwana bakho ngokwenzeka ku-Uziya kuyo imiqolo 16–23. Bavumele bayidilize inqaba yabo. Thetha ngezinto esinokuzenza ukuze sihlale sithobekile.
King Hezekiah and the People Thank God [UKumkani uHezekiya naBantu Babulela uThixo], © Lifeway Collection/imvume evela kwi-goodsalt.com
IziKronike II 30
Mna ndingaba nguye umxolelanisi.
-
Umfanekiso ongasentla ubonisa xa uHezekiya wamema abamelwane bakwaYuda ababevela kuBukumkani bakwaSirayeli ukuba baye kubhiyozela iPasika kunye nabo. Ungajonga lo mfanekiso kunye nabantwana bakho kwaye ufunde IziKronike II 30:18–19, ocacisa ukuba ezinye zeendwendwe azizange zizihlambe ngokomthetho kaMoses. Wenza ntoni uHezekiya? Ngaba oku bekuya kuzenza iindwendwe zivakalelwe njani? Nceda abantwana bakho bacinge ngendlela abanokufana ngayo noHezekiya kwindlela abaphatha ngayo abanye.
Ngokungakumbi, bona ukhutsho lwale nyanga lwencwadi Umhlobo.